الحلقة 159
#بقلمLina_sabrina
فالأخير قررت نخرج وخليها تخلى __خليتو متكي على حافة الباب مبتسم وهبطت وانا خايفة يكون ملعوب منو بصح جازفت و وفهمت انو هو ثاني شفى غليلو فيا وفي مجاهد وكيخربت علاقتي بمجاهد وهو درك هربني هاداك هو اكبر انتقام ليه لينا لزوج يعني وصل لغايتو مي كيهبطت لقيتو لحقني _علاه جاي معايا _نشوف مجاهد ادا راه برا قدام الباب روحث خرجي من باب لجنان خير _عاونتي خلاص يكتر خيرك مانحتاجش كتر _جيت نمشي سبقني فتح الباب تاع برا وعاود دور ليا قالي راه هنا قتلك روحي من لهيه _على الزهر _خليتو ورحت لباب لجنان من غير وصلت ليه سمعتو عيط لمجاهد قالو ارواح تشوف مرتك راهي خارجة بلا مشورتك _الله يلعنك يالمصيبة _ خرجت ليا يماه تشوف معايا ومستغربة وين رايحة نتي _باينة مانقعدش معاه وزيد نتفرج في عرسو _واش من عرس ماش راح يدير خلاص_اول مرة مانقيمهاش وخرجت قبل لا يلحقني وسمعت عياطو لداخل مع خوه وانا رحت نجري لدار جدي ماعرفتش روحي كيفاه وصلت والكل ناس حايرة فيا علاه نجري هكدا . بقيت نطبطب ونخبط وندعي في ربي يفتحو قبل لا يلحق والحمدلله فتح جدي بلحمو وشحمو فرحت ودخلت وسكرت الباب وهو مستغرب ويسقسي واش كاين واش ليبا وانا قعدت فالأرض ننهج حاسة بضيق قي صدري مانيش نعرف نتنفس حتا جاو خالي ومرتو وهيا فتحتلي الخمار و شربتلي الماء وتمروح عليا وزادت حالتي بعد ماوصل مجاهد وبدا يخبط فالياب ويعيط على جدي وخالي _انا رجعت نهدر برجفة ونفهم فيهم مايفتحولوش الباب وهوما مافاهمين فيها والو _دخلني خالي للبيت وخلاني مع مرتو ووصاها تغلق الباب وخرج باين باه يفتحولو ويفهمو منو _شوي وبديت نسمع في عياطو قريب ليا يقولهم جيبوها لعندي راهي خرجت من وراء ظهري ليوم ماتفراش معاها _خالتي حاولت تفهم مني وانا من الخلعة قلتها اصبري _شوي وحبس صوتو ورجع جدي وخالي سقساتهم مرت خالي قالولها راح بصح قال درك يرجع راح يجيبلها دواها كيقلنالو ماكييش مليحة ونتي فهمينا علاه درتي هكدا واش صرا بيناتكم _خدعني الغدار وراني طالبة طلاق منو نموت وماترجعونيش ليه _بلعقل شربي شوي ماء وفهمينا راكي تهجي بهدرتك _شربت وفهمتهم واش دار مجاهد تخلعو ونصدمو سيرتو جدي قعد وتصمر في بلاصتو .حنا هكداك الباب طبطب وخالي راح ليه فتحلو جابلي دواء شربت ورجع ليه سمعتو شبعو سبان ورخس ومجاهد يقولو مادخلوش بيناتنا ماعندكم حتا حق خااالدة امشي معايا ولا نجي نديك فورصي _ماراكش فالسوق باه تدخل تديها اخرج من الدار _قتلك نحتاج مرتي جيبها ولا مايعجبك واش تشوف مني _هوما يهدرو وجدي خرج شبعو مواعيض حتا من مجاهد ماسمعت منو كلمة حتا كمل جدي هدرتو وقالو نهدر معاها برك ماش راح نديها بلا رضايتها _خالي ماحبش بصح جدي قبل مي قالو ساعة وارجع درك ماهيش مليحة _خرج وهوما رجعو قالي جدي ياك سمعتي درك يرجع وكونك هعنية راكي في دار جدك حاجة ماتقيسك وليتحبيه ديريه الدار مفتوحة ليك _جدي تعيش كون يجي بابا ماتمدونيش ليه برك هادا واش نطلب _راكي كبيرة وتعرفي صلاحك مايقدرش يديك __من وراها بساعة تهدنت وهو جاء دخلوه للصالون وحتم عليا جدي نهدر معاه بسيف وليت خرجت عندو لقيتو قاعد ويهزز في رجليه ووجهو يخوف من الغش _كيشافني قالي علاه درتيها وهربتي _قتلك مانقدرش نبقى معاك وبزيادة كرهتك وعفتك _مستحيل تكرهيني نتي تحبيني وماتقدريش بلا بيا _وي عندك حق بصح من زمان درك خلاص خلاصت حكايتنا انا ونتا فض المكتوب _ميل راسو وقالي خالدة ماتقوليش هكدا تحرقيني من داخل _ادا هادي كلمة وحرقتك مالا كون تشوف الجمرة ليراهي تكوي في قلبي واش تقول تعيش روح وشوف حياتك مع نجوى مانسالكش فيها بصح بشرط تطلقني وماتدخبهاش عليا ضرة هادي الفكرة مانتقبلهاش ولو بعيدة عليك طلقني وادا تحب جيب عشر نساء _خالدة مانقدرش نطلقك مستحيل تصرا وزيد كون نطلقك هكدا راح تخلي نجوى تستشفى فيك وتحس بالنصر خميلها مليح علاه تخليلها فالمجال ليها وتحس بلي غلبتك خمي بعقلك _ماتخممش انا صح طلقني وتتزوجها انا عندي رد ليها وماش راح نخليها تستشفى فيا مستحيل _خالدة أي حاجة في راسك نحيها انا الطلاق من الموحال نخمم فيه _على واش تخمم مالا على جهازك وشمبرتك _واش تهدري انا وين ونتي وين _ايه ناناك قبيل جات وفضحتك _ربي يهديك ويهديها هادا ماقعدلي نروح نجهز لهاديك الخانزة ماراني راح ندييرلها والو من غير نفتح ونعقد وخلاص اصلا زواجنا راح يكون باطل في باطل واش تخرطو مستحيل نديلها قيمة _ماعليه مع الوقت ديرلها قيمة كيتعاشرها يرجعولك مشاعرك اصلا نتا تعرف تمثل _افهميني مشاعري ليك ماراهمش ثمتيل كون صح ثمثيل ماتلقايني هكدا تابع فيك ونطلب فالسماح ونحاول والله كلشي درتو معاها غير باه نخلف ثاري بصح مادرتيهاش تهز الحمل مادرتلهاش حساب بصح ماتخافيش والله نطلقها ونوريها شكون أنا .
