ألهَــجع " نار الحـد "

الفصــل-١١-

ألهَــجع " نار الحـد "
للكاتبه روَيــده

خذلــوني هلـي واعــز نـاسي، تهجـولت بالظلمـة،
و من شفـت خيـط الضـوء انطفـى

""""""""""""""""""""""""

مسحت دموعـي اشاهگ وعيوني بعيونهم وخالتـي ساكتة كلشي ما تحچـي،

هَجــع:: لا كافـي الي سمعته كافي ما ابقى ولا دقيقـة هنـا

احمد:: هَجــع شنو هل حچي ويـن تروحين؟

صرخت بوجهه
هَجــع:: ارض الله واسعه احمد ارض الله واسعه وما توگف على شخص وشخصيـن!!

احمد:: ماكـو طلعه وين تروحيـن؟

انداريت وهو لزم إيدي جرني نترت ايدي بقوة عاگدة حواجبي دخلت للـ غرفـة لميت غراضي و احمد فوگ راسي يحاول يمنعني

احمد:: هَجــع شبيـچ تخبلتـي وين تريدين بنص الليل؟؟

صحت بوجـهه وامل فزت على اصواتنا
هَجــع:: اي تخبلـــت وما ابقى هنـا زيادة ساعدتوني ومشكورين ما قصرتوا بس لهنا وبـس عبالكم غبيـة وتضحكون عليَ بكم كلمات بس لا ما حزرتوا اني هَجــع بنت حسين يعني بنت العز و الشرف ابويَ رباني احسن تربيـة و ما اخلي امثالكم يطعنون ويشككون بأخلاقي وشرفي!!

احمد بقى ساكت فاك عيونـه ويبلعـم لميت ملابسي وامل مصدومة تريد تفتهم، طلعت من الغرفة لامه ملابسي وكتبي وكل شي يخصني،

طلعت و بـ گلبي تسعر نار و دمعـة بعدها ما طاحت من عيني، طلعت للـ باب و احمد لزم ايدي نترتها و هوَ حچه

احمد:: هَجــع الله يخليـچ بطلـي ابقي هنا اكلـچ والله امي مو قصدها

غمضت عيوني اتنهد
هَجــع:: قصدها ولا مو قصدها اني ما ابقى هنـا..

احمد:: هَجــع فدوه اروحلـچ!

لزم الجنطـة مالتي يتوسلني بنظراته
هَجــع:: عوفنـي احمد