الحلقة 58
#بقلمLina_sabrina
ماعلاباليش واش صرا هاديك دقيقة كنت في عالم خلاف برك حسيت بالماء مسحوه على وجهي وهاديك لمرا ليدخلت علينا مقابلتني _ ماتخافيش راني جارتك وهادوك راهم راحو وانا وبنتي رانا معاك حكمي يدي وهيا تدخلي تقعدي فوق الكانابي خيير من الأرض _ حكمتني وداتني قعدتني وشربتلي الماء وتقرالي فالقرآن حتا تهدنت شوي .سور هبطتلك لاطنسيو ولا سكر عليها طيحتي هادوك مايخافوش ربي باين دخلو لليك وكاش متدارولك لمزية راجلي سمع صوتك _هيا تهدر وانا غير نشوف بعيني _ بنتي قوليلي راجلك وقتاه يجي وكيفاه نتصلو بيه وريلنا _جيت نهدر ماعرفتش ماعنديش طاقة هزيتلها صبعي لثلفون _ناضت هيا وبنتها قعدت قدامي حكمت يدي ويماها شفتها كيبقات تعيط وهدرت معاه قاتلو ارواح شوف بعينك __فاتت وحد ساعة هكداك باه سمعت صوتو برا مع راجل يهدر ومبعد دخل جاء عندي دييراكت _خالدة راكي مليحة شوفي معايا اهدري _هزت براسي وماهدرتش وهادوك نساء بقتوني على خير و خرجو _قعد معايا مدة وهو يمسح على راسي حتا راحتلي الرجفة وسقساني وجاوبتو وهو تنارفا وشعلت نار فيه _بصح ياك محدرك من قبل ولا راني غالط؟؟ _كي قالتي هاديك الهدرة مافقتش بروحي من الخلعة تلفتلي ومبعد راك عارف واش صرا _ماعليش هاديك ومبعد نهدر فيها .قوليلي درك كاش مادارولك احكي باسكو جارنا قالي سمعت عياط مرتك غير طبيعي مرة لولة والثانية عليها بعت مرتو ولمزية الباب كان ماش مغلوق بالمفتاح قوليلي كاش مادارولك _لالا بصح كانو حابين يسرقو يديو الدهب وقالتلي كون تهدري نرجعلك راجلك مهبول _بيانسور ترجعني مهبول راهي سحارة واش تستناي منها دير _طاحو دموعي .يخوفو لزوج سيرتو هيا تقول في كلام تاع شياطن _ريحي وانا نروح نشوف واش ندير معاهم _واش دير ماتروحش لعندهم كاش ماديرولك _حتا نلقاهم كيخرجوهم من الدار لمو قشهم وراحو مانعرف وين وجاري قالي ماقدرناش نحبسوهم حتا هوما يخافوهم بصح ماعليش انا نشكي بيهم _تعيش بلا مشاكل خلينا منهم نبدلو الدار وخلاص تعيش ماتشكي مانحصلو ماراناش قد هادو لقزانات _خلاني وراح خرج حتا رجع _هيا لبسي نديك نشكو بيهم _هدرت وحاولتو باه مانشكيش بصح مابغاش يسمعلي ودار رايو وفهمني واش نهدر وباه مانخافش .خرجنا كان وقت المغرب رحنا المركز تاع لابوليس كان قريب لدار كيكنا برا قط مايسعى غير حنا وهو حاكم يدي وضاغط عليها بالقوة ويمشي بيا جريا وعينيه من ومن يفيريفي .دخلنا وشكينا كي كملنا رحنا لدار حنا لولين وهوما لحقو بينا انا كنت فدار وهو خرج لبرا لعندهم بصح كيرجع كان وجهو فاسد سقسيتو ماحبش يجاوبني وانا كل شوي كينتفكر كيفاه دارولي تحكمني حالة رعب وموحبيتش نخبر مجاهد بلي راجل هاداك ضربني كنت حابة نسكر على الموضوع مانكبرهاش كتر ماراهي كبيرة خفت على روحي وعليه بصح هكدا وخلاني نشكي بيهم فورصي _شوي ولقيتو انفجر في وجهي كلو بسبابك حدرتك ماتفتحييلهاش الباب وهدرت وفهمت ألف مرة ونتي تفتحي ودرك رجعتي لحالتك لقديمة وانا بيانسور نحصل في جدك _يعني كينكت صحيحة مليحة بصح كي تحكمني هادي الحالة نرجع مانسواش هكدا حاب تقول _فهميها كما تحبي _يعطيك الصحة _خليتو ورحت توضيت وصليت وتقربت لربي يبقى هو السند الدائم __لصباح لقيتو راقد فالبيت مامبا جاء طل عليا فليل كما موالف يتفقدني _درت لفطور لقيتو ناض ديتلو فطر وماحبيتش نهدر حتا ومبعد خرج وبقى يامات وهو بعيد مني كأني غير موجودة قدامو وهادوك لابوليس حوسو عليهم ولقاوهم وداروني أنا الغالطة قالولهم بلي هيا قاتلي ارواحي قطعيلي الخلعة بصح كيكانت معايا تهجمت عليها وراجلها جاء يسلك مرتو مني المهم حطو فيا اللوم كلو وبليانا مهبولة وماش في عقلي ومسحورة وكلش .ومجاهد بقى غير يترقب فيهم يرجعو لدارهم بصح مارجعوش مانعرف وين راحو وهو كل مرة يكسر حاجة ويبقى يهدر وحدو حتا بديت نشك كاش مادارولو بصح غاضتني منو انو بعد مني وحاسبني بهادي الطريقة ولو يسمعني فليل كيفاه بايتة خايفة ومايجييش يطل عليا وينحيلي الخوف كيف عادتو هاد المرة عكس كلشي __وحد لعشية كيدخل لدار وقالي جيبيلي كاس ماء انا يديا كانو مطليين بلعجين قتلو اصبر .وانا نغسل في يديا دخل لعندي _نتي ماتسمعيش ماتجاهلتيني قتلك جيبيلي كاس ماء _وانا قتلك اصبر وشبيك شاعل فيا هكدا ادا نتا ماسمعتكش هادي مشكلتك يديا كانو بلعجين كنت نغسل فيهم باه نجييبلك وبزيادة مانيش خدامة عندك باه تعاملني بهادي الطريقة _نقصي عليا صوتك ومانحتاج منك حتا خدمة _بالناقص عليا مالا معاملتك معايا رجعت لا تحتمل _دورت لهاديك للعجية من غشي رجعت نعجن ونخبط فيها حتا لقيتو وقف قدامي _خالدة ونتي ماكيش عارفة علاه نتعامل هكدا ؟_ باينة ماتحملنيش وانا مريضة كلشي واضح.