الحلقة 160
بقلم لينا صبرينة
هههه مسكين يعني نتا حبيت تنتقم منها وهيا زادت نتقمت منك وهزت الحمل وجات فضحتك بالدليل وزيد نتا حاب تتزوجها وتزيد تطلقها باه تكمل تنتقم منها .واااو ظهرتو نتوما لزوج عايشين غير يياه تنتقمو من بعضكم وانا لا خبر انا صح انتقمت من خوك مانكدبش نهار تقبلتك نتا في حياتي غير باه ننتقم من خوك بصح لقيت روحي طايحة فيك مي ماش لدرجة نخونك معاه وباه يكون في علمك وقت هو تقرب مني وطلب مني نطلقك ونهرب معاه بصح رفضت باسكو انا وفية ونحبك ومرة فليل انا هربت منك ادا تشفى ماتخبيتش فالكوري كما شفتني لالا هربت لبرا كنت برا بلا حجاب ندور هاملة وهو لقاني حاولني ورجعت معاه وهو قالي تخباي وعطاني هاديك الخطة _واش تهدري تكدبي ياك _نووو ودرك روح تتقاتل مع خوك وقبل كلشي طلقنيييي طلقني وهنيني منك_تهدري هكدا غير باه يطلعو جنونبي ونطلقك ياك ؟؟_ مسكين ظهرت راقد على وذنيك للاسف مرتك دارتها بيك وتحالفت مع خوك _خاااالدة ماتهبلينيش _اربط الاحداث تفهم ونهار جاء رمضان سقساني وانا فالكونوزينة وحب يجبد مني الهدرة بلي صح خرجت لبرا لتم كنت عارفك تتسمع علينا عليها كدبت وعيشتك في كدبة يعني ياسي مجاهد انا ليخليتك تعيش كدبة وانا الغدارة والكدابة _هز يدو كان راح يضربني بصح حبس وحط يديه لزوج على وجهي وضغط عليهم وقرب وجهو ليا لوعينيه كلهم حومر _كون يخرج كلامك صحيح تأكدي بلي نجي نوريك نجوم النهار _ماتشقاش وتسقسي غير انا ورمضان لينعرفو هاد السر باسكو سر بيناتنا تشاركنا فيه _خاااادة ماتستفزينيش ماتوصليهاليش لشيطان الرجيم _تقبل تبقى مع مرا هكدا القرار ليك _طبعني للكانابي بالقوة من وجهي وراح خرج ثاير _راح وانا دخلت لشمبرة خالتي حورية وبقيت فيها طول نهار وهو مارجعش باين هاداك زاد ضخم الأمور صح تقهرت وتحسرت بواش قلتهولو واعترفتلو بصح كان يلزم نقول هكدا باه نتفك منو مي طول علاه ماجاش كنت حاسبة كيهدر مع خوه يجي يجري يلوح عليها الطلاق واش ليخلاه مايجيش _ مور المغرب سمعت تطبطيب فالباب تاع برا كيفتحو سمعت صوت بابا يعيط عليا .خرجت عندو وشفت جدي وخالي دخلو من برا بعد _خير بابا واش تحوس _هجالة ساقطة نتي ماش بنتي صحيح واش سمعت راجلك حكمك مع خوه تخدعي فيه عليها هربتي وجيتي لهنا وزيد ناس شاهدين شافوك كيهربتي ومعاك الذهب ليكنتي حابة تهربي بيه للمدينة معاه_واشنوووو واش تهدر _ناس برا الكل يهدرو عليك والخبر وصل لدشرتنا يالرخيسة رجعتي هبطتي راسي للأرض ورراجلك قبيل تقاتل مع خوه وحبس قلبو داوها ايرجو لسبيطار _وسعت عينيا من هاد لخير وروحي تقبضت منو ماقدرتش نزيد نهدر معاه ولا نتناقش وجدي وخالي قالولي لخبر صحيح كلو مجاهد تقابض مع خوه وطاح من طولو داوه لسبيطار ومن وراها خرجت إشاعة كبيرة والمشكل رمضان ماعارضش هادي الاشاعة وقال صحيح خالدة بنت حرام خانت راجلها وكانت معايا وتحلل فيا نطلقها ونديها معايا بصح مجاهد حكمنا بالجرم المشهود عليها هربت منو _هنا رجعت نخبط في راسي واش هاد ليزاد دارو فيا ماكفاهش لفضيحة الأولى والتشويه وزاد كمل عليا وباين مجاهد كيسمع تقلبو حوالو_بقيت نستنا وكلي تخمام ونستنا على أعصابي كاش خبر عليه ولو متغشة وحاقدة عليه بصح مانتمنالوش الضر ولا الموت _مور العشاء وصل لخبر وقالي خالي بلي جاتو نوبة قلبية ومنع منها راجلك مريض قلب وهو ماش عارف روحو ربي برك سترو وعمرو طويل _قعدت وحمدت ربي المهم سلك منها وراه بخير __لغدوا ناس جايين يسقسو ويعاودو واش صرا وواش سمعو الدوار تقلب بسيرتي انا ورمضان وخالي قال بلي لبارح مور عملتو هز روحو وراح هرب وخلاك غارقة فالإشاعات وحدك _خالي ياك مصدقني ليقالو كدب في كدب _مصدقينك بنتي كونك متهنية بصح الناس واش يسكتهم _آخر همي الناس والله من كثرة ماوالفت رجعت عندي عادي _انا نهدر معاه وانا ضاق نفسي وعرقت قالي نديك لاكلينيك ماحبيتش قلت فترة وتروح _شوي ولقيت بابا عاود رجع لعندي وقفت نهدرمعاه _ واش مازلتي ديري هنا امشي لدارك ماتخليش الناس تزيد تهدر كتر _مانيش رايحة راجل ليخون ويغدر مانعيش معاه _علاه هو غلط وراح يتحمل مسؤوليتو ونتي تبقاي معاه انا ماقلتش تطلقي درك يرتاح و يخرج من سبيطار يلزم تكوني لتم عندو _روح زوجلو بنتك وخطيني بيك بيهم انا راح نطلق _حكمني من دراعي وقالي قتلك امشي لدارك نتي حابة تبهديليني امشي واش من طلاق تهدري عليه ماعنديش طفلة ترجعلي مطلقة لدار _وانا مانيش قاتلة روحي نرجع عندك ونحتم روحي عليك راني في دار جدي ومريحة ونتا كما تبريت مني فيعني ماعندك حق تجي وتحاسبني .
الحلقة 161
بقلم لينا صبرينة
بقى يهدد ويتحلف وانا عند رايي مانروحش ومانرجعش وغفلتو ودخلت للشمبرة غلقت عليا بقى يهدر ويغلي وجدي يقولو راهي كبيرة ماتحتمش عليها واش دير كيفاه راجل دار معاها هكدا وترجعهالو نتا عندك عقل _بتتي هادي وواحد مايدخل .خااالدة منا لغدوا ماترجعيش نجي نكركرك ونرجعك ياوجه الرخس بيك بختك __لغدوا سمعت بمجاهد راح يخرج وجات عندي خالتي تحاول قيا نرجع وقاتلي ماتكبريش الموضوع مجاهد الشيى ليسمعو من خوه صعيب حط اللوم كلو عليك هدر كلام كبير وعيب وعاطل وقال كنتي تتلايحي عليه وماحبيتيش تروحي مع مجاهد لمدينة باسكو هو كان هنا وتأملتي باه مجاهد يطلقك وتروحي مع رمضان يابنتي ولادي راهم يديرو فالمنكر ونتي ماتزيديش تعقدي الامور خلي نحلوها بالحسنى _رمضان كداااب هو صح كاين امور بيناتنا بصح هو كبرها ضخمها مادريتوش يزيد يطعن في شرفي _ودرك واش نديرو وزيد اشاعة خرجت قالو بلي مجاهد حكمكم مع بعض ونتي هربتي وديتي دهب شافوك هاداك نهار ونتي تجري هوما فهموها هكدا واش يسكتهم هيا بنتي خودي رايي_سامحيني مانرجعش وخلوهم يهدرو واش يحبو هو غدوا نحبو يجي يطلقني مانبقاش معاه _راه قالي بالسرقة بلي غير تولد نطلقها _وليدك عارف روحو غالط والبيبي وليدو مستحيل يطلق _في هادي عندك حق مادام راح يتزوجها باين البيبي ولدو باسكو داوها لطبيبة وشافو شحال عندها لقاوه الحمل في بدايتو عليها مجاهد تحمل المسؤولية بصح ماهوش متأكد منها بصح اديها من عندي والله راح يطلقها كيتولد _خالتي بركاي ماتبرري لوليدك يدير واش يدير ماش مسامحتو ولا راجعتلو _بقات تحاول وانا رافضة حتا راحت محبطة _شوي وجات خالتي حورية وبكات على حالتي مع هيا تتواحم تأثرت بواش صرالي _بركاي من لبكى خلاص هادا هو مكتوبي _بقات تدعي على نجوى ماخلات فيها والو حتا سكتها _خلاص اتهدني ماش مليح ليك زعاف تزيد تطلعلك لاطنسيو بعيد الشر ينضر طفل في كرشك _بقينا نحكو حتا جابتلي سيرة نصيرة قاتلي عرسها غدوا _اااو ماسمعتش بلي تخطبت اصلا عندي سنين ماشفتهاش _خليها لربي انا اصلا كرهت هاديك الدار ومشاكلها صعيبة تعيشي وسط دار العايلة نحسهم جيش وجنود من كترة ماراهم بزاف ومع مشاكلهم تصرعت _واش صرا احكي _نصيرة بعتتها يماها تعيش مع وليدها لكبير فامدينة غير باه تبعدها من المشاكل ليصراو بسبتها .المصيبة حكموها دارت معصية كبيرة وتستعمل فالسحورات_ااااه قولي واللله نصيرة دير هادو الامور _ايه اسكتي برك تبهديلة دارتها قد راسها وهو فالاصل حاوزوها ماقبلوهاش تبقى معاهم يماها برك ناس ملاح غاضتني _شكون راح يتزوجها _خوها مدها لواحد يسكن لتم بعد فالمدينة قال يدير عرس خفيف هنا فالدوار المهم نسترها وماتزيدش تقرب هنا يسمعو ناس بلي تزوجت وخلاص _ياخاااه على نصيرة واش دارت في روحها ربي يهديها ويغرلها __فاتو بيومين وبابا كل صباح وعشية يجي عندي يحاول يرجعني ويلقى مني نفس الراي راح يهبل مني بصح انا من بكري كرهتو وزدت كيوقف مع نجوى ضدي انا وحتا خالتي رجعت مجاهد بعتها باه ترجعني بصح عاودت رفضتها وراحت شوي ولقيتو جاء مع جدي دخلو وقالي روحي يهدر معاك بالاك تتفاهمو _جدي مستحيل نرجعلو _بنتي حطي عقلك في راسك راكي تبهدلتي وتبهدلنا برا باه تسكتي الناس رجعي لراجلك راه باين كدب خوه ومصدقك نتي _حتا نتا حاب تسمح فيا وماش حابني _لالا بنتي بصح نهدر على صلاحك ونتي أدرى والله مانحتم على بنتي حاجة بصح خمي مليح ماتسرعيش عارفين هو انسان زاني وعاصي ربي بصح ان الله غفور رحيم _ماكانش مغفرة في حالة مجاهد _هيا خالدة خرجي وهدري معاه _رحت عندو لقيتو واقف وحط يدو على الحيط ويشوف لبرا من تاقة _حمدلله على سلامتك _دور ليا لقيت تحت عينيه كوحل وباين عليه المرض _يسلمك وشفتي وين وصلتيني _نتا وصلت روحك _شوفي باه نقول ماش متغشش بواش درتي معاه نكون نكدب راني راح نجهل بواش درتي وخبيتي عليا طول هاد سنين مافهمتش كيفاه قدرتي تخبي وتكدبي في وحهي خونتي ثقة تاعي _بكري كنت نادمة كيخبيت عليك بصح درك لالا مانيش نادمة باسكو ظهرت حتا نتا كداب وغدار _شوفي خالدة امشي تروحي معايا وننساو كلش _تحلم تزيد تشوفني في دارك ومعاك قتلك طلقني .اصلا كلش واش سمعت وليخلاك توصل لسبيطار ماعفتنيش _لالا باسكو ليقالو رمضان مانصدقوش نصدق واش قلتي نتي بصح راح نشفعلك _متنسناش منك الرحنة وتسمحلي قتلك طلقني _كيلقى مني الإستفزاز والرفض والصد هز روحو وراح وغدوا من داك لقيت مرت خالي قاتلي بلي سمعت منا على سمانة الفاتحة والعقد تاع مجاهد ونجوى .
