وَبشّر الصَابرين

تكملت الجزء ثالث .

ناضت من عالم الاحلام للواقع وهي مفجوعه وكأنها مزالت الدور بعيونها علي نفس الشخص .. شوي شوي بدت تستجوب مع الوقع مسحت بيدها علي وجها ورفعت عيونها لساعه لقتها واحد ليل انقلبت ع يمينها وقرت المعوذات نين نزل عليها النوم ورقدت .
✨✨✨✨
ثاني يوم الساعه 1 ضهرآ .
"والله ماعندي تلفون الله نحلفلك يماما عاد "
منيه بصوت عالي:وميه نشالله مالا منين بتعرف البنت حوشك
نسرين عيونها دمعن وغصتها العبره وهي تحكي بصوت هادي يدوب طالع منها:م كانت تروح معايا زمان اكيده جايا تسال عليا يماما
منيه :مدخلنيش بيك نا خلي خوتك يروحو ويصرفو معاك
نسرين غلبنها دموعها وهي عارفة شن حيصير بعد يروحو خوتها ولي وجعتها اكثر انه ضلم ..
نسرين
نا موليد 2005 لبنت لوحيده لهلي بابا الله يرحمه اكثر واحد كان حنين عليا ، عندي ثلاث خوت حفتر و اشرف واحمد الثلاثه مجوزين ماما متحبش خلفت البنات الانها مفش منها فايده غير العار بنسبه لها .. بعد م توفى بابا بشهرين وقفوني من المدرسه ..
ماما مكانش عندها اعتراض ابدآ وتوا بنات خوتي يقرن جامعه وثانوي واعدادي ويلبسن ويصحبن وعندهن تلفونات وعيشات حياتهن اهه الله يرحمك ي بابا ..
✨✨
"وكم من بنت عايشات نفس المعانه في وقتنا هذا ..
في الي خوتهم نعمه وفي لي نقمه ..
في لي امهاتهم حنينات وفي لي لا وكذلك العكس في الابهات ..
مش كل اب يتساهل الكلمه ولا الام برضو ..
" رفقآ بـِ القوارير , وصية رسول كريم "
لم يصتوصو بينا خيرآ ي رسول الله ؟
✨✨✨✨✨
مقعمزه علي سريرها مطلعه كُتب قديمه عندها من ورا هلها تكتب فيهن فذكريات تقلب في صفاحي وتذكر لعند مطبت في صفحه حرقت قلبها ..
" 7 مارس 2019 ..
ذكرا وفات بابا الاوله .. الله يرحمك ي حبيبي انا عارفة انك مش ح تقرا كلامي بس نحاول نفضض زي مكنت نفضفضلك زمان وتسمعلي .. توا نا مش لقيا حد يسمعني .. بابا من بعدك معش في شي حلو فحياتي ..
صح نا خشيت ثالثه عدادي سنه لكنت خايفه منها
بس مقريتهاش ي بابا .. وقفوني عشان خايفين نحشمهم .. والله ريفت عليك وعلي ايامك ريفت ع حضنك لكان يهون عليا فدنيا كلها .. تعرف ي بابا من بعد وفاتك معش شفت الشارع الا مروشن وبسرقه ..
وينك تجي دافع عليا وتقول بنتي محد يدخل فيها نانسي بنيتي انا مسؤل عليها وينك تجي تفرح بنجاحي وذكرا ميلادي وينك تجي طلعني وتهدرز معايا ربي يرحمك يحبيبي زي مكنت رحمني وربي يصبرني علي فراقك يعيون بنيتك"
بللت الورقه بدموعها تبكي والعبره تلاحق حست روحها نخنقت صبت عند روشن فتحته شوي وشمت شوي هواء وهي مغمضه عيونها وتذكر فذكريات كلها حلوهه واهه ع ذكريات الحلوه يوجعن اكثر م ذكريات الشينه ..
