جا صباح جديد كيف العادة فاتي كتفيق كتدوش وكتخرج تفطر مع الكروب كتدرب هي وايوب وبعض المرات كيدخل معاهم حتى الياس... رضوان جالس في الجردة ديالو في الفيلا كيتمنى نبيل وعبد الرزاق يوصلو، تحل الگاراج ديال الفيلا دخلات الطوموبيل فاخرة بورش كحلا. نزلو منها جوج من القدام ووراهم نبيل وعبد الرزاق سلم عليهم وجلسو معاه في الطبلة.
رضوان: احم المهم غاندخل معاهم في الموضوع نيشان كيف ماكتشوفو هاهي الأمانة قدامكم كولشي محسوب تأكدو لابغيتو
رضوان كلم واحد من رجالو حل لا فاليز وراهم الفلوس عاد عبد الرزاق تقاد في الجلسة وعطاه اهتمام هضر بجدية
عبد الرزاق :شنو المطلوب منا؟
رضوان: الفينال في مراكش نبيل غادي غير توجد راسك للسباق اما عبد الرزاق خدم ليا شي بلان في الطوموبيل ديال إلياس... احم وكيف كنعرف انت وخوك كطيرو في هدشي.
عبدو : اه اه كون هاني صافي هدشي لي كين؟؟
رضوان : اهاه والفلوس من دابا ديالكم المهم نهار السباق نهار تنفد ليا البلان والى حاول شي واحد فيكم يهرب بالفلوس غانمحيه اوك؟ غادي تلعب في الباراميطر ديال الطوموبيل الياس مستحيل يربح داك السباق خاصكم تديرو المستحيل باش تخلي الطوموبيل تقلب وتخرج على الطريق وبلاما يعيق بيك شي واحد ومنبغي حتى خطأ. عبد الرزاق بدا كيضحك وكيشوف في نبيل
عبد الرزاق : ههه صافي هدشي لي كين دوك الفلوس كاملة غير على هدشي هههه؟؟
نبيل : احم كون هاني ماغاديش نحاولو نلعبو مع واحد عندو نفوذ وسلطة والفلوس.
عبدو بدا غير كيضور في عينيه وكيهضر في خاطرو
عبد الرزاق: منيتو هاد زبي كيحساب ليه غايخلعني بديك جوج دراهم لي في جيبو عندو السلطة اه يعاودها لكرو مكنخافش انا يمشي يتحوا
عبدو : هههه واخا اسي رضوان غير هني بالك
رضوان مد لنبيل لفاليز ديالو
رضوان : وهادي على قبل السباق يلاه ...
سالاو الهضرة وناضو جمعو الوقفة وكل واحد مشا في بغا
~~~~~~~~~~~~~
من بعد يوماين ديال تدريب الياس لفاتي وايوب واستعداد الفريق للسباق النهائي ، واخيرا جا النهار لي كولشي كيتسناه وبالخصوص رضوان لي مخطط وضابط الامور. كولشي فايق مع الستة دصباح موجد راسو كيلبسو ويتقادو باش يشدو الطريق ، الدراري نازلين لتحت كيتسناو البنات ينزلو وهوما خاصهم ساعة ديال الشعر وساعتين ماكياج وساعة لبس.
كانت هبة الوحيدة لي ماغاديش تمشي معاهم واقفة كتشوف فيهم زربانين وكيلبسو وهي مكرهاتش تمشي معاهم ولكن للضرورة احكام ماغاديش تقدر تكون مع ايوب في اهم نهار في حياتو وفي نهار صحبتها لي كتعتابرها الأخت ديالها،
ودعات كولشي وبقا ليها غير ايوب وفاتي مشات عند فاتي عينيها مدمعين وفاتي حتى هي ماساخياش بصحبتها، عنقو بعضياتهم هبة كتمنى الخير والحظ الموفق لصحبتها
هبة : شوفي نرجع نبغي نلقاك ربحتي وديتي الكاس ولا نغضب عليك هههه
فاتي كتعنق فيها وحتى هي متفهمة ضروفها واخا تقلقات شوية حيت ماغاتمشيش معاهم ولكن عاذراها.
