في أمان المكار

البارت الرابع

#في_أمان_المكار

بقلمي: يـآسه.

#لا تنسون التعليق بين الفقرات+متابعة لحسابي لطفاً 🙈♥

أخخ يا روحي القوية شگد تأذيتي.، 💔

✧✧✧✧✧✧✧

«ملاك»

بعد ما گلنة الـ أزل عن اياد فقدت بالصياح والبواچي، گلت أنو علىٰ فقدان اياد سوت هيچ لعد اذا أستوعبت موت أبوي شسوي، حبالها الصوتية تگطعت، حاولو يخلوها تهدء بس ماكو فقدت..

محمد: مو هيچ أزل أهدئي راح نحاول نلگاه، وثانياً هوَّ چبير أواعي أكيد اختنگ وحب يگعد بمكان منفرد

أزل: جيبووو حباابين جيبوو والله ما أتحمل أفقدة هذه حبيبي، محمد حُسام فدوة دورو عليّ خاف صاير بي شي گلبي ديأذيني ما مطمئنة

دنيا: يمة بنيتي لا تفاولين علىٰ أخوچ أسم الله عليّ

حُسام: صدگيني راح يرجع أنتِ بس أهدئي مو زين عليچ أزولة

جالسة علىٰ الأرض وساندة راسها علىٰ كتف أمي ودموعها تجري، أنكسر گلبي علىٰ وضعها، علاقتها بـ اياد كلش قوية مو علاقة أخ وأخت لا وكأنما علاقتهم أم وأبن، واحد حنين علىٰ الثاني، أنقهرت وصرت أبچي گعدت بمكاني وسندت ضهري علىٰ الحايط وأحتضنت رجلي الصدري....

محمد وحُسام ما خلو شخص ما أتصلو عليّ، وعلي طلع يدور بالمنطقة ويسأل الناس لعل يعرفون وينة طلع محمد وحُسام أشرلي حتى أنتبه علىٰ أزل وطلع...

نهضت من الأرض ورحت الـ أزل أخذها لغرفتها حتى ترتاح خطية كلش تعبت، تقدمت مديتلها أيدي حتى أساعدها تنهض رمقتني بنضرات ما عرفت افسرها نضرات فارغة، هادئة، جامدة،نضرات حقد ما أعرف سببهن، گلبي أنعصر عيوني غوشن من الدموع بس ما نزلتهن حتى ما تسوء حالتها، چان منضرها جداً يقهر أول مرة أشوف أزل بهذه الضعف والخيبة...

حطت أيدها بأيدي والأيد الثاني حطتها علىٰ
الأرض تسند نفسها حتى توگف، چانت كلش هادئة وحركاتها كذالك هادئة لدرجة خفت من هدوئها الله اليستر من الجاي...

دخلتها للغرفة وما زلت لافة أيدي حول أيدها أسندها
جلست علىٰ طرف السرير وضلت صافنة بالأرض رحت گعدت خلفها وفتحت شعرها، ما أنطت أي ردت فعل، جبت الزيت خليت الشعرها وگعدت أمشطة وسارحة بأفكاري المخربطة من جهة اياد ماكو ومن جهة أفكر شنو حيصير بعد روحة بابا، حاولت أحچي مع أزل حتى أخليها تنسة هاي الأحداث الكئيبة....

_حبيبتي أزل

_ها

_أزل شنو حابة تصيرين من تكبرين

_أي شي ماعندي أحلام

_ما أتوقع أزل ما عدها أحلام!

رفعت أكتافها بعدم مبالات أخخخ سودة عليَّ ، أتمنى ترجع مثل قبل وما أشوفها هيچ مكسورة علىٰ الأقل أحس بالأمان بوجودها لأن بهاي حالتها أني خايفة حتى من نفسي..