✨✨✨✨
"نحجتتتتت ويووو "
اسلام:تكنك ي سكانه ع صبح
رهف بحماس:نحجت ي سلومتي نجحتت
اسلام ابتسم:طبيعي ي حوبي انتي امتا سقطي اصلا
رهف:ضروري ملخوف وهكي .. حول نعدي نبشر بابا
طلعت للمربوعه وجت لباتها وقالت..بابا نجحت ي بابا
حسين ضحكه بفرح ضحكه طويله :مُبارك يبنتي مُبارك
رهف حضناته:هي الحلوان ي حسونه
حسين ضحك اخرهه:واحلا حلوان ي لفوط
رهف ضحكت بفرحه هذا وين تريحت وزيها هناء طبعآ
"اجواء"
زهرة وهي حضنتها:نجي بنيتها شاطرهه يربي
هناء:هي نخشو ع ثالثه بقلب قوي
خدوج:مبارك ي صقر
هناء:يبارك فيك يحبي
ميار بغيره:خلاص حولي من عند ماما مكاني هذا وقعدت ادف فيها ..
وخواتها يضحكن عليها ..
✨✨✨✨
ويمشي شهر حداش ويجي شهر 12 ..
ويبدا التجهيز علي قدم وساق ..
ويجي يوم 12.12..
هناء
الحوش كان زحمه خالتي وصبايا خوالي جارت ماما لقريبات وبنات عمي الصغير ..
طبعآ عماتي مرفوع عنهن القلم !! .
الحوش كيف خليت النحل كل حد يدير في حاجه
خالتي الصغار يستفن في الحلو ..
وخالتي الكبيره مع صبايا خوالي في المطبخ ..
ونا وخواتي وبنات عمي شطبنا الحوش قبل العصر بدقايق كان كلشي برفكتت ..
ويوصل الدفع سماعنا البيبات ركبنا لدار الخزين نجارو..
كان كلشي راقي وفخم ..
سليمة"بنت عمي":حي ع العار شوفي خويا
كلنا ركزنا علي ولد عمي لي طلع سلاح وبدا يضربب ..
خدوج ضحكت وقالت:تخيلو يصبيهم ويقول حجرها جو مسلسلات وكذا
ضحكن البنات وشوي وشفناهه يفنص فينا خشينا جوا
خدوج:مبيخه بصراحه
سليمة:حازر علينا
نزلنا واذن العصر وبدو الرجاله يجو ودفعو فيا ..
ويستقبلني صبايا العيلة بلمباركات ..
واول مروحو الرجاله بدينا نستعدو لتاني يوم ..
✨✨✨
"نسرينن..نسرينن"
سيبت لي فيدها وطلعت لصاله:نعم
مرات خوها "اشرف":بالله عليكي جا فخاطري رز بحليب
نسرين:حاضر كيف لفت بتمشي وقفها كلام مرات خوها حفتر ..
"لحلحي روحك اليوم دفعو فبنية عيت جيران هلي موليد 2007 "
بحتت فيها بنضرات بارده وعدت للمطبخ بدت تجهز في لي طلبنه منها ..
لا مبكتش ولا تأثرت شبه تعودت عَ عزق الكلام اصلآ تستغرب لو عدا يوم ومحد ضايقها بكلمه فيه ..
✨✨✨.
الساعه 10:30ليلآ ..
كنا في دار المعيشه نهدرزو عَ حجات اليوم..
مرات خالي:لا و الله مشالله حتى الباسطي من نوعيه الغاليه ..
نطت خالتي صغيره وقالت:لا بس جابو طشه مش واجد نا والله مطقيت فيه ..
خدوج بينها وبين روحها ميته بضحك عليهم رفعت نقالها وبحتت فيا خذيت تلفون ماما وخشيت ع وتس لقيتها دزتلي..
"قتلك الباسطي من نوعيه لغالي منين تعرفها هيا"
هناء ضحكتت ..
"والله مطقيت فيه تحلف بلكذب ريتها وهي توزع خذت تلاته مسا"
شوي وجانا اشعار قروب فتحته بنت عمي ..
