وانا معاه اعيش فرحه بدون حدود احبه حب اكبر من مدى ظنه❤.

part 13🌷:

في الديره :
ثاني يوم الساعه 9 الصباح
عند ام فهد اللي جالسه تجهز ب اغراضهم بحكم انهم بيرجعون الرياض
دخلت سارة عليها
سارة : صبحك الله بالخير يا ام فهد
ام فهد : صبحك الله بالنور
سارة : ما تبون تكنسلون رجعتكم
ضحكت ام فهد : ولله لو الراي ب يدي جلست هنا وما رجعت الرياض بس تدرين اشغال اخوك علي
سارة : ايه ايه ادري الله يعينكم وزيد احس مو بخاطره يرجع
ام فهد : اي ولله بس وش نسوي اشغال
سارة : الله يعين
دخل ابو فهد وسلم وردو عليه السلام
ابو فهد ل ام فهد : ها تجهزتو لان بعد الفطور بنطلع
ام فهد : اي كل شي جاهز بس باقي ولدك زيد وش يقعده من النوم الحين
ضحكت سارة : انا بروح الديوانيه واقعده
ام فهد : خير ما تسوين
طلعت سارة وتوجهت للديوانيه دخلت تقعد زيد
فز زيد ونطق ريفان
ضحكت سارة ريفان ها
زيد اللي بدى يضبط بشعره ويناظر يمين وشمال هلا عمتي
سارة : هلافيك يلا قم الحين وغسل وتعال البيت الفطور بيجهز وابوك توه قال بتطلعون بعد الفطور
زيد بتنهيده : يوو يعني منجد بنرجع ولله ما شبعت
سارة : وش نسوي بعد اشغال ابوك تدري وان شاء الله تجون ب اجازة ابوك
زيد : ان شاء الله
قام زيد وتوجه هو و عمته سارة للبيت
دخل على المجلس اللي جالسة فيه منيرة و ريم و ريفان وكانت الشنط حقتهم على الارض
دخل زيد وسلم على جدته وعمته ريم
زيد بضحكه : ها وانتم بعد بترجعون
ريم : اي ولله ي زيد ابو نواف بالطريق الحين
زيد : مو كنه بدري الحين
ريفان : بدري من عمرك وبعدين لا تتشمت حتى انتم بعد بترجعون بعد الفطور
منيرة ل ريفان : وانتم بعد بتفطرون هنا وبعدها تطلعون
ريم : اي ان شاء الله
زيد ل ريفان بضحكه : بسم الله شفيك ما قلنا شي ترى
منيرة بضحكه : الظاهر ريفان زعلانه ما تبغى ترجع وطلعت حرتها فيك
زيد اللي ناظر ل ريفان وابتسم : عادي عادي م عليه ما ازعل منها
ريفان : عادي زيد يدري اني اطقطق معه
زيد : اي
دخلت ترف وسلمت على امها وعمتها وريفان وجلست
ترف : ها وين متجهزين كلكم
زيد بضحكة استهزاء : ها الحين انتي صرتي من اهل البيت
ضحكت ترف : ايوه اكيد متى بترجعون زيود ؟
زيد : بعد الفطور
ترف : انزين نسيت كم غرض في بيتنا وابغاك يوم تجون المره الجايه تجيبهم معك
زيد : ان شاء الله
دق باب البيت
ريم : اكيد ذا ابو نواف لانه قال انه وصل الديرة
ريفان : بطلع اشوف اذا كان ابوي
فز زيد : وين خلك انتي يمكن مب ابوك
ريفان : يو شدعوهه
زيد : ريفان لا تعاندين
ريم : خلاص رح شوف يا زيد
توجه زيد فك الباب الا ونه ابو نواف سلم عليه ودخل داخل
ركضت عليه ريفان وحضنته وهي تنطق : اشتقت لك يبا
ابو نواف : وانا ولله يا بنيتي
دخل ابو نواف المجلس وسلم على منيرة وريم وجلس
دخلت سارة ومها وسلمو على ابو نواف وجلسو
ابو نواف : الا وينه نواف
ريم : مادري اضن راقد الحين
