الحلقة 135
#بقلمLina_sabrina
مجاهد موالف تقولي بلي نتا هو سندي وكلشي في هاد الحياة مالا تقدر درك تسامح وتنسى وتهز مرتك وتديها معاك لمدينة بعيد على هاد المشاكل وتعيشو هانيين وانا بنفسي واجدة نواجه كلشي وننسى ونروح معاك لبعيد غير باه مانخسركش ونكون معاك مستراحة وحاجة ماتنزيد تدخل بيناتنا _بقى ثواني في يدو القارو ويشوف ليا _ مجاهد نحتاج جواب واحد منك باه نفهم علاقتك معايا_نحى القارو من يدو وناض وقف وفتحلي دراعو لزوج هنا تبسمت وفرحت من داخل انو تفكيري كان في محلو مجاهد مايقدرش يفرط فيا ولا انا نسمح فيه . رحت حضنتو وهو حضني وقتلو انا صح غلطت كيخبيت عليك بصح غير باه مانخلقش المشاكل وليقالوه لزوج غالط انا والله مادخلتوش عليها وادا كاينة حاجة بيناتهم انا خاطيني منها _خلاص سكري الموضوع _جبدت روحي عليه وشفت معاه ياك مصدقني ؟_انا لينعرفو انو خالدة مستحيل دير حاجة كما هادي بصح ليسمعو صعيب يتكدب وكلشي بالدليل وزيد نتي سكتي وغطيتي على هاد لحكاية .درك تفرت تفضحنا وخلصت لحكاية ومبعد نخمو فيها _مجاهد ..._اشش خلاص خلينا منهم وركزي معايا برك _حط يدو على الخمار وجبد لاماش ويعدل فيها على جبهتي _علاه ماهيش تطوال _باسكو كل مرة تطوال نقصها علاه حابها نخليها طويلة _لالا مليحة هكدا خليها باه كينكون متغشش ومنارفي تطاير مع أنفاسي الهايجة باه لتم نفيق بلي راني مع أنثى وأي هواء صغير يضرها _هههه نتا عندك تفكير وحدو _عارف بلي ماكانش مني عشرة _وينهي ضحتك مازلت متغشش _باينة مازلت بصح ماتخميش المهم الخطوة ليدرتيها درك وقلتيلي هاد لكلام عجبني وحسيتك صح عندي قيمة ليك وحابة تكوني معايا بأي طريقة ماش كما هاداك نهار تتخباي وهاربة باه تواجهيني وتتخبطي وحدك _مجاهد نسيت حتا نتا كيصرا مشكل تهرب _لالا غالطة انا نواجه ونحط النقاط على الحروف مبعد نبعد باه الوقت يداوي بصح نتي حنا في وسط المشاكل ونتي ديجا ماكانش هاداك نهار حطيت ألف إحتمال في راسي وزدتي كملتي عليا تقولي نروح وتتخباي مور مرضك _راك تعرف مرضي يخليني ندير امور ماش حابتها غير إرادية _بعدت عليه ورجعت نبكي ونشكي بلي كيفاه راح نفهمك الله غالب عليا أمري مغلوب عليه مانيش نقدر نتحمم في روحي تعبت باه نواجه ونتحدى رجعت اي حاجة صغيرة تدخلني في نوبة كيماقتلتش روحي راني هايلة انا نهاري وليلي وكل ساعة تفوت عليا لاكريز هادي ماتخطينيش مرات نحسها داخليا والله مانشكي بصح مرات تسيطر عقلي وساعتها مانقدرش نخمم راني تعبت نفسيا وجسديا حتا انا كون صيبت نعيش كيف ناس بصح واش ندير حياتي صعيبة ومعقدة وراني في دوامة غير ربي ليعالم بيها _قرب ليا وحكم وجهي بيديه لزوح وقابلني بعينه .خلاص سكتي راني معاك ياك قلتي نروحو لمدينة مالا خلاص نروحو ونديك لطبيبة تشوفك وتداويي روحك وبربي تبراي وترجع حياتك طبيعية _انا كون ماش نتا جامي نتخطى هادو الإبتلاءات خفت كينجي ونسقسيك هاد السؤال ترفضني وتصدني بصح كان لازم علياا نعرف جوابك في وسط غشك باه نعرف قيمة حبك ليا وادا صح تقدر تسمح فيا وتخرجني من حياتك_شكون قال نسمح فيك من الغش برك رجعت نهدر بلا تخمام هاداك نهار مستحيل نخليك تخرجي من الدار ولا من حياتي يصرا واش يصرا مانفرطش فيك والصراحة مانكدبش عليك مازلت قلقان منك وبزااف تاني بصح الطريقة المباشرة تاع سؤالك خلاتني نخمم بعقلانية باسكو كون درت العكس ونصدك عارف بلي نخسرك وندامة تجي الأخيرة ونتي فيساع تحسي بكرامتك تهانت وماش راح تهوني عليا تحسي بالخيبة على باطل بصح نخلو الوقت يداوي ماتضغطيش عليا ماش ساهلة ليسمعتو.
