وَبشّر الصَابرين

الجزء الثالث .

" لا إله الا الله وحده لا شريك له ، له الملك وله الحمد وهو علي كل شئً قدير "
الجزء الثالث من فصل : متغير ياما عن زمان .
✨✨✨✨
وتمر الايام علي نفس الحال تجهيز
لي امتحانات الفاينل بحماس ..
ويخش شهر حداش لي بدت فيه الامتحانات..
الساعه 5:30 صباحآ ..
وهيا مقعمزهه تستغفر بعد م سلمت من صلاة الفجر ..
مش قادرهه تركز في الاستغفار .. تفكر وعلقها يجبلها في افكار متداخله ..
الامتحانات و خطيبها لي مشفتاش الا مرا وحده..
الضيقه لي تحس بيها لي اول مرا فحياتها ..
هزت راصها يمين ويسار وكنها تطرد في الافكار بش تركز في ذكرها ..
بحتت جنبها ع رف شافت لمصحف ..
لها فترة مسيبه قرايه وردها من القرآن قعدت تبحت فيه لدقيق ..
صبت توجهت للراف صبت ع اطراف اصابعها وخذت المصحف ..
مسحت عليه بيدها ورد قعمزت عَ صلايتها وفتحتها ع صوره البقرة ..
وبدت تقرا وحده وحده لين نست روحها مع ربها..
كانها انفصلت ع العلم لي قاعده فيه تركيزها كله فصوره .. لعند م وصلت في الاية 213 .
( "٢١٣" كُتِبَ عَلَيْكُمُ الْقِتَالُ وَهْوَ كُرْهُُ لَّكُمْ وُعَسَى أَن تَكْرَهُواْ شَيْأً وَهُوَ خَيْرُُ لَّكُمْ وَعَسَى أَن تُحِبُّواْ شَيأً وَهْوَ شَرُُّ لَّكُمْ وَاللهُ يَعْلَمُ وَأَنْتُمْ لاَ تَعْلَمُونَ"٢١٤" )
عودت الاية مرتين تنهدت براحه
وكملت باقي الصوره..
صكرت المصحف ضماته لصدرها دقايق بعدها..
صبت رداته لمكانه وسلحت املايتها علقتها
فمكانها وتوجهت للمطبخ حطت القهوه ع نار ..
✨✨✨
في نفس الوقت في القارة العَجوز
كان يشرب في قهوه صاده وهوا يفكر ..
شوي ودق باب الغرفه متاعه توجله فتحه واشر
للقدامه يخش ، خش وصكر الباب ولحقه ..
عوض خذا فنجانه يشرب منه وهو يسمع في ضيفه ..
"قبل شهر وقفت قيدها في جامعه وباعت السيارة
حولت نعرف اسبب وصلت انه حالتهم الماديه تحت السفر باعت السياره بش توفر مصروف عالج امها وقفت قيدها بش توفر لفلوس ومن اقل من اسبوع انتقلو من الحوش لقعدين فيه لشقه فِ *** إيجار وفرها لهم جار لهم فلمنطقه ودفع ثلاث شهور مقدمآ وبدت تشتغل محل ملابس نسائيه في مول *** بمرتب شهري 700 دينار "
عوض حط كراع علي كراع وهو يحرك فراصه : امم كويس .. مفش اي حد يطل عليهم في شقه .
" قبل متحصل العمل كان جارهم يطل بين فترة وثانيه ويجيب معاه فخضرهه وغذائية بس له فتره مجاش ومختلطوش بباقي سُكان العماره .
عوض شير بيده علباب : تفضل
توجه الاتش للباب طلع وصكره وراه وخلا عوض
يسرح بتفكيره من جديد بس هلمره سرح بعيد بعيد بكل ..
🔹🔹🔹🔹
من حوالي 6 سنين في 2016 ...
كان متوجه للمدرسة بحماس اخر سنه ثانوي مع حبيبة قلبه ، يمشي الخطوه فخطوتين يبي يوصل اسرع ..
خش من الباب لساحه شافها مقعمزه تحت شجرة ومسكه كتاب بس تبان سارحه توجه نحيتها بخطوات خفيفه ..
خلاص هوا اليوم ناوي يراضيها
بعد م زعلها اسبوع ..
قبل ميوصل فيها بشوي شافه وصل فيها
وقعمز جنبها بمسافه بسيطه باين ان قللها شي خلها تضحك ..
مسك يدها وقعد يهدرز عليها وهي مبتسمه ..
وبين مهي تمرر فنضارها في ساحه عينها طاحت عليه
شاب طويل عريض صاحب العيون الخضره ..
وشعره نازل علي عيونه لي نضرتهن كانت مش مفهومه وقتها ..
لي جنبها شفاها مركزه بنضرها علي مكان شاف وين متشوف حقه حط عينه في عينه ابتسم بنصر ..
