في جُحر الأفعى

الحلقه ١٨

#في جحر الافعى
#بقلم شمس العراقيه

نمارق

ـ مرت علينا فتره كلش صعبه وما أتمناها للعدو والخوف صار مرافقنا الشخصي وإضافه علــــىٰ قلق وهم وتفكير بالمستقبل ومصيري ومصير أطفالي وأكبر من هذا كله مصير ابوهم اللي من يوم اجه هو على حالته لا يحجي لا يشارك بس ساكت وصافن هادئ بشكل يقتل وهذا هدوءهُ ما أحبه سبببلي عقده نفسييه  .

" كملت الغده طبخت تمن وسويت تبسي نصيت نار التمن علمود يتهدر على راحته والجهال كبالي يلعبون بالحوش وقهروني من اجو وكالولي يردون يطلعون برى ومن حقهم هالشيء يشوفون الدنيا ويلعبون ويه الجهال اللي بعمرهم ويعوضون الأيام العاشوها بسجن حالهم اتعس من حالي
بس هو رفض رفض قطعي وقفل الباب بالمفتاح ومنعهم

أشهاب ـ لعبوا بالحديقه وسگتوا اكو ألعاب لعبوا بيها يا بابا لعد المن مشتريها وبعدين برة جهال ما نعرفهم يلة لعبوا بينكم  .

نمارق ـ عبرني ومشه للصاله ولحكته وكفت باب المطبخ
رفع عينه باوعلي ورجع لصفناته

أشهاب ـ شعندج واكفه فوك رأسسي مثل الشرطي

ـ أريد أحجي وياك بس أخاف تعصب

ـ أحجي شعندج

ـ الى متى نبقى هيج

ـ لما الله يفرجها علينا وبعدين شبيها كعدتنا كاعدين والله ساتر علينا شتردين أكثر من هيج بس كاتلج القهر لن كاعد ومكابلچ

ـ مو قصدي هيج اقصد نبقى عايشيين هيج بخوف ورعب واحنه مطلوبين لأخوك حناش ما ندري يا ساعه يلكينه وفوك القهر هذا كله الجهال شُـنو ذنبهم يعني كان لازم تفكر بيهم قبل ما تخطي هيج خطوه

ـ ترى ما يحتاج تذكريني بدم إبويه وأعرف دمه بركبتي وأني قتلته لا كل ساعه واكفتلي فوك رأسي وتشمرين بكلامچ  .

ـ ليش ما تسلم نفسك وتخلص احسن ما حناش يلكاك ويكتلك ونرجع للمربع الاول لن الوضع هيج يصير فلت وكلمن اله، باوعلي بحقد وتأفف

ـ أسلم نفسسي وأنتِ وين تولين والجهال شلون لو بس تفكرين بروحج وحلج المناسب أهلي وأهلي

ـ ماكو حل ثاني

ـ يا حرمه ليش ما جايي تفهميني أني ما جتلته عامد متعمد شنو من گلب گلبي اجتلته برود دم هيج أني ابن عاق وأسوي اللي أسوي وضام رأسي وكاعد ومكابلچ يعني عبالج منتعش ومريش من سويت هيج  .

" أنتِ عمرج  ما تفكرين بعقل تفكيرج سطحي ومبني على حسابج وبس أنتِ وبس ما تفكرين لا بيه ولا بجهالج

ـ هذا الطلع وياك فوك ما أفكر وادور حل يخلصنا من هالخوف العايشيين بي ترجع عليه وما أفكر الا بنفسي

ـ دخيلچ ودخيل تفكيرچ أنتِ لاتفكرين عوفي كلشي عليه ولو أنتِ تسمعين من احد لو تاخذين حجاية احد اللي برأسج تسوينه لما طولت لسانج ما وصلنا لهل المواصيل..