حبيبي ترا بيني وبينك عتاب احباب
ولولا غلا حضرتك والله ما اعاتبها
من غيرتي عليك افقد الأعصاب
تراني دخيلك حالتي لاتعذبها
اموت انا لا شفت غيري يحاكيك
تقتلني الغيره واموت في مكاني
عليك اغار من ظلك الي يداريك
وشلون عاد لو ناظرك احد ثاني
-
جميله بحماس : والله كنت حاسه !
التفتت سعاد بخوف وربكه وعبدالله ترك يد سعاد بسرعه وناظر جميله الي متكتفه وتضحك
جميله : شفيكم كنت حاسه ان عبدالله الي اخرك !
عبدالله بفهاوه : هاه !!! ايه كنت اسالها عن غرام كيف صارت
جميله بتمثيل : اها طيب اسمع عبود مابي قهوه هيل خل ننزل نجيب كوفي ؟
عبدالله بتدارك للوضع: ايه يلا امشي
جميله ابتسمت: تجين معنا سعاد؟
سعاد بارتباك : لا مابي مشكوره بدخل !
جميله مسكت يد سعاد : امانه تعالي معي
سعاد بفشله : لا بدخل روحي انتي وتعالي
جميله : غرام موصيتني اخذك معي تغيرين جو شوي من المستشفى امشي !
عبدالله تنحنح: ايه امشي تغيرين جو مع جمول
سعاد ناظرته بخجل : طيب بس بجيب جوالي واجي !
مشت سعاد بااحراج حست انها بتنفضح لو طولت زياده : غرام وين جوالي؟
غرام حطت الفنجال : هنا امسكي وين رايحه ؟
سعاد : الكوفي مع جميله
غرام : اها اي زين
صالحه : لاتتاخرون !
سعاد : ان شاءالله تبون شي اجيبه معي؟
غرام ابتسمت : لا تسلمين
طلعت سعاد لجميله وعبدالله حصلتهم يتضاربون وقفت بفشله : وش فيكم ؟
جميله وهي معصبه : اخذ سماعاتي !
عبدالله : والله تخسين يالكذابه هذي سماعتي الي ضيعتها !
جميله : والله انت الكذاب ياسراق حتى شوف حاطه فيها علامه
عبدالله: والله تعقبين حاطه علامه بعد سرقتيها !
سعاد ضربت جبينها : تتهاوشون على سماعه ترا الاسواق مليانه سماعات اشترو وحده
عبدالله : والله ان تعقب اشتري وحده بفلوسي وهي تسرقها !
سعاد : طيب جميله عطيه وانا اشتري لك وحده تمام ؟
عبدالله التفت على سعاد : ليه تشترين لها وحده هي تشتري لنفسها !
جميله بتأفف: اف ياربي حتى على رزقي يتدخل !
سعاد ضحكت : خلاص عبدالله انا بشتري لها وحده عشان خاطر عيونها
عبدالله بفهاوه : وخاطري انا ؟
سعاد انصدمت : هاه؟
جميله ضحكت : وش دخلك انت يطيب مضيع بهاج وسياف؟
عبدالله : ياليل البزره ذي! يلا امشو خل نروح الكوفي افضل
جميله مسكت يد سعاد يمشون سوا وقدامهم عبدالله ركبو السياره وتقدمت جميله تشبك البلوتوث بجوالها : عبدالله قفل البلوتوث حقك بشغل من جوالي !
عبدالله : ارتاحي انا اشغل
جميله : عبود الله يخليك بشغل انا !
عبدالله : والله جوك ماصخ تشغلين ناس تعبانه !
جميله بقهر : ريحنا يالي جوك عبادي الجوهر
شغل عبدالله اغنيه وشلون مغليك ورفع الصوت يحرك التفتت جميله على سعاد تسالها : عاجبك ؟
سعاد ابتسمت : جوي خالد الصدق
جميله رفعت شفايفها بأسف : ماهقيتها منك ياسعاد
ضحك عبدالله يغني بطرب : وشلون مغليك وانت الي علمتني حبك ! ياهاجسي عشقي عيونك !