الحلقة 59
بقلم لينا صبرينة
تخمامك وين وتخمامي أنا وين يابنتي ياااو بالعكس انا صح تغششت منك وطلعلي زبل منك كيفتحتيلها الباب وعطيتيها فرصة تستغلك وتستغباتك وفي نفس الوقت حبيت نفيقك لروحك انا كينغيب راني نشوف فيك ياكلوك صح عندك لسانك بصح راكي ضعيفة من داخل كون واحد يخوفك فيساع يجوك هادو النوبات وتدخلي في حالة يرثى لها. راهم حكاولي واش صرالك اسخايلي كون دارتلك ونتي معاهم وحدكم كون راهم عجبو بيك وداو واش حابين ونتي جاتك سكتة قلبية عادي من الخلعة يلزم تفطني مع روحك باه بعيد الشر يصرا كاش حاجة قبل لا يزيد الحال تخدمي عقلك قبل ماتصرا حاجة انا مانيش معاك ليل مع نهار فهمتي _ايه بصح الله غالب عليا مانفيقش لروحي _ايه عارف ونتي يلزم قبل ماتجيك ديري البوسيبل باه تخفي على روحك باه ماتهلكييش روحك راني نهدر على مصلحتك _هيا خدعتني بالهدرة هاديك مادرتلهاش حساب اصلا ماش عارفة كيفاه علابالها بلي حنا من الدوار _وهادي تغفى عليها اكيد تعرف انا اصلا هادر مع الجيران يعني ماش صعيبة تعرف وزيد انا لومتك وزعفت منك باسكو تهورتي و تسرعتي لوقتاه تبقاي هكدا راكي شفتي كيفاه كيتسرعتي واش صرالك .يلزم قبل كلشي تخدمي عقلك .ادا جاو وقالولك راجلك مات قبل ماديريش ردة فعل وتدخلي دييراكت في إنهيار تاع لبكى وتصدقي .قبل كلشي استوعبي ساع ومبعد أحكمي _بعيد الشر عليك _حمدلله ليلحقو بيك الجيران صينو راكي من الخلعة والخوف موتي فلبلاصة ماتخليهمش يستغباوك و أفهمي من خوفي عليك راني نهدر هكدا _ مالا علاه كنت تتعامل معايا هكداك ليام ليفاتو كييعدت تخاف عليا علاه بعدت مني ورجعت مانهمكش _كينكون متغشش من الأحسن نبعد منك صينو نفسدها معاك وزيد حبيت نديرلك درس ونفيقك للروحك .يلزم تعرفي تتحكمي في روحك انا ماش ليل ونهار معاك ___بعد مافهمني وبقى يديرلي في دروس رجعت علاقتنا كيف ماكانت عادية وهادوك زوج قالي مانعرف وين راحو مازادوش بانو هنا وانا حالتي يوم بعد يوم تزيد تسوء رجعت نشوف خيالات بزاف كينقول لمجاهد يقولي بديتي توسوسي نحيه من راسك وانا بالفعل صورتهم ماهيش تروح من بالي كيكون هو غايب نسمع حس فالدار غير طبيعي مع انو وحدي ولا كينرقد نحس بحاجة ورايا كيف ريح يفوت عليا ومجاهد مالقى مايدير معايا داني لطبيبة قاتلو هادي ماش خلعة وحدها مرتك كاش مابيها ممكن سحر خلاها تتوهم وتشوف خيالات درك حالتها راهي دونجي أرقيلها _بصح هيا عندها مدة بهادي الخلعة وياك قلتيبها تجيك فجأة _ايه بصح ماش لدرجة تسخايل هادو الأمور غيرك اجري عليها __في نفس النهار خلاص أعصابي تلفو وقرر يخرجني من هادي الدار حتا هو توسزس كاش مادارولي هادوك وصح مابقات عيشة في هادي الدار _لم القش وحدو أصلا غير شوي ورحنا للدار لولى كانت فارغة وخبر رمضان باه مايجييش .استقرينا فيها وجابلي راقي وعلى حساب واش قال ايه فيا سحر مأكول ومرشوش وراه جديد .عرفناه هاداك طعام ليكليتو واستبنيتو هيا على الأكيد سحرتني وكييلها ربي __ بقيت مدة نرقي وحالتي بزاف كانت صعيبة كانو أسوء أيامي بصح حمدلله من الرقية الدائمة وقربي لربي سبحانو تحسنت حالتي هادوك الخيالات مابقيتش نشوفهم غير فالكوابيس فليل بصح الأثر تاعو ماش بساهل يروح مني ونبرا نهائيا المهم خيير من قبل . بصح الخلعة زادت فيا سيرتو فليل كينكون وحدي نحس بالموت دخلتني حالتي كانت غير إرادية وراح نموت منها هلكتني وخلاتلي حياتي بلا طعم مرار دمرت نفسيتي ماخلاتنيش نمارس حياتي طبيعية ومجاهد خمم وخمم وخرج بنتيجة _خالدة صيبو قررت نرجعو للدوار وتعيشي وسط دارنا هكدا نتهى عليك خير من هنا وحدك راكي راح تموتي وانا مانستحملش نشوفك هكدا تضيعي من بين يديا وتدوبي كيف الشمعة وماندير والو على الاقل كيتروحي لهيه وانا غايب نوصي وردة تبات معاك ماكنتش حاب نرجعك لهيه بصح درك تحتمت مانقدرش نكون أناني كتر مقابل صحتك _طاحو دموعي .سمحلي بصح والله ماش بيدي حاولت نتحكم في روحي وماقدرتش _قرب ليا وحضني .ماعليش والله عادرك وربي يشفيك ان شاءاالله .طلعي راسك نسقسيك حاجة _طلعت راسي ليه .كينرجعو ماش راح تسكني معاهم تقبلي تعيشي في هاديك الدار لي بنيتها ؟
الحلقة 60
بقلم لينا صبرينة
سكت زمان وقتلو نروحو ويرحمها ربي .ماحبيتش نمدلو جواب باسكو ماش متأكدة من روحي والقرار ليخداه باه نرجعو للدوار شفتو أنسب حل باه صحتي ترجعلي باسكو طبيبة قالت باه تخف عليها الخلعة لازم ماتبقاش وحدها وانا هنا ماعندي حتا واحد وهو خدمتو مايقدرش يسمح فيها راهي بيها نعيشو وكما قال صح ماش حابة نرجعو بصح مابقات في طاقة نزيد نحمل هاد لعداب ___بعد يمات جمعنا قشنا وهو قال هاداك المابل كلو ليفي هاديك السكنة نبيعو باه ادا سكنا الدار ليفدوار يكون عندي باه نعمرها _وصل نهار لينروحو فيع هاداك صباح نضت خايفة وهو فهمني _خالدة ربي هو الستار نتوكلو على ربي وخلاص_خاييفة نلقاو فوباراج والله ساعتها نموت ماشفيتش مرة ليفاتت واش صرا معانا_ عارف بصح ماعندناش حل مانقدرش نزيد نخليك هنا كتر هكدا افهميني .كون كاين حل خلاف والله مانروحو خممت نجيبلك وردة ونانا علجية ماحبتش ودارتلي حرب فثلفون ويما تاني حتا هيا ماحبتش ومحمود قتلو جيب العايلة وارواح نفس الشيئ ويماك ماتقدرش موحال هيا .مالا ماعندنا حتا خيار خلاف نخلوها على ربي وخلاص _ ان شاءالله ونتا تقدر تسوق ونتا مريض وزيد دواء ليتشرب فيه يرقد _يرقدني غير فليل نورمال نسوق وبقاي تعسي هادا ماكان __رحنا وطول طريق ندكر في ربي يسترنا وهو يهدر معايا غير باه ينسيني وفي نفس الوقت يفهم فيا كييفاه نرجع نتعامل معاهم .حتا دخلنا لدواونا ودشرتنا باه رتاح قلبي _اول بلاصة داني ليها لدارنا كيشافتني فرحت ماتت فرحة وغير تبكي ماتوقعتش كامل المجية تاعي .تغيدينا عندهم ونجوى كانت ماكانش قالولي راهي في دار عمتي .