إسكريبتات

الإسكريبت السادس " أنا سويّة يا مريض "

_ مساء الخير .. ينفع أقعد وأخد من وقت حضرتك ten minutes ؟

= أنتِ كدة كدة قعدتي أصلًا يا آنسة، اتفضلي

_ مبدئيًا أحب أعرفك بنفسي أنا مي رأفت أخصائية نفسية.

= آه دكتورة مجانين يعني.

_ أنا مـسمحلكـش!!! ومفيش حاجة اسمها مجنون يا حضرت، احنا بس اللي جهلة ومعندناش عِلم ولا دراية كافية أن المرض النفسي ليس جنون وإنما الجنون الحقيقي هو الإعتقاد أن المرض النفسي جنونًا.

= ءءءء أنتِ عايزة ايه؟؟؟

_ أنا هفهم حضرتك .. اسمك إيه الأول؟؟

= اسمي أحمد

_ عاشت الاسامي يا أستاذ أحمد، بص يا حضرت انا بشتغل أخصائية نفسية زي ما قولت لحضرتك .. وعلشان إحنا عارفين ان كلنا بلا إستثناء مرضى نفسيين ولكن فيه كتير جدًا مننا بيعاند وشايف أنه عيب أو حرام أننا نعترف بكدة، على الرغم أن أول خطوات العلاج هو الإعتراف بالمرض .. وزي ما قولت لحضرتك أن برضو المرض النفسي مش عيب، وإن كلنا بتحصل في حياتنا مشاكل بتخلينا نعاني من ضغوطات نفسية وعصبية وجسدية كمان وكل ده في الآخر بيصب في إكسير حياتك وبيملاه مرض والمرض ده لما بيتمكن منك بيتحول لمشكلة نفسية لازم تتحل في أسرع وقت ممكن.

= حلو اوي الكلام ده .. انا بقى مطلوب مني إيه؟؟

_ احنا بعد أبحاث كتيرة إكتشفنا أننا مهما وعينا الناس لأهمية العلاج النفسي برضو مفيش حد هيستجيب وكله هيعاند ويكابر ويرفض الموضوع ده، فإبتكرنا شيء جديد أشبه بالمنوم المغناطيسي هيخلينا نحلل شخصية الإنسان ده ونكتشف شخصيته الحقيقية وبدقة.

= طب إفرضي الشخص ده زيّف معلومات او حاول يحسن من صورة نفسه.

_ مستحيل يا أستاذ أحمد .. إحنا سبق وعملنا تجربة وهي أننا نجمع قدر كبير من الناس نعملهم إستقصاء وده عبارة عن مجموعة أسئلة مختلفة ومتنوعة وعلمية ويجاوب عليها بكل صراحة وصدق، ولكن المفاجأة أن 90% من الأشخاص زيفوا وخبوا شخصيتهم الحقيقية علشان ميتكشفوش، وناس تانية معندهومش أصلًا معلومات كافية وصحيحة عن شخصيتهم، وناس تانية مفهمتش الأسئلة بطريقة صحيحة فده خلاهم يجاوبوا غلط .. فعلى قد ما كان الإستقصاء ده مُوفر وسهل وعلمي .. على قد ما كان له سلبيات كتيرة جدًا ومنجحش.

= طب إيه التجربة الجديدة اللي عملتوها دي؟؟

_ التجربة دي زي ما قولتلك شبه المنوم المغناطيسي وبتدخلك في عالم اللاوعي واللاشعور .. وهي إننا بنخليك تتخيل نفسك في موقف وهمي معين وأسألك مجموعة أسئلة بناءً عليها بنقدر نحدد شخصيتك الحقيقية.

= مش قادر أصدق برضو .. لأني ممكن أحوّر أو أقولك هعمل كذا او كذا وأنا بكذب أصلًا .. ف لأ يا آنسة حاولوا تطوروا من فكرتكم الأول، أو تتعالجوا أنتوا من الأوهام دي.