فرح
"بنات وحقالله مطقيت في الباسطي الغالي"
هناء
"يكلباتت تخيلن يفطنن بينا"
سليمة
"يمينتي بحتي وجه امك منجمط"
خدوج
"شكلها مطقتش فلباسطي الغالي حتهي"
ضحكن البنات ..
امينه:هناء بكرا ماشية المزين..
هناء:ان شاءالله ...
سليمة:مبدري ورتنا فستان بكرا خطير..
امينه:مشالله
وكملت الهدرزه تلقيح وادواس ومفي حد مدور حد ..
خشت عليهم الساعه 12 الحوش كله رقد وفي لي روح ...
✨✨✨
"تخطر وان الليل الماسي ..
تخطر وان الليل الماسي..
يوانسي تدلا ع العين نعاسي ..
يوانسي تدلا ع العين نعاسي "
رهف:ومن يخطر عليك فعقبات الليل..
اسلام بضحكه:عليك قصقصه يرا ..
رهف قعمزت حداهه:كسدت وحدي..
اسلام:حتنا مكسد
رهف بحماس:شرايك نلعبو؟
اسلام بحت فيها برفعت حواجب:وشن بتلعبي توا..
رهف:وابيس زي زمان..
اسلام:ساعه قريب تخش الواحد راهو ..
رهف:اياهه وكان واحد ..
اسلام بتفكير:شرايك نطلعو؟
رهف:وين؟
اسلام:نتمشو في الحومه
رهف:الله ونشالله ينزل علينا ثلج ...
اسلام دفها:عدي ارقدي سلم بنيتي..
رهف بزعل:خزي وعليش تعشم فيا يتافهه..
اسلام:عدي ارقدي بلا نفاخخ ..
فتاته وخشت لدارها خذت تلفونها من شحن ..
ودزت لصحبتها ..
"ريما؟"
"نعم يحبي"
"مكسدهه"
"عارفة قاعده نتفرج علي بث خيال تجي؟"
"هاتي"
دزتلها صحبتها يوزر صاحب الاميل وعدت خشت لبثه..
وحول الكساد مع البث قعدت هدرزه وجو سمح..
وانقلبت لبصارهه تقيله مكانش عجبها الجو واجد بس خير من بلاشش ..
شوي واستأذنت بش ترقد وطلعت صكرت نت وغلبها النوم..
✨✨✨✨
بس في الي الليل يعتبر فيه بدايت يومه..
مقعمز ورا مكتب متاعه يشرب ويسمع في اغاني ..
وهايم في عالم الذكريات ..
ذكرياته هلمرهه كانت جميلة تزيد تعذب فيه ..
🔹🔹🔹🔹🔹🔹
مصبيين قدام حجرت المدير هوا وواحد تاني كان في بيناتهم مشكله ..
وتطلع هيا من الحجرهه ويتلقن عيونهم في بعضهن..
وقتها كان اول سنه في ثانوي ..
قعدو دقايق علي نفس الوضعيه لعند م ندتهم الاخصائية يخشو جوا...
نسا هوا ليش نازل وعليش متعارك مع العيل اصلا..
شويا وركبو للفصل شافها خاشه فصلها ..
ابتسمتله ردهاا وخش لفصله ..
من يومها لتقريبآ اسبوع وهما نضارات ..
لعند م في يوم لقاها مقعمزه تحت الشجره تبكي ..
قربلها وسالها بلهف وكانه كان يرجا في سبلةة..
عوض"خيركك؟"
رفعت عيونها المدمعات فيه وقالت بصوط يدوب طالع..
"محليتش كويس في الاختبار"
قعمز جنبها وبدا يهدرز من موضوع لموضوع لعند م نسجمت معاهه وتعرفو ..
من وقتها بدت قصة حبهم البريء..
🔹🔹🔹🔹🔹
تلاشت الذكريات بعد مجت صورتها قدام عيونه ..
وهي ماسكه فيد نفس العيل لي يكرهه..