مشاو كل واحد ركب في طوموبيل الياس وفاتي بزوج وفي الطوموبيل الثانية كينين سمير وحسان ، أنا أيوب جراتو هبة باش يتوادعو وتمشي في طوموبيلتها وهو يركب مع الياس وفاتي. هبة شدات في يديه وهو كيبتسم ليها غير من فوق خاطرو باش ماتمشيش كاعية وصافي اما هو من لداخل ديالو بقا فيه الحال بزاف علاش في اهم نهار في حياتو ماغاتكونش معاه البنت لي كيبغيها ايوب كيهضر وكيشوف في عينيها وكيقيس ليها يديها هو من النوع لي مايبينش ليك الى كان كيحس بشي حاجة ماهياش الى مهضرش وقالك شنو كين والله لا عرفتي.
أيوب : شوفي ردي البال لراسك ومتهضري مع حد ولي بغا يتبسل عليك غير عيطي ليا والله نخلي كولشي ونمشي نهرس لحبو العظام
هبة هارفاه يديرها ويقد بيها بدات كتضحك على هاد الافكار لي كيفكر فيهم واش هي غادا تقابل مها لي مريضة ولا تخرج يشوفها شي حد
هبة : متخافش انا غير الدار متنساش تعيط ليا فاش تبغي تبدا السباق ورد البال معاك لفاطمة الزهراء راه غير هبيلة قول لإلياس يتهلا ليا في صحبتي مايقلقها ما يعصبها ليا ولا نجي ليه هههه
أيوب كتحمقو فاش كتبدا تدافع هاكا كتجيه حنينة وطيبة وقلبها بيض جرها عنقهاا عندو خشاها في صدرو وحتى هي بادلاتو العناق وبقات كتبتاسم ليه مبغاتش تمشي مقلقة وحتى هو يمشي كاعي .
هبة : اييه صافي صافي راه من قبيلة كيتسناو فيك غادي تعطل
ايوب : هاهو غادي... خلي تيليفونك حداك احبيبتي
هبة : امم يلاه رد البال لراسك
ايوب : كنبغيك الهبيلة ديالي
هبة : حتى انا... الكأس الكأس هههه... عندك تنسى ههه
هبة ركبات في طوموبيلتها ومشات وهو ركب حدا الياس وفاتي لور كتضحك عليه غير مشات السيد التعابير ديال وجهو تغيرو وتقلبو بحال الجو لي كيكون باين ليك صافي شوية تغمم بحال هاكاك طرا ليه
فاتي : ماغاديش تطول بزاف راه عندها قرايتها هنا ...
ايوب تلفت فيها وابتاسم والياس ديمارا الطوموبيل ومشاو كل واحد وشنو دار شي تيسمع للموسيقى شي كيتصور ويتبوزا شي كيتمنظر في الطريق شي شاد النميمة شي كيخطط ويفصل...
~~~~~
ولصو للفيلا ديال البوص ودابا اجيو ناخدكم تديرو دورة خفيفة، الدخلة هي الإنطباع اللول على البلاصة كاملة وباينة الأناقة المتناهية بهاد الباب الخشبي لي كيتحل في اتجاه واحد واحد الجردة كاملة خضرة ونقية وبيسين من الجنب وفي القدام كتمشي مع الدروج لي بالرخام ولي كيديوك للباب ديال الزاج كتحلو كتلقى الصالون ومتنساوش الإضاءة لي مزينة السقف والجناب ديال الدار دخلو جارين ليفاليز ديالهم كولشي حال فمو عجباتو الدخلة وحمقهم الصالون عكس الياس لي كيجي هنا بعض المرات يعني تاحاجة ماجديدة عليه... فوتايات في القهوي وديكور سامبل... تلاحو الدراري كلهم عيانين كيستاراحو سكينة بقات كتشوف في اللوحات لي معلقين في الحيوط والديكورات كولشي كيحمق...
