البتاوين ومابين جدرانها

كَشف المجهول

" ما اسئلك ادري ماعندك صدگ

ساعه مرهم للجروح وساعه بالعظمه تدگ "

__________________________________________

_ طفرت مفزوعه على صوت الباب يندك

بعد ما اخذتهه النومه يمكن بسبب الدوخه من الطريق

لأن هاي الغرفه ما ينغفى بيهه من برودتهه مطت ايدينهه بكسال

وايدهه ع ركبتهه المتشنجه بسبب النومه عالكرسي متعرف شكد

اصابع ايدينهه تحس الدم واگف بيهم جامدين

للحظه فرت عينهه عالحيطان تشوف الساعه بس مجان اكو شي

فززهه صوت الباب يندك مرّه ثانيه وصوت الحجيه عرفته من حجت

_ خايبه وينج يالاجنبيه فتحي الباب ادحكج حلوه لا فتحي

والله وكت غرفة ابني وانتظر لمن يفتحولي حيل كبل وماكسرته

اخ من الوكت قدار باك مني حيلي

_ يامور: هوه كال لاتفتحين بس من اودي عليج اي بس هاي الحجيه

يلا ميخالف يامور عيب مره جبيره، بس لاتكتلني بالعوجيه بس هاي

ناقصتج يامور مانكتلتي بهيج سلاح

_ وينج يخايبه صارلي ساعه بالباب واكفه وخري مناك

:شلوم عِلخ(سلام عليك)

_ ها

_آيكنو ايثيك (شلونج)

_هااا !!

_ وثول ، اريد وحده تفهم عليه ماكو

_ امبله فهمت، انتي مسيحيه

_ يبوو بردي(برد)

_ شمكعدج هينه ، طلعي، ربي كلهن فشيطات(ثولات)

_ يامور: الحمدالله موبس اني بيه جوسيكا مال اججي وي روحي

هاي هم مثلي نوب وين تريدني اطلع لاتسويلي مشكله

_ خاله ماكدر هوه كال لـ

_ تعالي وراي كلت تبقين هينه تتجمدين طلعتي افشط(اثول) من هذنيج

_ امري لله طلعت وراهه وهاي ترطن بيهن حجايات سريانيات

اتذكر كون اهل امي من عائله مسيحيه جدتي جانت تحجي بهاي اللغه

بس كلمات ببعض الكلام مو هواي ماحفظت غير السلام وعبارات

بصيطه بس ، صوجي والله ماكعدت اتعلم منهه جا افتهمت هاي شكالت

شطيفات مدري فشيطات شنو يعني شتمتني مدري شنو

_طلعت وياهه اخذتني الغرفه من دخلت صارت عيني عاللي مخلي

ذراعه من وجهه يشوف منو فتح الباب تلاقت عيونه عزه هذا هوه

_ تعالي