المهم كانت قعدة معاها هايلة (وبالنسبة لبابا وخويا زوهير رجعو وجودهم من عدمو نفس الشيئ مايهمنييش فيهم قلبي تعمر منهم )_تغدينا وعاونتها وعمتي سادة عاى روحها ماخرجتش عندنا _بقيناهم على خير ورحنا لدار كي قارينا قدام الدار حكم يدي _شوفي ماكالاه تقوليلهم عندك مرض الخلعة وتسحرتي ماش حاب حتا واحد يعرف نقطة ضعفك ومرضك هادا ماش حابة واحد منهم يستغلك كي سقسوك قولي رجعنا من حالة لتم ماش مليحة ومجاهد ييروح يخدم ويخليني وحدي فليل ماقدرتش نوالف عليها رجعنا هادا ماكان وهاكي مفتاح شمبرة ليوم نباتو فيها ومنبعد ربي يعملها حل _حكمتو عليه وهبطنا طبطبنا فتحتلنا علجية الباب ورجعت لبين يديها __الحق فرحت فيه وزغرتت وانا ماعبرتنيش حتا انا ماش ميتة عليها بصح الباقي سلم عليا ودخلنا عند الشيخ هو ثاني ورحنا قعدنا فالحوش في نص الدار .ديراكت طلعت راسي لباب شمبرتي شفت معاها وسهيت معاها ونحكي مع روحي في قلبي وين كنت وين رجعت __بقاو يهدرو ويماه فرحت بيا وفي نفس الوقت تخلعو مني قالولي صحتك راحت شيانتي واش صرالك وحطت اللوم في مجاهد ماهوش متهلي فيا وهوما يهدرو على هاد الموضوع دخل رمضان وخديجة كيشافونا عقدو حواحبهم وقاتلي روفيا كانت في دارهم .ناض هو سلم على خوه وقعدو يهدرو ومجاهد يشرح فالوضع .شوي ونضت طلعت للشمبرة ولو تعبانة سيقتها باه يتنحالها الغبرة ومن الماء ليبزاف هبط لعندهم من السطحة ليلفوق وعلجية كيف العادة لازم تعلق _روفيا طلعي عاونيها حبت تشطار وهيا ماش قدها راه يسيح علينا الماء _في قلبي كدابة تعرف تزيد عليها برك اصلا هوما قاعدين مقابلين شمبرتي لتحت موحال يوصلهم الماء __كملتها وعاونتي روفيا فالفاليزات فرغناهم غير وحدة صغيرة خليتها _هبطنا كان وقت لعشاء جيت نعاونهم ماخلاونيش طبعا روفيا ووردة وسمعت مجاهد يعيط من البيت رحت عندو كان مع خاوتو وناناه ويماه قالي جيبيلي الكابة الصغيرة _طلعت جببتهالو وكيتلمو كامل كل وحدة واش مدلها حتا خاوتو جابلهم وكامل عجبوهم _قالهم خرجنا انا وخالدة وشريناهم ليكم راه ذوق تاعها حلو انا خاطيني _مانعرف هاديك دقيقة عيني علاه شافت مع رمضان لقيتو كما كان يشوف معايا وبدل عينيه _مجاهد حقا نجيبلك دواك قبل لا تتعشى شربو _خلي مور العشاء خير ماش بالضرورة نشربو درك _لا على جال صحتك لازم درك تشربو كما وصاك طببيب_جبتهولو شربو وعلجية تتنهد وتعاود حتا كي تعشينا هو بقى يقولي كولي مليح باه مايقولوش مضيعك بالشر كولي زيدي لحم تاعي .المهم تاكلي نتي وانا ماناكلش مايهمش ويماه تقولو ايه يلزم هكدا علاه عندك عشرة منها .
الحلقة 61
بقلم لينا صبرينة
فاتت ليلة وسهرة معاهم علكيف عجبتني اول مرة نحس بروحي زوجة وليا قيمة ومرتاحة .فليل كيطلعنا رقدنا ديراكت حتا لغدوا وانا نرجع فلماعن لبلاصتهم دخل مجاهد _علاه وحدك تخدمي _راهم غير هادو نرجعهم لبلاصتهم ماعليش _ريحيلي روحك ماش محتمة عليك .قوليلي كيفاه خممتي أنا لبارح من تعب والدواء رقدت طووول مالقيتش فرصة نهدرو فالموضوع _نتا واش رايك ؟_قرب ليا وحط صباعو في طرف ضفيرة تاع شعري .مادام بديت من جديد حياتي معاك مايهمنيش الماضي وحاباتك نتي دشنيها يالالة النساء .قرب وجهو باسني على خدي حشمت _واش رايك _ايه صايي مالا نطلعو ليها كيف كيف وندشنوها ونعيشو فيها _حكم لحيتي بصباعو . فحلة وشاطرة وكينرجع انا نغيب نوصي يما ولا وردة يباتو معاك أكيد مانخليكش وحدك _هو طلع وانا كملت الكوزينة كيجيت نخرج دخل رمضان طبعني من صدري بيدو قريب ماطحت _واش خصك عندي _عندي هدرة معاك وسمعيها مليح وحفظيها اولا انا صح حبيتك بصح من بعد كرهتك وكون مازلت نحبك مانخليك لخويا فضلة وثانيا شفت علاقتكم طورت وكبرت والاهتمام زايد واضح وزيد تتباوسو وماهمكمش ادا شافكم كاش واحد _علاه غرت ؟واش دخلك هو راجلي ومن حقي ندللو وانا من حقي نشوف دلال من عندو وشيئ كببيعي نكونو قراب لبعض عارفك راك تموت من داخل وراني حرقة في قلبك وادا ماش في قلبك راني في عقلك ماعجبتكش كييفاه بنيت حياتي من جديد ومع من مع خوك نتا لي مسكين ماش انا واصبر وزيد شوف بعينك حبنا كييفاه يزيد يطور قدام عينيك وماش من الموحال ترجع عم ولادي ياسي رمضان وكبرياءك وانانيتك نجردهم وانا غير نشوف ونشبع غليلي فيك ونرجع ثاري منك بكل هدوء ودرك طير من قدامي _بقى يضحك وانا عيني عاى لباب لا يجي كاش واحد ويشوفني معاه منت نهظر جيت نخرج ماخلانيش وحبس من ااضحك وضغط على سنيه _ادا دايرة في بالك راح نخليك تستعملي خويا باه ترجعي ثارك تكةني غالطة مجاهد ماهوش طعم وماش راح نخليك براحتك ومانخليكش حتا تحلمي تجيبي من مجاهد ولاد وعمرك في هادي الدار قصير ونطلقك منو ليوم ولا غدوة المهم آخرتك الطلاق والرجعة لدار باباك ماش معززة مكرمة راح ترجعي مكسورة ومهانة واشفاي على كلامي (صح كلامو أثر فيا وخوفني بصح ماخليتوش يحس ) _ابقى تعاود في هادي الهدرة منا لغدوا بصح حببيت نصححلك معلومة مجاهد ماهوش طعم باه ننتقم منك هو راجل عليك هو سيد رجال ليدخل لقلبي من أوسع ابوابو وعلاقتنا ماش مصلحة راهي حب خرجت منا مشاعر لبعضنا مماثلة ودرك دير لي عليك نشوفو واش تقدر دير وإذا راح ترجع كما القزانات ماش راح نستغرب لتم نفهم بلي تبقى دايما رخيس وانا العلة في حياتك _تسلكيها غالية على هاد لكلام تاعك هادا قسما بالله مانخليك تتهناي ونوريك السكوت تاعي ليقبل واش يدير ودرك وانا غير من بعيد منك موحال نخليك مرت خويا ونرجع نخليك تحلمي بيا وانا نتلذذ بضعفك يالحيوانة خليتي روحك لعبة مستعملة لواحد لواحد يلعب بيها ونتي كييف لبهيمة قابلة راح تبقاي موسخة لنهار تموتي المهم شوفي واش نديير_روح اتقوى على سيادك ماش معايا ودير ليتقدر عليه ماش خايفة _خرجت وخليتو بصح كلامو كانت فيه جدية وحقد ونكدب عليكم ونقول كلامو ماأثرش عليا بالعكس كلماتو الأخيرة بزااف أثرت عليا ورجعتي و جرحتني ورجعتني لور ودرك واحد فينا راح يخسر والعين تشوف.
