غسل العار

2 🐢🌻

#غسل_العار #ثانيا 🐢🌻
#وسام_الفراجي

ونزل جوة البيت ..
جان اسمع صوت شهاب ونازك يصيحون لزمناه لزمناه ..

بلحظتها سدير الي هي اخته لزمتني من اللثمة ونزلتها عن حلكي وكالت

ـ اذا صار شي لـ يمان حلكج هذا اشكه

لزمت ايدها ووخرتها ورجعت لثمتي وكلت
ـ ممكن تكرمينه بسكوتج مو ناقصتج هسة ..

صياح الولد وامي اسمعهم بإذني ياربي شصار بالولد ياريت ما دزيته شراح يصير هسة ما ادري ..

تمشيت وصلت لبابنا وردت ادك الباب واكلهم اني دزيته بس تخيلت ابوي يمكن يكطعني ويعلكني بالباب ..

من ورة الباب اسمع ابوي يكول للولد كلام هواي بس الي فهمت بعض كلامه يكول لولدنا اتركوه خل نسمع شعنده ..
و شوفولي هذولي اهله من يا ملة ومن يا منطقة وليش شايلين من بيتهم غير اكو سبب يجوز مطلوبين يجوز كلشي يصير اذا سمعتهم مو زينة حتى نطردهم من الديرة ..

رجعت ركض لبيت اهل يمان واخته سدير عالباب ..

باوعت لسدير صارت تلطم بوجها واجت عليه وكالت
ـ قسما اذا صار شي احجي كلشي لأهلج ..

صار صوت وفتحوا باب بيتنا واني وسدير ختلنا ورى باب بيت #يمان ..

يكلهم ماكو اصدقائي انهزموا والله جانوا هنا ..

لحد الآن هم ميعرفون اني برا البيت كل ظنهم جوة
وكل ظنهم هو حرامي الولد ..

بصراحة ما اعرف هالولد والله
بس اعرف ان هالولد من اول لحظة شافني مفرعة نزع جراويته وحطها ع راسي وهو عيونه بالكاع ..

الي اعرفه دز اصدقائه حتى ما احس بإحراج انه ولد ملتمين عليه

الي اعرفه صعد وجازف ولزموه وما كال بنتكم برا ..
بس الي ما عرفته من علم ع اصدقائه برا جان شنو بباله ..

معقولة غدر بإصدقائه !
صراحة هذا #يمان حيّرني متناقض كلش ..

زين شلون هسة اطلع نفسي من المشكلة ..
وهاي سدير اكلت راسي كدما سمعتني حجي ..

بالأخير .. فتحوا باب بيتنا واجوا لبيت يمان ..

هنا حرت وين اروح ماجنت متوقعة يبلغ عليه بالرغم مااعرفه الولد ..

طبيت اختل وشافني نازك جان يصيح ..

ـ يابه هذيج مريم والله ببيتهم ..
ركضت حتى اختل بشي مكان ..
مالكيت كدامي شي اختل وراه حدما سمعت صوت نازك يكول تعالي تعالي يالمتدينة ..

جمدت بمكاني ..
ابوي خنزرني واشرلي بيده وهو واكف ع باب بيت اهل يمان ..

استسلمت جاي امشي ع كيفي ودفعتني سدير تكلي امشي لأبوج ..