الحلقة 136
بقلم لينا صبرينة
طلعنا مع بعض لدار وصح كل واحد حكم بلاصتو وكل واخد حكم حدو ليه وسكتنا بصح ماعليش المهم راه قدامي وعرفت نحافظ على علاقتي الزوجية وهو كل مرة يبرهنلي بلي سلطان زمانو بأفعالو وشخصيتو ودرك راه طالعلي المورال كنت واثقة من روحي وفي مجاهد وعارفة واش عندي وحبي ليه جامي راح نندم عليه وكل مرة يزيد يقوى ودرك حكاية رمضان فرصة وزادت جاتني طبق من ذهب راح نزيد نشفي غليل ثاري فيه خلي يستاهل كان حاسب مسكين نطلق ونروح معاه نجري طز فيه ولو نطلق من سابع المستحيلات حتا نشوف ليه نظرة وزيد هو كتابو غلقتو من زمان وسبب ليخلاني نسكتلو هاداك نهار غير من حالتي ليكانت غير طبيعية وهو انتهز الفرصة باه يضغط عليا وفي حسابو حاجة خلاف بصح مايعرفش بلي حبي وعشقي لمجاهد أضعاف واش يستخايلو هو وأصلا كون جاني في وقت خلاف أكيد مانسكتلوش بصح خليه درك يعرف الجواب وحدو ويفهم بلي زاد خسر الرهان وماش راح يقدر يخسرلي حياتي ولا علاقتي بمجاهد ومخططاتو يروحو سدى__لغدوا كنت نستنى فالوقت المناسب ونحكي لمجاهد على هاديك ليلة باسكو لبارح ماخلانيش نزيد نذكرو بحتى حاجة من المشاكل _هبطت لقيت رجال ماكانش بصح ختهم لمتزوجة جات مجمعة معاهم سلمت عليا من فوق القلب كما موالفة وقعدت تولهت بلي روفيا ووردة ماكانش وليت رحت لبيت لبنات لقيتهم مع بعض دخلت كيشافتني فرحت _قوليلي كاش خبر على زوهير _شنفت عليها .علاه مقلقة عليه راجل فضحك وشهولك سمعتك وميتة عليه _كون ماجيتش نحبو مانق....._كملي علاه سكتي ولا ماش حابة تهدري قدام روفيا باه ماتوصلش لهدرة لخوك ويعرفو عمايلك _بقيت نهدر معاها رخستها شرشمتها فرغت غشي كلو فيها حتا ناضت ليا تاكل في روحها وحابة توصلني وتضربني وروفيا حاكمتها وتلمو علينا كامل حتا من نسيبهم جاء وسمع كيفاه تهدر وختهم تبهدلت قدامو لبست وراحت معاه وهيا غير تغلي وهوما يسكتو فيها بصح محمود جاء دخل وسمعها كييفاه ديير عطاها طريحة خلي تستاهل من لقفازة الزايدة راح تطير وترخسهم بتفكيرها__ساعة من وراها جاء رمضان بقى مرة على مرة يهز عينيه ليا حاب يعرف واش صرا معايا بصح ماخليتلو حتا فرصة يفهم .ومن وراه جاء مجاهد كيلقاني ماحبش وقالي طلعي عندنا هدرة مع بعض هنا _كيفاه تقولي هكدا علاه انا ماش مني فيكم _كاين هدرة ماش راح تعجبك ماكالاه نسمعيها غير يوجعك قلبك وماعندك ماديري مالا طلعي خير _ماعليش نستحمل _استغفر الله راسك يابس _راح لعندهم وعيطو لوردة قعدت بيناتهم وجابو سيرة زوهير بالعاطل حتا هشام وجبدوه أكيد رمضان ماش راح ينسى عمايل المرحوم وبدا يهدر فيه وفيه وانا بيناتهم حسيت بجمرة في قلبي شاعلة وتحرق وهوما يهدرو عليهم بصح كانو يقولو فالحق انا ماش ضد عايلتي ولا نكرهم ولا ناكرتهم بصح كلشي قالوه كان صحيح وماعندي ماندير مانقدرش ندافع عليهم وهوما لزوج غالطين كي لمرحوم هشام كما زوهير وكل مرة مجاهد يشوف ليا ماكانش عاجبو الحال اني راني نسمع في هدرتهم بصح استحملت وهاديك وردة بقات تقول بلي انا هيا السبة وعلجية تزيد فيها جاتها فرصة لقدامها ويماهم مالقات ماتهدر كبدتها لي هيا وردة وماعرفت توقف معاها ولا تكون ضدها موقفها صعيب .حتا لقينا محمود قال ادا زوهير عاش نزوجوهالو .هنا وردة شافت ليا وحسيت فرحتها ترسمت على وجها _بصح مجاهد قالو لالا موحال نمدوهالو مانديرش لامان اكيد راح يذلها ويهينها وجي يوم ويرجعها لدار مطلقة موحال نوثق فيه نيتو من هاداك العام كانت باينة خبيثة وانا وردة ولو غلطت مانرميهاش ليه راح يمرمدها برك متأكد_ (مع روحي قلت ياريت خويا خمم فيا وخاف عليا هاداك الوقت كما مجاهد يخمم في مصلحة ختو ).
الحلقة 137
بقلم لينا صبرينة
قالو محمود واش نديرو يديها هو على الأقل يسترها ونسكتو الناس نسيت واش هدر وناس سمعوه _بالعكس ادا تزوجها راح نثبثو للناس بلي صح غلطت ومديناها باه يستر عليها ويبقاو يهدرو علينا أنسب حل نمدوها لولد عمنا راه خطبها مني قبيل _قالو رمضان علاه شكون نتا حتا يخطبها منك علاه ماجاش ليا ولا لمحمود حتا يجي عندك ونتا الصغير فينا علاه حنا ماش رجال مانبانوش _شد فمك ليك وهو كيتلاقيتو برك جبدلي الهدرة هادا ادا عمي قبل بختك تكون عروستو وجاء خطبها _بقاو يحكو عليه هدرة تجيب هدرة ومحمود كون صاب يمدوها لزوهير هادا ادا عاش بصح مجاهد رافض ورمضان مأيد مجاهد قال ولد عمهم خير ووردة وجها رجع كحل وأكيد ماش طالبين شور تاعها وجودها بيناتهم غير باه تسمع برك كما وقت انا كنت يقدوني ببيناتهم غير باه نسمع مصير حياتي سبحان الله كيفاه الدنيا تدور وترجع تحطو كامل في نفس الموقف بصح هنا وردة زادت هيا هلكت روحها بروحها __فليل قالي مجاهد بلي سمع انو زوهير فطن بصح حالتو مازالت ماش مستقرة سقسيتو شكون زعما دار فيه هكدا _وين نعلم بصح عندي شك في رمضان خدايمو يقدر يبعت سكارجية يسلكهم ويديرولو رايو اصلا سكري عليا الموضوع ماش حاب نزيد نوجعلك قلبك بكلامي يبقى خوك فالاخير أكيد تتحسسي _ ماعليش ربي يشفيه مام انا مانتمنالوش الموت وربي يهديه __مجاهد نتا ماراكش تخدم واش درت حتا ماراكش تروح _من حكاية كيزدمو علينا الإ.