Legend Of Princess Yun Shang(MMTranslation)

စာစဉ်(၁) အပိုင်း(၁၀)

အဖြစ်အပျက်တွေ ပြီးသွားတဲ့နောက် နေမင်းကြီးသည် ပိုမို တောက်ပလာခဲ့သည် ဟု ယွင်ရှန်း ခံစားမိနေ၏။
သူမနှင့် ချင်းရီတို့နှစ်ယောက် ချင်ရှင်းနန်းဆောင်ရှိ ဥယျာဉ်ထဲတွင် ရှိနေပြီး ချင်းရီ ဒန်းလွှဲပေးနေရင်းဖြင့် သူမတို့ စကားပြောနေကြ၏။

"မင်းသမီး မင်းကြီးက ဒီကိစ္စကို ကိုင်တွယ်ဖို့ မိဖုရားရှု ကို လွှဲထားပေမဲ့ ဧကရီက လက်လွှတ်မယ် မထင်ဘူး ။ သူမသာ စုံစမ်းမယ်ဆိုရင် ကျွန်တော်မျိုးမ ကြောက်မိတာက ......"

ချင်းရီ နေ့ခင်းဖက်မှ အဖြစ်အပျက်များကို ပြန်တွေးမိသည်နှင့် အထင်ကြီးမိသွားသည် ။သူမ ဤရှစ်နှစ်အရွယ် မင်းသမီးလေး၏ လျို့ဝှက်ချက်များစွာကို ကိုယ်တိုင် ်တွေ့ဖူးခဲ့ပြီး ဖြစ်၏။ ယွင်ရှန်း ပြုံးလိုက်ပြီး

"သူမ လက်လွှတ်မှာ မဟုတ်ဘူး ။ ဒီရက်တွေအတွင်းမှာ တစ်ယောက်ယောက်က နင့်ကို လာပြီး စုံစမ်းလိမ့်မယ် ။ ဒါပေမဲ့ ဘာမှ ကြောက်စရာမလိုပါဘူး ။ ငါပြင်ဆင်ပေးထားတဲ့ အတိုင်းပဲဖြေလိုက် ။ ဒီကိစ္စ ငါပါတယ်ဆိုတာ သူမ ဘယ်တော့မှ ရှာတွေ့မှာ မဟုတ်ဘူး ။ ပြီးတော့ သက်သေတွေအားလုံးကလဲ ရှုရ နန်းဆောင်ဆီကိုပဲ ဦးတည် သွားလိမ့်မယ် ။အဲဒီလိုဖြစ်လာတာနဲ့ မိဖုရားကြီးက မိဖုရားရှုကို အလွတ်ပေးမှာ မဟုတ်ဘူး ။ ဒါဆို ငါတို့က လုံလုံခြုံခြုံနဲ့ သူတို့ အချင်းချင်း တိုက်ခိုက်တာကို ကြည့်နေလိုက်ရုံပဲ "

ချင်းရီ တိတ်တဆိတ်သာ ရပ်နေမိတော့သည် ။ နန်းတော်ဆိုသည်ကား လျို့ဝှက်ကြံစည်မှုများနှင့် တိတ်တဆိတ်ပူးပေါင်း ကြံစည်မှုများဖြင့်သာ ပြည့်နှက်နေသော နေရာတစ်ခု ဖြစ်ပေတော့၏။

မင်းသမီးလေးသည် အသက်ရှစ်နှစ်မျှသာ ရှိသေးသော်လည်း
ထိုအကြောင်းအရာများအား စေ့စေ့စပ်စပ် သေသေချာချာ နားလည်နေပေတော့သည် ။ ထိုအရာမှာ အကောင်းဖြစ်မည်လား အဆိုးဖြစ်မည်လား ဆိုသည်ကို သူမ မခွဲခြားနိုင်တော့ပေ ။

"ဒါနဲ့ ချင်းရီ စားဖိုဆောင်ထဲက လူတစ်ယောက်ယောက်များ စန္ဒကူးနံ့ ရမိကြသေးလား ? "

ထိုမေးခွန်းသည် ယွင်ရှန်းအား နေ့ခင်းဖက်မှ အကြောင်းအရာများကို ပြန်တွေးမိသွားစေသည် ။ ခွေးများအားလုံးသည် စန္ဒကူးနံ့ကို ရှုမိသည်နှင့် စတင်ရူးသွပ်လာတော့သည် ။ တာအိုဆရာတော်သည် သူမရှေ့သို့ လောင်ကျွမ်းနေသော အမွှေးနံ့သာတိုင်ကို ယူဆောင်လာရန် ကြိုးစားနေဆဲဖြစ်၏။ ထိုသို့ဆိုလျှင် စန္ဒကူးနံ့သည် ဆေးကို အဆိပ်အဖြစ် ပြောင်းပေးသော အထောက်အကူပစ္စည်းမှန်း ထင်ရှားလှပေသည် ။ သို့သော် လင်း ပြောပြခဲ့သည်ကား ကြက်ကလေးများ၏အစာထဲသို့ ဆေးထည့်လိုက်သည်နှင့် ရူးသွပ်သွားခဲ့သည်ဟုသာ ။