وليف الروح تدري من تكون غرام القلب واغلى من العيون

7+

                        مرٍ تمشي داخل العين يا عين
                        ومرٍ تخش الفكر محد ٍ يردك

                       ومرٍ تخيم في الحشى بين ضلعين
                       وعلى غدير الود ترشف بيدك

                       ومره تصرخها على الجبد باثنين
                       زاحف على كيفك ولا فيه قدك

-
غرام رفعت حاجبها من اسلوب ريانه : وش بيننا؟
ريانه : مادري اسالي نفسك !
غرام التفتت تتعطر : الظاهر انك تدورين مشاكل نصيحه ابعدي عني لان مالي خلقك ابد !
ريانه وقفت عند غرام : شوفي كلمتين بقولها لك ابعدي عن بهاج !
غرام ضحكت بستفزاز : بصفتك مين ؟ اخته ولا خطيبته؟
ريانه تكتفت : بصفتي حبيبته! وقريبا زوجته
غرام ضحكت : هالحلم تحلمين فيه دايم ؟
ريانه دقت كتفه غرام باصبعها : هذا كلامي ووصلك ولا تضنين اني ماشفتكم امس سوا حاطه عينك عليه وتتلزقين فيه !
غرام دفتها : اصبعك قبل ينمد اكسره لك فاهمه وبعدين متى تلزقت فيه يالمتخلفه !
ريانه : شفتك بعيوني امس بتكذبيني ؟
غرام : بعدي عني دام النفس عليك طيبه !
ريانه ضحكت تتكتف : اشوفك مانكرتي ؟ يعني صدق حاطه عينك عليه !
غرام اشرت على راسها : مجنونه انتي ؟ بعدي عني لاحطك براسي ثم والله لاكرهك اسمك تفهمين!
ريانه بتمثيل : يمه امانه خفت !
دخلت مرام عاقده حواجبها : وش فيكم اصواتكم واصله برا؟
غرام التفتت لمرام بغضب: شيليها عني جايه تدور مشاكل معي!
مرام التفتت لريانه : جده معصبه تقول وش هالازعاج !خلاص عيب استحو على وجيهكم وش اسلوب الهمج ذا !
ريانه تقدمت عند اذن غرام تهمس : احذريني يغرام نصحيه لاني انا لو حطيتك براسي مايصير لك طيب ! وابعدي عن بهاج دامنا على بر وتقدمت تخرج من الغرفه
غرام غمضت عيونها بغضب : معتوهه
مرام : طنشيها مانبي مشاكل غرام تكفين !
غرام بغضب : انا ماجيتها هي جت تدور  المشاكل
مرام : خلاص طنشيها
غرام تنهدت بغضب ووقفت عند الطاوله ماسكه خصرها تقدمت مرام : اشبك ؟
غرام : ولا شي بس تعبانه نزلت علي واحس نفسيتي صفر
مرام : خلاص ارتاحي اسوي لك الحين شي دافي يهدي وجعك
غرام : ارتاحي انا بسوي لي وبخرج برا احس مكبوته
مرام : مابتروحين معهم ؟
غرام : لا تعبانه مالي خلق
مرام : سلامتك
دخلت اغراضها بشنطتها وخرجت للمطبخ تسوي شي تشربه
مزنه : البنات رايحين مع عبدالله منتي رايحه معهم ؟
غرام : لاوالله جده تعبانه لمى فين؟
مزنه : عيال عمك مو فيه ولمى برا عند ابوها واخوانها بالمجلس والحين انا خارجه لهم
غرام :طيب امي وين
مزنه : امك راحت مع عماتك عند ام فلاح يزورونها
دخلت المطبخ غرام تجهز لها كوب بابونج تهدي الم بطنها وخرجت للحوش الخلفي وجلست على الدرج لابسه بنطلون اسود وتيشيرت اسود وعلى اكتافها جاكيت صوف باللون البيج شعرها مفتوح على جنب تسمع اذان المغرب وبيدها كوبها
مرام بعبايتها : غرام اذا امي سالت عني قولي خرجت مع منصور
غرام ابتسمت بهفوت : على وين رايحه معه ؟
مرام : كلمني قال البسي عباتك بنخرج
غرام : تتهني حبيبي روحي انبسطي
مرام تقدمت تبوس خد غرام : يهنيك حبيبي يالله سلام
