وَبشّر الصَابرين

جزء الاول .

في أحد احياء العصية بنغازي 💘.
الساعه 2:15 ضهرآ .
بضحكة حماس قالت
" والله ي هنو وعرفتيني منحلف كذب سمعتهم يحكو عليك موضوع خطبه واجواء "
هناء فتحت عيونها بصدمه : نهاري الحرف خطبة شنو تحقي في عمري نا قصدي مزلت فرخه راهو
خدوج : غر فكينا من جو مش بلغتي خلاص كل شي يحل عليكي واهو نا انخطبت ونا في 16 وعرسي قريب لا متت لا سو
هناء : هذك انتي مش انا
خدوج بحتت فيها بنضرت احتقار وقالت " وعنك ي حنه اقعدي عنزي هن بوري علي قولة عماتك وطلعت وسيبتها
"صح في ناس واجدهه ونقولو الاغلبية عندهم احسن انهم يجوزو بناتهم في سن صغير او بي ماعنه اصح "قاصرة" ميفكروش في بعدين نضرهم يكون محدود علي هدف معينه انه ..
البنت استرلها حوش راجلها !!! .. واهو بلمره يتخلصو من حمل لبعض منهم يشوف فيه تقيل ولبعض ثاني لولا الضروف والحياة الي عيشينها توا يشوف ان جوازهم لمبكر راحه ليهم هما بدور الاول ..
وفي نهاية كلحد وعقليته ؟؟
✨✨✨✨
ومن دار البنات لي الصالة لي كان يدور فيها نفس الموضوع ؟
" واللهي ماني عارفة انا عطيت الاوله وحاس روحي نادم "
زهرة طبطبت علي كتفه وقالتله بصوت هادي : جاها نصيبها م نبو نوقفو في وجها وبعدين في فترة خطوبة يتعرفو ولي فيها الخير يقربها ربك
بحت فيها راجلها وقال : انشالله خير انتي بعدين افتحي معاها الموضوع وشوفي رايها
زهرة : نشالله خير يا احميده
عيلة حمد من سكان مدينة بنغازي وجوزته اصلها من العاصمه طرابلس حمد موليد 1956 و زهرة 1986 عندهم ثلاث بنات ...
خدوج اكبرهن موليد 2005  دوبها مكملة امتحانات الشهاده العدادية ونجحت بي امتياز في بديت امتحانات انخطبت وحا نعرفو قصة خطوبتها هذي كيف صارت ،
هناء المتوسطه موليد 2007 ترحلة من صف الاول عدادي بسبب وباء انتشر ففتر 2020 "كورونه" وهذي لي حتحكي قصتها الرواية متاعنه ..
ميار 2010 اخر العنقود حتهي نفس الشي ترحلت لي شهاده الابتدائية...
ارتباطهم بباقي العائلة من هل "عائلة" حمد مش قوي واجد يتلاقو في المنسبات والاعياد ومنادر ميصير الشي هذا ... اما من هل زهرة ف ارتباطهم نوعآ ما قوي زي اي ناس ثانين ..
✨✨✨✨✨
بداية شهر 10 من سنة 2021 ..
كان الجو حلو بريح الي تجيب معاها بنت "رائحة" المطر وتراب المبلول كان الجو جميل بكل معنه الكلمة ..
مصبية ع روشن لي يطل ع شارع ونسمة لطيفه تضرب فوجها بلطف قالت"يربي ع الجو يريت السنه كلها الشتاء"
خدوج : بلعكس الصيف احلا هياجه وبحر وزرادي شتاء صبي فوق السطاح بلي روحك وانزلي امرضي وفضت
هناء:شن فهمك انتي اصلا فلحجات هذينا
خدوج اكتفت بأبتسامه جانبيه
هناء صكرت الروشن وجت قعمزت مقبلتها ع سرير وقلتلها : تعرفي مش حاسة روحي متحمسه اني ننخطب ؟
خدوج حطت تلفونها جنبها وساوت تقعمزيتها وقلتلها : عليش !
هناء : نحس في روحي مزلت صغيره هذي اول حاجه ثاني حاجه انه من معارف خالتك قلتها بازدراء
خدوج بضحكة : صح والله حتنا مش مطمنه تخيلي يطلع يشبه محمد ولد خالك
هناء حطت يدها علي صدرها وبفجعه مصطنعه قالت : لا يربي
وتنفجر خدوج بضحك وتكمل اليلة جميلة بدون تفكير ولا ارهاق علي هناء وبنسبه لخدوج لي كانت تخمم في قرايتها لي كانت تاخذ في بامتياز وعلي انها خلاص فرحانه لي بتخش ثانوي واخر نقاش صار بينها وبين خطيبها ...