كان ضعيف وقتها غلبنه دموع ..
قعد يبكي وكانه طفل صغير..
قاعد بروحه مفش حد جنبه ولا حد يحن عليه..
حتا الانسانه الوحيده لي حبها بعاته ...
وشرب هذك الليله لعند م تعب ورقد ..
وفي نفس الوقت هيا وعت ..
بحتت فساعه لقتها 3 فجرآ ..
تسحبت من جنبهم بهدوء وخشت لحمام..
توضت وصبت مقابله القبله ..
رفعت يديها محذيات لي وذانه..
"الله أكبر "
بدت تصلي في قيام الليل ..
سلمت قعمزت ع صليتها وبدت تدعي ..
مسحت بيديها علي وجها واستغرفت وخذات المصحف تقرا وين موصلت ..
فتحت ع صورة الحج ...
وبدت تقرا من بديتها ..
وفي حوش يبعد عنهم بمسافه كانت برضو تقرا في نهايت الصورهه ..
تماعنت في الايات وكررتهن لمرات معدوده ..
"96..وَلَقَدٌ نَعَلَمُ أَنَّكَ يَضِيقُ صَدْرُكَ بِمَا يَقُولُونَ97فَسَبِّحْ بِحَمْدِرَبّكَ وَكُن مِّنَ السَّـٰجِدِينَ98وَاٌعُبُدْ رَبِّكَ حَتَّى يَأتِيَكَ الْيَقِينُ99".
وهذي مش اول مرا تحس فيها براحه بعد تقرا كلام ربي ..
بس المره هذ بزيادهه حستها كأنها رساله تزيد تقرب فيها من ربها أكثر ..
بدت تردد ..
"سبحان الله وبحمد .. سبحان الله العضيم "
🌼خفيفتان ع اللسان..ثقيلتان في المزين..حبيباتن اللرحمان🌼
واللية هذ رقدت اسعد ناس ع وجه الارض ..
✨✨✨✨✨
وتطلع شمس يوم جديد ..
مع ساعه 11 بدت تجهيزات من جديد ..
خذتها بنت عمها وركبن السياره وتوجهن للمزين ..
توصل للحوش مع ساعه 5:30 مساءً ..
خشت والكل انبهر بطلتها هلمره غير علي قبلها ..
كانت مميزة بفستان اسود فيه وردات موف من تحت..
مع تسريحه رافعه بيها شعرها كله ومكياج بارز ملمحها ..
كانت جميلة بكل ماعنه الكلمه ..
كانت تسمع في كلمات الاعجاب من لي حولها ..
وهيا فرحانه متوقعتش تطلع حلوهه هك ..
ويحضر بيانها او تلبيستها ..
متعين خدوج وعمتها الكبيره وصحباتها وبنت خالها وبنات عمها ..
ويجو العرب ويستقبلوهم بِ الزغاريت وشافوها شوي وصبت غيرت لبست فستانهم ..
ولبستها ام خطيبها الدبله والتعليقه ..
وفوسط مهم منسجمين شافت وجه اختها و بنت عمها ..
ركزت بنضرها وين مركزات ..
توا بس كيف شافت صبايتها الصغيرهه شن لابسه ..
نسخت الفستان لي جيبينه لها نفس الساعه و شنطه و الكعب ؟..
اضايقت بس مبتش توضح..
شوي وبدا حرب الشتوات واكيدهه هلها فازو ومعهم عمتها تحتح ..
وجت صبيتها قعمزت يلاها ..
امل:شن جو
هناء بيتسامه مجامله:تمام
امل:شرايك فحجات لي جبناهن ..
هناء اكتفت ببتسامه ..
امل:لو في حاجه معجباتكش نغيروها عادي!!
هناء:بلعكس كلشي حلو حتا تطقيمتي نا وياك حلوه قلتها ببتسامه واسعه ..
امل ابتسمت : عاد نا لي طلعت وخترتلك كلشي
هناء:امم واضح ..
