وَبشّر الصَابرين

تكملت الجزء الرابع .

"نسرين تعالي للمربوعه"
نسرين بخوف وخطوات متردده نفذت طلب امها ومشت المربوعه خشت لقت خوتها فيها قلبها طاح ف اركبها في نفسها تقول"يعني منقبل يضربو فيا بلوحد ونتكسر ينعلاي بيتنصرو علي هم الثلاثه"
اشرف بصوت هادي خلها تزيد التوتر قال:شن صار ونحنا برا
بلعت ريقها وهي ترجف قالت:الباب دق وقبل بنفوته بس..بس قلت يمكن حد منكم ناسي مفتحه..يعني بعد قعد يدق لفترهه..قت من وقالي اشرف قاعد قتله..قتله لا وقالي هاكي هذ عطيه له بعد يروح .. واللهي ي اشرف خذيت الملف وخشيت طول والله
احمد:وينه الملف؟
نسرين مداته لخوها وقلتله:هذ والله م فتحته ..
جبده منها بلقوه ومده لخوها وصبا هي بعد صبا مقبلها لا اراديآ حطت يديها قدام وجهاا تحسابه بيضريه..
بحت فيها بستهزاء وطلع ناده ع مراته وسبقها فوق ..
اشرف بهدوء:اخر مرا ي نسرين فاهمه؟
نسرين بخوف:والله اخر مرا
اشرف:خلاص عدي لدارك توا..
طلعت نسرين من مربوعه بسرعه لدارها ..
تنفست براحه المهم ممدوش يديهم مزال اثار اخر مرا قاعدات ويوجعن فيها..
كان اي حد يضيق من خدمه او من مراته وعياله ينزل يفش غله فيها يدورلها اي غلطه ولو بسيطه بش ينفس ع روحه شوي كانها كيس ملاكمه..
✨✨✨.
مقعمزه قدام اختها لي تبكي ..
ميار ببكي:معش بنمشي للمدرسه البنات والعيال يتهزو عليا
خدوج:وعليش يتهزو عليكي؟
ميار:عشان طريقه لبستي للوشاح ووجي مدور تزر فيه يقعدو يقلولي ي وج دحيه
خدوج مسكت ضحكتها بلغصب وقالت:تو القمر عنده ملامح!!
ميار بستغراب:لا
خدوج:به عنده جسم حلو؟
ميار عقده حواجبها:لا
خدوج مسكت يدها وقلتلها:مش لما بتقولي علي حد جميل تقول قمر صح .. خلاص القمر سمح عشان مدور وابيض مسكت خدها ودرتلها حركه بخشمها وقتلها كيف وجك بزبط ..
ميار ضحكت بخجل:يعني نا سمحه
خدوج:وبلكل اخرهه ..تعرفي ربي ليش قللنا نلبسو المحرمه مش بس عشان نغطو شعرنا لا عشان نخفو حتى جمالنا.. المحرمه مندراتش عشان تبرز جمال حد او تخليه سمح وبرضو في ناس حلوه بيه زيك هك..
ميار ضحكت
خدوج ببتسامه قلتلها:معش تعدلي عليهم هما عشان مقهورين منك يبو يخلوك معندكش ثقه في روحك
ميار:معش بنقعد معاهم اصلا وبعد حد يتهزا عليا تو نبحت فيه منفوق للوطا ونشقلب عيوني زي مدير هنو ونعدي ونسيبه..
خدوج بضحكه:ايوا هكي الصح..خلاص بعد لعيد نديرو الامتحانات ونتريحو وتخشي مدرسه مع هنو ولي يضايقك خليها تخذلك حقك منه
ميار:ايوا
خدوج ضربت بيدها يد ميار وقتلها:اجري قعمزي غادي ننين نحطو سحور هي
ميار عدت تجري لتلفزون وخدوج عدت للمطبخ ..
خشت علي هناء وهي تعدل في ساعه الميكرويف..
خدوج:كرعيا طاحن في طريق ..
هناء:نفسجو .. كنتي تحكي مع علي..
خدوج:اها قالي بكرا بيجي يجيبلي حجات العيد..
هناء ببتسامه:محلاكم
خدوج حبت تغير الموضوع وقلتلها:شرايك بكرا نبدو فحلو العيد؟
هناء:امم..مفش مشكله نبدو فيهن بعد الفطور..
خدوج ببتسامه:ايوا
هناء : بنعدي نكلم عمتي
خدوج:تمام
طلعت هناء وعدت رنت علي عمتها نين فصل مردتش حطت نقال وكيف بتطلع عود رن من جديد فتحت للخط ..
