ألهَــجع " نار الحـد "

الفصــل -٤-

ألهَــجع " نار الحـد "
للكاتبه روَيــده

آخخ يا لوعات روحي الما تطفى..

""""""""""""""""

هُيام:: اكو شخص تقدملي وراح نخطب بعد العده

بهتت ابتسامتي وفتحت عيوني على وسعها
-شنو؟

حچت
هُيام:: من ترجعين من الدوام نحچي يلا ماما الخط راح يجي

فزيت من مكاني وضربت الطاولة وصرخت بوجهها
-ماما انــتِ صــدگ تحچيــن؟؟

باوعتلي مستغربه وعگدت حواجبها
هُيام:: شبيچ هَجــع؟؟

ضحكت بأستهزاء
-شبيــا دگليلي شبيــا؟؟

هُيام:: تأدبي هَجــع!

-شلـون تگدريـن شلـون ينطيــچ گلبچ تفكريـن لا وبكـل رحابة صدر تجيـن دگُليلـي راح نخطب بعد العدة؟؟

هُيام:: هَجــع انتَ تشوفين حالتنا لو ما تشوفينها ابوچ مطلوب ١٥٠ مليون وبعت الفوگايَ والجوايَ بس حتى اسد حلوگ الديانه انتِ وراچ جامعة ومصاريف الدراسة والأكل والمعاش والإيجار منين اجيبلچ منيــن؟؟

-عدنا راتب بابا نتصــرف بي يكفينــا ما يحتــاج تتزوجين!!

هُيام:: شگد هوا راتب ابوچ شگد يكفي إيجار يكفي مصاريف شتحچين انتِ هَجــع شتحچين!!

-ماما بابا الاربعين مالته هذاك اليوم طلعــت وتريديـن تتزوجيــن بعد العدة ماما شلــون تگدريــن تنسين بابا وحبه الچ شلون تروحين تتزوجين غيره وتنسينه وتكملين حياتچ شلــون تفكرين اصلاً!

هُيام:: شسوي لعد شسوي اظل هيچ منين اجيب معاش منين ادبر فلوس نبقى احنا گاعدين بالأيجارات والديانه يوميه داگين بابنا؟؟

بقيت ساكته فاكه عيوني على وسعها والدموع تجمعت بيها ما اريد ارمش وتنزل دموعي بلعت الغصه احچي

-مع الأسف عليچ ماما مع الأسف بابا وثق بوحده مثلچ!

فكتلي عيونها بقوه وخزرتني
هُيام:: كله بسبب ابوچ هذا دلال ابوچ وصلچ لهنا وخلاچ حتى امچ ما تحترميها!

صحت بعلو صوتي وجرحتها بالكلام
هَجــع:: مره مثلچ ما تستاهل احترمها فاهمة؟ روحي تزوجي وكملي حياتچ وانسيني وانسي شمس وبابا!!

حچيتها وانداريت ودموعي نزلت ركضت لغرفتي واسمعها وراي تصيح بحرگة

-هاي مجازاتي هَجــع كلشي علمودچ وهيچ تسوين بيا، هَجــع!!