الحلقة 62
#بقلمLina_sabrina
بعد كلامي مع رمضان طلعت لشمببرة وبقى مجاهد يهدر معايا على الدار واش نديرو فيها وانا تخمامي بعيد عليه كنت حابة نسقسيه واش ليخلى رمضان هاداك الوقت يبعد مني بيه بمرتو بصح خفت نسقسيه ويتوسوس ويفهم بلي صرات كاش حاجة .مالا خليني ساكتة خير ونخليها على ربي _خااالدة والله ماراكي تسمعيلي _لا سمعت وفهمت _كيشغل مانعرفكش راني راح نرقد شوي ونوضيني مع العصر و غلقي التاقة __هو رقد وانا بقيت نطلع ونهبط فالتخمام حتا داتني عيني مافطنت غير بالباب يطبطب تخلعت لقيت روحي واقفة _بلعقل ماكان والو طبطبو برك فالباب _قعدت وهو راح فتح لقاها ختو صغيرة قاتلو كاين راجل لتحت يعيط عليك_هبط معاها وانا شوي وهبطت عاونتهم فلعشاء لقيتو دخل قالي ارواحي نحتاجك _طلعت موراه لقيتو كمل لطاج ليلفوق حبس عند باب دارو وفتحها اوا ومبعد حكم يدي ودخلنا كانت اول مرة نشوفها من داخل .هيا مخدومة ومكملة وتجي على شكل آبارتومو 3بيوت وصالون وكوزينة فارغة برك يلزمها تتعمر _ماتخميش كينروح نبيع المابل ولفريجيدار وكللشي ليلهيه وكينجي نشري لجديد ولماعن نجيبهم معايا راهم غير شوي يكفو فطونوبيل .وهادي سمامة كينروح نديك لداركم خير ياك تروحي نورمال؟؟ _ايه عادي _عجباتك الدار؟_ ايه هايلة خصها برك تتعمر _قرب ليا وبقى يشوف ليا بنظرات غير طببيعية .خالدة نتي ليتستاهلي هادي الدار وبوجودك برك راح نحسها عامرة ومزينة برك فحفحيها بنشاطك وبقوة إيجابية _واش قصدك مجاهد باسكو تخمامي راح بعيد _ماتخلينيش نندم ليحكيتلك .انا صارحتك عادي بصح نتي ماتبقايش حاكمتهالي كون نبقاو حاكمين لبعضنا جامي تلقايتا وصلنا لهنا وسكري الموضوع ماش حاب نفسد مورالي على جال ماضي ماعندوش معنى __فليل قبل لعشاء دخلت خديجة حاكمة في مسلانها وتمشي تتمايل وتقول جعت وخالتي حطتلها فاكية في صحن ومدتهالها ليدها تاكل .همست لروفيا _اسمعي هادي علاه دير هكدا وخالتي راهي تدلل فيها لاتكون لي في بالي _ايه هاديك هيا راهي بالحمل صباح الخير _دخلت علجية وقعدت قدامها وتقولها كولي بصحتك وماتبخليش روحك وادا خصتك حاجة راني هنا _مبروك عليك خديجة هاداوين سمعت بيك_ يبارك فيك وعشرة في عينيك _تافهة مخلوعة هادي _نتي ليمسكينة وراكي علابالك بلا مانهدر اتشوطي من داخل _هزت صحت وخرجت وعلجية نطقت .ونتي علاه مازال ماشفنى منك والو راكي قريب عام زواج _ماكتبش ربي _كلشي تحصلوه فالكتوب باين مجاهد ماش حاب يولد من زريعة تاعك والله كون يقبل يتزوج بثانية في نهار واحد تكون عندو _ايه زوجيه تهنيه وتهنيني علاه حسباتلك كون يتزوج عليا يحبسلي الأكسجين عادي نكمل حياتي كما يقولي راسي_خلاص راكم سمعتو واش قالت شهدو معايا__ كيكنا نتعشاو رمضان ماسكتش وهو يهدر ويحكي وزعما يدلل في مرتو ومجاهد مانعرف علاه مقلب وجهو حتا دواه ماحبش يشربو والماكلة يلعب بيها سقسيتو تخنزر فيا وليت سكت كيطلعت باه نرقد لقيتو قاعد على حافة سرير وماهوش عاجبني _قعدي هنا عندي هدرة معاك _هاني قعدت واش كاين _نتي علاه متزوجة بيا _كيفاه! راه باينة علاه وحتا رانا حافظين سبب زواجنا _مانهدرش على السبب تاع بكري نهدر على درك _متزوجين وخلاص نبنييو حياتنا ونكونو عايلة مع بعض _اوك مالا تقبلي مرا خلاف تشاركك فيا _واش جاب هادي الهدرة درك _سقسيتك نجاوبيني قد السؤال _لالا مانقبلش مستحيل _مالا علاق قلتي لنانا كون نتزوج انا راه تتهناي ومانعرف واشش _يوووو ديجا وصلتك الهدرة سخونة عادي قلتها باه نسكتها وخلاص _بصح نتي هكدا قيمتي عفصتيها خليتيني نبان انسان حمار ودرويش قدامهم برهنتي بلي انا مانسوى عندك والو _علاه مكبر الموضوع ياك نتا تعرف واش عندك ماش محتمة هوما يعرفو _ناض وقف .مالا من ليوم ديريلي حساب وردي بهدرة سخونة قد مقامها ماش بلا مبالاة ماتخلينيش نحرقك صح بضرة انا ماش تاع هاد صوالح بصح كينشوف مرتي مانعنيلها والو فحاجة باينة نحوس على الإهتمام من جيهة خلاف فخودي حدرك مانيش راجل كرسي _قالها وخرج وانا رجعت نضحك وحدي ونهدر بالصوت .راه يقولي نجيبلك ضرة هههه من صحو هادا حسباتلو نقعد معاه _لقيتو فتح الباب وطل عليا .وادا ماش حابة ضرة ساهلة فكاين طلاق عندك كل الحرية _عاود غلق الباب وانا لبليغة لي في رجلي نحيتها ورميتها على الباب .طحان كلب راه بدا يطلق في ريحتو ويحوس على لجديد مالا انا واش كنت محلي من الإعراب .