رد نضره ليها صبا ونهضها معاه ومشو بعيد وهيا بعد مكانت تشوفله غيرت نضرها لقدام لين اختفت من قدام عيونه رد نضرهه لشجره ودمعه محبوسه في محجر عينه ..
حس بلمسات خفيفه علي كتفه التفات ..
شاف بنت جميلة قلتله ببتسامه ..
" ادور علي حد ؟"
عقد حواجبه وهو ملتزم الصمت ..
ضحكت وردت تقول : اكيد كنت ترجا فيهم يوقفو بش تقعمز تحت الشجرهه حط خصلت شعرها ورا وذنها
وقتله .. الاء مرتبطه بيه من فترهه واصلآ نص المدرسه مرتبطين مررت نضرها ع ساحه بعدين رداته له وكملت تقول نقعمزو عادي؟
ابتسم بتهكم وتخطها و توجه لباب وطلع من مدرسه
وهوا حاس بشعور بشع ..
🔹🔹🔹🔹
رد للواقع ونفس الشعور حاس بيه من جديد ..
ضرب الفنجان لي فيده ع ساس تكسر الاجزاء صغيره ..
زي قلبه وقت كان شاب عنده 17 عام 🥀.
✨✨✨✨✨
الساعه وصلت 7 وربع ..
قاعده تلف في وشاحها ع مرايت المدخل ..
خدوج:يعوينك تمشي امتا متكملي نا هلباص الغليض ضروري سبعه ونص تقعدي فشارع ..
هناء:واو تحسديني حتى علي مية وجي
خدوج : علي شن بنحسدك نحكي عادي وانتي تحسسي
هناء:باهي خلاص انا طالعه تريحي ههَ ..
طلعت لبست كويشها بحتت فشارع خدت نفس وطلعته ..
"توكلت علي الله " وكملت طريقها ماسكه فيدها اليمين بنينه "بيرو"واليسار شيشة الميه ..
وبعد مسافه مش طويل ومش قصيره وصلت للمدرسه لي في منطقتهم خشت تلاققت مع صحباتها ..
هناء:صباح الخير
"صباح النور .. صبحلخير ..اهلآ"
ملاك:قارية؟
هناء:طبيعي
استبرق:حي عليا ي بنات قريت بس مش بتركيز حاسه روحي خايفه
ندى:فرخه فاطمه اكيدهه واكله لكتاب
هناء : نشالله حتى انتي مش قاريه
ندى درت بيدها حركه : نص ونص
هناء رفعت حواجبها وبحتت فيهن:شن طاقة سلبية هذي اول امتحان را
فاطمه:فوتيهن هذينا يطيرن في العين بس را ..
هناء قبل مترد عليها رن جرس بش يركبن لقاعتهن
تعنقت يد فاطمه ومشت هيا وياها لقاعتهن ..
✨✨✨✨
الساعه 10:15 ..
ناضت بحتت فروشن زي كل يوم ..
تشوف في شمس متسلله لدارها جوا عيونها دمعن ..
شافت لساعه ونزلت دمعتها ..
غمضت عيونها وفي اصوات تداخلن فراصها ..
"خلاص تعلمت تكتب اسمها واسم باتها مفش داعي منه الباقي " " خلاص باتي لي كان يدفع فمصاريفك ويشيل فيك ويجيب عدا ونحنا منش فاضيلك"
"ايوا حطوها فمدرسه وخلوها تمشي علي حل شعره مندرعنها نا فمن تصاحب ومع من تحكي لبنات ميديرنش خير"
حطت يدها ع عيونها وقعدت تبكي بألم اذكرت باتها لي يحبها ايام كان معاها كانت حياتها جميلة تقرا وتطلع وتخش اول م توفى انحرمت من كلشي ..
تنهدت بضيق مسحت عيونها ونزلت كرعيها من سرير
بحتت في ساعه مفروض توا كملت امتحانها وطالعه تشوف في صحباتها حلن ولالا تنهدت من جديد ..
وصبت بش تخش للحمام ..
دقت ع الباب سمعت حد جوا طلعت للحمام الخارجي فتحت وخشت اتوضى
خوها خش دارها لقاها فاضيه عقد حواجبه بستغراب
عدا للحمام لقا امها كيف طالعه عدا يجري للمطبخ لقاه فاضي رد الامه من جديد ..
اشرف:وينها بنتك وينهي نسرين؟
منيه:تلقاها راقدهه تعلمتي تنوض ع ضهر
اشراف بعياط:تي مش قاعدهه فلحوش بنتك مش قاعدهه
منيه خبطت بيدها ع خدها:حي عليا
اشراف بعصبيه وهو ماشي ياخذ في مفتاحه ودخان يقول:والله كان نلقاها نقتلها بالله
قبل ميوصل في الباب فتحاته وخشت واثار الوضوء علي جسمها بحتت فيه بنضره بارده وتوجهت لدارها ..
اشراف بعد بحت فيها بعصبيه وطلع وخبط الباب وراه
✨✨✨✨
وصلت للحوش فتحت الباب وخشت لقت كويش اختها ابتسمت وكملت طريقها للمبطخ وهي تمسع في امها تغني ..