"السلام عليكم كلسنا ونتم طيبين"
هناء:وعليكم السلام وانتي طيبه
عمتها:عيدي ع امك وخياتك هي بسلامه
هناء رفعت حواجبها بقهر وقالت:بسلامه وصكرت
هناء
زياده علي اني منفهم منها في شي متعطيش فيا ففرصه اني نحكي لا والبيه يبيني نهدرز ونخش فيهم اهه ي قهايري اخته غر كان اجوزت بدري شوي راهي جيبه وحده من دادي حطا راصها من راصي وتصتصبا عليا افف مليت منهم"
خدوج:معلش فيها خيرهه نشالله وخذت صفرة العصير وطلعت
✨✨✨✨
ثاني يوم الساعه 2 الضهر ..
مصبيه تحشي في المصارين وهنا يلاها كل وحده دير في حاجه..
زهرة:رز بلخلطه وبطاطه مبطنه والمصرين وبوريك وكفتت الخضره وبراك وشربه ساد تهيالي
خدوج وهي تحرك في المسير:وبزايد
هناء كانت دير فصلاطه وهي مستمعه بس..
زهرة:كلمت خالتك تجي تفطر حتهي..
خدوج:امم
زهرة بحتت في هناء وقلت:نشالله تفردي وجك
مفش رد
خدوج تمرر في نضرها بينتهم وكلمة امها مزالت وجعتها اكثر م وجعتها اختها ..
زهرة تنهدت وكملت شغلها وهي ساكته..
ع العصر كان كلشي واتي..
طلعت ميار كنست ونشفت الدروج وبرمت ع المربوعه والمدخل وخدوج ع الحوش من جوا ..
قبل المغرب بشوي خشت خالتهن امينه..
خدوج سلمت عليها وقتلها:تفضلي
امينه:سلمك وخشت ع دار المعيشه لقت زهرة تفرج ع تلفزون صبت سلمن ع بعضهن بعدها قعمزن يهدرزن..
هناء كانت في المطبخ شاغله روحها بيه ..
متبيش تحتك بيهم وتخرب صيامها..
سمعت باتها خش طلعت فتحت الباب طبست حولت سباط باتها ورفعت كندرت خالتها لدولاب..
ولما جت بتخش شافاته مصبي في مستراح الدروج ويبحت فيها..
هيا بدون انتباه قالت "بسم الله الرحمان الرحيم وخبطت الباب بقوه وخشت..
عدت للمطبخ شوي ودق الباب طلع حمد استقبله وخذا منه شكاير عطهن لميار تحطهن فلمطبخ..
ميار:هاكي جابهن صديق
هناء:حطي ع طاولة ..
ميار حطتهن وطلعت شوي وجتها اخره قلتلها:قتلك خالتي تعالي..
هناء تأفأفت وسيبت لي فيدها وطلعت وصلت لدار المعيشه سلمت وقعمزت..
امينه:عليش تخبطي فلباب..
هناء كيف جت بترد قالت ميار:م كانت تسقم في الكنادر ولقت الصديق مصبي فدروج سمت بالله وخشت صكرت الباب..
زهرة وامينه فتحن عيونهن بصدمه وامينه قالت:عليك قلت ذوق
هناء استفزها اسلوبها بس قعدت ساكته..
امينه عكرشت وجها بعدم رضا وقالت:عيب مهما كان في تصرفات ميندارنش وامك تحكيلي علي لقطاتك البايخه معاهه .. ميار بحتت في امها لي هربت بنضرها منها وامينه مكمله تقول:كان متبيش هوا معناها في حد تبيه ..
خدوج بحتت في خالتها بعدم رضا وهناء صبت طلعت من حداهم ..
خدوج:قصدي لقطه عفوية قاعده بلا وشاح وحقت تفرج عليها هوا لي قليل ذوق مفروض حمحم ولا دار صوت افرضي نا ولا امي برا
امينه:خدوج ي خدوج اقتنعي اختك تصرفاتها كلهن غلط والله متستاهله الراجل..
وهناء كانت في المطبخ تغلي من القهر متبيش تطلع ترد عليها وتعلق هيا وامها..
اذن المغرب وحطو العشا وشوي وجا راجل خدوج ..
صلو المغرب وعطوهم صفرتهم وهما حطو سفره وبدو يتعشو..
✨✨✨
"اممم خيالل ي انا"
اسلام:بتبدا توا
رهف:بالله ماما مش تجنن البيتزا..