الحلقة 162
بقلم لينا صبرينة
فيساع جاني انهيار عصبي ماقدرتش نتهدن حتا قالولي مجاهد راه جاء خرجت عندو هايجة ونقولو يطلقني وهو رافض ويقولي مانقدرش _نتا ماتفهمش ماش حابة نخلي نجوى تتشفى فيا ماش حابتها تدخلها عليا ضرة طلقني الرحمة على والديك طللقني ولا كاش ماندير في روحي ياك تعرفني مريضة ويجوني ليكريز ومانعرفش روحي واش ندير قادرة في ثانية ننهي حياتي ونخليك ورايا عايش في تأنيب ضميير وعداب باسكو نتا سبابي _بقى يشوف ليا بشفقة وانا نبكي ونحاول فيه ونهدد عينيه كانو مغرغرين دموع وهو يطلب فالسماح ويقولي مانقدرش _مجاااهد راك تقتل فيا هكدا لوح عليا برك الطلاق درك ومبعد كمل قالمحكمة ماتخلينيش ندير في روحي جريمة _بديت نرمي ونكسر في اي حاجة قدامي صح هيجت وماعرفت روحي ونحلفلو بلي نقتل روحي وهو الخوف تاعو عليا شفتو في عينيه دار المستحيل باه يقنعني ويهدني بصح انا كنت داخلة عقلي _دخل جدي حاول يهدني ماحبيتش ومبعد قربت ليه _شوف طلقني درك ووعد مني كون نلقا كلامك صحيح وكيتولد نجوى وتطلقها ساعتها نرجع ليك نتزوجو بصح درك طلقني_واش يضمن بلي ماتكدبيش مانقدرش ندير لامان _جدي راه هنا وشاهد غير طلقني ربي يعيشك _هزز براسو لالا وخرج وانا كملت هيجت حاجة مامنعتني لدرجة هزيت زجاجة وحطيتها في فمي لتم تصدمو فيا ورجعت مرت خالي تعيط باه نبزقها ماحبيتش وقلتهم يطلقني نرميها مايطلقش نق.تل روحي _قالها جدي اتولهي منها ونتي حبسي درك نرجعو يطلقك ردي بالك تغضبي ربي بتخمامك _راح شوي لقيتهم دخلو لزوح وهو مصدوم فيا وانا لعاب يسيل من فمي بدا يعيط باه نبزقها وانا نهز في راسي لالا وحالتي حالة بلكى هو صح كانت تهديد بصح صح كنت كنت ماش عارفة بلي كاين خطورة كببيرة على حياتي وكون نديرها جهنم تحرقني _قدم ليا وحكم يديا لزوج وقالي خلاص نطلقك برك نحيها من فمك والله نطلقك خلاص هيا نحيها خودي راي _بقيت على رايي ماحبيتش _نحى يديه ورجف فمو وعينيه فيهم دموع _خالدة راكي مطلقة _لتم رميت ليعلى فمي ودورت وجهي عليه نبكي ونشهق _علاه خليتيني نقولها علاه ياخالدة ربي يسامحني هادا مانقول بصح وعدتيني نطلق نجوى ونرجعلك _كمل طلقني فالمحمة _ماردتش عليا وخرج وانا حالتي كانت منهارة حتا داوني لسبيطار وعطاوني دواء سبيسيال نمشي بيه طول حياتي __فاتت هاديك سمانة وتزوج مجاهد وليلة هاديك فاتت عليا تشوي حاطة كاسيط فالبوسط ونسمع في غناء شاب حسني سيرتو غناية ماتبكيش وقولي داك مكتوب أثرت عليا وبقيت نتحسر على حالتي تبكي لحجر وكانت لغناية ترجم مواجيعي حتا لقيت مرت خالي دخلت عندي وحبست البوسط وشعلت فيا _نتي هبلتي في عوض ماتروحي تطلبي لربي هو يصبرك ويخفف عليك تسمعي فالشياطن تاع لغناء نوضي يابنتي العني الشيطان وياك قتلك مادار عرس لا والو من غير فاتحة وعقد وحطها فدار لا زغاريت لا عرضة تقول جنازة وشبيكي هادا راجل باين غلط وحاجة ماتغفرش بصح باين الشيطان غرو حتا نجوى ماش قليلة ونبصملك بالعشرة غير تولد يطلقها هيا نوضي صلي لربي بركاي من لجياحة __درت واش قاتلي بصح تمنيت ماعشت هاد ليوم ليماقدرتش نوصفلكم احساسي الاليم __على صبنداح ربي نسمع فالباب يخبطو فيها بالقوة وجدي يعيط ييقول شكون راه يخبط حتا سمعت صوت نجوى عالي فدار وتقول لجدي نتا حرشت خالدة وخليتها ترجع لمجاهد _واش راهي تخرط هادي _بقيت نتصنت وفهمت بلي مجاهد لبارح مور العقد ومور مادخلها لدارو هز قشو و اختفى وقالتلها يماه بلي خالدة سامحتو وراحت معاه لمدينة _هنا يماه زادت عجبتني ومانكدبش فرحت انو خلاها وراح وماش كيدار هاد الجاست يعني راني سامحتو لالا جامي نسامحو بصح على الاقل بردلي قلبي فيها وخلي مانخرجش عندها حتا من جدي حاوزها ونسمع في عصاه باين ضربها من عياطها تستاهل _جات مرت خالي عني قاتلي راهي راحت وبقات تضحك عليا قاتلي شفتي قتلك مادرلهاش العرس وزيد خلاها كيلهجالة وحدها __فاتت سمانة من وراها وبقيت مور خالي باه يهدر مع مجاهد يطلقني فالمحكمة وكما كان الحال تواصل معاه ومجاهد رفض قالو تبقى معلقة على اسمي .زدت تحاورت معاه فثلفون وقتلو راني وعدك غير تولد نجوى وتطلقها نرجعلك كمل طلاقك _بقى يامات وهو رافض حتا اقتنع بنفس الأسلوب وهو تهديد نقتل روحي ورفع قضية وفاتو لشهور ومجاهد ماحطش رجلو فالدوار خالتي تحلف وتعظم في ربي انو مارهش يجي حتا روفيا نفس الكلام وقالت فالاول نجوى حسباتلها نتي معاه ومبعد وصولوها الهدرة بلي راكي هنا بصح حالتها ماتعجبش وماش عاجبتها روحها كيعاد مجاهد متجاهلها وهو حلف حتا نهار تولد باه يدخل لدار وحدرها كون تخرج من الدار يطلقها وكانت نيتو باه ماتجيش عندي _كلامهم صح كان صحيح بصح ماحسيتش بفرحة وكأنو حاجة ماتت فيا _ودرك وصل يوم طلاقي وقدري مكتوب عليه انو نطلق مرتين هاديك صبيحية جاء عندي ودخلوه وقالي جدي احكي معاه آخر مرة بالاك تبدلي رايك _خرجت عندو هدرت معاه ووضحلي امور بلي ماش راح يمسها ولا يقربلها ولا حتا يدخل لدار ليفيها هيا وقالي خلي مانطلقوش نبقاو هكدا _لالا ليعندي قلتو ماش حابة نعاود الهدرة وندخل في عقلي _مازالك وقت وقرري بصح حطي في بالك راح يجي يوم ونبرهلك كلامي انا نجوى كون نحبها كون درتلها عرس مطرق وراني معاها بصح انا درت العكس صح ديت ثاري منها وخلفتهالي بصح ماعليش ليام الجاين نبرهنلك كيفاه ندفن آمالها بثار جديد بصح راح نعيش على وعدك ليا راح يجي يوم وترجيعلي.
