نهار جديد، طاقة جديدة، وخطة جديدة... لو كان جا عندها شي حد غير قبل شهر يقولها نوار، انت غادي تديري هاد الخطط كاملة باش تصيدي عريس غادي تضحك ليه فوجهو وتعلي شفتها العلوية منين تكمل مع تكشيرة طالعة بيها من ساسو حتى لراسو ... عمرها تخايلات ممكن يجي شي نهار تدير فيه هادشي بالحق ما حد الواحد باقي عايش ما يستغربش من شنو ممكن يدير !
فاقت لبسات حوايجها ونزلات تفطر معاهم منها النيت يخرجها ناصر فيديه، تبسم ليها باها ودار ليها بلاصة بجنبه ...
نعمان : عاش من شافك !
جلسات معنقاه وقالت : - توحشتيني ؟
نعمان : بلا قياس .. ولينا نشوفوك غير وقت الماكلة ! اش هادشي ابنتي ! نوار : واش عند بالك غير اجي ولقا الخدمة ..
طول فيها الشوفة وهي تكمل كلامها مفافية خايفاه يعيق بيها حتى هو ... - ولكن اليوم غادية نعاون مجدولين فشي حاجات، انا فاش كانحتاجها كانلقاها، يعني خاص حتى هي فاش تحتاجني تلقاني او لا !
نعمان : وحنا ما نلقاوكش ؟
عنقاتو ثاني وباست يديه : - انا معاك !
ناصر : خاصنا نديرو نهيير نخرجو مجموعين منها نبدلو الجو منها نحلسو مع بعضياتنا! نوار : يا سلام، اش هاد الفكرة الزوينة ! ناصر : بحال مولاها طبعا
ناض واقف وشاف ناحيتها : - تبغي نوصلك ؟
شافت فباباها وحركات راسها شمال ويمين كاتنفي ... - غير سير طريق السلامة، انا نفطر مع باباتي وحتى يتيسر لخدمتو عاد نمشي ... اساسا مجدولين قريبة جوج خطوات نوصل !
ناصر : اللهم يسر !
تحنى باس لباه راسو وليها حتى هي وخرج متيسر لخدمتو مخليهم بجوجهم كايفطرو ويتعاودو بيناتهم، حتى ناض نعمان يتيسر لخدمتو، مخليها جمعات الطبلة فين كلاو، شللات اللواني وهزات صاكادو ديالها خارجة مع الباب !
خمسة ديال الدقايق وهي كاتمشي غير بالهدى عليها، تضحك مع الحيوط، القطوط، الارض، الشجيرات والدراري لي غاديين للمدرسة ! وقفات عند باب دار مجدولين صونات عليهم وتكات على الحيط كاتسناها تفتح ..
سلمات عليها ودخلات كاتقلب على سناء بعينيها !
نوار : سنوءة هاني جيت !
خرجات من الكوزينة فاتحة ليها دراعها باش تعنقها وقالت : - اهلا اهلا ..
عنقاتها وهي مكملة كلامها : - عاش من شافك يا لالا، غبرتي علينا !
شافو فيها نوار ومجدولين جنب بينما هي كملات كلامها : - لهلا يخطي عليا نعيمة، اما نتوما حزامي بيكم عݣادة عولت عليكم بكري تقولو ليا اش كاين ! نوار : كنت غادي نقول ولكن ماشي دابا، خلاوها خوتنا المصريين داري على شمعتك ... سناء : شويني فيك انت وشمعتك !
جراتها من يديها مدخلاها معاها خدات قياسها لي حساتو تبدل، حيت كاتكون جالسة حتى كاتنوض تقاد ليها شي حاجة هي ومجدولين ... وغير سالات جرات عليهم من البيت لي مخصصاه للخدمة وسدات الباب فوجههم !
مجدولين : ايوا ؟ باش نبداو؟ نوار : بلي بغيتي ! مجدولين : نبداو بالصالون نوار : هيا بنا !
جبدات زيف حياتي من الصكادو ديالها حزمات بيه راسها وطلقات الشعبي !
بداو هز وحط معاونين على الثقل وهوما ناشطين، شوية يهضرو، شوية يشطحو شوية يتناقرو وعايشين الحياة ... وحيت معاونين ما حسوش فمرة بالعيا ... دارو بوز تغذاو فيها ورجعو ثاني مكملين حتى بقا ليهم غير بيت مجدولين ويكونو كملو !
نوار : شفت حنا علاين نساليو والسيدة باقي ما شافت ! مجدولين : هههه ياكما تقولبتي ! نوار : جيت فرحانة وغادي نخرج فرحانة اكثر واخا ما تجيش حسيت براسي حطيت هم الجبال وانا كانحك الحيوط !
طولات فيها مجدولين الشوفة وقالت : - اوها ! بدا يدخل معاك مفهوم ربات البيوت للراحة النفسية وهادشي ما كايبشرش بالخير !
ميقات فيها وردات عليها : - انا فرحانة غير حيت عاونتك اديك المفافية !
مجدولين : هم، عليا اناو !
#𝑇𝑜_𝑏𝑒_𝑐𝑜𝑛𝑡𝑖𝑛𝑢𝑒𝑑 اراؤكن
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