"انا قلبي دليلي قالي ح تحبي "
هناء ببتسامه:توين حميدا بس
زهرة ضحكت باحراج:عدي ي مسخه .. ها شن درتي في امتحانك ..
هناء بنفس الابتسامه:الحمدالله
زهرة:باهي ربي يوفقك يبنيتي
هناء:ميار موعتش؟
زهرة:قبل متخشي بشوي كيف طلعت
هناء:راجعت؟
زهرة:اها راجعتلها وفطرتها
هناء:باهي نا بنرقد وعيني ع الغدا
زهرة :نوم العوافي عدي تريحي ..
بعد مطلعت من لمطبخ خشت لدار لقت اختها متمدده وماسكه كراس تراجع
هناء:حليتي؟
خدوج:حليت فمي
هناء ضحكت:نعنها حلت فم كل حبيب
خدوج ضحكت:بنصر ي باردهه حليت وانتي
هناء:يس
خدوج حطت لكراس يلاها وفردت يديها بكسل:حاسه بخمول غريب
هناء:حي كان تسمعي من شفت ونا مروحه
خدوج بأستغراب:من؟
هناء وهي تسكر في بطمة البجامه:السوده
خدوج بضحكه مفاجأه:الله
هناء:والله حتنا بعد شفتها حسيت روحي رديت صغيره
خدوج:عليك ايام ايامها ..
هناء بضحكه قالت:نذكر زمان بعد نديرو ورده بلخط لوح ونحطو فيه بشبوات ونولعوها تقولنا مش حرام عليكم هكا تحرقو في زقريلو قلتها وهي تقلد في صوتها..
خدوج ضحكت:لا ولابعد تعطيك من شبس وتخذي طرفين تقول يودي هلبا
هناء تنهد ببتسامه:والله ايام ي خويدج
خدوج رمت فيها المخده :يباردهه
هناء ضحكت
✨✨✨✨✨✨
ويعدي اسبوع الامتحانات ويبدا توتر الشهادهه ..
يوم ثلاث الساعه 3:30 القايله ..
مصبيه ع الحوض وتغسل في الماعين ..
"فكرت نرد نقرا فجامع من جديد"
خدوج وهي تمسح فطاولة:بروحك؟
هناء:لا معايا ندى انتِ متبيش؟
خدوج تنهدت وقالت:والله يريت بس استغفرالله حاسه معنديش له وقت
هناء:أستغفرالله مش مشكله كل سورة نخذها نجي نعطيها لك هن رفعت حاجبها وباسلوب جاد قالت وتسمعي أي غلطه بشلطه ..
خدوج ضحكت:حاضر معلمتي
هناء ابتسمت: عارفة خاطري نوصل لمرحلة يعطوني حلقه نقعد شيخه متاعها ونعلم في قران للبنات أصغار
خدوج:نشالله يمي
صكرت شيشمه ولتفت عليها وقلت لها:زعما الشهاده امتا اطلع
خدوج:شفت مبدري اميلات المدرسة والمعهد مفش منشورات الجدد
هناء مسحت يديها وقالت:راضيه علي اجاباتي أقل من ممتاز نعدي للمدرسه نخلي الطايح اكثر من لمصبي
خدوج:هذا الدج ورج ونار ودخان
هناء ضحكت وهي طالعه من المطبخ ..
✨✨✨✨
بطني يماما شنو تورت هذا ..
جميلة:نشالله خير انتي شاطره يماما متخفيش
رهف بقلل:نشالله بحتت في امها بنضرات حب وتنهد وجدت حطت راسها ع كراع امها وقالت :ماما مسحي علي شعري
جميلة ضحكت : كنتي تحبيها وانتي صغيرهه
رهف:لعند توا والله ..
جميلة اكتفت ببتسامه وبدأت تمسح علي شعر بنتها وهي تقرا عليها لعند م منزل عليها النوم ورقدت عند امها 💗.
✨✨✨
☄️مقعمزه قدام عماره تحت جو لتحب تقعد فيه لمطر مبلله وجها وشعرها وقاعده تحول تلم مجموعه في كفوف يديها شوي جات سياره درست قدامها ونزل منها واحد ملامحه مش واضحات مد يده بحتت فيه بعدها مسكت في يده وعدت معاه يتمشو تحت المطر وهي مبتسمه وحاسه بفرحه كبيره شوي بحتت جنبها ملقت حد التفتت وقعدت ادور بعيونها وهي خايفه ملقت حد عيونها دمعن ورؤية ضببت قدامها حطت يديها ع عيونها وقعدت تبكي بدون صوت لعند مخطمت نفس السيارة من جديد تخطتها وعدت قعدت تجري فرجتها وتنادي فصاحب السيارة بأسم مش واضح لعند مختفات من قدامها☄️

#متغير ياما عن زمان
#هناء