الحلقة 163
بقلم لينا صبرينة
مور ماراح خممت ومديت قراري وتم طلاقي بمجاهد ورجعت مطلقة وشعورنا لزوج هاداك نهار صعيب وكل واحد فينا كانو عينينا يهدرو بألف كلام وحسرة .هاداك اليوم كان صعيب عليا موت وحييت فيه تغرس فيا الف سكين ودبحني وجرحني موحال نقدر نتخطى واش دار فيا ووين وصلني بالغدرة تاعو يدير واش يدير ماش راح ننساهالو__هاديك ليلة بعد لقيتو جاء لتحت تاقة وقالي عارفك راكي هنا فشمبرة وتسمعيني موالف نشوفك تقعدي هنا نشوف ظلك وخيالك يدور .بقى يطلب فسماح ويعاود مرات نحسو يبكي مرات نحسو ماش صاحي ولا سكران ومرات نحسو طبيعي ماقدرتش نفهمو _رحت لبست خمار عليا وفتحت التاقة وطليت عليه كان قاعد وقف شاف ليا وعينيه حومر _خالدة ياك وعديتي نطلقها وترجعيلي .اصبري بصح نتي علاه لابسة خمار تعيشي نحيه نشوف شعرك ولاماش خليني ننسف عليها تواحشتك ياحبيبي تواحشتك سامحيني مانقهرينيش وتقولي رجعت راجل غريب عليك _روح مجاهد ماتزيدش عليا_كيفاه عطاك قلبك تقبلي بطلاقنا كنت متمني ترفضي بصح هانت عليك عشرتنا عارف روحي غالط بصح واش ندير ندامة هيا تالية _مجاهد مكتوبنا فض خلاص ماتعب روحك ماتعبني معاك ولو كلامك ومشاعرك لبعضنا صادقين نتا كسرت كلشي بغلطة وحدة هنا وانتهى _سكرت التاقة وهو بقى يطبطب عليا حتا فاقلو خالي وخرج هدر معاه ماحبش يعقد معاه الحالة وبعدو من الدار وقال لمرتو بلي شافو راح لطونوبيل وبقى فيها _مرات نشوفهم يغيضهم ويعدروه بصح انا ولو مكسورة منو وحزينة بصح حجرت قلبي وكأني عمري ماحبيتو خلاص غلطتو كبيرة خلاتني ننسى عشرتنا الحلوة بكل تفاصيلها ومواقفها__من وراها بيامات جات عندي يماه قاتلي جابهم محمود من لمدينة يبقاو يامات ويرجعو _خالتي حابة نجييب قشي من تم حاولي مجاهد يمدلك مفاتح الدار _ راهم عندي بصح مجاهد كون يعرف مايعجبوش الحال هو قال ماتبعتولها والو راهي راجعة _شوفي عاونيني برك ندخل لدار نهز لروحي شوي قش نحتاجو بصح بلا مايشوفني حد سيرتو نجوى راهم شوي قش ماش راح يفيق وماش حابة واحد يشوفني تعيشي عاونيني وتستري عليا _قبلت وديت مشورة جدي وخرجت معاها شفت رجاجيل يشوفو ليا ويسمعوني في هدرة عيانة درت روحي مانسمعش _دخلت هيا لولة ومبعد رجعتلي قاتلي هيا _مدتلي لمفاتح وطلعت جرية لداري فتحتها ودخلت لقيتها مقلبة وكما سمعت بلي نجوى مادخلهاش هنا شمبرتها لتحت منين كانت شمبرتي لقديمة _شفت مع لفراش والقش حاجة مافي بلاصتها كما خليتها مقلبة لقيتها مقلبة كتر _رحت نحيت القش لي فلكابة وحطيت فيها لغطاء تاع بنتي راح يبقى عندي عزيز وزدت حطيت قش هو قديم بصح عزيز عليا مخيطتو يما بيديها _هزيتهم وخرجت بلا مانضوف وارايا واش خليت كيجيت هابطة شفت نجوى خرجت من شمبرة وفي يدها منشفة وقش عرفتها هابطة تدوش بصح كرشها ديجا خرجت ليشوفها مايقول راهي فالرابع .زعما يكون عندها توام مانعرف واش دخلني فيها خليتها هبطت ودخلت لشمبرة لقيت نفس لاشومبر ماش مبدلة رحت لخزانة لقيت غير قشها وقش مجاهد ماكانش .شفت نويزات تاعها جبدتهم وقطعتهم كل وحدة خليت فيها تعطيعة وعاودت طبقتهم ورجعتهم كما كانو بردت قلبي وضحكت عليها متأملة في باطل مسكينة لا شمبرا كيف ناس لا راجل و درك كيتشوف قشها هكدا باينة تشك فااسحورات نخليها في هواها موسوسة من خيالها _خرجت شفت من ومن لقيتها عافية هبطت لقيت خالتي تستنا فيا_ماش عملة هادي تدخلي لدار كيف سراقة _ماعليش خالتي هيا برك _عاودت وصلتني لدار ومديتلها مفاتح وراحت وانا اصلا الروحة تاعي غير باه نتأكد ادا سكنها فالدار لفوق ولا لتحت كما قالولي خرج كلامهم صحيح __فات شهر وكل مرة مجاهد يجي ويبات فطونوببيل قدام الدار وخالي موراه يقولو احشم وهو يقول لالا مانسمحش فيها مابقاش ونرجعها ماش حاب نولفها غيابي _خالي مايلقى مايدير معاه هو اصلا انسان متعاطف ومتسامح بصح الناس برا تقلق منهم يهدرو في شرفي وعرضي ويسبوهم بلي مخليني عندهم ويقولو بلي باباها تهنى منها تبرى منها و من فعايلها ونتوما تلمو فالخماج تاعها _سمعنا بزاف كلام لا يرضي ويوجع القلب بصح ماعليش كلش يفوت ويتنسى وراني متأملة بربي سبحانو يجيبلي حقي من كل واحد آذاني __سمعنا بخالتي حورية اجهضت رحنا طلينا علينا مسكينة حتا هيا كانت متاملة ترجع أم وربي ماكتبلهاش عقوبتنا كيف بعض خليناها في حالة ورجعنا لدار وبعدها يومين طيبنا انا ومرت خالي غير الحاجة ليتحبها ووصلنا خالي دخلنا عندهم شافتني عمتي رحت سلمت عليها وهيا تسلم وتعاود وتحضن _واش راكي بنتي سمعنا بواش صرا معاك راكي بخير _حمدلله إبتلاء برك وبربي نصبر عليه _سلافاتها تلمو علينا بصح كاين هدرات عليا على جنب ويسقسو في أسئلة قلقتني وليت نضت قلتلهم نروح عند خالتي _جات مرت خالي ورايا ودخلنا عندها لشمبرة فرحت بينا لقيناها صابرة شوي وبداو لزوج يتغامزو ويتهماسو سقسيتهم قالو والو ومرت خالي قاتلي نروح عند عمتك شوي ونرجع وخالني هبطت رجليها للأرض وفتحت لقجر ليقدامها ومدتلي برية ليدي قاتلي هادي ليك زعما نمدهالك ليام ليفاتو بصح ظروفي ماسمحتليش هيا فتحيها وأقرايها _فتحتلها ديراكت عرفت الخط هادا _خالتي هادا هو راه الخط تاعو هو ايه متأكدة بصح كيفاه وصلت عندك لبرية هادي من وين تعرفيه وزيد ياك راه فالحبس _درك نجي ونشرحلك .