الحلقة 63
بقلم لينا صبرينة
طلعلني لينار لسماء وخلاني هكداك حتا فاتت 12 باه دخل درت روحي راقدة ماش حابة نشوفو حتا هو سمعتو يشرب فدواء وحكم بلاصتو وانا رقدت مازدتش حسيت .فطنت صباح على الحس تاع بيبان لخزانة يتخبطو تخلعت تقعدت لقيتو هو يجبد فالقش ويرمي للأرض _واش ديير نتا صباح ربي علاه ترمي فيهم هكدا _قمجة تاعي البيضاء وينهي لينخدم بيها _حطيتها فالجيهة تاعي كون نوضتني برك مديتهالك ماش حتا تخلطلي الحالة درك واش يرجعهملي _هبطت رجليا للأرض باه نوض لقيتو عفص على القش لي فالأرض برجلو وهو لابس صباط وراح لجيهة ثانية تاع لخزانة جبدها وحطها فالكابة وغير مبالي _نتا واش خداك صباح ربي _سكتي ونوضي لمي قشك نديك لداركم راني رايح للخدمة_والله نتا تحب دير رايك على هواك علاه ماخبرتنييش لبارح _انا ياك مانهمكش وزبد حبيت نريحك قلت نديرلك مفاجئة _ماش بهادي الطريقة راني حسيتك تلي...._كملي واش حسيتي وعلاه راكي تحسي أصلا _ماش محتمة نشرح واصبر عليا حتا نكمل بغرضي ونروحو _ساعة مانزيدلكش _استغفرت ونضت وجدت روحي بسكات اكيد ماش راح نزيد نتناقش معاه حسيتو راه غير حاب يهرب . لميت القش ليرماه ولبست وهبطنا لقيناهم مجمعين مع بعض يفطرو _خير وين رايحين صباح ربي _صبحنا عليهم وشرحلهم مجاهد وعلجية نطقت .ايه اديها ماخصناش اتهامات باطلة في غيابك _المهم مادامكم مجمعين درك حببيت نقولكم بلي كينرجع من الخدمة راني راح نطلع انا وخالدة نسكنو لفوق في داري وترجعو تشوفوها كيف الضيفة هنا وهكدا ماتتهموها ماتهمكم _يماه ردة فعلها كانت عادية ورمضان شفتو مهبط راسو ويلعب بالمغرفة تاع القهوة وعلجية طبعا ماهجبهاش الحال ولاحتلو كلام بصح مجاهد كما العادة غير مبالي _قبل ماتخرجو قعدو تفطرو ساع _لالا يما ماش قادر نفوت حاجة وخالدة تاني شبعانة ياربي مانروح_ربي يسهلكم _خرجنا ورحنا لدارنا كيفتحلنا زوهير الباب بقى يخبش في راسو .خيير واش صرا ماش قادر على لفجايع على صباح ربي _علاه نتا كيتجي ختك تعتبرها فاجعة ربي يهديك _اييه دوختوني برك كيمبكرين ادخلو _دخلنا وفهمهم مجاهد وجبد يما على جنب هدر معاها كيجاء رايح لحقتو _مجاهد كلامك تاع لبارح واش كان مقصودك ببيه ادا كرخت مني ماكالاه ترجع لعندي _كلامي تاع لبارح هو درس ليك باه نفطنك خدمي عقلك باسكو ماش مجبور نشرحلك كلشي يلزم نتي تفهمي المعنى وحدك وتطبقيه هيا بسلامة وبلا مانوصي _راح وانا دخلت عند يما سقسيتها واش كان يهدر معاها قاتلي حكالي على حالتك باه نهتم بيك مانخليكش وحدك _ممم زعما يخمم عليا.بقات يما تلوم فيا كيجامي حكيتلها على مرضي بسيف سكتها __رحت للبيت لقيت البقرة تاع نجوى راقدة من غشي خبطت باب لخزانة ناضت تخلعت وتسمي كيشافتني ماصدقتش _واش جابك نتي شحال ساعة ؟_جيت لدار بابا تساليني _يالطيف واش من وجه صبحت عليه _ناضت خرجت وشعرها طالع فسماء ماش مستوعبة__وانا نفطر وحدي دخلت تشوف فيا من فوق لتحت .نتي درك كلما يروح #### تاعك تجي هنا محتمة عليا نشوف فيقورتك _أولا هاداك يسموه راجلي وعندو اسم مسمى مجاهد ياالحنونة حسني ألفاظك على راجلي وثانيا ماش راح نزيد نجي هنا ونطول باسكو عندي داري وحدي يعود كيروح هو نبقى في داري نتمع بيها براحتي ماعندي عجوز فوق راسي ماعندي سلافات غيارات _قدمت ليا وميلت راسها ووجها فسد .واش قصدك بدارك هادي _لللأسف ياختي لعزيزة النصيب والمكتوب تكتب انو الدار لي تبنات على جالك تطلع ليا ونستاهلها أنا يعني لالات النساء راح تسكنها _تبسمت .ماعليش بصحتك مايهمنيش بصح ليوم بانت حقيقتك ووجهك ليكان مخبى بلي صح كنتي حاسدتيني عليه وليوم راكي مخلوعة بيه بصحتك الفضلة تاعي يالمخلوعة _ناضت تمشي .ايه مخلوووعة بداااري وراااجلي يالغيارة _دخلو عمتي ويما .بنتي علاه هاد لكلام لختك _خلي تستاهل هيا تعرف روحها ونتي يافريدة ماعجبتكش حتا تشوفي فيا هكدا _يااالطيف على العقلية الخاسرة .
الحلقة 64
بقلم لينا صبرينة
فاتو يامات وهادوك زوج كون يرمو عليا الهدرة نكلاشيهم وفليل كنت نرقد مع يما في شمبرتها وبابا جابتلو السبة انو متواحشتني برك حابتني معاها واكيد ماهدر والو وانا كيعاد الحضن الدافئ والامان قدامي نرقد مرتاحة ونوض لاباس عليا وماخليت حتى واحد يحس بمرضي وفي نفس الوقت هادوك ليام بقيت غير نخمم في كلام مجاهد وكيخبرت خالتي كيجات على كلامو نصحتني وفهمتي بلي راه يحوس على الإهتمام منك كيتكونو وحدكم وكيتكونو مع فاميلتو يلزم قدامهم تبينيلهم بلي مجاهد هو كلشي في حياتك ماتصتصغريهش باسكو يحس روحو رتجل زايد ناقص باانسبة ليك. __وحد نهار قاعدة فالحوش جات يما .بنتي راجلك راه جاء _عدلت روحي ودخلت عندو وأنا ماش آلاز مع روحي باسكو آخر مرة علاقتنا كانت متكركبة .دخلت كيشافني ناض قدم سلم عليا وسقى على حوالي ومن ورايا دخل بابا كان برا قعد معاه وانا جبتلو قهوة ورجعت نعرفو يحب يشربها بزاف .كيدخلت لقيت نجوى قاعدة لتم جنب يما وتلعب بشعرها ولابسة جبة مزيرة على صدرها .