ريفان بعصبيه : اي اكيد راقد دامه صار من اهل البيت وما بيرجع معنا اكيد راقد
ضحك ابو نواف : وانتي ليه كل ذي العصبيه خلاص لا انهيتي دراستك بتجين وتصيرين انتي ونواف ب الهوا سوا
ضحكو كلهم
دخل ابو فهد وام فهد وسلمو على الجميع
منيرة : دام الكل اجتمع الحين حياكم على الفطور
سارة : اي حياكم كل شي جاهز
توجهو كلهم للطاولة وجلسو وسمو بالله وبدو ياكلون
زيد اللي ما شال عيونه عن ريفان وطول الوقت جالس يناظرها بحكم ان كل واحد فيهم بيرجع ل ديرته وبيمر وقت وما يشوفون بعض يناظرها ويبتسم وجاهه فلاش باك " يوم كانو ب المطبخ وشد ريفان عليه وهو يناظرها وهي تقول لاحد يشوفنا وبكل برود يقول لها وخلهم يشوفونا "
ضحك وهو يقول بخاطره : يووه وش كنت احس فيه يعني منجد لو احد دخل
سارة : زيد شفيك ما تاكل
فز زيد : اي اي جالس اكل
بعد ما افطرو كلهم توجهو الجميع للمجلس وجلسو يتقهوون قبل يطلعون
ريم : انا بروح اقعد نواف يسلم على ابوه قبل نطلع
ترف اللي كانت طالعه
مها : ريحي انتي هاذي ترف اكيد بتروح الديوانيه
مها تنادي ترف
وقفت ترف عند الباب والتفتت ل عمتها مها : هلا عمتي
مها : وين بتروحين
ترف : هني هني بالحوش بكلم خويتي
مها : زين دامك طالعه مري الديوانيه وقعدي نواف
ترف : ان شاء الله
ريم ل مها : مابي اتعب البنت كان خليتيني اروح
ضحكت ام فهد : يوو وش تتعبينها توهم بداية عمرهم احنا اللي المفروض نتعب
ضحكو كلهم
توجهت ترف للديوانية دخلت ترف وهي تعض بشفتها وتطق ب اصابعها وتنطق : ييووو كيف بقعده الحين خجلانه مره
تقدمت ترف ونزلت راسها وقربت من نواف وهي تهمس ب هدوء : نواف
فز نواف ورفع راسه وجات عينه ب عين ترف
رجعت ترف راسها ل ورى ونطقت : صباح الخير
ابتسم نواف : صباح النور
ترف اللي تضبط طرحتها وتناظر يمين وشمال وخجلانه مره نطقت : عسى ما خربت عليك نومتك ؟
ضحك نواف : لا ابد
ترف : انزين قوم الحين لان ابوك جا وامك تقول قم سلم عليه قبل لا يطلعون
نواف : اي شاء الله
نواف اللي يحاول يقوم وهو متعاجز مد يده صوب ترف ونطق : لا هنتي وربي متعاجز اقوم
ترف بضحكه : شفيك قوم
نواف : تروووففف
ترف مدت يدها : يلا يلا قم لا تفصل علينا عمتي ريم
مسك يدها وقام شدها عليه وناظر ل عيونها وقال : ليه تخافين علي
ترف اللي تحاول تبعد عنه : لا شدعوه بس ـــ قاطعها بالكلام نواف اللي شدها له اكثر وقرب من رقبتها وهمس : ويلوموني بحبك
ترف اللي مره مره خجلت منه وبعدت عنه وابتسمت وما قالت شي
طلعت ترف من الديوانية وهي تحس ب ان قلبها جالس ينبض بسرعه وجالسة تبتسم بعدها صحت على نفسها وقالت وهي تكلم نفسها : بنت اهجدي ضحكت وتوجهت للجلسة اللي بالحوش وطلعت الجوال بتكلم خويتها
طلع نواف وتوجه للبيت
مر من جمب ترف وناظرها وابتسم وترف بادلته الابتسامه
دخل نواف وسلم على ابوه وعلى الجميع وجلس