الحلقة 164
بقلم لينا صبرينة
خرجت وخلاتني حايرة _شوي وتفتح الباب ودخلت هيا ووراها راجل كيشفتو وقفت تمعنت فيه باه عرفتو تبدلو ملامحو خلاص _السلام عليكم _وعليكم السلام وحمدلله على سلامتك آخر مرة شفتك كنت مريض _خالدة ابقاي هدري معاه شوي ودرك نرجعلك _لالا واشبيك واش كاين ماتخلينيش معاه ماش ناقصني فضايح _نطق هو قالي خالدة محتاجك في موضوع صغير نهدر معاك ومبعد نروح واحد مايشوفنا _سمحلي ماش ناقصتي هم خلاف خالتي بعدي خليني نخرج _خالدة والله ماييشوفكم حد ماتوثقيش في خالتك اسمعيه واش حاب يهدر عندو هدرة معاك صغيرة ويروح _سكت وهيا خرجت _محمد واش تحوس عندي _لبرية لي في يدك تلخص كلشي _شفت مع لبرية وطلعت راسي ليه ونتسائل كيفاه واش قصدك _لبرية مكتوب فيها خالدة راني جاي نخطبك قبلي بيا وماترفضيش راني ناوي معاك لحلال ونيتي صادقة كلشي سمعتو عليك ماش مصدقو وراني جاي نخطبك من باباك على سنة الله ورسوله برك نتي وافقي _ايه نفس لكلام يعني... ماتقوليش مول لبراوات هو نتا _ماتمنيتش تعرفيني هكدا بصح الظروف جات العكس(لتم ماش استغربت حسيتها صدمة )_ مي نتا قالولي راك فالحبس كيفاه مافهمتش تخلطت عليا وآخر مرة شفتك مريض عندها سنين من عرس نجوى _راكي قلتيها سنين صح كنت مريض بصح الحبس خاطيني مادخلتوش شكون ليقالك فالحبس _نصيرة قالت _ربي وكيلها هاديك نصيرة سبابي وسباب تعاستي ومرضي انا عمري مادخلت للحبس قالتك هكدا غير باه ممكن ماتحوسيش عليا مانعرف واش صرا بيناتكم حتا قاتلك هكدا _تخلطولي لخيوط بصح قولي حاجة علاه قتلي هيا سبابك _ماش راح نخبي ولا نستر عليها سيرتو ليك رايح نحكيلك كلش ومبعد راح تفهمي قصدي مع الحكاية نصيرة ماخافتش ربي ودارتلي سحور ماش واحد وماش زوح وصلتني للموت وحييت حمدلله ربي كشفها وختي فاقتلها صينو راني في كاش قبر مدفون ولا في كاش سبيطار تاع لمهابل _نصيرة سحرتك نتا علاه ؟_الغيرة والحقد والحسد والبغض خلاوها دير هكدا كيكنت بصحتي كنت نشوف معاها غير بنظرة اخت برك كنت بزاف نعزها ونحسها قريبة ليا بزاف ونرتاحلها و نحكيلها كلش عليها درت فيها ثقة وكنت نبعت لبراوات معاها بصح كيلقاتني مهتم بيك وحبيتك نتي وناويك وماقدرتش نشوف ليها هيا لتم دارت واش دارت فالاول شوهتلي صورتك وعقليتك وهكداك ولقاتني مازلت متعلق بيك ولو هيا اعترفت بلي حابنتي وطلبت مني نتزوجها بصح انا رفضها الف مرة عليها راحت استعملت السحور باه تهدمني ونكون ليها مي إنقلب السحر على الساحر .سحور ليدارتهملي وصلتني بيهم للموت رجع عندي مرض فالمصران وكون ماش عمري طوييل كون راني مت هاداك الوقت وزدت من وراها دخلت عقلي وهيا ماكانش حابة هكدا توصل بيا خرطت مع القزانات حتا ماعرفتش ساسها من راسها وضرتني بيهم وماوصلتش للمبتغى تاعها وأكيد بعدت مني وندمت بواش دارتلي بصح بعد فوات الاوان هادي هيا نصيرة بنت عمتك والحمدلله ختي فاقتلها _لا حول ولا قوة الا بالله مادرتيهاش توصل بيها تسحرك نتا بالتحديد كل مرة هادي الطفلة تشوكيني كتر وكتر _ايه وانا خطبتك شحال من مرة وكل مرة باباك يرفضني وبقيت نبعتلك فلبراوات بصح اكتشفت انو ماوصلتهملكش حتا كيخطبك رمضان بعتلك باه ترفضي وهادي لبرية لي في يدك وحدة منهم بصح للاسف ماوصلتهملكش وخبات كلشي عندها ممكن تشوفيني جريئ بزاف في كلامي المفاجئ بصح مانكدبش عليك وانا واقف قدامك راني ضعييف لدرجة رجليا راهم يرجفو _مالقيت مانقولك ماكنتش نستنى في هادو الإعترافات _راح قعد على حافة سرير وانا بعدت وقفت مقابلو وهنا اعترفلي بحبو وهو مهبط راسو ويديه نشوف فيهم يرجفو _انا حبيتك خالدة حبيتك غير بعينيا وماقربتش .سهرت ليالي وانا نخمم فيك و تمنيتك تكوني ليا وحتا ومبعد كيرجعت مريض بقيت نتفكرك مارحتيش من بالي مي زواجك حرقني من داخل انا حبيتك بصمت ومن بعيد كنت ناوي نبني دار ونكملها ونجي نخبطك باسكو باباك هادا هو شرطو وانا خطبتك شحال من مرة وكان يرفض بصح مالحقتش نكمل وكنت نبعتلك براوات غير باه تتعلقي بيا ووصلت بيا نهددك .خفت نقربلك بوجهي وترفضيني قحبيت نكون سري حتا ندخل من الباب الواسع خير بصح المكتوب مغلوب ماش ساهلة عليا نشوفك مرتين تتزوجي سيرتو الثانية كيخرجتي من دار باباك عروسة موت وحييت نشوف فيك من بعيد ونتحسر وقلت انا تمنيت وهوما حققو كيصرات بيك هاديك لفضيحة مع رمضان رجعت لباباك مرتين نخطب ونعاود وهو يرفض سيرتو كيشافني رجعت مريض ومرات تجيني كريز ناس سمعت بيا رجعت تقول عليا مهبول بصح انا بعقلي مرات برك مانحسش بروحي بصح خسرتك بين يديا سيرتو كيتزوجتي مجاهد لتم عرفت بلي نتي ماشي ليا نتي ربي كتبك لغيري ماش مكتوبي _انا هنا مالقيت مانقول وهو جبد من جيبو ورقة مدهالي حكمتها اقراي واش كتبت هادي كانت آخر برية ليا ليك كتبتها نفس اليوم ليسمعت بلي عقدتي بمجاهد هاديك ليلة كتبتها بصح ماقدرتش نبعتهالك باسكو رجعتي مرت راجل عليها بقات عندي.
الحلقة 165
بقلم لينا صبرينة
فتحتها جيت نقرا لقيتو هو نطق وقال نفس الكلام الموجود فالورقة _ ولو ابتعدت بي المسافات عنك سأبقى أراقبك من بعيد فأنا ليست عندي ذاكرة خائنة لتنساك سريعا إلا اذا قبض الله روحي ولكن اذا لي عمر طويل سأعود إليك مثل مايعود اليتيم إلى ملجأه الوحيد وسأضل أحاول أن أتغلب على القدر والنصيب وستبقين خالدة قلبي للأبد _خالدة كلشي كنت نكتبهولك حافظاه باسكو كتبتهم من قلبي انا مانزيدش نطول كتر من هكدا نورمالمو فهمتي نيتي مليح انا ناوي لحلال وحاب نتزوجك وهاد المرة نجي نخبطك من عند جدك مادام راكي عندو _سمحلي نتا صح انسان محترم وكلش بصح زواج نحيتو من راسي ماعنديش بزاف من طلقت مستحيل نتزوج أصلا رجال رجعو عندي عقدة في حياتي ولو نشوفك مليح ومطمن قلبي من جيهتك بصح يبقى نفور في قلبي لأي راجل _وقف وشاف ليا وتبسم وقالي ماعليش ليريحك وفاهمة وضعك وماش راح نظغط عليك ونتي أصلا تستاهلي ماخير مني _ماتفهمنيش غالط نتا ماخصك والو برك انا ليفيا المشكل _فاهمك وعندك حق ماعليش انا نروح ونتي تهلاي في روحك انا عندي المهم فتحتلك قلبي وحسيت بحاجة لداخلي كانت كيف الغصة في قلبي وكيحكيتها رتاحت ونتي ماش محتمة عليك تصايريني انا نعرف روحي المهم ساامحيني مالقيتش فرصة خلاف باه نهدر معاك غير هادي الفرصة هيا بسلامة _خرج وانا رحت قعدت ياربي واش هادا ماتوقعتوش يكون محمد هو نفسو هاداك ليظل يبعتلي فلبراوات انا وهو جيران من الصغر كبرنا مع بعض في نفس الدشرة ومعرفة قديمة حنا وهوما بصح جامي حسيت بيه ناويني ولا حابني بالعكس كان انسان محترم و منين يشوف نساء يهبط راسو ماعندوش العين الزايغة داير حدود بيناتنا عليها ماتوقعتوش هو جامي لمحلي ياولوكان بكلمة ولا نظرة وبزيادة نصيرة تشوكيت فيها هنا ربطت الأحداث وعرفت بلي هاديك اللية ليسمعتها تهدر مع يماها كان قصدها السحور ماش شرفها _دخلت خالتي ومرت خالي قالولي واش عجبك ؟