حسان : واااه متقولش ليا غانبقاو هنا حتى يسالي السباق... ناري ناري هدشي خطير الساط
سمير : الفلوس الفلوس اصحبي ناري تگهمت شبعت اصحبي
سكينة : متنساوش علاش جينا هنا ماجيناش عطلة جينا نربحو فهمتو
فاتي خلاتهم ومشات لواحد البيت كتحل لفاليز ديالها باغا غير تدوش وتنعس عيانة وباغا تفيق غدا تكون اونفورم، البيت كان أنيق بزاف فيه نموسية كبيرة وبارلكو كيطل على البيسين والجردة ...
دخلات كتدوش وهي غارقة في التفكير عقلها مكينش كتفكر شنو غادير وكيفاش غاتفوت انبيل وخايفة الى خسرات ... ماخايفاش على الياس تايقة فيه وعارفاه ذكي وموهووب واي حاجة دارها في بالو كيوصل ليها واخا هذاك نبيل كيبان غدار وخفيف .
دخل الياس لقاها يلاه خارجة لاوية عليها الفوطة هي غير شافتو ولات حمرة ومزنگة جاتها الدوخة الياس بدا كيكحب كان داخل غير يهضرو صدق داخل عليها بفوطة ، بدا كيضحك وكيكحب حشم مسكين اول مرة يشوفها هاكا... غمض عينيه كيضحك عليها
الياس : والله ماشفت والله حق الرب العالي ماشفت شي حاجة... هههه واصلن ياك نتي ديالي...
فاتي : اليااااااس... عندااااك عنداااااك تحل عينيك والله تانشير عليه بهاد الحوايج
فاتي عطاتو بالضهر وهربات للدوش وسداتو كتنهج حمرة الياس جلس فوق النموسية وسرح يديه فوقها وبقا كيتسناها تخرج يشوف ردة فعلها فاش تشوفو جالس ومامشاش ...
فاتي لبسات بودي وسروال وخرجات كتنشف شعرها بفوطة... تفتات بان ليها جالس فوق النموسية ولايح يديه
فاتي : تئ ولايني حريرة معاك
الياس : اجي نقولك...
فاتي شافت فيه نص شوفة زعمة اشنو كيققصد هذا اشباغي يدير ياكما شاف الفوطة واللحم وسخن عليه مخو والله تانغوت ليه ، فاتي مشات عندو كتبحلق في عويناتها باغا تعرف اشباغيها وهي عيانة باغا غاتلاح تشخر، وقفات قدامو كتشوفيه غير كتشوفو كيشوف فيها هاكا كذوب كتعرف راسها خاصها تهرب ولا ليوم تسخن القضية اخر مرة بزز باش طلقها ...
الياس كيشوف قدامو هاد الكتكوتة ديالو صغيورة وملاميحها كيبانو صغيورين بحال شي بنيتة مع دابا لامكياج لا شفار لاوالو كتبان طبيعية وشعرها الفازگ كيقطر جرها حتى قربات عندو وجلسها فوق رجليه وبدا كينشف ليها شعرها بالفوطة وهي غير ساكتة وكتبتاسم وكتفكر كيفاش تهرب سالمة منو... الياس كينشف وكيشم ريحة باندوش ريحة الفانيلا قريب يتسطى حط الفوطة وهبط عنقو كيشم وهي حسات بنفسو سخونة على عنقها عضات شفايفها بإثارة باغا تنوض ولكن ماساخياش بيه مكرهاتش تكون بين ذراعو دائما...
