في جُحر الأفعى

الحلقه ١٦

. في جحر الافعى
#بقلم شمس العراقيه

صباح الخير بارت متأخر بس تعويض بارت ونص 🤍

نمارق

ـ بقيت أيام بالغرفه ميخليني أطلع وحاقد عليه وإي كلمه احجيها يردني ما يسكت حسيته تغيير وياريت يتغير ؏ أهله مو بس شاطر عليه .

" تريكوا وضلوا كاعدين يلعبون ابوهم جابلهم إلعاب وفرحانين بيها والمفروض يكونون إطفالي عايشين أحلى عيشه مو باقين بالحصرة ومحرومين من إبسط حقوقهم حالهم حال جهال عمامهم اللي العابهم عباره عن طين وسخ وبالشموس أربع وعشرين ساعه اني ما اخليهم يطلعون طول الوقت بغرفتهم وحتى لو طلعوا محد يريدهم ويكتلونهم امهاتهم زرعت الحقد بقلوبهم عليهم

بوستهم وطلعت وغلا ضلت تباوعلي وتبتسم بيدي صينية الاكل مالتنا غسلتها وخليتهن بالشمس على القريوله واجت رحمه بيدها مكناسه خلتها كدامي وكالت

رحمه ـ وصوني ابلغچ تكنسين مكان الغنم وهاي المكناسه

نمارق ـ ما كانسه بحياتي كلها ولا اعرف الزم مكانسة أيد انوب انظف مكان الغنم شنو هالظلم

ـ والله اني ما عليه منج الهن هنا كالن كوليلها كيفج بعد روحي عليهن وحاجيهن

ـ ماشي راحت واجت وديان اني ما اعرف اشتغل الشغل كلفتوني بي عادي اغسل المواعين كلها بس هيج شغل ما ادبره

ـ صايره فقيره ما عرفتج لازم ضرب اشهاب معقلج

ـ ميخصج شعليج أنتِ خليج بنفسج وبس

ـ خوش وهاا على الشغل ترى الحلال رجلج عنده بيهن يعني لازم أنتِ تنظفين مكانه شطلعت هاي هم ما ادبرينها امشي اثنينا نشتغل باوعي وتعلمي ما ينراد الها تعلوم

ـ مشيت وراها وكامت تنكس وتنظف واباوع الها لعبان نفس نزلت دموعي بقهر شوكت اخلص من هالعيشه السم

" ما خلصنا الا معدتي كلبت تمنيت الموت بلحظتها حياتهم شكثر اكول عنها صعبه احس ما كفيت بالشرح ما ينبلعون ولا يتقبلون لا هما ولا شغلهم ولا عيشتهم ولا الواقع اللي نفرض عليه اتعايش وياه غصب عني لازم اصبر وأتحمل ماكو حل ثاني،  طلعت وياها ورى البيت ذبينا الوسخ باوعت ساحه جبيره تاخذني على كيعان زرع  وبساتين صرت اباوع منا ومنا ادور شارع اشوف سياره

وديان ـ خيرج تعاينن من كل صوب ششمضيعه

نمارق ـ مضيعه حريتي سلبتوها مني اخذتوا كلشي املكه

ـ احنه شعلينا بنت عمج وسوالفها هنا العمن عليج وكعتي بيها ومصيرج وحياتج ومماتج صار هنا

ـ مشت وصحت وراها وديان اريد اسألج منين ترحون طريق الولايه هم بعيد منا

ـ خيررررر تردين تشردين مو