_ وشبيكم نتوما دايريلي رؤية شرعية معاه ولا كيفاه راجل طالب زواج وانا أكيد رفضت _عارفين ترفضي انا المهم محمد قالي وصليني بيها وصلتك مام انا ماكنتش عارفة بلي ناويك وحتا يماك ولا مرة جبدتلي عليه ماقاتليش بلي موالف يخطبك حتا سمعتها من عند عمتك _عمتي تعرف بلي خطبني _ايه ويماك قالتها اسكتي ماتهدريش باه نتي ماتكرهيش باباك باسكو كان يحوس على راجل بدراهمو ماكانش حاب يزوجك لراجل طباخ وماعندوش وزيد المرة الاخيرة كيخطبك رفض ليخلاص باسكو كان مريض _ربي يرحمك يايما بقيتي تدافعي على بابا وانا كارهاتو كارهاتو كيليوم كي غدوا_شفت مع خالتي قلتلها يعني حتا عمتي تعرف بلي تلاقيتو درك _لالا واحد مايعرف بيناتنا حنا برك. __بعد يامات صح محمد خطبني من جدي وجاء سقساني بصح رفضت مانيش مستعدة نزيد نبني حياتي مع انسان خلاف يكفيني الجرح ليراني عايشة فيه _وحد صبحية نضت على مرت خالي تهزز فيا وتقولي نوضي عندي ليك خببر _تقعدت وقلتلها واش كاين _نجوى ماتلها طفل لي في كرشها راهي فسبيطار قبيل جارتي سمعت من علجية _ماكانش منها وقتاه صرات _لبارح قالو داوها لسبيطار _ايه هيا اصلا لولاد ماراهمش يصدقولها بصح كيفاتت الخامس قلت كيعاد جاء من لحرام عاشلها بصح المكتوب ماتقدري تتحكمي فيه المهم خطيني منها خليني نرقد ماشبعتش _ياخاااه انا في بلاصتك نموت فرحة _ربي راه يجييبلي حقي في كل واحد دمرني _خالدة غيرك خرجي من الإكتآب ليراكي فيه راكي تضري في روحك سورتو ليل ماكيش ترقدي ونتي تبكي وتتحسري _تعيشي خليني في حالي ماتفكرينيش يحالتي تاع الليل _هيا خرجت وانا هبطت مني دمعة غاضتني روحي بلي الناس شافقة عليا وعلى حالتي وكما قالت انا كل ليلة نضل نبكي وعايشة في كآبة وقهر ماقدرتش نتخطى واش صرا فيا سيرتو نهار ليجي فيه مجاهد ويبدا يهدر ويحاول فيا لتم يفكرني بكل أوجاعي كلما نقول نسيت نلقاه في آخر سمانة جاء ورجعلي الذكريات عشت إرهاق نفسي _فات من وراها شهرين نفس ريتم والسيناريو تاع مجاهد بصح وحد صبحية نضنا على خبيط فالباب خلعنا كامل خرجنا نشوفو واش كاين _كيفتح خالي لقاها نجوى حالتها حالة بالضرب وقاتلو تعيش خلوني عندكم هاداك راح يقتلني _ هو يحاول يفهم منها وهيا لمحتني دييراكت تهجمت عليا تسب وتعاير وخالي جبدها قالها وشبيه قسامك واش تحوسي _هيا بسبابها خربتلي حياتي هيا بعتتو يضربني ويذلني _قالها شكون دار فيك هكدا مجاهد ؟_ايه هو الله لا تربحو بصح على جال الهم تاع بنت ختك كلبة رخيسة _واش دخلني فيك انا علاه جاية تهجمي عليا _زادو خبطو فالباب وهاد المرة كان مجاهد فتحلو وقال لخالي ادا راهي لداخل قولها تخرج نصفي معاها حسابي ولله يسهل عليها _مجاهد بعقلك علاه درت لطفلة هكدا_ماتحوسش تفهم قتلك جيبهالي ولا ندخل نخرجها بالقوة _راهي خايفة منك مانقدرش نجيبهالك وزيد نتا ماش في عقلك _ياراجل قتلك جيبها وباباها درك يجي راني عيطتلو _لقينا نجوى خرجت عندو قاتلو واش مازلت تحوس علاه عيطتلو _حكمها من يدها وكركرها معاه وراح خالي ومرتو وجدي جريا لبسو ولحقوهم واناوبقيت نستنا حابة نفهم واش كاين.
الحلقة 166
بقلم لينا صبرينة
بعدها بنص ساعة هكدا جاو ودخلت غير مرت خالي سقسيتها واش صاري قاتلي خلات على نجوى هاديك طفلة ماتخافش ريي _ كيرحنا موراهم فتحتلنا وردة الباب لقيناه يضرب فيها فالبيت وهيا تعيط حتا دخل باباك وهدر معاه باه خرج عندو ونجوى كانت مشنشفة بالضرب و مجاهد قال لباباك بنتك راهي مطلقة ورجع باباك يحاول فيه باه مايقولهاش ومايكملش عليها بصح هو قرب ليها عطاها زوج كفوف ورماها لباباك قالها راكي مطلقة و قالو هادي بنتك ربيها وربي معاها ختك ليتسترت عليها طفل ليكان في كرشها ماش ولدي وخدعتنا كامل وشكوكي كانت في محلها موحال تهز مني انا .راني كشفتها نهار ديتها لطبيبة اول مرة ونتا كنت حاضر قالت لطبيبة استريني وقولي عندي حمل جديد صينو بابا يقتلني قالتها غطي عليا وماتديش ذنبي .يعني بنتك نجوى ضغطت على طبيبة وأثرت عليها باه تقول هاد لكلام وربي كيحب يكشف عبادو كشفتها وحكاتلي كلش بالتفصيل قاتلي كان عندها كتر من شهرين لتم رحت عند لزهر حبيت نستفزو ووصلت لوين حاب وقالي بلي مور طلاقها معاه بيامات برك جاها لدارك نتا وغلط معاها وعمتها ليهيا ختك غطات عليها وماش غير مرة هادا كلو هدرو هو وكيربطت انا الأحداث فهمت بلي طفل ليتبلاتني بيه هو ولد لزهر ونهار غلطت معاها ماش انا ليتلاحت عليها أصلا بنتك الساقطة ليتلاحت عليا ودرك راهي مطلقة مطلقة _يعني خلاص طلقها_ ايه وباباك يقى يراوغ فيه بالهدرة باه يتراجع بصح مجاهد صعيب ديراكت حكمها من يدها وخرجها لبرا وباباك لحقهم ومجاهد قالو هز خماجك واديه عليا أصلا زواجنا باطل في باطل ورخسها بلمعاير _هادي برا قالها _ايه سمعوه الناس ليكانت لتم اصلا راكي تعرفيهم كيسمعو عياط يحبو يقرعجو هاداك هو سمعو كلش وتبهدلو __من مور واش صرا مع نجوى زدت سمعت من عمتي ام نصيرة قاتلنا بلي بابا كيداها لدار وقابلها مع عمتي ليفدار و ضغط عليها حتا عمتي قاتلو صح لزهر كان يجي فنهار وكانو يتلاقاو في شمبرتي ونتا تكون ماكانش _هنا بابا جهل عطاها طريحة لنجوى وخدلها وجها بالضرب وزاد كمل بعمتي اول مرة يرفد يدو عليها وهيا كبيرة قالو حالتو ماكانش في حالة استوعاب صرات كبيرة بيناتهم حتا جاء عمي وداها معاه لدارو وبابا خلاوه حالتو ماتعجبش ونجوى ثاني قالو بابا اديها معاك ماتبقاش معايا قالو مانديهاش هادي تربيتك نتا تتحمل مسؤوليتك وبزيادة مانخدلش زانية لداري __صراحة كل الأحداث ليصرات ماشفقتش شعرة على نجوى بالعكس ربي خدالي حقي منها أضعاف مضاعفة ولزهر مافهمتش نيتو هو ثاني علاه طلقها ومبعد زنى معاها فلحرام وزيد درك رافضها وقال نجيب لالاها .المهم والمفيد نجوى خلصتها بفضيحة وتبهديلة وشفنا غرورها بزينها وين خداها __فاتو يمات برك وطلقها فالمحكمة نشوكينا كييفاه بهادي السرعة قدر يطلق موالف الشرع يحكم شهور ومبعد نفس نهار ليطلق جا عندي مجاهد قالي كما سمعتي وكما وعدتك أصلا انا رفعت قضية طلاقي منها قبل شهر ماتجهض عليها تم طلاقي بيها بهادي السرعة وبزيادة زواجي بيها اصلا كان باطل في باطل وماش صحيح ودرك مابقاتلي صلة معاها _نسقسيك نتا علاه ضربتها زرخستها هكداك باسكو طفل ماش ولدك ولا واش _رجعث ثاري برك هيا حبت تلعب بيا انا لعبت بيها والدليل اني كنت صح ناوي نطلقها هيا رفعت عليها دعوة قبل ماتجهض عارفة بلي الإجراءات يطولو انا ماخليتش الوقت يداهمي كنت حاب نزرب نتفك منها وليدرتو فالأخير فضحها ورخستها هاداك كان رد لإنتقامي برك عارفة باباك مايقدر يزيد يهدر والو ولا يتهمني ولو يتهمني واحد مايصدقو كانت تستاهل هاديك التمرميدة _ايه المهم علاه طلبت من جدي تهدر معايا واش كاين؟_ باينة باه ترجعي ليا ونتزوحو وناوي نديرلك عرس كبير هاد المرة_حسباتلك بهادي سهولة نرجعلك _خالدة واش تفاهمنا ياك نتي وعدتيني _مجاهد روح انا جرحي مازال مابرا من خيانتك _ماعليش ماتسامحينيش درك برك نتزوجو ومع الوقت تسامحي _بقيت انا نهدر وهو يهدر كلمة تجيب كلمة وهو يبررلي في روحو حتا رجعتلي لاكريز تاع تنفس وهو من وجهو خاف وتخلع وعيط لجدي دخل ومن وراها خرج معاه شرحلو واش ليبيا ومرت خالي جابتلي دواء ورجع كل مرة يجي يجبد موضوع زواج من جدي وهو يقولو ماهيش مليحة كلما تتفكر واش درتلها ترجعلها لاكريز اصبر عليها .