رفعت الجوال سعاد بخفه وصورت كتف ويد عبدالله تحتفظ فيها وقفلت الجوال من التفتت جميله تكلمها : سعاد سمعتو وش صار لريانه؟
سعاد تنهدت : ايه الله يشفيها
جميله : على اننا كلنا كارهينها بس والله الي صار لها يحزن الله يشفيها
عبدالله قاطعهم : جمول تبين الكوفي الي دايم ؟
جميله : لا شوف اقرب كوفي ناخذ منه ونتقهوى شوي ونمشي
عبدالله : طيب امسكي الجوال شغلي اغنيه من ذوقك خل نشوف تغير ذوقك الخايس ولا باقي
اخذت جميله الجوال تشغل اغنيه مزلاج وحطت الجوال بحضن عبدالله
عبدالله :صوريني لملاك اقهريها
جميله ضحكت : ايه خل اقهرها واقهر البنات
رفعت الجوال تصور سناب تضحك: عبودي وين رايحين؟
عبدالله بهبال :رايحين نحلب النياق !
جميله نزلت الجوال عصبت : عبود خربت السنابه امانه
ضحك عبدالله : طيب اسف مدام جميله
حذفت السنابه ورجعت تصور : عبدالله وين رايحين ؟
عبدالله : رايحين نتقهوى بكوفي ونروق احلى روقان وانتم قضو لاتنسون الشربه عشان جده مزنه ماتعلقكم بالباب
جميله لفت الجوال جهتها : موتو قهر يبنات ومعي احلى وحده سعاد ولفت الجوال جهه سعاد الي ضحكت قفلت الجوال جميله بعد ارسلت السنابه بالقروب ونطقت : سعاد لازم ندخلكم معنا بالقروب
سعاد ابتسمت : طيب
ناظرها عبدالله من المرايا وابتسم من شافها مبسوطه اخذ جواله يشغل اغنيه من بعد مزح ولعب وحط الجوال يعدل نفسه التفتت جميله بحماس تغني: الله من بعد مزح ولعب اهو صار حبك صحيح اصبحت مغرم عيونك وامسيت وقلبي طاريح
سعاد ناظرت عبدالله وابتسمت بحب روحها لقت من يحسسها بالحنان لقت نفسها وكأنها مراهقه حصلت احد يحبها بعد فتره عصيبه طول عمرها كانت تبي احد يحبها وتعيش قصه حب مثل المسلسلات والافلام ماكانت متوقعه بعد تشدد ابوها انها بتلقى نفسها فيه ! في عبدالله اليكل مرا يلقى فيها فرصه عشان يضحكها ويعطيها جرعه حب
وقف عبدالله قدام الكوفي : يلا انزلو
نزل عبدالله يتقدم يفتح الباب لجميله وسعاد ودخلو ودخل خلفهم واشر لهم يجلسون على الطاوله لين يطلب لهم : وش تشربون؟
جميله : ابي فلات وايت واذا فيه حلى زين جيب
سعاد بحياء: مشكور مابي شي
عبدالله : والله ان تشربين بس قولي وش تبين ؟ولا اجيب لك من ذوقي ؟
جميله بقرف: لا تكفى لاتجيب من ذوقك تصرعها اطلبي سعاد قبل يجيب لك من ذوقه !
سعاد ابتسمت : خلاص جيب قهوه سودا
عبدالله ابتسم: ابشري
وقف عبدالله بالاين بحكم المكان فيه زحمه شوي ورفع نظره لمكان جلوسهم يشوفها تسولف وتضحك مع جميله ابتسم يتأملها ويدقق بملامحها باريحيه رفع جواله وشغل الكاميرا يصورها ورجع جواله بجيبه وضحك من حركته لهدرجه صار مغرم؟
جميله : والله ماتصدقين كيف جده مزنه كرشتنا ! ساعه نخطط ونرتب اخرتها قالت كلكم بالمطبخ
ضحكت سعاد : جده مزنه تجنن صدق انها صارمه بس والله عسلل
تقدم واحد : والله انتي العسلل !
التفتت سعاد وعقدت حواجبها : نعم اخوي؟
ابتسم : افا اخوي مرا وحده ؟
شمقت جميله : وقح ! طنشيه سعاد
وقفت سعاد : امشي جميله مابنجلس هنا
وقف جنبها :طيب قبل تمشين رقم سناب انستا اي شي ؟كل هالجمال ويروح علي !
التفتت سعاد وكانت بتصفقه كف لكن سبقها يد عبدالله بالكف : ياكلب !
شهقت جميله توقف : عبدالله
عبدالله بغضب : والله لاكسرك ياكلب !