ر.ه.ا.ب والموت وحالتك زدت ديت كونجي مانقدرش نخليك ونروح بصح درك خلاص نفريو مشكل وردة ونروحو مع بعض لمدينة وندو معانا وحدة من لبنات باه ماتبقايش وحدك ومابقاتش سكنة هنا سيفيني نروحو ونعيشو لرواحنا بلا مشاكل ونداويك وتستقر حياتنا تعبت من المشاكل والشكوك والمصايب وحتا لمدينة شوي آمنة خير من هنا كل يوم خايفين يزدمو علينا وهوما يحبو يروحو الدار راهي كاينة يحبو يبقاو كما يحبو المهم انا كينديك راح نكري باه نإيفيتي المشاكل من كل ناحية _ ان شاءالله .سكتنا وحبيت نحكيلو على هاداك الموضوع بصح كما خممت ماقدرتش وليت سكت وقررت هاديك لحكاية نغمها تبقى بيني وبين رمضان واكيد ولو رمضان يحكي مجاهد ماش راح يصدقو ماعندو حتا دليل ولا شاهد مالا علاه ليا المشاكل خلاص نسكت خير بلا مانجيب روحي لبلاء بعد ماتعدلت علاقتنا باسكو كون يسمع بيها أكيد ماش راح يفوتهالي على خيير وانا ماش مستعدة نخسرو ولا يزيد يتزرع الشك في راسو أفضل حل نسكت وهاد المرة واثقة بلي سكوتي مانيش غالطة فيه ولمصلحتنا _ فاتو ليام وعلاقتي بيه عادية مازال متغشش بصح مساعفني عادي وزوهير ستقرت حالتو وخبارو نجيبهم من عند بيت جدي قالولي ليضربوه مايعرفهمش وشاك فالا. ر.ها.ب لمزية ماجدبش مجاهد كنا خايفين يستغل الوضع ويحط فيه التهمة بصح مجاهد شاك رمضان قال أكيد هو مادامو ساكت وراكح يعني شفى غليلو فيه ومحمود ومجاهد مازالو متحلفين فيه بصح كيعاد وصل للموت جبدو رواحهم بصح اكيد يجي نهار ويتحاسب مانضنش يفوتوهالو بساهل و وبابا لعزيز قريب يتزوج بلمرا ليلقاتهالو نجوى وبالنسبة لوردة دايرة حداد لعمرها باسكو عمهم خطبها لوليدو وقبلو بيه مدوها ليه بصح شرطو عليهم يدوها لطبببة وبحضور بنت عمهم باه تتأكد للاسف تهانت كرامتها وكرامتهم وماعندهم مايديرو قبلو بالإهانة هادي غير باه تتزوج وتتستر والناس تسكت وعرسها قالو بعد شهور علجية أكيد حازنة على راجلها وزوهير كيسمع مانعرف كييفاه تكون ردة فعلو .
الحلقة 138
بقلم لينا صبرينة
ورمضان ماهبطت مازدت شفتو أكيد فهم بلي طلاق ليكان يحلم بيه ماكانش منو __وجدت قشي كلو ليندوه معانا للمدينة وختو صغيرة قبلت تروح معانا ولو علجية حاولت تمنعها بصح مجاهد وقف في طريقها وبخص بيها باسكو راه معمر من جيهتها كل مرة تهدر حاجة هو يكلاشيها ومرات حتا يقلل إحترامو معاها _خصتني كابة نلم فيها ليبقى وخلصولي وليت هبطت عند روفيا مدتلي تاعها جيت طالعة خلعني رمضان في وجهي _علاه ماقبلتيش بطلاق من مجاهد علاه هو يهين فيك ونتي قابلة بلحياة هادي ضربك وذلك وهانك وحابة تبقاي معاه _ يووووو مسكين كنت حاب نتزوجك نتا بوووه عليا شحال خرجت حمارة اصبر أصبر ولا نتا لي بهلول زيادة زعما كنت حاب نديك نتا ونتخلى على سيد رجال بصح والله تغيض شفقت عليك كيمديتلك أمل وفالاخير راح على باطل أصلا وينو الأمل ليشفتو منيي وينووو _تتمسخري بيا خالدة انتبهي لكلامك ماكالاه تستفزيني راني نخرجك نتي الخاسرة ماتنسيش كون يسمع بيك وبيا هاديك ليلة يطلقك في دقيقتك وقادر حتا يدير جريمة فيا باسكو شك يسكن مخو فهمتي قصدي الليل وانا ونتي _هنا كلاني توسوسي وليت خليتو وطلعت مالقيت حتا واحد خفت يكون كاش فخ منو وكاش واحد يتسمع علينا .رجعت ليه وقتلو ماتخافش حياتك ماش راح تخلاص على يدو ماش راح نقولو وهاد لحكاية تبقى بيني بينك علابالك علاه .تبسمت ابتسانة عريضة وقتلو غير باه ماترخسش كتر ماراك رخيس وووو ...راك علابالك خلي تبقى في نظري وحدي انسان خاين وغدار وريحة رجلة والاخوة ونخوة مافيكش خير ماترجع في نظر الجميع انسان بلا أخلاق وبصحتك من عندي طحن الخواطر كما نتا موالف تغلغل ثارك فيا انا تاني شفيت غليلي وخليتك اضحوكة لنفسك ولنفسي .كون جيت راجل تجيني وانا في وعيي وتقولي هاداك لكلام فالشمبرة ماش حتا نكون داخلة عقاي باه تستعطف مشاعري بصح هكداك ونسيت بلي راك تحكي مع خالدة تطيح وتتسكر بصح تنوض وتتقوى وتنفض الغبار من عليها لي كما نتا _كان يسمعلي ووجهو حمر راح يكلاكي وصح خفت من ردة فعلو _خالدة كلامك هادا لي قلتيهولي يجي نهار ماش تندمي عليه تندمي عليا أنا _حشومة عليك أخلاقك وكرامتك راهي تتكركر فالأرض سكتنا وانساني نتا _طلعت لدار وغلقت الباب مليح ورجعت أنفاسي صح القدر طيحتو معاه ماكانش يلزم نهدر هكدا وبالغت بزاف في استفزازي ليه بصح كان يلزم نبرد غشي فيه مانقدرش نسكت كتر يكفي اني سكتلو كل هاد سنين واحترمتو وهو مايستاهلش __موراها بساعة هبطت عند ختو وصيتها واش تهز معاها كيخرجت للحوش لقيت مجاهد دخل قالي جابك ربي عطشت جيبيلي كاس ماء نشف ريقي من لمشي فالشمس .