الحلقة 167
بقلم لينا صبرينة
غاب فترة سيمانتين وزاد رجع نفس الموضوع وانا رافضة حتا لوحد نهار جاء بطريقة هجوم انو لوقتاه يبقى يستنا وانا وعدتو لتم تحتمت نخرج من صمتي وقتلو وعود كاذبة صح وعدتك بصح لعبتها عليك برك ماراح نرجعلك مانتزوجك ماترجع حياتنا كما بكري حكايتنا انا ونتا خلصت من زمان من نهار غلطت كسرت كل المشاعر ليعندي ليك _اجابتي ليه تصدم بيها وحسيتو ماتوقعهاش وحس بخيبة وخدلان مني _خالدة خدعتني _ايه خدعتك وراني نعترف _هزز ببراسو وقالي يعطيك الصحة _راح من هاداك نهار مازدتش شفتو بقى مرة على مرة يبعتلي يماه ولا روفيا وانا رافضة كليا وحتا جدي وخالي حبو يغطو عليا باه نقبل نرجعلو وهدرو معايا بكل الطرق بصح ماحبيتش نسامح ولا نرجع ___من وراها بشهرين من طلاقو سمعت بلي بابا كان حاب يزوج نجوى باي طريقة كانت وبقات مهانة من دار لدار تاع عمومي وفالاخير خالتي لكبيرة جات وداتها معاها وقالت نتكفل بيها ونلقالها راجل يخاف ربي ويناسبها وتتزوج وندي عليها أجر اني سترت يتيمة ورمضان عمل عملتو وراح للخارج مازادش رجع __في ليلة سمعت شوي تخرخيش منين تاقة قالأول خفت ومبعد شكيت في مجاهد ممكن يكون هو حتا لقيتو يطبطب عليا من تم قدمت وقلت شكون _انا خاالدة هادا انا علاه تعدبي فينا هكدا رجعت مانقدرش نجي عندك وانا خايف نسمع نفس الجواب الرفض والصد عارفك مجروحة ومكسورة مني بصح نوعدك قبلي برك ونسيك في كلشي نتي دواك راه عندي وانا دوايا عندك _ليتكسر مايتصلحش مجاهد روح تعيش ماتفتحلي لجروح _خالدة في خاطر عشرتنا ووقفتنا وثقتنا ببعض هيا قبلي ترجعي _مجاهد افهم ماكانش كيفاه نزيد نرجعلك كلما نتفكر واش درت نحس بغصة في قلبي راح تقتلني _ماعليش نزيد نصبر ونبقى صابر حتى يحن قلبك عليا __من وراها بيامات رجع محمد يخطب فيا وانا كان ماعندي حاجة فيه ولو قال بحبني وناويني من بكري وكلشي صرا معاه بصح مانقدرش نكون معاه لا هو لا غيرو حابة نغلق عليا موضوع زواج ونعيش وحدي لنفسي برك ونتكل على روحي ولو الناس برا كلات لحمي بالكلام العاطل بصح ماهمنيش .حتا لوحد نهار خالتي حورية كانت عندنا فالدار وبقات تقنع فيا بمحمد وانا رافضة ولعبتها عليا وخرجتني معاها لمدينة مع راجلها ندورو حتا لقيت محمد في وجوهنا وهيا وراجلها بعدو علينا _خالدة علاه تعبي في روحك وفيا واش شفتي مني حتا رافضتني وماش قابلتني _ماشفت منك والو قتلك هاداك الوقت المشكل فيا انا _يااا خالدة خليني نداوي جروحك انا انسان صادق وطالب لحلال ونيتي صافية علاه موسوسة من روحك مني انا ماش كيفهم _ انت علاه مصمم عليا انا بدات مع انو سمعتي مشوهة وقذفو في شرفي شحال من مرة علاه متمسك بمرا كما أنا _ انا راني قابلك بكل حالاتك ارملة مطلقة المهم قابلك وحاب نديك وتكوني معايا المهم ماتكونيش على رقبة راجل خلاف وحاجة اخرى نتقبلها عادي اصلا كيكنتي مرت راجل ماقدرتش نقدملك .انا ليهمنيي انو نتي راكي براسك ماش حرمة كاش واحد هادا ليخلاني نخرج ونقابلك . انا حبي ليك فاق الحدود ونتي بالنسبة ليا حلم وماش حلم نزوة برك ويخلاص غير نوصلك لالا هو حلم أبدي يعني حابك تكوني ليا ونيتي باه نكمل معاك حياتي ومشاعري لينكنهم ليك مايتوصفوش بالكلام باسكو الحاجة ليتخرج من القلب ماتقدريش توصفيها وادا وصفتيها تكوني اكيد قللتي من قيمتها _محمد تعيش مانيش قد هاد لكلام شوف طريقك من جيهة خلاف _انا ونتي خلقنا لعض نتي ومجاهد فض مكتوبكم غير باه تكوني ليا وربي عندو حكمة لكلش وانا ونتي نتشاركو بزاف أمور وربي إبتلانا بمصايب وأمراض غير باه يشوف صبرنا كيفاه يكون المهم زيدي خمي في كلامي ووعد مني كراجل راح تلقاي مني كل خير __راح وانا زدت تشوشت من كلامو وكيرجعنا دخلو حكمهم جدي يتعشاو ويروحو .جاتني لحظة ادراك جبدت خالتي بجيه وقلتلها واش يقصد محمد انو اتا وهو تشاركنا مصايب وأمراض _علاه ماخبركش ياك هو كان مسحور ولليوم مازال مابراش مليح _لا حكاية سحور نعرفها _ايه ومرضو هو نفسو مرضك حتا هو عندو نوبة الهلع سحورات خلاوه هكدا مسكين خرجو فيه الأمراض كامل بصح لاباس بيه _ربي يشفيه صح حكالي على سحور بصح ماغمقش فيه لا هو لا مرضو _ايه باسكو ماقعدتوش بزاف عليها المهم نتي خمي والله جاتك فرصة راجل قابلك كما تكوني تكوني واش تسناي خليه هو يخرجك من الغرقة هادي ليفيها نتي _واش قصدك واش حابة توصيلي _علاه زعفتي والو قصدي انستري برك هو طالب لحلال _خليتها ورحت لشمبرة حكمني غل داخلي عليهم كامل علاه يشوفوني اني علة عليهم .
