.
الحلقة 26
بقلم لينا صبرينة
كيهبط انا ثاني من الخلعة زربت لبست جبة وهبطت لقيتهم مجمعين لتحت في شمبرة والهدرة بزاف شفت من ومن مالقيت حتا واحد من فامييلتي بصح نسمع فيهم ييقولو قتلها ماهيش تتحرك واش ندييرو باصيت يارمضان وين كان عقلك _حتا لقيت مجاهد خررج من هاديك لجماعة وجاء عندي _وشبيه ### واش دييري هنا اطلعي لشمبرتك _ بصح واش كاين شكون ق. ت.ل فهمني ياك ماش زوهير _ لالا راهي مرتو ماعرفتها ميتة ولا حية _حطيت يدي على فمي تخلعت _هيا طلعيي وماتزيديش تهبطي ولا تخرجي حتا نجيك هيا ماش ناقصني همك نتي ثاني _طلعت فدروج ولمحت رمضان في يديه الدم وحاطهم على راسو مانعرف واش دارلها المهم ليخفت منو ماش صحييح وطمنت على الاقل لحكاية بعيدة على دارنا_دخلت لشمبرة وهو طلع من ورايا بزربة لبس وماهدر معايا حتا كلمة ولا حتا شاف ليا وعاود هبط وبقيت نستنا ونستنا طولو بزاف حسهم لتحت مازال كاين ونسمع في هدرتهم وماقدرتش نزيد نخرج مانعرفش عقليتهم وماش حابة نقابلهم. حتا طبطبو فالباب رحت فتحت لقيتها مرت محمود روفية وختو وردة دخلتهم وبقيينا نحكو _واش صرا لتحت فهموني _ اقعدي نحكولك .رمضان مور ماراحو الناس والفاميلية دخل عندنا يعرش ويحاسب على هاد الزواج ومرتو ماتحملتش وراحت علات صوتها في وجهو ورخسلو وغسلتو غسيل دوارة كييفاه بوجودها وحضورها وهيا تسمع يهدر عليك المهم الغيرة نطقتها وهو شعلت فيه النار حكمها من شعرها خلخلها وعطاها كفوف وبلا مايفيق خبطلها راسها فالمرايا ليمعلقة فالحييط خبطها مرة لولة وزادلها الثانية مسكينة هاديك لمراية كسرها بيها ورجعت جبهتها تشرشر بالدم وجها رجع مايبانش من دمومات ومازادت نطقت حتا كلمة وتغاشات حسبناها ماتت حتا هو بقى مصدوم من واش دار وكيعاد ليل ماقدروش يخرجوها من الدوار ويدوها لسبيطار بصح دارو ريسك وداوها للعيادة وان شاءالله تكون بخير ماصرالها والو ويرجعو سالمين لدار _بصح علاه ماحبستوش رمضان علاه خليتوه يضربها وتوصل بيه يدير هكدا ونتوما حاضرين _راه كان كييف الوحش والله شيطان يخوف جابها مور بعضهم ضرب ضرب وعلى غفلة كلشي فات وماقدرنا نديرو والو _ان شاءاالله مايصرالها والو _نطقت ختو .ادا راهي بخير كيترجع باينة ماش راح تسكت ضربتها كبيرة وباينة ماتبقاش هنا معاه وتصرا كبيرة مع مواليها __بقاو معايا شوي وهزو هاديك الماكلة وهبطو وكانت معاملتهم معايا مليحة .تفكرت القش ليمطلي بالدم هزيتهم وحطيتهم في ساشي وخبيتهم ومبعد نشوف كيفاه نرميهم عليا_بقيت نستنا حتى غفات بيا عيني ورقدت من التعب حتا فطنت بصوت الباب تفتح وتغلق تخلعت لقيتو مجاهد دخل والفيستا مطلية بالدم _علاه خليتي الباب مفتوح ورقدتي _نسيت عليه _ماتزيدييش تخليه صح تدخلي تغلقيه وراك ولا ورايا كينخرج _ايه قولي واش حوال طفلة _سترها ربي وخلاص رانا جبناها _حتا نتوما ستركم ربي رجعتو مابيكم والو في هادا ليل _هزز براسو وفتح لخزانة جبد قش جديد وخرج وانا رجعت نرقد حتا عاود دخل انا تقعدت شفت معاه باين عليه دوش _للمرة الثانية نفكرك ونحدرك الباب ورايا يتغلق _ايه كنت حاسبة راجع فيساع عليها ماغلقتش _حكم بلاصتو تكسل وانا توترت واش ندير ماعرفتش كيفاه نرجع تكسل قدامو _النهار قريب يطلع ماش حابة ترقدي _ايه نرقد .