امل:عادي تصوري معايا؟
هناء:اسفهه منحبش نصور ..
امل :براحتك وصبت من يلاها ..
ويعدن ساعات ويروحو هل العريس من هنا وهي خشت غيرت لبست بلوزه وسروال وتوجهت للباب بعد مسمعاته يدق ..
فتحت ولقت خالتها كيف جايات ابتسمت بتهكم وخشت وسيبت الباب مفتوحح ..
"عيب هناء الوحيده انها كانت تعطي فناس اكبر من حجمها وكانت تحب خالتها بشكل مش طبيعي "
✨✨✨✨
ومرآ الايام بتغيرات بسيطه ..
هناء لي بدت تكلم في خطيبها لي صوطه ارق من صوطها ولعند توا المكلمات شبه عاديه ..
وعوض لقرر يمشي لشرق يقضي مصالحه ويرد من جديد ..
اما رهف بدت تخش البث متاع العيل كل يوم ..
طلعت من البث شافاته متابعها ردت المتابعه ..
شوي ودزلها ..
"اهلآ"
ترددت ترد في الاول بس بعد تشجيع من صحبتها ردت..
"اهلين"
"شنجوك"
"تمام الحمدالله"
وعدت الهدرزه عادي لعند مطلب منها يوزر لسناب وعطاته ..
✨✨✨
وعدت فترهه بسيطه..
كان قاعد في مربوعه صديق له قديم كان يبيه فخدمه..
مكسد ع تلفونه لعند مخش عليه صاحبه بصفره الضيافه..
"مرحبتين بعويضه واللهي"
عوض ببتسامه مجامله:تسلم..
اشرف:وين مغيب!!
عوض رشف من قهوته بعد قال:طلعت برا عندي اشغال
وجاي طالبك فخدمه..
اشرف بتركيز:ادلل ي حبيبي
عوض حك حاجبه ببهامه وقال:كيف متعرف اني مستقر برا وكان نلقا منروحش بكل وهنا عندي اشغال نبي حد يمسكهن ليا وعندي فيه ثقه !!
اشراف فهم قصده وقاله:اشغال شنو بزبط..
عوض:عندي معرض سيارات في****له فتره مصكر وتوا بنجيب سيارات من برا وبنفتحه ونبيك اديره ليا شرايك!
اشراف بحماس مخفي:والله شن نقولك ي حبيبي مسؤليه هذي
عوض:كان معنديش فيك ثقه منجيكش؟
اشراف:خلاص ع البركه امتا بتفتحه!!
وقبل م عوض يرد تخش تجري وهي تندي ع خوها ومعندهاش علم بوجود الضيف..
"اشرافف مراتك بتجيب بسرعه الحقهاا"
اشراف طلع يجري ومركزش ع الموقف اما هي بعد جت عينها ع عوض تحشمت واجد وخشت تجري..
عدت دارها وصبت قدام المريه وقعدت تضرب فوجها بضربات خفيفه وهي تقول...
"يربي عليك منضر يعني ضروري نطلع نهد عليهم هد يعني"
اما هوا بعد عدت تجري استقاض من هيامه حمحم ووقف عَ رجليه وطلع ركب سيارته متوجه لشقته ..
✨✨✨✨
ويعدي شهر 12ويخش شهر 1 ..
رهف محستش اتجاه"سيف"بأي مشاعر اما هوا حبها..
اضايقت منه وحضراته ع سناب وتيك ..
ونساته ولا كانه كاين في حياتها..
وخش عليها شهر واحد كانت فرحانه بسنه الجديده..
وهناء نفس الشي عشان بعد اقل من اسبوع..
ح يقرو فاتحت اختها خويدج..
وبنسبه لنسرين نست الموقف وحمدت ربي ان خوها مركزش وحياتها ماشيه كيف قبل..
وعوض لي سلم اشراف المعرض ورد منوين م جا ..
وخدوج طلعت شهدتها ..
وكانت طالعه الاوله ع المعهد..