هو دخل عند يماه وختو وانا رحت للكوزينة صبيت كاس ماء وجيت راجعة لقيت رمضان ورايا ديراكت قالي مالا ماش راح تجبدي حكاية هاديك ليلة بلي من خوفك خرجتي من الدار وانا لقيتك ورجعتك _أنعم واش تقول واش من ليلة علاه أنا وقتاه خرجت ونتا رجعتني ؟؟ _بركاي من تمهبيل _سيريو نتا لي بركا ماتطعن فيا وتتهم فيا في امور انا مادرتهمش اخطي حياتي ياسيدي حاب بسيف تخلقلي أمور ماكانش منها وماصراوش _بعدت منو وجيت نخرج من الكوزينة لقيت مجاهد يتصنت وحاط يديه وراء ظهرو بلعت ريقي من الخوف ولمزية خدمت عقلي وشكيت من كلامو بلي حاب يطيحني فالفخ _مديتلو الكاس حطمو وقتلو مجاهد شوف مع خوك يخطينا ويبركا من يخلقنا فالمشاكل ويقدف فيا ادا كاش نهار شكيت الموس في كاش واحد من الضغط لتم واحد مايلومني _نطق رمضان من ورايا .مجاهد تعرف لفعى ليتلسع وتتلوى وتهرب هاديك هيا مرتك بكلامها هادا والخبث _ديراكت مجاهد حكمني من كتفي بعدني من قدامو خرجن للحوش ورمى الكاس تسكر عليه جاء في صدرو و وهجمو على بعضهم يعنيي وصلو للحد الأقصى من قلة الإحترام مجاهد ماحترمش رمضان ليكبر منو فلعمر ورمضان ماحترمش مرت خوه قدامو بتشبيهي لفعى .تمنيت الخاوة مايتقابضو مايتشابكو بصح رمضان هو جنى على روحو وحتا مجاهد تصرفو هادا ليجاء يتصنت ماعجبنيش يعني ثقتو فيا صح تزعزعت لمزية عرفت نتصرف __انا حلفتلي خالتي نطلع مانبقاش لتحت بقيت نستنى وخافة رمضان يقنعو بكلامو حتا طلع مجاهد ينهج غلق الباب وتكى عليها وهو حالتو مشنشفة وبقى يشوف ليا وعينيه خارجين يخوفو _خالدة راكي..... مريضة تغفرلك الدولة ومسامحة من عندي برك المرة الجاية يزيد يقاطع طريقك شكيه بموس تبريت منو خلاص ق.ت.ل.يه هنينا من رخسو _ياوخدي حسباتلي راح يقولي راكي مطلقة قريب ماحبس قلبي بصح ياريت قصتنا انتهت في هادي النقطة لأنو خروجنا من هادي الدار بفضيحة عظيمة ومرهقة للقدر .
الحلقة 139
#بقلمLina_sabrina
بدل قشو وداويتلو الجرح لي في وجهو وهو يسب فيه وانا تاني حاسبتو كيفاه كان يتصنت عليه وهو معايا وقالي بلي هو لاحلو هدرة خلاه يلحقو الشيطان وسوسو .أكيد غاضتني وخديت موقف منو وحس بيا وحاول يصلح الغلطة تاعو حتا لسهرة وهو باقي يحاول فيا وأكيد ماعطانيش قلبي نبقى قالبة وجهي عليه ضميري راه يأنب فيا وماخلانيش نعاملو بهادي الطريقة وانا عارفة روحي غالطة بصح من غير باه مانخربش علاقتي مع مجاهد محتمة نكون واقعية __ليلة هاديك كانت كاين حركة غريبة برا والكل خايف ولو الأمن راه يدور بزاف بصح كاين خوف وعلى حساب مجاهد كيتصل بواحد يعرفو قالو بلي وصلتهم هدرة انو ليلة ممكن الإ.ر.ه.ا.ب يزدمو على الدوار هكدا وصلتهم معلومة _كيسمعنا هاد لخبر لبسنا وهبطنا لتحت معاهم كنا مجموعين مع بعض كامل باه ادا صرات كاش حاجة تكونو واجدين .وواحد ماكان لاتي لا بالعداوة لا والو من غير الخوف والتوتر مسيطر علينا _دقايق برك والتريسيتي راح هنا فهمنا بلي صح الخبر صحيح وركبنا في مخنا جميع السينياروهات ليقادرة تصرا يانخسرو أرواحنا ولا أحبابنا .ديراكت داونا تخبينا في نفس لبلاصة فالكوري وانا غير نحاول في مجاهد وهو يديرلي فالكوراج كانو لحظات بزااف صعاب مرينا عليهم كل مرة نحس بلي آخر مرة نزيد نشوف فيها مجاهد .بقينا كتر من ساعة متخبيين وصوات برا تاع لعياط ورصاص بدا وكلشي يتخبط بعضو بصح ماش قاوي كما مرة لولة ونسمعو فيه شوي بعيد وانا حالتي بزاف كانت صعيبة حاكمة في روفيا وفي ولادها ونرجفو ونستغفرو ونشهدو وخالتي وعلجية ولبنات نفس حالتنا طولنا وحنا لتم مدفونين حيين ونرجفو ونعرقو ونبردو وميتين والعين مفتوحة حتا سمعنا لجري فلجنان هنا كل واحد يسأل في روحو شكون جاء والحمدلله سمعنا صواتهم هوما هزو علينا هاداك القرط والشجر لمقطع لغطاونا بيه لقينا غيير رمضان ومحمود قالونا هيا طلعو_وانتبهنا علجية متغاشية هوما بقاو معاها يفطنو فيها وانا واقفة بفشلة وعيني تحوس على مجاهد هبلت في تخمامي وخممت غير فالسلبيات رجعت نقوولهم وينو وين راح واش صاري فيه علاه ماهوش معاكم _قالي رمضان عظم الله أجرك _واشش تهدر شكون مات ماتقوليش هو راني نجهل غير هادي ماتقولهاليش كيفاه يموووت _نطقق محمود بعيد الشر وشبيكم تفاولو عليه .مجاهد طلع يبدل قشو برك _كمل قولها علاه يبدل قشو ظهر ماش راجل _اسكوووت بركانا مشاكل وروح جيب لماء لنانا باه تفطن مليح_كيريحني محمود وليت تهدنت وحمدت ربي وفرحت وقالونا بلي الحالة مليحة درك برا وماقربوش الا.ر.ه.ا.