طرف ثالث

البارت السابع

رواية
#طرف_ثالث
الكاتبة ندى البياتي

البارت السابع
لاتنسون التصويت
والتعليق بين الفقرات

........

"" حسبالي خوش وليد سلمتك الروح....
ماشفت منك غير الهم والجروح...

آه يازماني وليش ما تنصح وياي
فوك القهر والظيم تتشمت عداي

شنسوي عالمكتوب والي الله راده
طبع الغدر بالناس يا يمه
عاده""

.........

هجرس : بنية ! يعني عفت التحدي الصار اسبوع اتوسل بيك حتى تفوزه و اكسر خشمهم واخذ الصفقة منهم وانت علمود بنية تضيع الأول والتالي هسة اذا اطيح حظكم ثنينكم احد يلومني

كافل : كتلك انطيك فلوس الصفقة كلها بس لاتضل تنگ براسي

هجرس : ما اريد فلوس مو بعازتهن اني اريد هاي الصفقة هيج عناد بيهم لك كبيت مي وجهي علمود اخذهة منهم وانت بكل بساطة خربت علي كل السويته

كافل : ااااخ يا عنادك بس مرة وحدة تنازل عن شي ولا تاخذ على انه شغلة شخصية صفقة ما صارت الك اكو الف غيرهة

هجرس : هذا الحجي قنع روحك بيه تريد اخليهم يتهنون بيهة واني اتفرج لو ادري احرك المشروع فوگ روسهم ما اخليهم يتهنون بيه

كافل : عفته يطحن بروحه عباله اذا راحت منه هاي الصفقة راح تنقص من هيبته جدام الناس

هذا طبعه مخربه كلشي عنده شخصي ولازم يحصله واذا ما ياخذه يضل شايل بگلبه وانوب الخسارة صارت بسببي بعد شيخلصني من ملامته

وتعال اتحمل زعله ونگه لو ادري مخلين وقت محدد ما جان رديت على مهند وتجفيت الشر وانا مو هامني الأثقال اكدر اشيلهم بدون جهد بس هجرس راح يشيب گلبي بسوالفه راح يبقى لازك على گلبي ويلوم بية

وصلت ليمهم : ماجنا متفقين تخلون وكت محدد الأتفاق جان برفع هاي الأثقال والي مايگدر يحملها يخسر الصفقة

نجيب : صح بس غيرنا الاتفاق گبل لانجي وصار حسب الوقت المحدد

كافل : مو مشكلة خل نعيدها

نجيب : خسرت فرصتك اذا كل شوي عايدين التحدي على شنو اسمه تحدي واصلا انت لگيتها فرصة حتى تنسحب ما تكدر ترفع هذا الوزن الثگيل متباهي بعضلاتك الهرمونية النافخها بالابر وكيلو متكدر تشيل

كافل : اني عضلاتي هرمونية !! لا غلطان حبيبي لا عضلاتي هرمونية ولا اني انسحبت بس ما عبالي اكو وقت محدد ورديت على الاتصال

نجيب : جان لازم تكون اكثر نباهة

كافل : بهاي حقك جان لازم اكون نبه لأن اتعامل ويا شلة قفاصة ماعدهم ضمير وبالنسبة للأثقال الي كلت ما اكدر ارفعهن شوف بعينك