الولد دفه : خير وش دخلك انت !!
سعاد بخوف : عبدالله اهدى خل نمشي اتركه الناس تناظر !
عبدالله بحده : ماتستحي على وجهك انت ! شنبات وطول وعرض واخرتها حركات مراهقين!
الولد : هيي احترم نفسك !
عبدالله : احترم نفسك انت واذلف لا اكفر فيك !
الولد : خوفتني الصراحه !
جميله : عبدالله امش خلاص
سعاد : عبدالله خلاص لاتوسخ يدك بالاشكال ذي !
الولد : هي انتي وش هالاسلوب !مو يعني غازلتك تشوفين نفسك؟ حدك يابنت ......
كانت الكلمه قويه على مسامعهم شهقت جميله وسعاد من الكلمه ومن تقدم عبدالله يضربه وكأنه مجنون نطق عبدالله : والله لاكسر فمك ياابن ... هالكلمه تقولها لامك الي ماعرفت تربيك !
بدأو الناس يفرقونهم وعبدالله لاخر لحظه كان يضربه والولد طايح ووجهه كله علامات وبأول فرصه له هرب من تحت يدين عبدالله الي وقف ينفض ثوبه بغضب والتفت لهم : امشو قدامي لسياره!!!
مشو قدامه يطلعون من الكوفي وركبو السياره بهدوء من غضب عبدالله مسح وجهه عبدالله بقوه وبغضب التفت لجميله: غطو وجيهكم محد يشوفكم تسمعون !
كان يقصد سعاد بالكلام لكن جمع جميله معها لان ماله سلطه عليها يتحكم فيها الان بشكل صريح
سعاد بعناد : وش دخلنا احنا يوم تصرخ علينا !
عبدالله التفت عليها : عاجبك الي صار ؟
سعاد : ماقلت عاجبني بس غضبك لاتفكه علينا !
عبدالله : يعني اشوفه يرمي كلمه وسخه عليك واسكت !
سعاد عضت شفتها : انا اتصرف ماله داعي تمد يدك !
عبدالله التفت لقدام بغضب : انا الغلطان الحين ! المرا الجايه ماتدخل فيك لو يرقمك ولا يرمي كلمه عليك !
سعاد سكتت تناظر بالشارع بغضب وجميله تنهدت تناظرهم بتوتر عبدالله حرك للمستشفى وطول الطريق ساكتين وقف قدام المستشفى ونزلت سعاد تدخل وجميله جلست تنتظر صالحه تنزل عشان يرجعون وثواني ودخلت صالحه لسياره : مشكور يولدي تعبانك معنا
عبدالله بهدوء: العفو يخاله مامن تعب
حرك باتجاه البيت ووقف السياره ينزلهم نزلت صالحه وبقيت جميله الي تنهدت تنطق: عبود لا تزعل ترا ماتقصد !
عبدالله بتعب : جميله انزلي ماني رايق
جميله : عبود الله يخليك لاتضايق والله انا عارفه سعاد هي مو قصدها !
عبدالله عقد حواجبه بغضب : مو قصدها ايش؟ كلامها ملفوف بفيونكه لو عطتني بصريح العباره قالت لاتدخل فيني مالك حق افضل لها !جميله انزلي الله يخليك راسي مصدع وماني رايق اتكلم اكثر
جميله تنهدت : والله مابيك تروح وانت ضايق ! متاكده بتجيك تعتذر
عبدالله غمض عيون : انزلي يجميله
غرام : وش فيك من جيتي وانتي مو على بعضك؟
سعاد تنهدت : بقولك شي بس مابي احد يدري !
غرام عقدت حواجبها: وش ؟
سعاد عضت شفتها بااحراج : انا وعبدالله نحب بعض !
غرام ابتسمت بحماس: الله حب من ورايه يالخاينه وماتقولين لي؟
سعاد ابتسمت بحزن : يعني هو مو حب حب ! بس احسه اعجاب اكثر من انه حب
غرام ضحكت: طيب وليش زعلانه ؟
سعاد فركت اصابعها ببعض: بقولك وادري بتعصبين علي!
غرام : عساه خير قولي؟
سعاد تنهدت وعلمت غرام الي صار وغمضت عيونها: وعاد الحين واضح زعل !
غرام: والله ماله داعي كلامك الولد يدافع عنك وانتي تقولين له كذا !