وليت حطيت راسي على لمخدة وعطيتو بظهري وغطيت روحي كان الحال بارد وهو نسمع فيه غير يستغفر ويعاود حتا داتني عيني ورقدت __صباح نضت لقيتو فاتح التاقة ويتكيف وليت انا نضت _صباح الخير وين رايحة _صباح النور حابة نروح نغسل ونتوضى من لبارح ماصليتش _هزز براسو ولبس سروال وقالي تبعيني _خرجنا شفت لبنات لتحت مع الشغل الله يبارك في عرش كل وحدة واش دير _ادخلي هادا هو الدوش وقدامو توالات وكاين لتحت بصح نتي هادي هيا بلاصتك ومادامني انا هنا هادي المدة ماتهبطيش لتحت غير معايا برك _فهمت ماعليش درك ندخل _ايه روحي راني نستنا فيك _دخلت لدوش وعينيا قلبتهم كيفاه هادا يستنا حاساتو يعس فيا في كل حركة نديرها _غسلت وتوضيت ورجعنا لشمبرة قبل لا يغلق الباب عيط لختو قالها طلعينا لفطور وسمعت ناناه قاتلو هبطها تفطر معانا وتسلم على الشيخ راه حاب يشوفها _ومبعد نجيبهالو ماهيش هاربة _بقات هيا تهدر بصح غلق الباب مازدتش سمعتها .هزيت الكوستيم تاعو كانت شوميز مطلية بالدم قتلو يلزم هادا القش وتاع لبارح يتغسلو مايتخباوش هكدا _جمعيهم في بلاصة كينشوف الحالة مليحة نقوللك غسليهم _علاه واش كاين _شوفي بابنت الناس من التالي رمضان راه فدار بيه بمرتو ومادام هو هنا نتي ممنوع تخرجي من شمبرة وحدك يلزم انا معاك ومادامك مرتي نتي هيا مسؤولة على قشي وعلى متطلباتي كلها كما القش ماش راح نخليك تهبطي تغسليه يبقى هكدا حتا يجي الوقت المناسب ونقلك غسليه _يعني حابني نبقى محبوسة _ماعندييش في يدي حل خلاف ماش ساهلة الشيى ليصرا فينا يلزم نتعايشو مع الوضع حتا يفرج ربي وادا ماش حابة تبهدايل ولفضايح وتخلي روحك عزيزة سمعي لكلامي.
قريتي ديري جام
الحلقة 27
بقلم لينا صبرينة
طبطبو فالباب راح فتح لقاها ختو دخل لفطور قتلو افطر نتا بصحتك انا نصلي ساع _خليتو يفطر وانا صليت كملت _ هيا فطري ولبسي نهبطو تسلمي على جدي باه ماتبقاش نانا تعاود فالهدرة نعرفها قادرة تطلع وتهبطك ماعندهاش صبر _درت واش قالي وحطيت على راسي خمار وهبطت معاه كيكنا فدروج تلاقينا بختو طالعة قالها وينو هاداك ليمايتسماش _خرج صباح بكري _ومرتو واش حوالها _ماتعجبش ليل طول وهيا تبكي بالسطر داها لمدينة لسبيطار خير _هزز براسو وهبطنا وجاو كامل صبحو عليا وسلمو كاين ليقالب وجهو عليا وكاين ليضحك معايا سيرتو يماه انسانة هايلة قعدتني فالحوش قدامها وباركتلي ودعاتلي بالخير وحتا طلبت مني السماح على الشيى ليدارو رمضان قبل وعلى لبارح وقاتلي نتي ماعندك حتى ذنب بواش صرا وجامي نلومك ومجاهد نستعرف بيه وراني راضية عليه دنيا وآخرة كيعرف يخمم ويستر العار ليحطو فيكم رمضان وقاتلي انا ماعندي حتى كلمة في هادي الدار منا جيت كبرت كبرو ولادي وهوما ثاني رجعو يتحكمو فيا مور مامات باباهم وبقات السلطة كلها عند ناناهم علجية والشيخ ولو فلبلاصة طايح فراش بصح كلمتو تمشي .