الياس دايخ بيها والريحة زادت دوخاتو دورها عندو حط يديه ضهرها وجرها ، باس عنقها، فاتي حطات يديها على كتفو وقربات نيفها وفمها وباستو وهو بهاد الفعلة لي دارت زادت شعلاتو، كيبوس وكيعض شفايفها حتى كيعرف راسو راه عيق وكيمشي يدخل لسانو في فمها وكيخليها تحس باللذة والحلاوة ... منغامسين في لجو ديالهم حتى تحل الباب على غفلة قفزو من بلاصتهم كل واحد تلاح في قنت فاتي خشات وجهها في الحيط وهو خنزر في أيوب لي دخل بعجاجتو بلاما يدق الباب ، الياس كيطلع فيه ويهبط مكرهش ينوض يجمع مو بشي نص
أيوب كيضحك وحاط يديه على عينيه دار هاكا اكسبري باش يزيد يحرج فاتي
أيوب : هههه سمحلوليا سمحلوليا جيت نقوليكم غير لبوص عيط ليكم راه كين التحت
الياس كيلعن فيه في الداخل ديالو ملقى هاد البوص امتى يجي غير تاتنفخ ليه الشورط
الياس : صافي قود انا نازل عندو
ايوب شاف في فاطمة الزهراء لقاها مزال خاشية وجهها في الحيط بغا يشد فيها شوية
أيوب : ختي فاطمة الزهراء ...
فاتي تلفتات فيه حمرة وكتنهج صافي معندهاش الوجه تعاود تشوف في أيوب مرة اخرى
أيوب : شوفي متحشميش غير الحب هههههه
فاتي حلات عينيها فيه وبدات كتويل في خاطرها هذا اشكيقول ،الياس ناض ليه وأيوب سد الباب ونزل التحت كيضحك في خاطرو تفكر هبة خاصو يعيط يسول واش وصلات
فاتي : انت لي باسل شوف ماهو شافنا دابا
الياس : وهو لاش داخل علينا مكيعرفوش الخصوصية ولا شنو
فاتي شافت فيه والله مكيحشم الباسل لاخر
ايوب خرج للجردة التحت كيعيط لهبة التليفون كيصوني وهي مكتجاوبش بدا كيتخلع عليها ياكما وقعات ليها شي حاجة في الطريق وموصيبة دابا
هبة كتعاون مها في طويان الحوايج في الكوزينة ولايحة التليفون في بيت النعاس
حليمة : غير خلي ابنتي يلاه جيتي سيري رتاحي شوية
هبة الله : لا لا اماما راه نتي لي عيانة خاصكي ترتاحي واش مسمعتيش الطبيبة قالت ليك نقصي الملح ونتي مكتسمعيش واش باغا تلاحي كاو تخلينا
هبة كانت هاضرة حتى دخل باها هاز الصلاية وباينة فيه غادي للجامع
عبد العزيز : ويااه ابنتي هضري معاها نتي انا راه رفعت يدي عرفتي اشكدير للملح حتى ديناها للطبيبة وقالت ليها القلب عندك منفوخ بزاف خاصها تنقص الملح البارح ابنتي تاكل دكشي المقلي وكتغطسو في الملح وتاكل وتقول ماكلتش وفاش تسالي كتبدا تسوط وتقولك ناري معرفت مالي عييت ابنتي انا
هبة : وعلاش ابابا معيطتوش ليا نهضر معاها حتال دابا
عبد العزيز : وااابنتي الله يهديك راه كتقوليا خلي البنت تقرا بلاما تشطنها وكتبدا تغوت حدا راسي متخلينيش نعيط ليك
هبة شافت في مها لقاتهاا كتشوف بنص عين وكتغمز لعبد العزيز
حليمة : اششش اششش ويلي ويلي كبرتي الموضوع
هبة شدات في يدين ماماها وهضرات
هبة : شوفي فيا وسمعيني علاش كتفضلي الماكلة على صحتك واش ماعارفاش شحال الصحة مهمة اه كينة موت وحدة واش بغيتي تعافي وتولي صحتك بيخير ولا تبقاي ديما تشدك الدوخة وتسخفي وتعرقي وتنهجي حتى الله يستر توقع ليك شي حاجة وقلبك يوقف واش مكتفكريش فينا ماعارفاش شحال بابا غايمرض من وراك شكون غادي يرد ليه البال بحالك شكون غادي يبقى معايا وينصحني ويوجهني ويكون معايا ويحن فيا نتي راه اعز ما عندي اماما منقدرش نصبر الى وقعات ليك شي حاجة حتى واحد فينا ماغادي يصبر يشوفك ناعسة في السبيطارات تهلاي في صحتك راه هي اهم حاجة وتهلاي في راسك حتى حاجة ماتستاهل تهملي عليها صحتك . هبة عينيها دمعو وعنقات ماماها حليمة عارفاها حنينة وعلى سبة مكتبغييش تشوف المرض والكآبة عندهم في الدار .