ب منين نسكنو بعاد شوي والأمن قدر يسيطر عليهم فاتت على خير برك ناس خايفة وزادت عليها بزاف هوما ليهلكو رواحهم في عوض مايتخباو ويسكتو مانعرف علاه يتعايطو في باطل_ رحنا دخلنا لدار لقينا تريسيتي جاء وانا جريت لفوق لداري دخلت لقيتو كما خرج من الدوش _راك مليح واش صاري علاه ماجيتش عندي _حمدلله بخير ماكاين والو برك قشي توسخ كيكنا فالكوري وطليت روحي وشعري جيت دوشت و بدلت ماحملتش روحي ومانقدرش نقابلكم هكدا _قرب ليا .خالدة ونتي مليحة شوفي راكي تعرقي _راك علابالك المهم حمدلله جازت على خير _راح لبس وانا دخلت شربت الماء ورجعت أنفاسي وحمدت ربي وشكرتو كيفاتت عل خير وكملت ليلة لاصقة فيه وهو ثاني ماقدرش يرقد ليل وهو يعس فيا قالي ضليتي تشوفي غير فالكوابيس وتهترفي وحدك __لغدوا كملت لميت كلشي بقى باه نروحو .حتا لقيت لباب طبطبو رحت فتحت لقيتها ختو قاتلي زوهير راه لتحت ويعيط _اااو كييفاه ماسمعتوش _لبست عليا وهبطت لقيتو مقلب دنيا بعياطو قدام الباب وماحبوش يفتحولو هادا راه مريض كيفاه قادر يعيط هكدا ويقول فتحولي نهدر مع ختي ليمخبينها علينا واش درتولها .
الحلقة 140
بقلم لينا صبرينة
بقينا هكداك حتا جاو مجاهد ومحمود دخلوه معاهم وكان راسو بلفاصمة ووجهو زرق باين فيه ضرب وقالولو هايليك ختك درك وين بانتلك تسقسي عليها ولا مازلت حاب تفضحنا ياك ؟عارفين نيتك علاه جيت وباين حاب تموت باه تتهنى ونتهناو _مجاهد تعيش خليني نهدر معاه ودرك يروح ونتا زوهير راك مريض حالتك حالة روح لدار ماتجنيش على روحك _بعدي مني انا مانخافش ونتوما قولولي علاه تمدو في وردة لوليد عمكم ياك قلتكم ادا ماتزوجتهاش انا ماراحش تكون لغيري _ديراكت خبطو محمود وقالو تزيد تنطق اسمها نجيب موس ون.د.ب.ح.ك بلا شفقة ولا رحمة _قلتلكم وردة تاااعي وغير انا لينديها ماتفهموش وردة تااااعي _غمولو فمو وانا نحاول فيه يحبس بصح ماحبش يركح ومجاهد ضربو ومحمود ماخلاش فيه ورمضان كيزاد دخل كمل عليه وانا طلعت جريا لدار عيطت لدار جدي يجو باه هوما يدوه _عاودت هبطت لقيت عمهم وولادو جاو بصح خطيب وردة ماكانش واشتباكات كلامية بيناتهم كامل .حتا وردة خرجوها كانت بيناتهم وعمهم يستجوب فيها على حساب مافهمت زوهير كاش ماهدر فيها وهيا المصيبة مازالت تقول ايه بلي هيا وزوهير كانو متصاحبين وتقولهم ماش حتبة تتزوج ولد عمها .مافهمتكش كيفاه تخمم هادي المخلوقة حتا عمها وضربها ومحمود ماحبش عليها قالو ماعندكش حق تضربها وزوهير رجع يسب بالمقلوب وشوي وجاء جدي بقى عقابو باه يديه ماحبش ومازال يجبد في إسم وردة وهيا شفتها غير تشوف ليه ويماها معاه وهوما يجرو فيه باه يخرجوه دخل خطيب وردة منارفي وديراكت طاح فيه ضرب اكيد واحد مايحمل يهدرلو على مرتو والتالية خلاص كيكان زوهير فالارض حكمو من تريكو وجرو حتا لبرا هنا زوهير ظهرو باين تسلخت كامل .كيوصل لباب الدار حكم فيها ونوضو جدي قالهم خلاص انا نديه بصح في رمشة عين زوهير كيوقف جبد من جيبو موس ودخلو فيه في كرش خطيب وردة عيطنا فرد عيطة من الخلعة هاداك طاح بدمو والكل مشوكي .ورجال الجييران تجمعو قدام الباب و ولبنات يتعايطو ووردة تعيط من نص راسها هبلت وحكمو زهير ماخلاوهش يهرب وانا غير نتفرج ونرجف تصمرت في بلاصتي شوك حكمني كييفاه خويا رجع ق.تا.ل وزيد جريمة قدام عيني .روفيا تولهت جات لعندي حاولت معايا وانا غير نشوف معاهم شوي وجاو الأمن ولامبيلونس وقامو بخدمتهم وقبل لا يخرجو زوهير دور ليا وقالي خالدة سامحيني ماقدرتش مانخلفش ثاري كانت من الاول باينة ماش راح تخلاص على خير ماقدرتش ننسى كيفاه لعبو بشرفنا وعرضنا _ماقدرتش نجاوبو وداوه الجدارمية وراحو وخلاو الحوش غارق بدم ضحية ليما عندو ذنب في ثارنا برك جاه في طريقه وخلاونا في شوك متلبسنا كامل. كنت نسمع في كل واحد واش يهدر .دخلوني للبيت يقراولي قالقرآن ويرشو عليا فالماء بسيف استوعبت ورجعت نبكي ونتحسر واش صرا في عايلتنا كلها تلاشت وتفرقت وعار كبير بقى فالنص وملاحقنا طول حياتنا وانا في هاديك الحالة ووردة ماش اقل مني هيا ضغط كبير دارتو لروحها حزنت على زوهير غير اسمو على لسانها تقول هادا ساحرها خويا مافهمتش كيفاه عشقتو لهادي الدرجة لكبيرة سيقت الأرض وهيا تتمرغ فيها وتندب على زهرها وزادتلها عجوزتها جات وبقات تحاسب وتلوم فيها على وليدها وهدرت فيعا العاطل والناس برا مرة على مرة واحد يطبطب وعلجية تسوغ وتحاوز فيهم تبهديلة كببيرة صرات وليدارها زوهير ووردة ليخلات كرامتهم تتكركر فالارض وأمور بزااف صراو في ظرف ساعة وحدة والهدرة قليلة في حق الأحداث والمشاعر ليصرات مع بعض .كيرجع مجاهد جاء عندي ديراكت خرجهم وبقى معايا وحدو حضني ويصبر فيا وانا حالتي حالة كان حاس بيا وفاهم شعوري وهو يحسنلي في حوالي ويصبر فيا _وانا معاه سمعنا خالتي تعيط وتبكي في عياط غير طببيعي.