ابو نواف : ها عاد نواف ما اوصيك انت الحين رجال البيت ذا وجدتك وخالتك حطهم ب عيونك
نواف : لا توصي حريص يبا
منيرة : اي ولله لا توصي حريص نواف وليدي رجال وما ينخاف عليه
ابتسم نواف : الله يسعدك جدتي
زيد : هي هي انا هنا مب كنكم سكبتو لي
ضحكت سارة : كلكم واحد
زيد : ايه بترضوني بذا الكلمتين نواف كبر راسه من كثر المدح ونا هنا حالي ب حال ذا الحايط
ضحكو كلهم
مها : يوووو اليوم ريفان وزيد مب طبيعيين حرتهم كلها على شان ترف ونواف بيبقون
ضحكو كلهم
ريفان : لا شدعوه
ترف : لا ترا واضح انك مب غيرانه من نواف
ريفان باستهزاء : لا ليه اغار منه
ابو نواف : يلا يا ريم نطلع الحين ؟
ريم : توكلنا على الله
سلمو على الجميع وطلعو بالسيارة
ابو فهد : يلا وحنا بنتوكل
زيد : يبا وش رايك نبقى وبعد اذان العصر نطلع
ابو فهد : انت لك اكثر من شهر هنا باقي ما شبعت ؟
زيد : تبي الصدق عاد لا ولله ما شبعت
ضحك ابو فهد : اقول اخلص اخلص جيب الشنط وحطهم ب السيارة
زيد بتنهيده : ان شاء الله
منيرة : الله يهداك يا علي شفيك على الولد
ابو فهد : ما قلت له شي يمه
ام فهد : اي وعلي صادق زيد تعود على ذا الاسلوب
منيرة : الله يهداهم عيال هالجيل
نزل زيد وجايب الشنط معه ها يبه مشينا ؟
ابو فهد : يلا يبا
سلمو على الجميع وطلعو
عند ريفان بالسيارة اللي جالسه تناظر بالطريق وتتذكر كل المواقف اللي جمعتها ب زيد نزلت دمعتها وادركت انها بتفقده وهنا ادركت انها منجد تحبه ومو مجرد اعجاب
بعد مدة وصلو ابها نزلو
ابو نواف ينادي الشغاله تشيل الشنط وريم وريفان دخلو
ريفان : يمه تبين شي بروح ارقد اريح
ريم : سلامتك نوم العافيه ولا قعدتي تروحين مع ابوك السوق بحكم انه بيجيب لك مستلزمات المدرسة
ريفان : اليوم يمه ؟
ريم : اي مو المدرسة باقي لها يومين
ريفان : ان شاء الله بعد المغرب قولي ل ابوي
ريم : ان شاء الله
توجهت ريفان ل غرفتها بدلت ثيابها وتمددت على الفراش حاولت ترقد لكن تداهمها افكارها ب زيد وتصرفاته
قطع حبل افكارها دق الباب
ريفان : من ؟
ابو نواف : انا ي رفون ابيك
ريفان عدلت جلستها : ادخل يبا
دخل ابو نواف وجلس ب جمبها
ابو نواف : رفون قالت لك امك بنروح بعد المغرب السوق عشان تجيبين كل شي تبينه للمدرسة
ريفان : اي يبا ان شاء الله
ابو نواف : رفون يا بنيتي انتي الحين ثاني ثانوي وما ابيك تفكرين ب شي الا ب مذاكرتك رفون انا ابيك تجيبين درجات ترفعين راسي وراس امك فيها
تقدمت ريفان وقبلت راس ابوها : ان شاء الله يبا ما يصير الا اللي تبيه وان شاء الله ترفعون راسكم فيني
ابو نواف : ان شاء الله يا بنيتي يلا الحين بروح اخليك ترتاحين
ريفان : ان شاء الله يبا
طلع ابو نواف وتوجه للمجلس وجلس مع ريم وبدو يسولفون وريفان رقدت
*
في الديرة :
في المجلس عند منيرة ومها وسارة اللي جالسين ويسولفون
دق جوال مها وكان المتصل حسام ( زوجها ) فكت مها الخط وسلمت عليه