بقات مع ماماها حتى نعسات ومشات كتوجد العشا ... حتى تفكرات فاتي وايوب والدراري واش وصلو غدا في الصباح عندهم المسابقة كتطلب الله ياربي يدوز كولشي مزيان كملات التوجاد ردات الطجين فوق البوطة ومشات لبيتها لقات الفاليز مليوحة في حطاتها فين بقات جبدات التليفون لقات ايوب معيط شحال من مرة وفاتي معيطة لقات ميساجات بزاف من عند ايوب...
_ وصلتي احبيبتي؟ _
_جاوبي كنصوني ليك مالكي احبي؟ _
_هبة راه خلعتيني _
_هبة ياكما وقعات لك شي حاجة خايبة؟_
_جاوبي الله يخليك؟ _
عاودات عيطات ليه ايوب كان جالس مع الدراري كيناقشو ويهضرو على غدا وكيفاش غايدوز دكشي غير شاف الابيل ديالها رتاح وعرف راه غاتكون غير تشغلات مع دارهم ناض من حداهم ومشا لواحد البيت
ايوب : حبيبتي؟؟؟
هبة : فين توحشتك الكبيدة
ايوب : عارفك كتبردي فيا دابا...خلعتيني عليك ياك قلت لك خلي التليفون حداك
هبة بتاسمت وعجبها الحال كيفاش كيتخلع عليها، ويهتم بيها
هبة : كنت مع ماما
ايوب : ياك كولشي بيخير ياكما خاصك شي حاجة نسيفطها ليك؟
هبة : لهلا يخطيك عليا احبيبي... انا غير مع الدار متخاف والو
ايوب تنهد وخربق شعرو بيديه كيكره البعد والمسافات مكيحملش العلاقة البعيدة ولكن معندو مايدير
ايوب : امتى غاتجي راه توحشتك
هبة بدات كتضحك عليه يلاه مشاات تفارقت معاه غير الصباح وهو كيقوليها امتى غاترجعي
هبة : دابا خاصني نبقى شحال على الاقل شهر
غادي نكمل القرايا على بعد
ايوب : هههه تيكيفاش شهر ههههه ولاهيلا عندك شي نكات خطيرين احبي
هبة : متقلقش مني أايوب عارفاك موحشني وباغي تشوفني معاك كل نهار ولكن بلاما نبقى نشرح لك راه، عارف علاش انا جيت
ايوب : صافي انا بعد غدا نكمل السباق وتلقايني عندك... اما باش تقولي ليا شهر بلا بيك نتي راه مزنزنة في راسك بربي تابعد غدا انا عندك متقولي ليا لا ها لا ها
هبة تنهدات وخلاتو يدير لي عجبو
هبة : اييه اييه صافي صافي لي عجبك ديرو المهم حبي كيعيطو ليا دابا خاصني نمشي
ايوب : تهلاي في راسك الحبيبة ديالي... كنموت عليك.
~~~~~~~~~~~~~~
YOU ARE READING
لعبة الخارجون عن القانون 🇲🇦🏎❤
Lãng mạnهلوووو هلوووو مرحبا بيكم في قصة جديدة هاد المرة كين غير السرعة وعان عااااان عاااااااااااااااااان🥱🏎❤