_ تمام يا أستاذ أحمد  .. بس ممكن أعرف حضرتك شغال ايه؟؟

= موظف في مصنع الغزل والنسيج فرع السويس.

_ و ليه مش في القاهرة؟؟

= يخصك في حاجة؟؟؟

_ من باب الفضول يا حضرت.

= نقلوني فرع السويس بعدما اتخانقت مع مدير المصنع وشدينا سوا فزقيته على آلة النسج جابتله إرتجاج في المخ.

_ يا نهار ابيض!!! طب مش كدة يبقى شروع في قتل.

= أنا وقتها كنت متعصب يا آنسة ولما ببقى متعصب غضبي بيعميني ومبكونش شايف قدامي وبعدين هو يستاهل أي حاجة تجراله كمان.

_ طب ليه كل ده عملك ايه؟؟

= أصلًا هو دفعتي ومتخرجين سوا بس مكنتش بطيقه علشان كان بيحب مراتي زمان، وهي رفضته واتجوزتني أنا .. من ساعتها وهو بيرازي فيا ومش سايبني في حالي.

_ طب وليه أنت اشتغلت عنده في المصنع من الأول؟؟

= علشان أكيده .. علشان كل ما أشوفه أثبتله أن الحاجة اللي كان عايزها بقت تخصني أنا.

_ أممم .. يعني سر الخناقة بقى كانت على كدة؟؟

= أيوة قعد يلقح عليا بالكلام وعلى مراتي فالدم جري في عروقي روحت باطحه في دماغه وزقيته على الآلة.

_ أنت سادي كدة ليه يا أستاذ أحمد؟؟؟ للدرجادي لو حد عصبك ممكن تعمل فيه كدة؟؟

= وأكتر من كدة كمان، علشان أنا مفيش حد يعلي عليا عدم اللامؤاخذة .. اللي عايزه يبقى لازم يكون بتاعي وبعدين انا مغلطتش ولو رجع بيا الزمن هعمل فيه نفس اللي عملته قبل كدة.

_ هايل هايل.

= هو ايه ده اللي هايل؟؟؟

_ شخصيتك اللي تستحق يتقال عليها مرض نفسي وبجدارة .. حضرتك نرجسي مغرور بتاع مصلحتك، إنفعالاتك شديدة، عايز كل حاجة تبقى بتاعتك، مستعد أنك تبقى واطي وتتمنظر بمراتك علشان بس تكيد واحد مبتحبوش، لأ وكمان كنت هتبقى سبب في قتل شخص ولو عاد بيك الزمن هتقتله بجد، حرفيًا سوبر توكسيك مشوفتش زيه .. ده أنت هتبقى مصدر ترقيتي الفترة الجاية يا راجل .. طلعت مُغفل أوي يا ابو حميد ومش زي ما أنا توقعت، ده أنت لُقطة.

= أنـتِ إتـجننتي يابت أنتِ؟؟؟ أنتِ إزاي تقولي عليا كدة؟؟ وبتجرجريني في الكلام علشان أبحاثك الـ****

_ نضيف كمان لقائمة صفاتك العَفِنة أن لسانك زِفر ومش متربي.

= آه لا ده أنتِ هبت منك على الآخر ومش هسيببك النهاردة.

_ طب ممكن بس تستنى عشر دقايق وبعدها تعمل اللي بتقول عليه.

= اشمعنا مش فاهم؟؟

_ علشان كل الكلام اللي إتقال دلوقتي متسجل وحاليًا فيه عربيتين عاملين سباق وجايين علينا، أولهم الشرطة وثانيهم مستشفى الأمراض النفسية .. مش كنت بتقول أن المرضى النفسيين مجانين؟ أديني يا سيدي هوديك هناك تشوفهم لايف .. بس مش قبل ما الحكومة تعمل معاك الواجب وزيادة كمان.

= أنتِ .. أنتِ أكيد مش طبيعية.

_ عندك حق .. أنا سويّة يا مريض.
____________________

اسكريبت قصير بس متنكروش انه كوميدي😂❤
اعملولي فوت بقى وفرحوني❤