الحلقة 168
بقلم لينا صبرينة
لصباح جاتني علجية لدار وبدات تعاير فيا وتلوم قاتلي وجه الشر على جالك ماهوش حاب يتزوج ومعاديني ياسحارة كاش مادرتيلو باه كرهنا بقات تعيط وتبخص بيا وتسمع فالناس عن قصد دير فيها ومرت خالي تقولها سكتي خافي ربي ولا روحي قبل لا نغلقو عليك الباب في وجهك_اغلقو اغلقو وريلهم للناس بلي نتوما لا تربية لا أخلاق _سكت سكت وليت هيجت عليها بيها برجاجيل ليوافين ويتصنتو ماعندعم خدمة يديروها غير يقرعجو على الناس ويدخلو في مشاكلنا ومشاكل بعضهم في كل مشكل هوما لولين يتطفلو _هاهو وجهي ادا رجع تزوجك ياساقطة تبقاي هكدا هجالة وتبقاي عايشة مع عارك يارخيسة _لقينا مجاهد جاء ليها قالها روحي واش هاد ليديري فيه يعني نجي نهار مانهناش معاكم أنا كنتي ورايا فدار ودرك جايا لهنا ولامة عليك الغاشي _مجاهد اديها وروح قيلوني _دخلنا وخليتها تغلي شوي ورجع وكنا وحدنا فدار من لباب قالي مانطولش عليك سمانة الجاية نجي ونجيب معايا امام ونعاود نفتح عليك نتي يلزم نستعمل معاك القوة وادا رفضتي ماتلومي غير روحك _ واش تأمر وتهدد فيا غير الخير واش حاسب روحك حتا راك متسلط على قراراتي _ليعندي قلتو سمانة لجاية يسموك مرتي وعلى ذمتي شئتي أم أبيتي _ راح وخلاني حالة فمي كيجاء خالي قالتلو مرتو قال ايه تقبل وتهنينا لوقتاه يبقى رايح جاي والناس تهدر هيا ليراهي تخلي الناس تزيد تهدر _خالي كرهت منيي تليكيدي فيا _حاشة قصدي برك انستري ماتقدريش تبقاي هكدا مجاهد ماش راح يحبس عليك كرهت في بلاصتو وهو ماكرهش ويقول نبقى نحاول حتا تسامح وتقبل يعني على قد ماقصرتي ولا طولتي راح ترجعيلو _بصح انا كرهتو ماتقدرش نزيد نكون معاه _مالا قبلي بمحمد واش خصو صح كان مريض بصح درك رجع صحتو لاباس عليه _خالي حابة نعيش وحدي بروحي فهموني _ماكانش منها نعيشي وحدك لا اب لا ام لا اخ لا اخت وزيد عندك عار فوق ظهرك تبقاي طول حياتك عايشة في جهنمة تاع كلامهم يابنتي لمصلحتك قبلي واحد فيهم _كيجاء جدي وسمع كلامو قال خالدة في دارها مانجبرها على والو وخالي قالو اكيد مانجبروهاش بصح نفيقوها لنقاط هيا جاهلتهم __من وراها بسمانة رجع مجاهد ومعاه إمام وانا رفضت وبديت نعيط رجعتلي لاكريز وماصرات لا خطبة لا فاتحة كان حاب يحطني تحت الأمر الواقع ويجبرني نرجعلو بأي طريقة وانا حالتي حالة قالو جدي قدامي اهدر واش عندك وروح وماتزيدش ترجع هنا ولا تقابلها حتا تنسى وتقبل _خالدة عارف حالتك صعييبة وغلطت كيكنت راح نجبرك وكما قال جدك راني رايح ونستنى منكم تتصلو بيا ماعليش نصبر عليك حتا تنساي شوي وتوافقي ونرجع ومنا لهاداك الوقت اتهلاي في روحك وراكي علابك _راح وكلامو حسيتو استفزاز مازالو حاب يجبرني ودرتلهم حالة فدار حتا مالقاو مايهدرو حياتي رجعت صعيبة ومرة حتا لوحد نهار نضت بقرار في راسي رحت عند جدي لشمبرتو لقيتو يصلي ستنيتو كمل وهدرت معاه _جدي راني قابلة بمحمد _تشوكا بقراري كما تشوكا خالي ومرتو بصح هاد المرة قراري خديتو بكل قناعة ولا حتا ضغط حبيت نمد خطوة لمستقبلي ممكن نشوف الراحة مع محمد ونقدر نتخطى الماضي معاه اصلا حياتي هيا عبارة على تجارب وقراري بزواجي من محمد كان نابع من القلب حسيتو هو أصدق واحد فيهم ونيتو صافية وماعندوش مصلحة ولا ثأر .نكدب عليكم ونقولكم ماخفتش من هادي الخطوة بالعكس خفت وتوترت وتوسوست انو يتكرر معايا نفس الشيى بصح كاينة حاجة بداخلي خلاتني نرتاح لهاد الراجل رغم كل سنين ليفات وواش فات عليه واش فات عليا وماسمحش فيا وبقى متمسك وصارحني بكلشي __جاو خطبوني من غير عمتي ام نصيرة ويماه ليباينة ماش عاجبتها وجات اجباري حتا قالتهالي في وجهي وعمتي قالتها مهم محمد قابلها _راحو وتفاهمو بلي العرس مانطولوش فيه برك يوجد روحو _ماسمعنا حتا واحد والحكاية بقات مغمومة وانا ماعجبنيش هاد التصرف علاه ماسمعوش الناس وحبيت نهدر معاه هو شخصيا حتا خالتي دبرت راسها وجوزتهولي من ثلقون وسقسيتو قالي صراحة موسوس وخايف يخربو في زواجنا حاب نستر هاد الشيى باه تكمل بيناتنا على خير _ايه فهمتك درك _خالدة راح نقولك هدرة وحطيها مليح في راسك .نتمنى منك مجاهد كون يزيد يجيك ماتخرجيش عندو أبدا ماتخليهش يزيد يشوف وجهك درك رجعتي تاعي ومن غيرتي نقدر نقتل نورمال _بعيد شر علاه نوصلو لقت.ي.ل.ة أصلا موالف تديرها كنت مرت غيرك وقريب ضربتنا بطونوبيل _الله غالب عليا انا صح راجل كالم بصح عندي ردة فعل هجومية مالا احرصي على روحك وكما قتلك ماتخرجوش خبر زواجنا حتا يلحق الوقت _ان شاءالله _كوبا ودورت لمرت خالي قلتلها هادا محمد ظهر صح عندو الوسوساس القهري كيفي _مالا كما يقولو مايتزاوجو حتا يتشابهو حمدلله ربي عوضك بسيد الرجال متأكدة ماش راح يخيب ضنك فيه.
الحلقة 169
بقلم لينا صبرينة
فاتو شهور ومجاهد مازادش جاء بصح يعيط لدار وخالي يجاوبو بلي راهي رافضة مي ماسمعش راح نتزوج قتلو مايخبروش باه هكدا نكون وصلت لغايتي ونحرقلو قلبو كما كوالي قلبي ومنها مايفسدش عليا_ ووصل نهار الفاتحة تاعي وسمعو الناس مابقاتش حاجة تتخبى وكنت واجدة نفسيا لهاد الزواج حسيت روحي تحررت من مجاهد وحبي ليه وبالنسبة لبابا كيسمع جاء وزلزل الدار بعياطو بصح انا قتلو نتا ماعندك حتا حق تدخل في حياتي وقراراتي باسكو تبريت مني هكدا سبني وراح _قبل بليلة جاو لافامي فرحو بيا ورحت قعدت مع بنات خالتي وخالتي حورية سقساتهم على نجوى قالولوها جبناها راهي هنا عند باباها _ بدلتهم الهدرة وبقيت نويرلهم واش راح نلبس وهوما يقولوي شعرك نديرولو كواف تجي تهبلي برك ارواحي نقصلك لاماش طوالت _ لالا مانقصش نخليها هكداك حابتها تطوال ( وانا في قلبي ماش حابة حتا حاجة تفكرني في مجاهد ) _لقيت مرت خالي جات عندي ووجها مخطوف قاتلي ارواحي _رحت وراها .خالدة مجاهد سمع بلي راح تتزوحي _كيقالت هكدا حكمتني رعشة بصح تحكمت في روحي _باينة يسمع مايهمنيش _خالدة راه يستنا فيك فثلفون رحت هزيت لقيتو هو حتب يهدر معاك مالقيت مانقولو _جدي راه في شمبرتو قوليلو يهدر معاه _جات تروح وليت حبستها اصبري بدلت رايي انا نهدر معاه ونحطلو النقاط على الحروف _رحت هزيت ثلفون حس بيا _خالدة صحيح واش سمعت ؟_ ايه صحيح رايحة نتزوح _خااالدة ماتهبلينيش شكون ليتزوجيه نتي ماتقدريش تكوني مع غيري ماتغدريش بيا_راك غالط والدليل اني غدوا نرجع مرت راجل انا حبي ليك دفنتو نهار خرجت من دارك ودرك في قلبي جيهتك غير الغل والكره انا يامجاهد كرهتك _خااالدة اسكتي ماتقدريش ديريها بيا ماتغلطيش راني نجهل _صايي خلاص طار لحمام _قسما بالله راني نحلف ياخالدة كون ماتراجعيش غير ن.ق.تل روحي ونخليك عايشة على ذنب موتي جامي تترحمي منو _ماعدتش يهمني لا نتا لا تهديداتك ومايهمني لا تكون حي ولا ميت ماعدتش تهمني افهم _خالدة راكي تندمي على كلامك اتراجعي ورفضي هاد الزواح ماتدمريش عشرتنا وحياتنا راني نحاول فيك خالدة ماتتهوريش مانقدرش نتقبلها ماتخليش غشك مني يتغلب عليك وتسمحي فيا _وانا قلت كلامي وجامي نندم نتا رجعت آخر همي وزواجي راح يكمل _.....زربت كوبيت في وجهو وهو يهدر وقعدت كلشي فيا يرجف بزاف صعييبة اني نهدر هكدا ولو نص من كلامي صحيح بصح صراع نفسي راني نعيش فيه _فليل مور العيشاء صونا ثلفون وحسيت يكون هو زربت سبقت رديت لقيتو هو _خالدة راني دخلت لدوار على جالك ريسكيت وديماريت فليل باه نلحق بيك _مجااهد انساني علاه دير هكدا خليني نعيش حياتي درك لحياة معاك رجعت مستحيلة _خااالدة ماتلعبيش بعمرك وبحياتي راكي تندمي_ماتزيدش تقربلي ولا تتواصل معايا _كوبيت عليه ماش قادرة نزيد نهدر _نحيت الخيط تاع ثلقون باه مايبقاش يعيط _من وراها غير ساعة وجاني خبر زلزل كياني من داخل كانو حابين يخبو عليا بصح سمعتهم كيقالو مجاهد دار آكسيدو كبير تكركبت بيه طونوبيل من جبل صغير وهزوه لامبيلونص لسبيطار ومع قلبو ضعيف حياتو في خطر كبير _هنا طيحت نبكي نلوم في روحي انا سبابو كون خير لمحتلو من قبل بلي راح نتزوج ودرك هو هدر و هدد وكان قد وعدو وكلامو مادريتوش يديرها فعلا ودرك خلاني غارقة في دوامة هيجان مع خوفي ووعدي .
هنا جف حبري وقلمي لوصف المشاعر.
يتبع الحلقات الاخيرة
