لـم ننتـه بعـد [ تكـملة ]

زيـف الهــوى أم لعــنة القصــاص _ الفصـل 41_

يــوم_جـديـد_نهـــار_جـديـــد_وأحـداث_جـديــدة 🌞

كانت فاقت على صوتو في الحمام استغلت الفرصة تخرج قبلمـا يشوفها ، شدت تيليفونها وخرجت تجيب حقيبتها ، تفكرت ملابسها في الحمام ينشفو نسفت ماعندهاش ثياب اخرى وماتقدرش تستناه حتى يخرج يشد فيها وهي مش حابة تحكي معاه او تشوفو من اساسو ، قررت تغادر بيها ، شدت لافاليز وكملت للدرجة الثانية وين كانت بلاصتها من قبل ، وقعدت في مكانها من بعد خممت اذا جا يحوس عليها اكيد راح يجي هنا مباشرة ، شافت في بنت قاعدة قريبة ليها ، وتبادلت معاها الاماكن ...

خرج من الحمـام كان سمع حس توقع يلقاها مي غير شاف الحقيبة ماكش عرفها خرجت ، هز راسو وخلاها لوقت ثاني حتى تهدا الامور ، رجع للحمام جبد حوايجها الي كانو ناشفين و خرج طلب مظيفة طلعت عندو وبعثلها حوايجها باش تبدلهم بما انو عارف ماجابتش حوايجها وماعندهاش واش تلبس ...

بعدها رجع بدل حوايجو و جمع اغراضو لانو وقت نزول الطائرة كان قرب بعدها شد تيليفونو فتحو بدل البيس الي تتناسب مع البلد الي راه فيه وعيط لسيفاك مرة ثنين رد عليه بصوت ناعس : اممم
ايـاس : راقد ؟؟
سيفاك : ووي علاش ؟؟
ايـاس : كيفاش علاش ؟؟ واش وصيتك ؟؟
سيفاك : لا تهنى درت واش قلتلي غير تخرج من الطيارة تلقى الصحافيين يستناو ...
ايـاس : صحاا وانت وينك ؟!
سيفـاك : كي تلحق تلقاني عندك ، شديت طيارة ولحقتك
ايـاس : مليح.. حاجة اخرى مانيش حاب صداع الراس مع فاروق .. بدل البيس نتاعك علبالي راح يعيطلك على العرس
سيفاك : بدلتها اصلا غير طلعت في الطيارة
ايــاس : صحيت شريك.. من بعد نحكو ..

قطع عليـه وخبى التيليفون حتى يسمع المظيفة تعلن عن اقتراب وقت الهبوط .. دار يكمل يجمع اغراضو حتى يشوف البروش نتاعها فوق البوفي كانت نساتو ، تبسم بالجنب لقى سبب باش يلحقها مجددا ، شدو وخباه عندو وهو يخمم كيفاش يرجع يشوفها واذا اصلا لازم يرجع يشوفها  ..

#بعــد_لحظــــات⬅️⬅️

حطت الطائرة في المطار وبداو الركـاب يخرجو ، لحق دورها  شدت لافـاليز نتاعها كانت بدلت ثيابها ، خرجت وصلت للبـاب لقات نفس المظيفة عند البـاب وقفتها : مدموزال ال ناصـر لحظة اذا ممكن ..
شافت فيها نهـاد : انعم ..
المظيـفة : انا وطاقم الطائـرة حبينا نعملولك تكريم بسيط بسبب الشي الي درتيه !!
نهــاد : هه بصح انتوما كرمتوني ؟! كانكم بالغتو شوية ؟!

هنا تذكرت البروش وتذكرت كي حطاتو عندو ونساتو مسحت على جبينها باحراج ونسفت : اووف ...

المظيفة : لا مدموزال انتي انقذتي حياة شخصين والشي الي درتيه عظيم و علبالي كرمناك بصح التكريم كان بسيط وانتي تستاهلي اكثر لهذا تفضلي معايا...

اشارتلها بيدها للخارج دورت نهــاد راسها باستغراب بعدها تقدمت وغير خرجت انتبهت للصحافة منتشرة في المكان من بينهم مراسل صحفي خاص بجريدة ايفانت الي مترأسها #كاميـل ،  بجنبهم الناس الكل مجموعين مع خرجت بداو يصفقولها ويصفروا واصحاب الكاميرا يلتقطوا في الصور  ، توردوا خدودها وحست باحراج كبير ، دارت للمظيفة : اووف علاش هذا كـامل  ؟؟