الحلقة 141
بقلم لينا صبرينة
خرج يجري وانا تبعت لقيناهم في بيت لبنات ومجمعين على وردة ليكانت فالأرض متغاشيا قالو بلي لحقو بيها شربت دواء بزاف حبت ت.ن.ت.حر .دييراكت بزربة خرجوها وداوها لسبيطار على أمل أنو يلحقوها والناس فهمت ومشات الهدرة وحتا زادو فيها وتفضحنا في وسط الدوار وبابا جاء يلوم فينا على زوهير وانا ماخرجتش عندو مجاهد ليهدر معاه ودرطبر راسو _قبل المغرب دخل محمود وجاب معاه وردة كانت لاباس عليها حمدلله فاتت على خير بصح وجها صفر قارص رماها في بلاصتها وماش حامل حتا ييشوف ليها وبقات خالتي معاها ماصدقت بنتها رجعتلها حية واكيد رمضان كان حاب يدخل ليها ماخلاوهش عارفينو قادر ي.ق.تلها نورمال بقى غير متحلف فيها وقالها بهدلتينا وزيد تق.تلي في روحك معفونة ديقولاص ياريتك كون موتي ودفناك وتهنينا من عارك(نفس سيناريو تاعي ليدارهولي هو راه يتعاود في وردة وزوهير وصل لمبتغاه بصح بخسائر كبيييرة ) _رمضان كان اكثر واحد عصبي يعرف غير يهاجم ومجاهد ومحمود متحكمين في أعصابهم لدرجة كبيرة وبالنسبة لخطيب وردة لحقوه على شعرة دارولو عملية وحالتو استقرت بصح زوهير باين يتحبس لعوام راه شكى بيه واكيد يتعاقب مافيهاش هدرة .رحت عند وردة حمدتلها على سلامتها وقتلها هادا واش حبيتي واش قتلك من الاول قتلك بلي زوهير يكدب وماتامنيهش شوفي تبهديلة ليدارهالك والحالة ليوصلك ليها ودرك فهمتي نيتو _ماعليهش اللوم عليا انا انا ليحبيتو وصدقتو وعلى كل حال كون يرجع بيا زمان وتعاود تصرالي نقبل نتزوجو المهم تطفى الجمرة ليفيا عليه المهم نكون معاه ياولوكان ليلة وحدة _سمعها مجاهد دخل ليها كان راح يضربها لولا يماه لحقت بيه و منعتو وهيا ربي يهديها مافهمش كيفاه راهي تخمم الحب صح أعمى وكما يقولو ومن الحب ماقتل ودرك راهي خاسرة من كل جيهة _طلعت لدار وكلشي فيا مكسور وضني خايب خسرت عايلتي كلها مابقالي من غير أب ومتبري مني من زهري .دخلت لدار وحطيت راسي على صدرو بكيت بكية تشق لقلوب وتهد لجبال باسكو صايي نضرييت بزاف كلشي ماش مليح ملاحقني وأي حاجة تتعلق بيا تهدمني_ ليل طول وانا مع مجاهد نحاول نفرغ في قلبي ونحكيلو في مشاعري وخوفي وكلشي عشتو ليووم لعلى وعسى نريح داخليا ونفسيا من الحطام ليعاشة فيه بصح دمعتي كانت غالية ومجاهد ماحلمش يشوفني مكسورة هكداك شفقتو عليا كانت واضحة بصح ربي كتبلي نعيش هادي الاوجاع والحمدلله على كل حال كاين ليراه كتر مني ويبقاو للبيوت أسرار __لغدوا جاو دار عمو قالو بلي وليدهم مازال قد كلامو وحاب وردة وراح يسترها حمدلله فاتت غلى خيير بصح باينة راح يشبعوها تمرميد من كلامهم الواضح بصح عمهم بخصهم خلاهم مايقدروش يطلعو راسهم من حشمتهم ومن غير علجية ليراهي تسير فالأمور وتهدن فيهم ودرك مستقبل وردة مشكوك في أمرو ياتعيش تعيسة ياإما هادا الراجل يرجعها لطريق صحيح ويكون معاها ناضح ويغيرلها حياتها للأحسن. حتا الناس برا راهي تهدر فينا أشكال وألوان كانت باينة .ومجاهد طللب منهم يهزو قشهم ويروحو كامل لمدينة بصح علجية عند كلمتها تبقى هنا بين ولادها وفي دارها .وحنا هكداك رمضان خرج من شمبرتو في يدو فاليزة قرب ليماه ولناناه سلم عليهم وخدا دعاوي الخير وقالهم وردة متبري منها ماراهي ختي ماراني خوها يكفي تبهدايل ليعشتهملي رجعت راسي مانهزوش مع ناس بسبابها بهدلتنا ورخستنا المهم راني رايح مانقدرش نبقى هنا كتر من هكدا نروح ومنين نطلق راح نروح للخارج وندي معايا مرتي.كيسقساوه شكون مرتو قالهم ماتعرفوهاش بصح كون تجو لمدينة تعرفوها أصلا يكفي طول هادي المدة وانا بعيد عليها _شاف مع مجاهد وقال بصحتكم تبهدايل وانا مابقاليش نزيد نجي هنا نفسي عزيزة وراح يجي يوم وتندمو عليا .