سعاد بحزن : طيب وش اسوي هو صارخ علي وانتي تعرفين اني ماحب احد يصارخ علي
غرام بصرامه : بس حتى ولو ياسعاد الولد دافع عنك تردين جميلُه كذا ! خيراً تعمل شراً تلقى
سعاد عضت شفتها بحزن : طيب وش اسوي الحين ؟
غرام رفعت حواجبه : مايبيلها اعتذري له
سعاد : مابي احسسه انه مهم ابي امشي دور صعبه المنال !
غرام ابتسمت: صعبه المنال بيروح عليها عبدالله وتصير تبكي اذا دور غيرها !
سعاد : خل يدور عادي اصلا مايهمني !
غرام ضحكت : عشتو وين الي اولا تقول حب واعجاب؟
سعاد بتراجع :لاوالله لو شفته مهتم بااحد غيري ببكي
بالاستراحه تاكين مصعب وخالد وياسر وسالم ومحمد رن جوال مصعب باسم عمر ورد : هلا ابو علي
عمر : محمد معكم ؟
مصعب رفع عينه على محمد : ايه
عمر : طيب اسمع غير مكانك ترا بهاج عرفك وعرف موقعك !
مصعب طلع برا ياخذ راحته بالكلام : وش عرفه ؟
عمر : شاف الكاميرات وشكله تتبع سيارتك لين حصلها ! اهرب قبل يمسك ولاتجيب سيره عني يامصعب اذا انمسكت تفهم!
مصعب : ابد ماعرفك ولا تعرفني !
عمر ابتسم: تمام وجوالك ذا اخفيه لايلقى لك تواصل معي !
معصب: تم اي شي ثاني ؟
عمر : لا وقفل
دخل مصعب ياخذ محفظته ومفتاحه : تبونشي يرجال؟
سالم : على وين؟
مصعب : شغله بخلصها
خالد :طيب يالزقرت لاتنسى تجيب دخان معك
ياسر : واهم شي المزيونه وضحك
مصعب ابتسم وناظر محمد الي منسدح يتأمل السقف طلع وركب سيارته يحرك ثواني وانتبه لسياره الي تتبعه ابتسم من عرف انهم يلحقونه وقف عند محطه ونزل يدخل الحمامات العامه رمى جواله بالبالوعه وشغل عليها المويه وطلع يغسل يده بهدوء وطلع يركب سيارته وكأنه مو منتبه لهم كمل يمشي وشوي شوي بدا يدخل الحواري ويلفلف فيهم يبي يضيعهم عنه لكن كانو معه بالمرصاد بدا يطفش مصعب : شكل ماينفع معكم الا اللكاعه !
بدا يدعس ويطلع على الخط العام وخلفه السياره تلحقه وبدأت المراوغه بين السيارات وصوت التفحيط مالي المكان سياره مصعب فورد رمادي والسياره الثانيه كامري ابيض
مصعب بعصبيه : والله لاجننكم !
بدا يلفلف ويدخل على السيارات وخلفه الكامري وبدا صوت جهاز الشرطه ينتشر على مسامع مصعب : وقف يراعي الفورد !
زاد من سرعته مصعب : تعقب اوقف لك !
ابتسم مصعب من فكره طرت براسه وبدأ بالتنفيذ اخذ منعطف لين وصل لاشاره عليها زحام ودعس بالسياره لين وصل التقاطع ولف بالسياره على اتجاه الكامري ودعس بقوه باتجاهه ، كان صوت التفحيط واحتكاك الكفر بالاسفلت عالي جدا للحظات كان قريب التصادم لكن الكامري لف بقوه وصدم بسياره ثانيه مسرعه وانقلبت السياره !
هرب مصعب من الموقع : وخلصتك ياعمر من عدوك بهاج ! وضحك
بدأو الناس يتجمعون على السياره يشوفون الي فيها تقدم واحد : بسرعه دقو على الاسعاف !
تقدمو مجموعه من الشباب وبدأو يرفعون السياره ودخل واحد يسحب الرجال من السياره : نادو الاسعاف بسرعه الرجال غرقان بدمه !!
رهـِام .
أنت تقرأ
وليف الروح تدري من تكون غرام القلب واغلى من العيون
Художественная прозаأول روايه لي 🔸. الروايه سعوديه 🇸🇦. التنزيل مستمر ✔️.