حنا هكداك و ناناه جات عندي _ هيا ارواحي معايا تباني عجبتك مستراحة فالقعدة (كانت تهدر وتشوف مع رجليا ) _نضت رحت معاها لشمبرة لقيت الشيخ متكسل ومغطيلو رجليه كيشافني بقا غيير يخزر فيا وانا خفت نقربلو حتا شمبرة حسيتها تغم النفس وقديمة بزاف _قربت سلمت عليه وكلامو معايا كان سطحي وببرود حسسيت روحي تخنقت لمزية جات روفيا قاتلو وقت دواء باه تشرب .خرجت وناناه ورايا قاتلي ماكييش مطولة في هادي الدار حتا الشيخ ماش مرتاح ليك _جيت نرد لقيت مجاهد جاء وقالها بصح انا مرتاح معاها _عندك غير سوايع معاها ديجا لحقت توالفها وترتاح بركاك كدب _مجاااهد ارواح _جدو عيطلو دخل عندو وقالو هبط مرتك لتحت خير قدام عينينا ماكانش لامان كيتخليها وحدها _لالا تبقى لفوق كيفها كييف مرت محمود _وين لفوق في دارك؟؟ _لالا هاديك الدار ماش راح نسكن فيها راني قاعد في شمبرة لفوق _ااا كييعاد هكدا ماعليش _تبقاي تتسمعي فيهم هيا غسلي لماعن مع لبنات ياك تقدري ماكانش حاجة توجع فيك _شفت مع مجاهد لقيتو لاتي مع جدو وليت قلتلها ايه عادي نقدر و رحت مع لبنات عاونتهم وكان مرة على مرة يطل عليا ماش غافل عليا دقيقة عاس كلشي وحسيتو شغل قلقان حاب يخرج وجدو حاكمو بالهدرة _كيجات لعجوز وشافتني نغسل ماعجبهاش الحال _خلايا طفلة عروسة ليوم صبوحي تاعها تخدمو فيها نوضي بنتي نوضي _نطقت نانا علجية .خليها واش راح يصرالها كيفها كييف لبنات اصلا مايبان عليها والو راسي راه يوسوسلي _خرج مجاهد عندي نوضني ويتخنزر فيا .نتي مافهمتيش قصد نانا ؟_علاه واش قصدها ماش فاهمة _حنا هكداك ورمضان دخل مع مرتو جبهتها كلها مربوطة بشاش وعينيها مدبالين وبسيف تمشي وهو حاكمها من يدها ومسلانها .كامل جراو لعندها ويسقسو عليها وهيا ترد بصح صوتها ماش مسموع _كيكان رمضان يهدر لمحني بلي قدامو تبدل وجهو .حتا لقينا زوج رجال دخلو مع مرا كببيرة وتبكي وراحت عند مرت رمضان تحضن فيها وتسقسي ورجال حشرو رمضان قالولو وصلنا لخبر واش درتلها ضربتها يارخيس _ابقاي هنا ماتحركيش _راح مجاهد لعندهم كيحس بلي الحالة راح تكبر وفهمت بلي هادو خاوتها ويماها وحتا مرتو ماش قليلة وقاتلهم بلي ضربها وكانو راح يتلاحو عليه لوكان ماش مجاهد يهدن فالحالة وقالهم ماكانش في عقلو برك وحتا بنتكم غلطت فالهدرة معاه كون نتوما تقال لكلام هاداك ليكم ماتستحملوش وديرو ردة فعل _كلقى الحالة مازالت متكهربة وزاد رمضان بدا يبعد في مجاهد ويقولو ماعندو مادخلك بيني وببين نسابي .لتم مجاهد كره وقالو عوم بحرك وجاء عندي حكمني من يدي _هيا نطلعو _طلعت معاه وكيكنا فدروش دورت عينيا لتحت ولو الحرب قايمة بصح لقيتو يراقب فينا وعينيه مركزة معانا _دخلنا لشمبرة غلقها بالمفتاح وانا فرشت سرير .