في جُحر الأفعى

الحلقه ١٥

#في جحر الأفعى
#بقلم شمس العراقيه

صباح الخيرات بارت مطول عباره عن بارت ونص عدل
شاركوني ارائكم حول الروايه وتعليقاتكم الحلوة 🤍👍🏻

نمارق

ـ تعلعلت خلال الأشهر المرت فصل الصيف والجو حار ومنا حامل بشهري ومنا شغل يكسر الضهر ومنا بنتي غلا كبرت وتريد أهتمام وتربيه وكعت برأسي مسؤوليات أكبر مني صرت أم بوكت المفروض أعيش اجمل أيام حياتي بوسط كتبي دراستي ومستقبلي الما شفت منه شيء تدمرت دمار نفسياً وجسـدياً   .

" من الظهر عندي ولاده والوب الوجع ياكل بيه رحت الها كالت بعدچ لليل يلة تولدين رجعناا كبل سبحت وتمددت بالغرفه ودخلت سعاد كعدت تحضر ملابس اليه ولطفل أشهاب أنطاها فلوس وخطيه ما قصرت جهزتلي من كلشي

" خلال هل الفترة كلها ما وصلت دكتوره ولا فحوصات ولا شيء وكلهن هيج يحملن ويولدن معتمدات على الجده مره بالعرب تولدهن ما اعرف شلون متعايشات ويه الوضع ومتقبلات كلشي الا أني مستحيل أكدر اتقبل عيشتهم

سعاد ـ جهزتلچ كل أحتياجاتچ وملابس الطفل راح اخليها كدام عينچ مو تروحين وتنسينها ويصير وياچ مثل هذيچ المره بولادة غلا

نمارق ـ هزيت رأسي وطلعت صحت وراها سعاد أمانه غلا ديربالچ عليها ما اوصيج بيها

ـ صدك جذب يمعوده بعيوني مخليتها ولا يضل بالج هي متعلقه بإيه ما تحس بغيابج تولدين وتردين بالسلامه
يلة حبيبه أخليج اخاف يردوني تعرفين الكل ناشبلي على كعدتي يمچ

ـ روحي معذوره وأنتِ هم ما قصرتي ما اعرف شلون أشكرچ لما أنتِ ما جنت اعرف شسوي وشلون اربي غلا أنتِ ساعدتني بتربيتها وأفضالج عليه هواي  . 

ـ يمعوده تدللي مو لخاطر عيونج السود لخاطر إشهاب لا اجذب اتشاقه وياچ يله من رخصتج انتبهي ؏ نفسج وأشهاب يمج حواليج كاعد برى بس يشد عليج الوجع عيطي خبصي خلي ما يعرف رأسه من رجليه ههــهه

ـ ماشي عيني  ، راحت وبقيت لوحدي ومتوجعه وكلبي وبالي يم بنتي غلا الوب والوجع يروح ويجي اجه ضل واكف ويباوعلي

إشهاب ـ هاا عيني أخذچ الها مبين عليج حيل تعبتي

نمارق ـ اي والله تعبت كله من وراك كلتلك ما اريد طفل

ـ هذا رزق ياعيني وبعد صار يلة شدي حيلچ أنتِ سباعيه اوكفي لاتكومين اني اساعدج

ـ تقرب ساندني وصلني السياره وجابلي الجنطه مالت الملابس خلاها وشغل السياره وطلعنا للجده يمشي على كيف يخاف عليه من الطصات وكل شوي يباوعلي ما شال عينه عني لحدما وصلنا وأنعصر كلبي وتذكرت ولادتي بغلا شصار بيه وشنو عانيت لوحدي والوجع المر عليه

" دخلني يمها وطلعت خطية أستقبلتنا وهو بعد ما شفته ضل برى ينتظرني فحصتني وكالت

ـ طفلج داحم عندج ولاده يمه ارتاحي هسه اجيج شدة وتزول يمه كولي يالله