تبسمات ليها وتحنات عليها باست راسها، شافت فمجدولين وخرجات فيها عينيها : - تهزي ياله !
مجدولين : انا واجدة ..
وقفات وهي شادة فنصها باقي كاتضرها بلاصة الطيحة، وكانت معولة على نوار تخليها ترتاح لي بقا على التخميلة ديال الصبح كملاتو ليها الطيحة ودابا عوالة تخرجها حتى طحطها تردها كاتمشي على يديها ورجليها ! سلمات على نعيمة وخرجو، حدها نوار شدات الباب تطلقات كاتنݣر عليها ...
مجدولين : فين غادية بيا ؟ واش ما عزيتش عليك ؟ راني مقصحة ! نوار : ختي واش قالك شي حد طيحي فخويا باش تهربي منو تطيحي فالدروج ؟ لا ايوا صافي الاستعمال على مسؤوليتكم ! مجدولين : والله يا ديك نوار الشمس !
قاطعاتها نوار حيت ما عزيزش عليها اللقب لي عيطات ليها بيه : - لواه بلعمان ..
مجدولين : وقولي فين غاديين ؟ نوار : لداركم، نهزو ديك الخرشاشة ديالك، حيت ما فياش لي يتشمى ومن بعد تمشي توريني فين ساكن حب قلبي !
وقفات مجدولين لوهلة كاتشوف فيها وهي تهز كتافها ثاني وقالت : - كايقولو بلي ما باغيينش يبززو عليا شي حاجة، ولكن منين فاتحين المجال لفتيحة يعني هوما متقبلين فكرة زواجي !
مجدولين : ايوا ؟ نوار : واللهم ناخد لي بغا قلبي ! مجدولين : لي بغاه قلبك؟ غير لبارح شفتيه ! نوار : كافي ! عجبني خَلقا، واكيد ناصر ما غاديش يدخل لدارنا شي حد ما مربيش ولا ما مخلقش ... فيه كاع الصفات
قاطعاتها : - اشمن صفات يهديك الله ! باش عرفتيهم !
نوار : هو صاحب خويا، يعني مفاهم مع خويا، يعني غادي يكون مفاهم معاي ! مجدولين : منطق هارب هذا ! نوار : عجبني، دق ليه قلبي اش ندير ؟ مجدولين : تاخدي وقتك بينما !
قاطعاتها نوار هاد المرة وقالت : - هاء، بينما اش ؟ طلعات ليا الجلسة فدارنا فراسي ! وكل مرة كايجي شي عريس عامر عيوب وماما كاتقول ما فيه ما يتعاب ! كايضرني قلبي وكانحس بحال الى باغيين غير يتفكو، داكشي باش قررت غادي ندي لي بغيت وانا بغيت عدنان، نفكهم ونرتاحو !
سكتات لوهلة كاتشوف فيها، ومنين دوراتها فراسها تنهدات ونطقات : - حسيتك غير كاتخوري فهاد اللقطة، انت عارفة عائلتك كلها كاتحماق عليك وما باغا ليك غير الخير، الموضوع وما فيه هو انت وصلتي للسن ديال الزواج وخاصهم يفتحو الباب علاش لا يجيك شي نصيب كايحمق !
نوار : انا غادة نقلب على نصيبي بيدي ! مجدولين : ولكن انا ادعمك واخا شنو ما بغيتي ديري، تحفري حفرة وتلاحي فيها غادي نتبعك ! نوار : (بسخرية) وناصر ؟ مجدولين : نجروه معانا ..
قهقهات نوار ولوات يديها على مرفقها وجراتها : - زيدي زيدي دوخاتني الشمس !
خداو سيارتها ومشاو بيها حتى لعند باب دارهم، فرانات مجدولين ودارت وشافت فيها ...
مجدولين : هنا فين ساكن مولاي السلطان ! نوار : هنا غادي تكون داري المستقبلية ! مجدولين : لا حول ! نوار : (ميقات فيها) غير الغيرة مهضراك ما نديش عليك !
حنات كاتطلل على الدار وارجاءها ... وهي تنطق مجدولين : - ايوا ! شنو الخطة ؟
نوار : الخطة هو خاصني نخلي الخالة سماح تبغيني ! مجدولين : ومالك غادي تسلكي الطريق الطويلة ؟ نوار : حيت ما عزيزش عليا الحاجة الباردة، وحيت ما باغاش ندير شي بلان يقدر يحط خويا فموقف محرج ! راه عاودت ليك اش قال لبارح ! مجدولين : ولكن راه غير بشوفة منك يقدر عدنان يبدل رأيو، بالحق سماح هيهات، ختنا راه جهنم فوق الارض، شعوانة لاقصى الحدود وكلمتها ما تنزلش للارض ! نوار : نجربو اش خاسرين حنا ! مجدولين : الجهد، الوقت، الطاقة
قاطعاتها بسخرية : - صافي صافي ما سولتكش باش تجاوبيني !
نزلات من الطموبيل ووقفات قدام الدار كاتشوف فيها ولوهلة سهات حتى كايوقف وراها شي حد .
#𝑇𝑜_𝑏𝑒_𝑐𝑜𝑛𝑡𝑖𝑛𝑢𝑒𝑑
اراؤكن - توقعاتكن - حماسكم للماجي من 0 لـ 10 تصبحن على خير
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
