اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
🦋ميران🦋
(أنا عندي استعداد أسيب ياسر عشانك، لكن إنت عندك استعداد تسيبها عشاني؟!) #viral تعبير شائع ومنتشر معناه (منتشر) وفيه مثل viral عندنا جداً بيقول (الضُفر مايطلعش من اللحم)، مجازاً عن مدى قوة العلاقات بين الأقارب والأخوات، جرّب كده تشد ضُفرك من لحمك وشوف هاتحس بإيه...
ألم.... ألم رهيب لايُحتمل ولو ضغطت شوية على نفسك هاتكتشف إن الضُفر بيطلع من اللحم عادي جداً لكنه بيسيب وراه جرح عميق لا الزمن ولا البُعد ولا محاولات النسيان بيقدروا يعالجوه ومع الوقت بيتحول لنُدبة بتشوه وِش عيلة كانت في يوم من الأيام متجمعة على الود والإحسان وعلى رأي ميادة الحناوي (كان ياما كان.. الحب مالي بيتنا ومدفينا الحنان .. زارنا الزمان.. سرق منا فرحتنا والراحة والأمان)..
الحقيقة ياست ميادة الزمان برئ وماسرقش حاجة، ومع الأسف الحرامي مش غريب ودود أهل البيت منه فيه...
بيت كبير في منطقة راقية .... بيت غير البيت وجدران تانية لم ترى شئ من الأحداث.. مشهد مُتداول (كليشيه يعني) لأم واقفة في المطبخ بتجهز مالذ وطاب ومن الواضح إن فيه مُناسبة سعيدة انهاردة تدعو للإحتفال..
الإبنة الصُغرى والصديقة المُقربة في الدور العلوي بيشرفوا على تنضيف وتظبيط أوضة (ميران) والفرحة بتتنطط حواليهم...أخيراً حبيبتهم الغايبة هاتعود وتنور دنيتهم تاني بعد ما قررت تسيب كل حاجة وتمشي... تمشي بعيد أوي... بعيد من قارة لقارة.. ومن بلد لبلد.. بمسافة أربع سنين عشان تقدر تنسى وتتعافى
:-غادة!، هي يُمنى عرفت إن ميران جاية انهاردة؟... سؤال سألته روان أخت ميران الصغيرة لصاحبتهم وجارتهم في بيتهم القديم وأكتر شاهدة على الضُفر وهو بيطلع من اللحم بالدم وبيمزع قلوبهم
انتهت غادة من رش المُعطر في الجو وقالت بعدم اهتمام:-اعتقد لو خالاتك عرفوا يبقوا أكيد قالوا لها