حسام : انا بالطريق باجي عليكم بسلم على عمتي ونرجع البيت بحكم اني بطلع على اهلي واكيد انتي بترافقيني وش قلتي ؟
مها : ان شاء الله خير اجل انا بجهز نفسي
حسام : ان شاء الله وقفل
منيرة : ها ونتي بعد بترجعين ؟
مها : اي ولله يمه ذا حسام بالطريق قال بيسلم عليك وبعدها بنرجع
سارة : اجل تتغدون هنا وبعدها تطلعون
مها : لا ولله بنتاخر
قاطعتها بالكلام منيرة : خلاص يا بنيتي تتغدون وتطلعون
مها : ان شاء الله يمه
دخلت ترف : سلام عليكم
ردو جميع : وعليكم السلام
ترف : ها عمتي بترجعين بعد ؟
مها : اي ان شاء الله بعد الغدا
ترف : ايوه الله ييسر دربكم
مها : امين
سارة : وش تبون اسوي لكم وش تشتهون
ترف : تدرين عمتي ودي ولله اني اتعلم الطباخ وخصوصا طباخك دايم ابوي يمدحه
ضحكت سارة : ابشري بعلمك
دخل نواف وهو يضحك وينطق : ها تروف بتذوقينا طباخك ؟
ترف : اي عاد يا ويلكم ما تمدحونه
ضحكت منيرة : انا اول وحده بتمدحك ولو كان مب ضابط
ترف وهي تمثل الزعل : وش تقصدين جدتي انا طباخي خايس
منيرة : ما اقصد كذا تتعلمين مع الوقت
مها : اي اكيد لزوم تتعلمين بعدين لا تزوجتي من بيطبخ ولا بتنادين جارتكم
ضحكت ترف وناظرت نواف بخجل : لا شدعوه عمتي نتعلم
ضحكو كلهم
سارة : يلا تروف الحقيني المطبخ وتشوفين والمره الجايه تطبخين لنا
ترف : ابشري عمتي
توجهت سارة للمطبخ وترف تمشي بخلفها وبدت سارة تضبط الكبسه وهي توري ترف وش تسوي ووش ما تسوي
دخل نواف يبي يشرب مويا دخل وهو يناظر ب ترف اللي جالسه تتعلم الطباخ ناظرها وابتسم وقال بينه وبين نفسه : عقبال ما تصيرين حلالي وتطبخين لنا
شرب المويا وطلع
بعد مده قصيرة وصل حسام
دخل وسلم على منيرة ونواف ومها وجلسو بالمجلس
دخلت سارة وهي تحط الغدا على الطاولة وسلمت على حسام
سارة : حياكم
حسام : ولله ما كان له داعي تكلفون على نفسكم
منيرة : لا شدعوه ما من كلافه وبعدين انتم من العايله
حسام : الله يسعدك عمتي
جلسو كلهم على الطاولة سمو بالله وبدو ياكلون
بعد الغدا جلسو بالمجلس
حسام ل مها : يلا ي مها ما نبي نتاخر
منيرة : اجلسو وش وراكم
حسام : ولله بروح بيت اهلي وبنطلع بعد شوي بحكم ان الطريق طويل من هنا للرياض
منيرة : الله ييسر لكم
مها : امين يلا مشينا
حسام : توكلنا على الله
ودعو الجميع وطلعو
*
في الرياض عند زيد اللي جالس ب غرفته ويفكر ب ريفان
مسك جواله وقال خلاص بدق عليها وادردش معها شوي
دق على ريفان
عند ريفان اللي مصدومه ان زيد يدق عليها فكت الخط
زيد : يا هلا ب صويحبي ارحبي
ريفان ب ضحكه : تحسبني خويك لا لا الظاهر فيك شي رح ارقد احسن
زيد : هي علامك بسولف معك شفيك
ريفان اللي تحاول تبين الثقل ولا هي من الداخل ميته عليه وتبي تكلمه
ريفان : اقول اذلف بس ماني بفاضية لك
زيد : ييوووو اذلفي
قفل زيد وتنهد بضيقه وقال : مالي الا اني ارقد