خرجت ريانه الحوش تشوف غرام جالسه ومعطيتها ظهرها تقدمت لين باب الحوش القاسم بين حوش الرجال ونادت بهاج الي شافت سيارته مع الطاقه  رفعت راسها غرام من شافت ريانه تخطها وتنادي بكل جراءه
تقدم بهاج ببدلته : هلا ؟
ريانه التفتت تشوف غرام تناظرها وبدلع متصنع : براق من اليوم ماخرج من القفص عادي اخرجه ؟
بهاج : وينه ؟
ريانه : بالغرفه حطته لمى
بهاج : جيبيه اصلا باخذه خلاص
ريانه بدلع : من عيوني ثواني بس والتفتت على غرام تشوفها جالسه تناظرها ابتسمت وراحت تركض لداخل
دخل بهاج على عتبه الباب يبي ينزل البوت من رجله وشافها جالسه ومميله راسها تناظره قلبه رجف من نظرتها وجلوسها امامه ولا حتى حاطه شي على شعرها ايده وقفت لارادياً على البوت يتأملها .
غرام كانت تشوفه كيف نزل يفك البوت ورفع راسه من انتبه لها ماتدري ليه حست نفسها بتبكي مشاعر غريبه داهمتها  ماتدري هي من لخبطه الهرمونات مع دورتها ولا صدق هي محتاجته !
عيونها بعيونه ومارمشت ولا هو رمش ثواني لكن كانت بمثابه ساعه تعصف فيها مشاعرهم
سمعت صوت ريانه جايه تنهدت تنزل عيونها لكوبها .
ريانه : امسك ترا طول وقتي معه عشان مايطفش بس احسه طفش مرا
بهاج : شكرا والتفت للقفص يخرج براق
ريانه التفتت لغرام تشوفها صاده وتقدمت من بهاج : هو مايحب اي احد يقرب منه ! بس الي يعرفهم
رفعت راسها غرام ونفخت خدها بلسانها من استفزاز ريانه لها
بهاج كان ساكت وعينه كل شوي تميل على غرام وترجع لبراق قامت غرام وحطت كوبها عالدرج واتجهت لهم بهدوء لين وصلت لبهاج وبكل جراءه مسكت يد بهاج الي عليها براق تقربه من جهتها : عادي اشيله؟ وميلت راسها ومال شعرها معها
ابتسم بهاج باعجاب من حركاتها وهدوءها هز راسه بالايجاب والتفت يحط غطى عيون براق على القفص وتقدم من غرام يمسك يدها يعدلها عشان يوقف براق عليها كانت غرام ترفع عينها على ريانه بتحدي والتفتت تبتسم لبهاج: مرا اليف ! وهادئ
ريانه بغضب تقدمت : براق مايحب احد يلمسه !
غرام ابتسمت باستفزاز وبهدوء نطقت : بس انا مو اي احد !ورفعت عينها على بهاج ثواني ورجعت تناظر ريانه وكملت :براق يعرف قلب الشخص مايهاجم للي يعرف قلبه !
بهاج ضحك: صدقتي يبنت العم !
مدت يدها لبهاج يشيل عنها براق ومسكت بيدها الثانيه بطنها من الوجع وعقدت حواجبها بتمثيل
انتبه بهاج لها واخذ براق وغطى عيونه : فيك شي ؟
رفعت راسها غرام : لا
بهاج التفت بكامل جسمه لها يعطي ظهره لريانه ونزل لمستوى غرام : والله ؟ اوديك المستشفى اذا تبين !
غرام ابتسمت من حست نالت الي تبيه : تسلم ماتقصر وجع بسيط ويروح والتفتت تبتسم لريانه وتعدتها تمشي لداخل
ريانه كانت واقفه تشوف بهاج عينه على غرام لين دخلت وشاهده على حركات غرام وعلى كل الاهتمام من بهاج لغرام وكيف هي مهمشه منه نار داخل جوفها اشتعلت تحس من قوة الاشتعال اي شي بتلمسه بينحرق .
اخذ بهاج براق وخرج وهي ولا كأنها واقفه تتذكر ولا مرا اهتم لها كذا وغرام بيوم وليله صارت محط اهتمامه دخلت الصاله تهز رجلها بتوتر .
غرام خرجت من الغرفه تتقدم لها :لاتلعبين بنار دام انك حطب !
ريانه كانت علامات الغضب واضحه عليها : والنار اذا شبت تحرق الي قدامها !
غرام ابتسمت باستفزاز : تحرق كل شي الا المويه !.