(طنط ڤيكتوريا)
:-Por qué Basma no duerme inmediatamente después de regresar del trabajo y permanece ocupada con su teléfono todo el tiempo?
:-هي باسمة مابتنامش على طول ليه لما بترجع من شغلها ودايماً ماسكة تليفونها؟!
واضح من ترجمة السؤال إن اللي بيتكلم شخص مش عربي...
طنط ڤيكتوريا...
حماتي الأسبانية وعملي الأسود في الحياة...
كنت لسه راجعة من شغلي ويادوب خلصت أكل ومسكت تليفوني أكلم أهلي شوية قبل ما انام وبالصدفة وانا متجهة ناحية أوضتي لقيتها قاعدة مع "أندرو" إبنها وجوزي بذات الوقت وبتبخ سِمّها في ودانه وبتحاول تشككه فيا وفي أخلاقي....
إسمي "باسمة" بنت عربية، عندي ٢٧ سنة وبشتغل في مجال السياحة وبتقن خمس لُغات من ضمنهم الأسبانية...
وأثناء تأديتي لأحد مهام العمل اللي كان بيفرض عليا التعامل مع أجانب بشكل مستمر اتعرفت على "أندرو"....
"أندرو" أو "أندي" زي مابحب أدلعه شاب أسباني عنده ٣٢ سنة، كان بيشتغل في نفس مجالي داخل بلدي وده سبب تعمق علاقتنا أكتر لدرجة وصلت للإرتباط العاطفي...
بعد شهرين بالظبط من تعارفنا عرض عليا الزواج...
وقتها كنت طايرة من الفرحة لكن فيه مشكلة كبيرة واجهتنا وهي إن "أندرو" مش من نفس ديانتي...
ولأنه بيحبني طلب يروح المسجد ويشهر إسلامه...
انبهرت واعتقدت ساعتها إني البنت الأكثر حظاً في الدنيا...
ربنا رزقني بإنسان جميل شكلاً وموضوعاً...
بيحبني لدرجة إنه غير دينه وحياته كلياً عشاني...
وافد من مجتمع راقي وعالم مُتفتح وديموقراطي...
حلو؟!...
لا مش حلو لأن تاني مشكلة قابلتنا هي عدم استطاعة أهله إنهم ييجوا من أسبانيا عشان يتكلموا مع أهلي ويتقدموا رسمي ويطلبوا إيدي منهم كتقليد وعُرف أصيل في مجتمعنا العربي...
اتنازلت وقولت عادي دول أجانب وناس عملية وأهم حاجة عندهم الشُغل وأكيد المظاهر دي مش هاتفرق معاهم...
وفعلاً أندرو قابل عيلتي لوحده واتخطبنا وكتبنا الكتاب....
تمام؟!...
لا مش تمام لأن فيه مشكلة تالتة ظهرت لما طلب مني نأجل الإنجاب لأننا في بداية حياتنا ومحتاجين ننظم أمورنا أكتر ونستعد كويس لاستقبال أفراد جديدة في أسرتنا الصغيرة....
الصراحة انا ارتاحت للفكرة ووافقت وفعلاً تم الزواج والحياة مشيت زي الفل لمدة سنتين....
أنا بشتغل وهو بيشتغل وعايشين سعداء جداً...
أهله ولا مرة حاولوا يشوفوني أو يتواصلوا معايا...
ومع انتشار كورونا شغلنا اتأثر والوضع المادي لم يكن مثل السابق وبعد انتهاء الوباء الحمدلله، طلب مني نسافر أسبانيا كام يوم نتفسح و... ويمكن نلاقي فرص للعمل أفضل من الموجودة في بلدي...
