في جُحر الأفعى

الحلقه ١٤

#في جحر الأفعى
#بقلم شمس العراقيه

نمارق

ـ متزوجه !!! رجعت مصدومه يعني كل اللي صار وكع برأسي وأني عشته وعانيت لوحدي والمذنب بكل هالمصايب عايشه حياتها لا وفواكاها متزوجه عجيب الدنيا أبداً مو منصفه الحقير والنذل مرتاح وما راحت الا عليه عايشه بالضيم وعيشتي زقنبوت انوب كملت عليه من صارتلي طفله بهل الوحل والضيم .

" شوي وكبت العيطه بينهم أصواتهم صارت عاليه ومن ضمن أصواتهم عصبية إشهاب طلعت اشوف شكوو واذا يدافع عنها الإ أشرب من دمه، باوعت عليهم مجموعين وحناش ينفض بيده بكل أستهزاء

حناش ـ أي فضننا عاد دومك مخربط وما تعرف الحق وين وبعدين انت شكوو باللي نسوي شو تزوجت والباقي ما الك دخل بي

إشهاب ـ لا اللي دخل ونص كافي عاد حقكم واخذتوا عوفوا بنت الناس بحالها تزوجت الله يسترها ولاتنسون انتوا تعديتوا على كاعهجم واحنه اتفقنا محد يكرب صوب احد يعني اول تالي الحق علينا مو عليهم وابوها مات وبنت عمها منعتوها تروح بيت اهلها على يا حق تحجي عنه ما الكم حق بعد

حناش ـ شنوووووو نسيت دم امجد انهدر بسببها هالعايقه مات بعز شبابه وهي متزوجه وعايشه حياتها وتريد مني اسكتتت واعديهاا

ـ اي اسكت انت كلتها متزوجه شتسوي تأخذها من رجلها

ـ اي اخذها ومن حضن رجلها اذا صحتلي واجيبها مثل الحيوان تغسل رجليه وتخدم الكل شنو ناس وناس واظن فهمت شنو اقصد

ـ مو ؏ كيفك هذا الشيء ما يصير لو ؏لى جثتي والبنت تعوفونها بحالها والا ما يجرالكم خير

ـ خوش لعد دام هيج حرمتك ما طلكها وتبقيها بهل الخرابه وتكون بمكان بنت عمها طلعه من هل الخرايب ماكو بس على الكبر لو هي لو بنت عمها هذا العندي ما عاجبك هسه اخذ حرمتك واربطها بمكان التبن وعلف الحيوانات واعاملها معامله الحيوانات لن لهنا وبس طفح الكيل منك ومن كلامك كلبك على الغرب وع اخوانك مثل الصخر

نمارق ـ ضل ساكت وما حجه شيء عافهم واجه باوعلي وجاوبته ليش دافعت الها ليش متخليهم يجيبوها وتعيش اللي عشته وترجعني بيت اهلي

إشهاب ـ شتحجين أنتِ بابا بنت عمج متزوجه يعني على ذمة رجال السالفه مو لعب جهال واللي صار مقدر ومكتوب مو كيفي ولا كيفج

ـ لا مو ذنبييييي مو ذنبييييي اني مالي دخل باللي صار رجعونييييي بيت ابويه واخذوا حقكم من اللي كتل اخوكم يعني هي الحقيره عايشه حياتها واني مدفونه وعايشه بالضيم عاجبك الوضع عاجبك يعني حتى ما تكدر تطلع من لبيت ولا تكون نفسك وطلعني من الوحل ترى سمعت حناش شنو كالك وكال هالشيء لن انت دافعت عنها وما اعرف هالدافع شنوو سببه يمكن الاخوان الاثنين يحبونها !!!!

ضربنييي كف ودار وجهي

ـ أحجييي عدل لا أكسرج وأنسى اصلج فاهمه