جميلة:مشالله عليها بنيتي الفالحه..
اسلام خذا طرف قطايف ومدها الباته وقال:هك ذوق ي حاج وعطيني رايك..
رهف:را مش انتا لي ديرها شريها را؟
اسلام:سلمني جياب ي انا..
جميلة وحسين تعودو ع منقرتهم في كل وقت كانو يفطرو وكانهم مش موجودين..
بعد شوي كمل حسين عشاه وصبايا توضا عشان يلحق صلاة العشا في جامع ولحقاته جميلة وبدت رهف تلم في صفرهه..
حطت المعين في المطبخ وعدت بتشرب اميه سمعت تلفونها يرن عدت لدار لقاته رقم غريب كتمت الصوت وطلعت تكمل في شغلها..
غسلت المعين وطلعت سفره الشاهي شربو وهما يتفرجو ع شط الحريه وبعدها باتها وخوها عدو لجامع..
رهف:ماما خاطري في كيكه مثلجه..
جميلة:امم ديري
رهف:خاطري في متاعك
جميلة:والله معندي جهد بنوض نصلي ونخش نرقد شوي
رهف مطت شوربها بزعل:خلاص تو نديرها الله غالب عليا عضمي عضم شقا..
جميلة حركت راصها يمين ويسار وصبت تصلي..
ورهف خذت تلفونها لقت رساله من نفس الرقم..
"كل سنه وانتي طيبه ي راهفي"
عيونها دمعن هيا تحاول تنساه وكل متنساه شويا يجي يذكرها بيه منجديد..
جت بتحذف الراسله بعدين خلتها وصكرت التلفون وعدت للمطبخ..
✨✨✨
الحال عند نسرين كان كما هوا عليه ..
تنوض من صبح امها دير شربه وهيا توتي باقي الفطور مع الصلاطات والحلو وتغسل المعين يفطرو وتنوض تغسل لي كلو فيهن وتحط الحلو والقهوه وتنوض الدير السحور ..
دق باب دارها ..
نسرين:خشش
خش اشرف وصبا عند الباب:مجبلكش خوتك دبش؟
نسرين حركت راصها بنفي وقالت:معنديش وين نطلع عليش يجيبولي في دبش عيد؟
اشرف:وتي روحك نرجا فيك برا وطلع وصكر الباب..
نسرين استغربت مع هذا صبت لبست عبايه سوده ومحرمه سوده حتهي ولبست كندره حافيه..
طلعت لقاته يرجا فيها في سيارهه بروحه..
ركبت يلاه وهي مستغربه هذ اول مرا يطلعوها فيها ولا بيجيبولها دبش عيد..
تحركت السياره وهما في صمت تام..
لعند مقطع هه الصمت لما قال:بنتكي ع المعرض بناخذ حجات..
هزت راصها وقلتله:به
بعد زحمت الطريق المعروفه في بنغازي لي يجوها من جميع المدن كانت بزيده في العيد .. وصلو لي المعرض..
صكر الرواشن وقللها:بتنزلي؟
هيا بتوتر:نرجاك عادي
هز راصه ونزل من سيارهه صكرها عليها زين وخش للمعرض ومهيا الا دقايق وطلع ركب بسياره وحركها متوجه لسوق..
✨✨✨✨
"كانت متفوقه في قرايتها اغلب السنين وبذات الاخيره كانت تاخذ في الاوله ع مدرستها في 2019توفه بوها لي بعده خوتها وقفوها قبل امتحانات الشهاده الاعداديه..كانو يمنعو في زيارات لي تجيها ومنادر تطلع معاهم لو مشو زرده او حجزو في شلي بنيه كانت علقتها بناس صطحيه عندها صديقه وحده بس من فتره طلعت هي وهلها لمصر "
قله بحواجب معقوده:موليد الكم هيا؟
الاتش:2005يعني توا 17 عام..
عوض ببتسامه:امم..
الاتش بفضول:بتخذها؟
عوض بحت فيه شوي وحرك يده فهم عليه الاتش وطلع وصكر الباب..
اما عنده هوا اذكر كيف كانت خايفه وهي تحكي معاه وعلامات لي كانت علي يدها ابتسم بحزن..
✨✨✨
ويجي اول ايام العيد💘.
في احد مناطق بنغازي العصيه..
الساعه 5:15عصرآ ...

#كان لوقانا احلا صدفه..
#اتسغفرالله العضيم و اتوب اليه..