راح غلق التاقة ولقيتو قرب مني حكمني من يدي _عينيك من ليوم مايزيدوش يزغدو راكي مرتي ماتنسايش هادي فهمتي _هززت ببراسي ايه _لبسي كاش حاجة خفيفة وحكمي بلاصتك ريحي ودرك نجي _هابط لعندهم لتحت؟؟ _لالا ماش راح نزيد نعمر راسي بمشاكلو كرهت _خرج وانا بدلت لبست بيجامة تاع رقاد بدرعيها يما خيطتهالي .تكسلت شوي ودخل شاف معايا _علاه متغطية بردتي ؟_ايه شمبرة باردة _حكم بلاصتو ورايا قلت سور راح يرقد بصح تفاجأت كيحط يدو عليا قلبي رجع يضرب فالالف _دوري ليا عندي هدرة معاك _دورت وبلعت ريقي _لبارح خليتك براحتك ماحبيتش نظغط عليك ونبان ليك وحش من ليلة لولة بصح درك محتمة ندخل عليك _كيقال هكدا فشلت طاح مني النص ماتوقعتوش يطلب يدخل عليا بهادي السرعة كنت حاسبة راح يساعفني ويصبر عليا مدة وكنت حتى حاسبة هو ماش حاب يقربلي بصح كلشي خرج العكس وتقرب مني كتر وهمسلي _قتلك لبسي حاجة خفيفة يعني نويزات ماش بيجامة _يديه قاسو لحمي وكان غير مبالي بالأصوات العالية لي تتسمع من تحت فدار وكأنو في عالم خلاف وحدو وماخلالي حتا فرصة باه نتهرب ولا نبعد منو و كلشي صرا بالزربة وكان القرار قرارو وحدو ودخلتي كانت في وضح النهار عكس كل العرايس ورجع شرفي هو شرفو .......وكيشاف دم عدريتي تنهد تنهيدة طويلة وقال الحمدلله ماخيبتيش ضني فيك مبروك عليك .
قريتي دييري جام
الحلقة 28
بقلم لينا صبرينة
غطاني وناض لبس وانا جاتني لحظة ادراك .كيفاه يعني ماخيبتش ظنك مادام شاك فيا علاه تزوجتني وكون جيك صح كما هدر عليا خوك وبنت حرام واش دير فهمني _شاف شاف ليا وراح للباب وجابلي البينوار كان معلق لتم _البسي ونهدرو راه لبرد .تقعدت لبستو وبقيت نسنى في وجوابو حتا تكيف وكمل باه دار ليا _نجاوبك بسؤال نتي ماش عاجبتك السترة ليدرتها فيك ؟_ماراكش داير فيا مزية درتها لخوك ولخاواتاتك ماش محبة فيا _هادي مفروغ منها ماش محبة فيك بصح حتا نتي ليدرتو هادا كان لصالحك وسترة ليك ولداركم المهم انا بكري نعرف ختك مليح نتي ياربي نص دقيقة نهدرها معاك وهاديك ماكانتش تهدر عليك نهائيا عليها مانعرفش عقليتك وثاني كيخرج فيك رمضان هاديك الهدرة اكيد ماستوعبتش ادا صحيح ولا غالط ماكناش نستاو فيها بصح كيبقينا وحدنا صارحني بلي نتي خاطيك وحاب غير ينتقم عليها بعد كلشي صرا وعادت فيها انتقام من خوك وعداوة كببيرة انا تقدمت هادي الخطوة وضحيت بروحي باه نحبس لعداوة وفي نفس الوقت كنت نقنع في رمضان باه يصحح هو الغلطة بصح هكدا وطلقك مي بعد الشيى ليسمعتو واش صرالك بعد طلاقكم انا دخلني الشك والتسوسيس حتا لبارح حببيت ندير تاست ونقرب منك لقيتك تتهربي توسوست _هربت منك باسكو نفسيا مانيش قانعة بيك ولا مستوعبة واش راك دير ماضنتيتكش تقرب مني _راني راجل ونحس مانيش عزبة باه مانقربش لحلالي _ماش كما فهمتها نتا كان قصدي كييفاه تقربلي وانا كنت مرت خوك وأختك حبيبتك _نقولك هدرة وحدة ونتي فهميها كما تحبي .