الحلقة 142
بقلم لينا صبرينة
كيقال هكدا فهمو راه يوصل فالميساج .ودعهم كامل من غير مجاهد ماحبش يطلع راسو ليه .راح وحنا بتنا هاديك ليلة ولغدوا مجاهد هبط عند وردة ساعة وهو معاها يهدر ومبعد طلع هزينا قشنا ولبسنا وزاد حاولهم لتحت بسيف يماه قبلت بصح قالت راح تلحق هيا ولبنات مع محمود ماهانش عليها وليدها تخليه هنا وتروح باسكو محمود كل خدمتو ورزقو فالدواو وعلجية بقات قالبة خليقتها .ودعناهم وخرجنا رحنا لدار جدي ماقدرتش نروح بلا مانودعهم .قالولي بلي خالتي حورية خطبوها وهيا قبلت وعرفت بلي راجل من فاميلة عمتي .استغربت كيفاه حتا قبلت باسكو من قبل كانت رافضة فكرة زواج مرة ثانية بصح هيا قاتلي بلي باباها ماش راح يدوملها وعلى كل حال هادا مكتوب ري حاولتني باه نجي لعرسها قلتلها بإذن الله وبقيتهم على خير ومع جدي يوصيي في مجاهد ويعاود عليا _ديمارينا وتوكلنا على ربي والحمدلله وصلنا على خير ومجاهد كان ديجا متصل بصاحبو يشوفلو دار من قبل وكما كان الحال رحنا ليها وكانت مافيها والو من غير مصارح جدد .وهادوك ليام سوفرينا غير بلقليل وختو ماكانش عاحبها الحال نهائيا كون صابت راهي راحت لدار ليفيها رمضان ومجاهد شهريتو كانت قيس قيس وزيد لكرا دفع لملاين ماكانش عندو باه يعمرها حاولتو باه يهز حاجة من دهبي يبيعها ويعمر الدار باه ختو تركح معانا ماحبش وراح سلف من عند صحابو وتكل على روحو وعمر الدار وفرلنا كلش وعشنا في نعمة ربي سبحانو .
____بعد سنة الألفين 2000
فات على زواحي بمجاهد 5سنين الله يبارك عشنا فيهم لحلوة والمرة مع بعض تحدينا كل الظروف والصعوبات وبقينا متمسكين ببعض وريح ماضر علاقتنا .عايشين في نفس الدار ليكراها قبل عامين من جينا هنا وختو معانا مرة هيا مرة وحدة من خواتاتها ولا يماهم باسكو محمود ويماه وروفيا وولادهم ولبنات الكل جاو لمدينة يسكنو في سكنة جديدة لانو محمود باع أرضو ليكان راح يبني فيها فالدوار وشرا بيها دار توسعهم كامل وعلجية بقات فالدوار رفضت رفضا قاطعا انها تسمح في دارها بصح عايشة معاها وردة وراجلها لي هو ولد عمها سكنتهم معاها باه ماتبقاش وحدها لانو بعد عرس وردة محمود هز العايلة وجاء استقر هنا كما تفاهمو من قبل وانا مرة على مرة تجي عندي وحدة من لبنات ولا يماهم ونهار ليكون مجاهد فدار مايكونوش هو يدي وهو يجيب ومرات يتفاهم مع محمود ورمضان من نهار طلق مع خديحة هز مرتو ليواحد مايعرفها وراحو للخارج ومجاهد ماعندوش اتصال معاه نهائيا قاطعو وبالنسبة لخويا زوهير حكمو عليه سنين حبس وللاسف يلزم يتعاقب على فعايلو وبابا تزوح هاداك العام ومرتو مابقاش وتولد ولو جابها كبيرة بصح ضنات وماعنديش اتصال معاه ونجوى راهي عايشة مع راجلها في نفس لمدينة ليعايشين حنا فيها سمعت من مرت خالي قاتلي بلي بقات موراه تضغط عليه حتا قبل يجيبها لهادي لمدينة باسكو متوفر فيها كلش عكس مدينة دوارنا وحنا تلاقيناها غير مرتين صدفة بصح واحد ماهدر مع خوه ومع هادو العامين حبيت ندير كاش حرفة ولا حاجة نلهي بيها روحي بصح ماخلانيش حتا باه نخرج ممنوع يلزم معاه ولا ماكانش مرات مجاهد نشك فيه انو عندو عقدة انو خايف كون نخرج وحدي ونكتشف الدنيا نتبدل عليه ولا نهربلو المهم متأكدة انو حاط في راسو هادي الفكرة بصح اما عكس تفكيرو مي ماخلانيش حتا خواتاتو ومانع عليهم ومحمود فالاول قال عادي يقراو بصح بعد ماضغط عليه وعمرلو راسو رجع يقول مجاهد عندو حق مايخرجوش حتا ربي يجيبلهم مكتوب واصلا غير وحدة مخطوبة وقريب عرسها .