هيا صح من ناضت كانت لابستها بصح كان لازم عليها تبدلها قدام مجاهد بصح وجها ماش تاع حشمة _وليت قعدت معاهم وغير نعس في تصرفاتي وضفاري كليتهم من القلقة بسنيا باسكو شفتو صح متوتر من القعدة تاعو سيرتو هيا كيتهدر نحسو يتهرب منها ونظراتو كيتكون تهدر يخطفهم ليها ثواني وبدل عيينييه وهنا توسوست _خالدة هيا وجدي روحك نروحو _شفت معاها ونضت وبقيت نغلي من داخل وليت رجعت عيطت عليها قلتلها عمتي تعيطلك روحي عندها ناضت وتتمايل وهو كان مهبط راسو بصح كيوقفت قسما بالله شفتو كييخزر فيها وزرب بدل عينيه _لميت قشي بزربة ولبست وهاديك جات هايجة عندي تلوم فيا بلي عمتي ماعيطتلهاش _ماحببيتش نجاوبها ورحت عندو .راني واجدة كملت _رحنا وواحد ماهدر مع خوه حتا دخلنا لدار ديراكت طلعت لشمبرتي بدلت قشي وهو شوي وطلع يشوف ليا مستغرب _كاش مابيك _شفتك كيفاه خزرت فيها بصح انا ماش راح نحاسبك. مي نقولك حاجة ادا مازالت في قلبك ماكالاه تستغباني وطلقني ماش حابة نكون مع راجل قلبو وعقلو مازال معلق مع حبيبتو لقديمة _واش هادي الهدرة ياك حكينا فيها ولا حابة برك ترجعيلي الضربة _هدوءك والتورتر ليتكون بيه وهيا قاعدة قدامك وتخطف في عينيك ليها خلاني نحبس بلي مازلت ماتخطيتهاش _راكي غالطة مليون فلمية _ياريييت والله ياريييت بصح تعيش ماكالاه توهمني على الكدب باسكو والله كون نحس بحاجة ماش راح نبقى معاك _رحت قعدت ضفرت شعري وحطيت خمار على راسي ربطتو لور وهبطت وهو خليتو قعد وساكت وماطولش من ورايا شفتو خرج لبرا وانا عاودت طلعت حتا رجع مع العصر ومعاه حس جيت نخرج من شمبرة حبسني_رجعي قعدي راهم رجال يطلعولي فالحوايج ليشريت لدار _واش شريت _دخلي ومبعد ساهل_ ربع ساعة ورجع عندي طلعني لدار لقيتو جاب لماعن ليكنت نطيب بيهم فدار لهيه قالي جابهم معاه والأمور ليبخلاف شراهم من هنا قبيل ومن بيناتهم شمبرة كوشي _ماش حاب نطلع شمبرة ليلتحت ماشفتش منها الخير _واش هو الخير ليحاب تشوفو _كما ليوم كيشفتك غيرانة عليا _بيانسور نغير ماراكش براني راك راجلي _وانا هادا واش كنت حاب منك حاب نشوف غيرتك واهتمامك بيا وتديري ردة فعل ونشوف قيمتي عالية وغالية عندك ماش تخليني نحس روحي بلي مانسواش عندك غرام _واش ليخلاك تحس هكدا _كيسمعتك قلتي هاداك لكلام ليهم فالكوزينة النار شعلت فيا ماعرفتش كيفاه حكمت روحي عليها ومبعد تعاملت معاك هكدا غير باه نفطنك _ماقصدتش ليفهمتو نتا _ماعليش أصلا غيرتك تاع ليوم وضحتلي كلش_جاوبني مجاهد وصارحني مازالت ساكنة في قلبك _ياودي ياخالدة أنا وين ونتي وين ربي يهديك والله ماتهمني خلاص ليكيديتها بكري درك تهميني غير نتي_وعلاه كنت تخزر فيها سيرتو كيوقفت شفتك كيخزرت فيها _انا طلعت راسي كيسمعت صوتك عند الباب وهيا كانت جاية جييهتك ماش كما فهمتيها بلي شفت معاها هيا صيبو بلا توسويس درك انا فهمت عليك ونتي فهمتي عليا مانديروش مشكل ونبعدو على بعضنا على والو _ماش بهادي سهولة نسكر على الموضوع ادا ماش فايق مع روحك ذكرت طلاق _ايه باه نفيقك لروحك _مادابيك ماتزيدش تهددني مانححبش هادا الاسلوب وانا ماش من نوع لينقبل نعييش فالذل ونسكت _وانا حافظك ونعرف كيفاه نتصرف مع عقليتك برك الدرس ليمديتهولك كونك قدو باه علاقتنا ماتفسدش ومايصراوش مشاكل _ان شاءاالله ___طلعت وردة وروفيا عاونوني فتسياق ومجاهد حط كلشي في بلاصتو وركب شمبرة غير كملنا هبطنا تعشينا ورقدنا دييراكت من التعب حتا لصباح كملنا طلعنا قشنا كامل وغلقنا الباب ورجعت منعزلة عليهم وكينطل على التاقة في جيهتهم نشوف غير القرمود لي فوق الحوش مانشوفهمش هوما ونشوف الباب لكبيرة والحيهة ثانية تطل على لجنان والكوزينة تطل على طريق ليتدي لدار جدي .
تابع للحلقة 64
_إول ليلة بتناها لتم حسيت براحة كببيرة سيرتو هو معايا كاين هدوء وأمان حتا هو صاب راحتو ورجع يقولي باه توالفي وحدك وترجعي ترقصي لراجلك وتدلليه بحنانتك _مادرتهاش كيكنا فلمدينة ندييرها هنا مانضنش _هاداك الوقت كنا نوالفو بعضنا بشوي بصح درك تبدل الوضع هادي هيا دارك ترجعي مستقرة وكلما نجي تزهيني بحاجة جديدة حتا تلقاي الحشمة طارت _مع الوقت تبان _ايه بصح نتي حاولي تتحكمي فالخلعة تاعك وأبراي باسكو ماش معول نخليك دايما هنا حابك وين نكون تكوني معايا وهادي الدار تبقى لينا كينجو نلقاوها _ايه بصح نسقسيك هاداك الوقت علاه ماحبيتش خوك يسكنها _يما خوفتني قاتلي كاش مايصرا فيهم وتحصل نتا باسكو محمود من النوع ليرجع اللوم على غيرو عليها قاتلي بعد من المشاكل وزيد ولادو صغار المهم يما خافت وانا زدت توسوسست عليها تراجعت وماحبيتش نقول بلي يما هيا ليهدرت معايا باسكو كون يعرف بلي هيا بدلتلي رايي راح يلومها _ايه عليها وصح عندكم الحق ___فات النهار الثاني ومجاهد راح لخدمتو ورجعت وردة يوميا فليل تطلع تبات معايا وفنهار كينحس روحي ماش مليحة نولي نهبط لتحت نخمم في صحتي وصلاحي نحب نهبط باه ننسى حالتي سيرتو كيكون رمضان ماكانش نصيب راحتي بصح كيكون موجود نبقى لفوق .
الحلقة 65
بقلم لينا صبرينة