ويزيد ع فرحتها انه فتحتها قربت من جماعت ..
فواتح دبيبه ..
✨✨✨.
يوم 10.1.2022 ..
كانت مقعمزه بردا البودري يلا خواته وبنات عمها ..
شوي وتعالت اصوات الزغاريت بعد م نقرت الفاتحه..
كل لي فلحوش جو باركولها ..
بعد المغرب بشوي جا راجلها السلم عليها..
في المربوعه الخارجيه..
"مُبارك علينا"
خدوج ببتسامه خجل:يبارك فيك..
علي:مش كان نروح بيك توا لا فرح لا هم يحزنون..
خدوج ضحكت
وفي دار كانت هناء تكلم وعلي وجه ملامح الازدراء ..
بصوت رقيق"والله سهفوني نقرا فاتحه حتنا"
هناء ملتزمه صمت..
"كنك ي مجنونه تحشمتي مني اه وخلاص"
هناء حمحمت:بنسكر عندي مندير
الصديق:عدي اهربي ي الهرابا هههههه
هناء عكرشت وجها بقرف وسكرت عليه ..
طوحت تلفون ع سرير وطلعت مع باقي البنات..
✨✨✨.
الساعه 8:15 ليلاً ..
مكالمه لمتهن هنا الاربعه ..
استبرق
"شفت استرورياتك مشالله "
ملاك
"كنكم م عزمتوني"
هناء ضحكت
"بلا عزومه مفروض ي لوكه"
ندى
"من لي منزلتهم اختك ع ستوري"
هناء
"ولد عمي و راجلها"
ملاك بدت دربك ع طاوله
"هم ثنين تقول غزله م خلو في الخاطر بله"
ندى تحمست وبدت تزغرت
هناء
"بنات بنصكر صديق يرن"
البنات
"تمام..عدي هيجي"
صكرت وردت عليه ويجيها صوط عالي بس ميخوفش
"مع من هذا كله مكالمه في من تكلمي في ليل"
هناء رفعت حواجبها:حاجه تخصني هذي تهيلي؟
صديق:كيف حاجه تخصك تحقي فيها بقروني
هناء عقدت حواجبها وبغضب ردت:شن قصدك انتا؟
صديق:توا وريني مع من كنتي تحكي ولا والله بكرا نجي لباتك..
هناء صكرت فوجه وقفلت النقال وهي قارفه..
"هناء"
هناء بصوت:نعم ي ماما
"تعالي خطيبك يرن"
تأفأفت بغضب وغمت وجها بلبطنيه ورقدت..
✨✨✨
الساعه 1 ..
تقلب في تيك توك قابلها بث خشتله ..
وبصدفه يطلع سيف قاعد فيه..
قعدت تشوف فتعليقات البنات لي كلها دحنسه عليه
حست بشعور غيره اجتاح صدرها..
طلعت من بث ورفعت من عليه الحضر وردت خشت..
قعدت تهدرز وهوا يرد عليها بزعل..
شوي وصكرو البث وجا دزلها..
"نبي نحكي معاك شويا"
"احكي؟"
"ميجيش هنا عطيني رقمك بنرن عليك"
ترددت في البدايه بعدها دزته له ورن عليها ..
فتحت وحطاته علي وذنها ..
"ايوا"
رهف:اهلا
"شنجوك"
رهف:الحمدالله
تنهد"ليا زمان عليه الصوط هذا"
وبدا يحكيلها شن صار بعد حضراته واستمرت المكالمه لخلت قلب رهف يميله لي م قرب الفجر صكر وهي رقدت طولل ..
✨✨✨
"نوضي يهمي صداع روصنا راه"
هناء ناضت بحتت في اختها وقالت بستغراب :من؟
خدوج:امس معقب علي من رن بعد قفلتي نقالك وتوا قاعد مع بابا في المربوعه ..
هناء تنرفزت ع الاخر :منش طالعه را من توا نقولك
وردت تغطت ورقدت

#متغير ياما عن زمان
#هناء