كون درك كما دخلت عليك ولقيتك ماش عدراء تأكدي بلي نهزك و نكركرك عريانة فدروج ونرميك برا الدار ونزيد نكمل على العار ليحطو فيك رمضان مانقبلش نستر وسخ تاع انسان خلاف_كيفاه ؟؟_ قتلك فهميها كما تحبي _ناض فتح التاقة وبقى يطل ويتكيف وانا دورت كلامو في راسي كلمة كلمة وفهمتها كان قصدو كون جيت صح مرت خوه ودخل عليا رمضان وصرا ليصرا بيناتنا جامي يخمم يشوف ليا ولا يقرب مني ويستر عليا فالاخير انا طليقة خوه بدون دخول وهادا الأهم كلمة طليقة بدون دخول يعني لا خوه قربلي لا غيرو هادا هو الشيئ ليخلاه يتقبلني __شوي وغلق التاقة وشاف مع الباب وتنهد .ماش راح يسكتو علينا هادو _حابة نروح نغسل عليا _ماعندك وين تروحي درك الحرب مازالت قايمة لتحت اصبري حتا يتفرقو _ستنيت حتا غفات بيا عيني ورقدت مافطنت غير وهو ينوض فيا _نوضي تغسلي وهيا نهبطو نتغدوا _ايه .نضت والوقفة جاتني صعيبة حتا هو شفتو يشوف ليا ومدلي يدو مشيت رحت معاه غسلت ورجعت لبست وهبطنا لقيناهم مجمعين كامل ياكلو في بيت مفرشين فيها غير زرابة وبسايط وفالوسط 4مايدات وفوقهم سينييا والماكلة الله يبارك وكاينة مايدة مجمعين عليها ولاد محمود .عينيي حوست على رمضان مالقيتوش وليت قعدت وكامل عينيهم علينا سيرتو ناناه تسكاني فيا _كنتي راقدة علاه ماشبعتيش نوم فليل _نطقت ليها لعحوز قاتلها راهي عروسة باينة تعبت ليام ليفاتو _واش من تعب عقدت ليوم عذوا من داك جات تجري لا عرس لا تكسار راس حتا لجهاز ربي ينوب قريب ماجابت والو _قاطعها مجاهد .البركة فلقليل نانا .اييه قوليلي هاداك واش دار فيها مع نسابو _داو بنتهم وراحو ورمضان راه يقولي غدوا نروح معاه باه نرجعهالو من خرجت من دار وهو يسب ويتحلف كيداوهالو _مانعرف كيقالت هكدا حسيت باللقمة بسيف هبطتلي يعني فهمت بلي مرتو يحبها وعزيزة عليه عكس مادارلي انا .بقاو يحكو وانا غير مهبطة راسي ناكل ونسمع بصح كلشي راني نماركي فيه في راسي باه نعرف عقليتهم ونحفظها كيفاه دايرة _كييكملنا ناضو لبنات هزو لماعن وناناه طبعا عينيها فيا .نوضي عاونينهم وشبيكي مدبالة هكدا وريلنا شطارتك شوي_شارطة نانا ماتخافيش على مرتي. هيا خالدة نوضي طلعي لشمبرتك رتاحي _نتا باغي تحبسها خليها هنا _حاليا لا بلاصتها لفوق وخلاص _بوه عليك مادامك خايف لاه تقرب وتتزوجها وتجييب لمشاكل لراسك _شفت معاه هززلي براسو باه نطلع وليت نضت وطلعت وانا فدروج خلعتني الباب تاع برا تغلقت بالقوة دورت لقيتو رمضان غلقها ويشوف ليا والشر يطير من عينيه زربت كملت دروج ودخلت لشمبرة وغلقتها درك هادا يبقى كابوسي في هادي الدار كيفاه نديير كيفاه راح نعيش .كيطلع مجاهد ماعرفتش نجبدلو الموضوع كنت حابة نقولو يطلعني يعيشني لفوق في دارو وحدنا خير بصح سكت حتا هو مايهدر مايشوف ليا ماوالو وكأني غير موجودة قدامو.
قريتيي ديري جام