وفليل انا ووردة نخافو باسكو كل مرة واش يصرا برا مع هاداك الوقت الحال كان صعييب مرات نسمعو صوت رصاص بعيد ولا حركة برا ولا صوت رجال ولو عاليين بصح مع الكالم نسمعو حتى الخطوات تاع رجلين ولو قط برك كان يمشي تخرج روحنا من الخوف .عليها فنهار كي مايجونيش نولي نهبط لعندهم وعلجية تنتغم القرصة تخدمني وانا عادي نديير ليعليا برك كينتعب نطلع نتفرج فثلفزيون نتمتع ونحاو نسي روحي معاه __فاتو يامات وكيرجع مجاهد هاديك ليلة تقرب مني بصح حسيتو يدي في حقو باه ييشبع روحو وخلاص من غير لمسة وزوج حركات وهو كمل قلت ممكن من تعب بصح لقيت راجل بعدها مايهدر معايا مايقصر ماسامع بيا بلي كاينة _مجاهد كاش مابيك.من رجعت ونتا ماش عاجبني _والو برك قلقان مع روحي _فضفضلي واش ليبيك_ماحببش يردلي ولا يحكيلي شحال من مرة نسقسيه وبسيف جاوبني _حاب نديير سطاج تاع قراية وراني مترد_ايه مليحة اقرا _بصح بعيدة كون نروح مانجييش بشهور ساع يلزم نكمل باه نقدر نجي نعود ببين قرايتي والخدمة ماكانش وقت نجي هنا _شحال المدة _6شهور _ اووو بزااف _ايه بزاف وفي نفسوالوقت حاب نقرا باسكو ادا طلعت في خدمتي سلاكي يزيد وتعود عندي صلاحيات بزاف يفيدوني مانرجعش عامل عادي .حتا نعود نقدر نجي ونطول _والحل _والله ماعلابالي غير نخمم ونعاود ويلزم نقرر هاد ليام ماكانش وقت بزاف نتي واش رايك؟ _ ديير ليريحك مانقدرش نعطيلك رأي بصح ادا خايف عليا كونك متهني راح تخلي وراك مرا ونص _عارف بصح عقلي يبقى مشغول فيك _ديرلي برك ثلفون وخاطيك نبقى نتمعشق معاك ليل مع النهار _خزر فيا بنص عين وانا هدرتها بعفوية ومبعد حشمت وجهي نحس بيه نار خارجة منو من الحشمة جيت نهرب حكمني وحضنيي بالقوة _نتي منين خرجتيلي واش جابك لعندي واش درت في حياتيي حتا ربي كتبلي وحدة كييفك _جبد روحو عليا .خالدة نسقسيك وتجاوبيني بصراحة _ايه _حابة تجيبي ولاد معايا _مادام متزوجين فشيى طبيعي نجيب منك ولاد _لا قصدي واش في قلبك نتي حابة نجيبي ولاد من صلبي احكيلي واش يقول قلبك _والله حابة نجيب وتكون نتا باباهم وانا وين نلقى أب حنون كما نتا _مالا يلزم نكترو لادوز _واش قصدك مافهمتش _يعني يلزم نكترو في علاقتنا ماجايتش هادي تاع مرتين فسمانة ولا عشريام تكون ففيها فرصة قليلة باه تهزي الحمل _نتا درك تخدم وأغلبية الايام بعيد _ايه نرجعو من نجي نسكن معاك فشمبرة الغلطة فينا شهور ليفاتو كنا مقصرين مع بعضنا وانا ماكنتش نحب نطلب منك هاداك الشيئ باه ماتقوليش عليا راجل شهواني برك _حنا هكداك والباب طبطو راح هو فتح لقاها يماه دخلت وخبرتو بلي ناناه زعفت كيمادرتلهاش غداء ولا عشاء وعرضتها فدارك _كيراحت حكينا انا ومجاهد فيها وقررنا نديرو غداء ونجمعوهم كامل ببيهم بدارنا وكما كان الحال درنا لغداء وعرضناهم جاو حتا دارنا من غير عمتي ونجوى ماجاوش ويما عجبتها الدار _علاه ماتجينيش خلاص علابالك بلي رجعت ساكنة وحدي وهكدا وماجيتيش_يابنتي وكينجيك يلزم نطبطب عليهم هوما باه نفوت عليهم ونطلع عندك تعرفيني نحشم وعلجية لسانها طوييل وانا ماش قدهم نخاف نغلط فالهدرة ونتي تحصلي _يما مايهمكش فيهم رجعي كل سمانة ارواحي وتهدر واش تهدر مايهمكش حطيها برك فثقيل المهم زوريني __فات هاداك نهار علكيف بلا مشاكل من غير زوهير عينيه كانو يزغدو باسكو عسيتو كشفتو وهو يتبسم لتحت لتحت يدير روحو خرج للبالكو يتكف وهو غير يكحل عليها .حتا وردة ماش قليلة شفتها ناشطة بزاف ماش من عوايدها .جبدتها على جيه وقلتها ادا عينك فيه غير خطيك ماتعلقيش روحك وتوالفيه ومبعد تقولي حبيتو من اول نظرة وتخرجي فالأخيير خاسرة نتي ماش تاع خويا نتي تستاهلي ماخير وأصلا خاوتك موحال يمدوك ليه ماتعبيش قلبك على باطل __فاتو ليام بصح للأسف مجاهد حسيت بحاجة مبدلة فيه ماهوش مجاهد لينعرفو حاجة تبدلت بين كنا فلمدينة وكييرجعنا هنا كاين فرق وقبل لايروح دارلي رايي وجابلي ثلفون وكيراح عاد يعيطلي مرة على مرة يسقسي ويكوبي مايطولش ونهار ليجاي فيه خبرني وجدت روحي وطيبت وكان خاصني ديسار وليت هبطت لتحت لمزية لقيت خالتي وحدها طلبت منها تفاح قاتلي ايه صباح برك نحالنا الخدام هزي راه فالكوزينة _ديتها معايا مدتلي بيدها وطلعت كيوصلت للسطحة تاع داري لقيت رمضان هبط من السطح يشوف ليا ويصفر حتا تفرفشت .
الحلقة 66
بقلم لينا صبرينة
راهي منورة ليوم مرت خويا _أحشم على روحك _علاه واش قلت ياك كيفك كييف روفيا نفس لكلام نقولها ولا نتي مخك ييروح لبعيد ويفهم غالط _مالا ماتزيدش تهدر معايا انا ماش روفيا _ايه بيانسور واش جاب لجاب هيا بنت أصل دخلت لهادي الدار بقدرها وشانها بصح نتي دخلتي كييف المنكوبة لا شرف ولا قيمة ولا كرامة _ايه ممكن كلامك صحيح بصح حتا نتا خرجت واحد رخيس وماش راجل تسمع غير لنساء وتصدقهم وتسمع كلامهم _ههههه تقصدي كلام ختك هاديك كلامها سمعتو دخل منا خرج منت عارفها تكدب وماكانش منها وكنت عارف بلي بكري نجوى كيماتقدرش تخرج عند مجاهد نتي كنتي توصليلو لكلام وماكان عندك حتا علاقة معاه وانا عن قصد اتهمتك هاداك الإتهام يعني عقلي ليكان حاب يوسخك عارفك بلي نتي طفلة بريئة وماعندك حتى ذنب بصح إنتقامي لقاك نتي في وجهي نبرد فيك ثاري وكلام طليقتي هاداك وحدو ممكن يجي يوم وتفهميه وممكن تتفهمي شعوري _كيشغل انا ميتة باه نتهمك _هههه المهم عارف ليوم يجي مجاهد ونتي راكي متزينة على جالو بصح ليومنا هادا متأكد أنو مازال علاقتكم باردة باسكو مجاهد مستحيل يشوف ليك نظرة اعجاب ولا حب مستحيل تكون إلا علاقة واجب معاك يعني غيير أوهام _نقولك حاجة أبقى مأمن في أوهامك نتا حتا يجي نهار تشوف الواقع ليصدمك ودرك بعدني ماتزيدش تخرجلي في وجهي_خليتو ودخلت كملت شغلي كامل وقعدت حتا تفتح الباب لقيتو مجاهد دخل سلمت عليه وحمدتلو على سلامتو وقعدنا وكما عادتو يحكي أي حاجة جات في بالو ولا كاش حاجة صراتلو فطريق يحكيهالي نحسو يخلق لكلام كون يصيب مانبقاوش ساكتين كما لغراب .