🔹🔹🔹🔹🔹🔹🔹🔹🔹
"عارف وفاهم عليك ي عمو بس موضوع ثانوي وثلاث سنين حيطول نا عطيتك قرار اختصريها وخشي معهد خوذيه سنتين بشهاده مضمونه واهو بلمره تفضي لوجيج الفرح"
خدوج وهي تفكر في كلامه وشبه قتنعت الانه كانت تحبه وتبي تقعد قريبة منه في اقرب وقت : خلاص خليني نفكر ونشوف شن راي ونقولك
علي:خلاص عندك ليوم بطوله بكرا ردي عليا بش ناخذ ملفك ونحطه في معهد لي تختاريه باهي
خدوج وافقت وهي حاسه روحها متردده:تمام يعمو
علي:تصبحي علي خير
خدوج:ونتا من اهله
🔹🔹🔹🔹🔹🔹
وعدا عليها ليل وهي تفكر لعند سمعت صوت منبه تلفونها يذكر فيها بصلاة قيام اليل استعوذت من شيطان وصبت خشت الحمام بش التوضى وتطلع الاريح مكان فدنيا كلها💘.
✨✨✨✨✨✨✨
ويعدي اليوم و يجي مكانه يوم تاني باحداث جديده ..
مع الساعه 7:30 صباحآ ..
كانت زهرة مع بنتها قدام البنات تسقد فيها بكلام المعروف ..
زهرة : عينك من روحك كرعيك في غمرك اي حد يكلمك متردش عليه استودعتك الله وخشت وصكرت الباب ..
في بداية الشارع كانت هناء تمشي وهي ملتزمات الصمت حتى بينها وبين نفسها  صبح احتمال لو حد قالك صبحخير تتفل عليه
ويقطع الصمت هذا دوشة العيال المشيين باتجاه مدرسهم ...
بعد م قطعت مسافة لا بأس بيها وصلت هناء لمدرستها لي حتقرا فيها باقي رحلتها في الاعدادي
✨✨✨✨✨✨✨✨✨
وفي نفس الوقت في مكان ثاني من احد احياء العصيه بنغازي .
في حوش خالتهن الخطابة (: .
"اها قوله قلولك تفضل الاسبوع جاي  يوم 22 "
محمد:
تمام علخير نشالله .
زينب:بتعدي معاه صح ولا ؟
محمد:اكيدهه
زينب:علي خير
صابا محمد باس راص امه وطلع من دار ومنها من الحوش بكل متوجهه لسيارته ويقطع عليه صوت رنين تلفونه طلع تلفونه من جيب جاكته فتح لخط وحطه علوذنه وهوا قاعد يركب في سيارهه ببتسامه حلوهه :صباح الخير
هبه:صباح النور نحسبك راقد
محمد:طالع توا يحبي
هبه:تمام خلاص نا بنرقد تروح كلمني
محمد:تمام يعيوني احلام سعيده
هبه ضحكت ضحكه خفيفه وقالت:بونوي وصكرت الخط قبل متسمع ردهه
محمد تنهد وحط تلفونه ع طبلون السيارهه وتحرك لمشواره ..
✨✨✨✨✨✨✨
بعد مرور اسبوع وجا اليوم لمنتضر ..
مع الساعه 6:15 مساءً.
زهره وهيا ماسكه لبخارهه وتبرم بيها في المربوعه الخارجيه بعد كملت حطتها ع المدخل وخشت متوجهه لدار بناتها دقت علباب بعد سمعت الاذن بدخول فتحت الباب ببتسامة مفاجأه:مشالله حوته علي بنيتي
هناء ضحكت بخجل وبحتت في اختها لي ردت تقول
خدوج:عمايل ايديا
زهره:خلاص كان واتيات اطلعن جهزن معين الضيافة بش تقعد ساهله علينا بعدين
هناء عقده حواجبها وقالت الامها:معرفتيش كم وحده جايا
زهره:والله ي بنيتي منندري اكيد امه وخياته بس
هناء:خواته مجوزات صح؟
زهره وهيا طالعه قالت بصوت مسموع:اها ...وحتا كان جن عشر صبايا مرحبتين بيهن الخير واجد غير اطعلن ساقدني
طلعن البنات ورا امهن وخلن ميار مقعمزه تكتب في واجبها ....
✨✨✨✨✨✨✨
بعد دقايق يدق الباب ويتوجه حمد بش يستقبل ضيوفه
حمد ببتسامه بشوشه:تفضلو
محمد:يزيد فضلك خش ي صديق
مسك يد حمد بيديه ثنين وهو يرحب بيه ببتسامه وقال
"خيرات كيف حالك ي باتي "

#متغير ياما عن زمان .
#هناء