طرف ثالث

البارت الاول

#رواية _ طرف ثالث

الكاتبة ندى البياتي

البارت الاول

لاتنسون التصويت والتعليقات بين الفقرات

النشر بين يوم ويوم  لاتنسون 😊

🦋🦋🦋🦋🦋🦋🦋🦋🦋🦋🦋🦋🦋🦋

نارفين  

كاعدة يم گبر امي  وحاضنة ترابه لدرجة اريد ادفن روحي يمها  و ابجي من كل گلبي  ممصدگة ماتت وعافتني وحدي بهاي الدنيا واني بعدني شعرف بيها

جنت عايشة لخاطرهة ومتحملة عوز الدنيا لخاطرهة وحرمت نفسي من الدراسة لخاطرهة

حتى ما ازيد عليها ضغط المعيشة  اعرف هي بالگوة مدبرة عيشتنا اني وياهة  يلا نلحگ نخلص يومنا بدون ما انام جوعانين  ومانحتاج لأحد 

بابا سبقها بالموت من سنين وخلانا وحدنا لا عدنا بيت ملك  ولا مأوى زين  نعيش بيه

عايشين بخوف وقلق ناخرات كلبنا اي كركعة نسمعها تالي الليل  تيبس الدم بشرينا من الخوف 

و لو ما صاحب البيت الگاعدين بيه خوش ادمي جان من زمان ضعنا بالشارع والناس تلطش بينا

بس الله ينطيه الصحة والعافية صاحب البيت حتى ايجار ماجان ياخذ من ماما يكول اني رايد اخرتي بيهن 

..... 

نارفين : ماما  وينج ماما  يم گلب الحنين  حبيبة وينج  صدك رحتي وما تجين 
ماما  رجعيلي على بختج
ماما  مشتاگة لضحكتج
ماما يم كلب الحنين
المن عفتيني  بهالدنيا هاي 

ماما گعدي اني شصير من بعدج 
ماما الدفنوج  راحو  محد بيهم حزن  عليج كلها غربة  بس ادوو الواجب ومشو  محد حس بية وبحزني عليج  محد گال هاي وين راح تعيش

فدوة اخذيني وياج ما اريد اعيش بعد  تعبت يا ماما تعبت لا  عندي اعمام ولا عندي سند  الناس انگلبت وحوش بيوم وليلة علي

الناس الجنة نضنهم جيران كشرو انيابهم علي. گامو يستغلوني بعز الصبح لا يخافون الله ولا يخافون عباده  الرجال الجنتي تخافين منه  وتقفلين البوب منه  اني هم صرت اخاف منه كمت اقفل على نفس الباب وابقى محبوسة بالبيت لا يشوفني  ويتعرضلي ماما الجوع والخوف  والقهر على فراگج كتلني 

اشكد بقيت اتوسل بكبرهة واشكي بالكت تكعد وتمسح دموعي بس شيكعد الميت  صح يكولون هو يسمعنا بس السمع شيفيد

رجعت للبيت  منهارة وعيوني وارمة ما اشوف جدامي امشي بلا وعي

طلعب البكلبي كله ومابرد كلبي وين جنت وين صرت  الدنيا افترت بية فرد فرة خلتني حايرة بزماني

ما ادري شسوي  وحدي شلون ادبر عيشتي كل الفلوس الجانن بيدنا. حطيتهن على امي قبل لا تموت