الحلقة 67
بقلم لينا صبرينة
بصح قربو ليا رجع بعيد مايقربليش بزاف غير فليل كيحب يدي حقو برك مافهمتش السبب بصح أكيد عندو مشكل وانا كل خوفي من كاش سحر حتا رجعت نشعل البوسط ونحط الكاسيط تاع القرآن بصح مانطولش بيه باسكو دييراكت يتبدلو حوالي .سقسيتو على حالتو لقيتو تقلق مني ويحلف بلي انا برك نتوهم ماكان حتا تغيير مني وليت سكت وقلت نخليها مع ليام تبان __كان هو برا سخفت على تفاح طايب باسكو ليعندي بقى غير الحامض بزااف وليت هبطت مالقيتش كاين سقسيت روفيا قاتلي خلص والخدام ليوم ماجاش خاصتنا حوايج بزاف من لجنان وهو ماجاش_ واش رايك نروحو لشجرة نحيو مادام الخدام ماكانش _ايه هيا هاداك هو نبدلو شوي جو _ كيرحنا لجنان طلعت للشجرة نحات هيا شوي وقاتلي هادوك يبانو طايبين بصح مالحقتهمش .كيعدت انا طول منها هيا هبطت وانا درت كوراج وطلعت فوق الشجرة و طلعت يدي نجبد ونمدها ونضحكو و انا هكداك معلقة ونسمع في صوت مجاهد عيطلي _######## واش ديري لتم ونتا تتفرج فيهمم درك نجي #### نحييلك سروال _كان قصدو الخدام قاتلي روفيا كان ورانا وانا من الخلعة وخوفي ماحكمتش توازن وطحت من لفوق لتحت للأرض حسبت بعضامي تكسرو قبل لا يلحق هو يكسرهم _رجعت نعيط لربي ليخلقني من سطر وااخدام يقول ربي يستر ربي يستر وروفيا مالقات مادير معايا غيير تبكي معايا ومجاهد ماعرفتوش كيفاه هبط بهادي الزربة وهوما كامل وراه وأول حاجة دارها سمعتو ضرب الخدام وسبو وجاء ليا _واش صاريلك نوضي علاه تعيطي وتبكي نتي وياها _خويا راهي طاحت من الشجرة مرتك تبان تكسرت _خالدة سكتي شوي وقوليلي واش حاسة_ ظهري وجنبي سطر فيهم راح يقتلني مانيش نقدر نتحرك _يماه تخلعت عليا وعلجية قربت مني قاتلو بالاك لعظم بوجا من بلاصتو برك اديها للعيادة يديرولها راديو بزربة تخاف تكون تكسرت ونحصلو فيها _خالدة هيا درك نوضك بشوي برك استحملي ووحدة منكم تطلع لدار تجييبلها حجابها _هزني من تحت دراعي بصح سطر عصرني ماتحملتش وهو يعيط على الخدام قالو نجي ونتفاهم معاك_دييراكت داني للعيادة مع يماه دخلوني طول قالو ماعندناش راديو وماقدرو نديرولها والو هنا .لتم تحتمت داني لسبيطار لمدينة تاع الدوار ماش مدينة ايخدم فيها مجاهد .هيا صح قريبة بصح السطر كنت نعبط منو ونرات نحس روحي راح نتغاشى غير هوما يديرو فيا فالكوراج .كيوصلنا دخلني دارولي راديو والحمدلله خرج ظهري صافي برك كدمات ونفخ من الطيحة بصح جنبي فيه ضلع واحد شبه مكسر دارولي برا نقسلي سطر وربطولي جنبي بحزام ودارولي ليزاناليز وخلاوني عندهم حتا خرجو النتائج وللأسف كنت بالحمل وفارقت ممكن من الطيحة ممكن من قبل دارولي راديو ومابانلهمش مليح بصح لخبر هادا قطعلي قلبي من داخل رجعت نبكي داخليا لتم وين حسيت بلي الذرية مليحة وهييا رزق من عند ربي بصح كيهزيت ومافقتش بروحي وفارقت غاضتني روحي بزااف وتمنيت كون عاش .كيدخل عندي مجاهد حكم يدي وتبسم _ماعليش مكتوب ربي ومازلنا صغار وربي يعوضنا ماتقلقيش _ مدولو دواء يشريه باه نشربو باه نصفي رحمي ودواء تاع سطر وخرجنا ركبني وركب ومن ديمارا وهو يتكيف ويماه تقوولو حبس نقص علينا الدخان هادا غميتنا وهو كلمة مانطقها _كيرجعنا لدار دخلنا بصح مانقدرش نمشي الخطوة نمدها بسيف وكل حركة مني توجعني حاسة روحي مقسومة لدرجة امو الدرجة ماقدرتش نطلعها مستحييل لقيتو همسلي في وذني _تحبي نهزك _هادا دلال كون درتهولي وانا بصحتي ماش درك _شكون قالك دلال .برك حاب نعاونك _عادي متوقعتها منك .
الحلقة 68
بقلم لينا صبرينة
نطقت يماه .واش تهدرو نتوما لزوح هيا دخلها للبيت تاع لبنات تريح فيها مادام ماتقدرش تطلع _مالقيتش حل وقبلت نبقى لتم وعلجية دخلت عندي قاتلي مادام عضامها ماش مكسرين غير واحد درك نعيط لمرا تداويها بالأعشاب ويومين برك وتنوض كيف لحصان تجري تدخم شغلها عادي خير ماتزيد ترجع لسبيطار _في قلبي تعرفي غير الشغل وتهنبير بصح مليح دارت حاجة مليحة جابتلي مرا تداويني كانت كبيرة شوي فلعمر وماحبيتش حتا واحد يبقى معانا ومجاهد فهم عليا خرجهم بقيت غير انا وهاديك لمرا داواتني وكيشغل جبرت عضامي وربطتهم وراحت قاتلي كل مرة نجيك حسيت روحي حطتلي حجرة وخلاتني بزاف تقلقت _دخل وجابلي دواء حطو قدامي وكانت يماه معانا قاتلو علاه عابس وجهك خالدة درك يامات وتبرا وطفل ربي يعوضو _ايه قول لعروستك المرة الجاية تتوله ماش تزدم برك هيا تعرف روحها مخلوعة واش داها لفوق الشجرة _سكتو وخالتي خرجت وهو غلق الباب كان حاب يشوف ظهري ماخليتوش . نسقسيك نتا راك تحاسب وتلوم فيا كيفارقت ؟!_ اي كون ماطلعتيش كون راه ولدي في كرشك _ونتا وين دراك بلي فارقت كيطحت ممكن كما قالت طبيبة قبل أصلا في عوض ماتلووم روحك تلوم فيا. نتا خلعتني بعياطك وكلامك عليها ماتحكمتش في روحي وطحت_يااا...كاش ماراح نقولك نتي واش داك تطلعي للشجرة والخدام قدامك يتفرج فيك ويتفرج في كل تفصيل فيك صدرك يتحرك وتر... يشطحو ورجليك يبانو وصوتك فالسماء تاع الضحك فهمنيي منين جابتك لفهامة كون وحدك ماعليش واحد ماراح يشوفك بصح لخدام كان وراكم واش مطلعك _قالولي ماجاش ليوم عليها خرجنا ماش عارفين بلي كاين _يادين رربي كان يشوف معاك وتايه كنتي سينيما قدامو بيك بهاديك ليراسها فارغ سيرتو نتي الضحك تاعك وصل لعندي لفوق من غيير دخلت لدار سمعتك كيطليت وشفتكم هكداك وهاداك يتفرج فيكم وشفت ملامح وجهو كيفاه يدير عرفتو بلي راه #### انا راجل ونعرف واش يصرا لراجل. كون صيبت سوطييت وهجمت عليه صيبو سكتينا كينتفكر نبغى نهبل ندخل بعضي _خرج وسكر الباب بالقوة وعلجية تعيط عليه تقولو ياك قتلك من قبل ربيها بصح نتا ماتسمعش راك شفت كيفاه مادارتلكش حساب _فيساع دخلت روفيا جابتلي ناكل وحبت تنسيني شوي بصح انا مانيش نقدر مورالي صفر _بقيت يومين وانا في بلاصتي غيير قاعدة ونوض غير كيتتحتم ومجاهد قلق من الوضع تاعي كون صاب راني طلعت لدار لفوق خير من هنا ومام انا كنت مديرونجية من لبنات من بكري يكرهوني وزادو حاشا وردة يكتر خيرها عاونتنيي وقامت بيا بصح كيلقيت روحي ماش مرتاحة وزيد سمعت برمضان جاء باسكو كان غايب وراه في مشاكل مع مرتو والحرب قايمة بيناتهم وزيد جات لعندي خديجة بالغش _اسمعي نتي واش تعرفي على طليقة رمضان _وين دراني بيها انا جامي شفتها علاه _راهي تحوم بيه وزيد جات ليا كيكنت في دارنا قاتلي رمضان يرجعني لدارو ونشربلكم لمرار بيك بخالدة _اااه وشبيها هادي علاه مازالت عقابي _كون تفهمي فهميني _خرجت وكيجاء مجاهد سقسيتو قالي رمضان معبي دعاوي الشر واش يجيك منو خاهيا نعازنك نطلعك لفوق خير _ درت كوراج وطلعني مجاهد لدار بصح دروج طلعتهم غير بسيف .حطنيي في بلاصتي وبقى هو يخدمني ودارنا سمعو وجاوني كامل بيهم بعماتي بخوالي بجدي كل مرة يجيني واحد وانا مازلت عند بلاصتي مانتحركش بزاف ويما بقات معايا سمانة كيراح هو يخدم وبعدها جاء بابا مع نجوى كيشفتها جات تشوكيت ماتصورتهاش تجي وكما توقعت بقات تشوف مع الدار وساكتة بالها بعيد شوي ودخل مجاهد كيشافها لعيون كانت تحكي وماتوقعتش واش راح نسمع واش راح يصرا .
