وليف الروح تدري من تكون غرام القلب واغلى من العيون

4+

-
غرام كانت لابسه فستان احمر ميد وفاتحه شعرها ويفي وحاطه فوقه الطرحه السودا رفعت الطرحه تتلثم فيهاا من سمعت صوت لمى جات
لمى : امسك
بهاج تنحنح : الصحون ثقيله دخلوها سوا
مشى بهاج ولمى وغرام شالو الصحون ودخلوها للحريم يحطون العشا بالصحون .
غرام كانت طول وقتها تفكر كيف الصدف جمعتهم وطلع ولد عمها تذكر شكله زين ومستحيل تنساه هو الي انقذها من الهلاك هو نفسه الي ماتركها لين وصلها بيتها التفتت لسعاد تأشر بعيونها لها انو تلحقها وقامت من العشا ولحقتها سعاد للغرفه .
غرام : سعاد هو تخيلي !!
سعاد عقدت حواجبها : مين ؟
غرام : الشرطي الي ساعدني تذكرين ؟ الي انقذني ذاك اليوم هو نفسه!
سعاد : وين وكيف ووش ماني فاهمه !
غرام تنهدت بتوتر : طلعت انا ولمى ندخل الصحون من عند الباب ودخلت لمى تجيب مويه وملاعق وانا تقدمت اخذ الصحون من اخو لمى وطلع هو نفسه الشرطي هو نفسه طلع اخو لمى !
سعاد فتحت عيونها بصدمه : كذابه ! احلفي
غرام : والله هو
سعاد : يالله كيف! ...مسكت راسها بصدمه يارب ماعرفك !
غرام عضت شفتها : الا عرفني !
التفتت سعاد بصدمه : شافك؟
غرام : ايه صدمني والله من غير شعور تكلمت وهو رفع راسه وناظرني عرفني على طول يسعاد !
سعاد مسكت راسها : يويلي يارب مايفضحنا !
غرام : لا ان شاءالله مايفضحنا
دخلت رنا والتفتو عليها : انتم هنا وش عندكم ؟
غرام تنهد : ولا شي امشو خل نخرج .
بعد العشا الحريم جلسو بالمجلس يشربون الشاي والبنات كانو بالحوش عالدكه جالسين يسولفون وبينهم براد الشاهي والمكسرات والشبسات الي جابتهم ملاك وجميله
وعد : بنات ماتعرفنا زين كم اعماركم وتدرسون وش ؟ انا ببدا متخرجه من الجامعه ومخطوبه
وسن : انا متخرجه وطبقت بمدرسه للاطفال بس ماعندهم مكان شاغر وجالسه بالبيت حاليا وعزباء
ضحكت لمى : بيجيك العريس معليك وترا وعد مخطوبه من اخوي
غرام نزلت فنجالها تناظر ماتدري هو نفسه الشرطي ولا لا والتفتت لسعاد الي تناظرها ورجعت ترفع فنجالها بهدوء تشرب منه
كملت لمى : انا باقي ادرس بالجامعه قسم شريعه وعزباء
رنيم : وانا كمان ادرس جامعه وعزباء
ضحكو البنات من المسمى الي اخذوه على محمل الجد وكملو يتعرفون
جميله : انا مخلصه جامعه حديثاً وعزباء برضو
ملاك : انا ادرس جامعه قسم شريعه مع لمى وعزباء دوركم يالله اشرت على سعاد وغرام ورنا
سعاد : انا مخلصه جامعه وعاطله عن العمل وعزباء
غرام : انا ادرس جامعه قسم رياض اطفال وعزباء
رنا : وانا ادرس جامعه قسم تمريض وعزباء ادور على ثلاثيني جاد وضحكو البنات من اسلوبها
سعاد : ترا هي كذا لسانها متبري منها !
رنيم : باقي صغيره وش لك بالزواج والمسواليه انبسطي اول
رنا : ترا مو منجد !  بس استهبل معكم
غرام بتردد : طيب عندكم اخوان ؟
سعاد التفتت على غرام بتعجب من سوالها وعقدت حواجبها
ضحكت جميله : ليه بدورين عريس لرنا ؟
غرام باحراج : لا بس بشوف عندكم اخوان ولا زينا مجموعه بنات
وسن ضحكت: احنا عندنا اخ واحد اسمه سياف ودلوع الماما
وعد : انا الكبيره وانسحب علي يرضيكم !
رنيم : اسكتي بس ابوي مدلعك اكثر منا ماراح فيها الا انا ووسن امي مدلعه سياف وابوي مدلعك
ملاك: صفوني معكم لان حتى انا مسحوب علي امي مدلعه راشد وعبود وابوي مدلع جميله
جميله : عن الكذب والله ابوي يدلعنا سوا مايفرق بيننا
غرام : يعني عندكم بس اثنين؟
جميله:ايه راشد الكبير وعبدالله بعده وبعدين انا والاخيره ملاك
سعاد : ماشاءاللله
غرام : وانتي لمى؟
لمى : انا عندي ثلاث اخوان راكان وناصر وبهاج وانا البنت الوحيده والمدلله طبعاً  رفعت شعرها تهفه بدلع
غرام ابتسمت : ماشاءاللله ليت عندنا اخوان
رنا :بنات مرام شفتها داخل مع مرت اخوكم شكلهم تعرفو على بعض وكرشونا
لمى : بسمه مرا عسللل بجيب بشرى بنتها اموت عليها وقامت تدخل للمجلس
غرام : الله عاد اموت عالاطفال احب اجلس معهم واسمع سوالفهم
سعاد ضحكت: غرام كانت تجلس مع بنت جارتنا عندها اخت صغيره وغرام كانت ترابط عندهم ماتقدر تتحمل
رنا ضحكت تكمل: تذكرون يوم ام بدريه طردتك قالت لعد تجين !
غرام ضحكت باحراج : ياخي مقدر اقاومهم وهم صغار والتفتت لجهه البنات تكمل البنت صغيره كانت دوبها مالها شهر شهرين وانا طفشت الحرمه من عصر لين الليل عندهم ماخليهم يرتاحون لين قالت لاتجيني
دخلت لمى ومعها بشرى ومرام وبسمه وتقدمو يجلسون يكملون الدائره
لمى : هذي بشرى عمرها ست سنين
غرام : هاتيها عندي بسولف معها
لمى : واضح من شكلك تحبين الاطفال اصلا
بشرى : انا مو طفله ترا انا كبيره دخلت المدرسه
ضحكت غرام : يروحي تعالي انتي كبيره معليك من لمى
جلست بشرى بحضن غرام : شعرك حلو ابي نفسك
غرام : يروحي والله ... لاتقصين شعرك انا كنت زي شعرك بس ماقصيته من كنت صغيره لين الحين وصار كذا وابتسمت
بشرى حطت اصبعها على غمازات غرام : حلوه هذي
غرام باست خدها : وه انتي الحلوه والله والتفتت عالبنات تضحك
سعاد : الحين تسحب علينا