الحلقة 143
بقلم لينا صبرينة
مرات نحس روحي محبوسة بين ربع حيوط مرات نحمد ربي المهم حاجة ماتخصني __وليوم راني في شط لبحر مع مجاهد وحدنا كما وعدني نهار مايخدمش يحوس بيا ويعوضني _مجاهد عينيك وين راحو _هههه غيارة راني معاك مانيش نشوف ليهم خلاص _ممم أمنتك شفتك عينك زغدت _واش حبيتيني نديير وين نحط عيني نشوف لعرى نتي حبيتي تجي لهادي لبلاصة ماحبيتش نخليها في خاطرك _ايه كيكنت نشوفها فلاثيلي نسخف عليها وحلمي نكون في وسط هادي لبلاصة تسخف كلشي فيها متطور واي حاجة تشتهيها تلقاها _عارف وهاد ليام رجعتي تتواحمي على هاد لبلاصة وأكيد مانخليهاش في قلبك وتمرضيلي وزيد نتي هيا الحب وهادو لبنات ولعرى مايغرنيش كمشة وماش راح يبدلوني عليك راح نبقى نحبك ليوم وغدوا ونعشقك بثانية ودقيقة وساعة غير كونك متهمية غير نتي ليماتتبدليش بكنوز الدنيا ومجبورة حتا نتي تحبينث وتعشقيني وماتنسيش دلالك الحلو ورقصك ليدوب هادو كامل بلا قلبك الطيب عليها قتلك راح نبقى نحبك ونعشقك لنهار نموت _تبسمت في وسط كلامو الزين وفراشات كانت ترقص في عينيا .ربي يخليك ليا انشاءالله _آمين ونتوما ربي يحفظكم ليا _حط يدو على كرشي وتبسم وانا حاليا راني بالحمل غير شهرين ربي يكملي وطول العامين ليقبل ربي ماكتبليش حتا لدرك .وبإذن الله تكون ثمرة حبنا .حنا طول هادو العامين علاقتنا ماشاءالله مرات نتناشعو من بعض ونغضبو ونتخاصمو بصح سرعان مانتصالحو ومرات على قد ماعلاقتنا مليحة ونصنفها في المستوى العالي نخاف انو يجي نهار ويتهدم واش بنيناه الله غالب عليا عندي هادي الافكار السلبية لانو مرضي نوبة الهلع مازالت حاكمة فيا ومستمرة ولو راني نتعالج بصح نخاف ونتخلع ونتسوس ونتوهم __وحد نهار وانا فدار مع ختو لقيت الباب يطبطب رحت قلت شكون قاتلي أنا فتحي. عرفت صوتها بصح كدبت _شكون نتي _نجوى ختك افتحيلي _تشوكيت و فتحت الباب لقيتها هيا وراجلها لزهر هادو واش جابهم لعندي قدمت سلمت عليا وتسقسي فيا على أحوالي وأنا نجاوب فيها ومستغربة ودورت ليه و قاتلو شفت قتلك راهي دار ختي خالدة نتا ماكنتش حاب تصدقني ودرك روح ماش حابة نشوفك حاليا _قالها باسكو عمرك ماخممتي تجي عند ختك وكما نعرف تكرهيها عليها كدبتك وحبيت نتأكد برك ومادام هادي دار ختك مالا راكي مطلقة _لزهر تطلق فيااا وشبييييك ؟_ ومليون مرة باسكو اكدتيلي شكوكي اتهناي بفراقي والهدرة مع باباك _راح وخلاها في صدمة وانا في حيرة من كل جيهة هادا علاه طلقها وخلاهالي عندي واش هيا النية والمبتغى من الشيئ ليشفتو وسمعتو قدامي ومجاهد واش يدير كيشوفها عندي واش لبلاء ليجاني درك .
الحلقة 144
#بقلمLina_sabrina
غلقت الباب ودورت ليها .نتي واش جابك عندي علاه جيتو وزيد طلقك وراح واش صاري _علاه انا علابالي مادريتوش يطلقني مادرتلهاش حساب _بصح نتي علاه جيتي عندي قوليلي علاه ؟_تقابضنا انا وياه وهدرة تجيييب هدرة حتى لقيتو قالي ماعجبتكش عيشتي االه يسهل عليك وانا من الغش وكيغاضتني منو رحت لبست لقيتو لحقني ويطلب فسماح بصح ماسمعتلوش وكيخرجت مالقيت بيها وين_لدرجة جيتي لعندي زعما نتي كامل ماعندكش معارف _ايه ماعنديش معارف هنا ماخلانيش نتعارف على الناس من قبل .هو حاصرني بالقواعد والأوامر تاعو نخرج نقضي ونرجع لدار لا نحكي مع حد ولا ندير صحبة مع ااناس ولا مع الجيران عندو عقلية تاع انسان معقد وقاسي ودرك انا مانعرف حتا دار نلجأ ليها عليها جيت عندك وقبيل كيجيت طالعة لعندك لقيتو ورايا ويديرلي في تحقيق قالي واش ديري هنا وعند من جيتي وانا قتلو بلي نتي وماصدقنيش وطلع معايا وصدمني كيطلقني والله من قبيل برك وانا معاه وهو يطلب فسماح ونادم على واش قال ودرك تحول مافهمتش كما سمعتي نتي انا تشوكيت منو _بصح نحوس نعرف حاجة نتي من وين تعرفي داري ؟_بنات خالتي ياك موالفين يجوك هوما موالفة كينهدر معاهم قالولي وين تسكني اكزاكت بلي ماش بعيدة عليا بزاف _اوك درك فهميني علاه جاية عندي انا واش نديرلك راح نستقبلك بالعكس راح نرفضك نتي آخر وحدة نخمم ندخلها لداري روحي تبعي راجلك وأتسامحو _خالدة يعيشك انساي الماضي وعداوتنا وشوفي لحالتي ماعنديش بلاصة نروحلها وهو حاوزني وزيد طلقني مستحيل نروح وراه باه نحاولو ونطلب سماح ونذل روحي وهو أصلا ماش راح يدخلني لدار اتفهمي حالتي وخليني نعيط لبابا نحكيلو واش دارلي قبل لا مايسبقني و يعيطلو هو تعيشي خليني نهدر معاه ومبعد نهدرو _هززت براسي اوك __هيا كانت ماش حافظة نيميرو وليت ساع عيطت لدار جدي مدولي نيميرو تاع بابا باسكو رجع عندو الفيكس مرتو عصرتو.القصة كاملة موحودة في صفحة قصص لينا صبرينة.خليتها تحاول تحكم فيه باسكو ريزو ماكانش بلاصتنا فالدوار شوي بعيدة .واخت مجاهد بقات تسقسي وتستفسر ماش فاهمة وغايضتها نجوى كيطلقها _يسيف حكمتو وهدرت معاه سمعتها تشكي وتبكي وفالاخير قاتلو ايه خلاص نجرب وادا مانفعتش نعاود نتصل بيك ونجيك لدار _ماطولتش وكوبات وانا ماحولتش نفهم قلتها ياك صايي كملتي روحي مالا _اااه منك بصح تخرجي و تحاوزي فيا وين نروح نتي ماش متفهمة حالتي صعيبة _كلامك مايهمنيش تهزي روحك وتروحي _وشبيكي لا تكوني مازلتي خايفة مني على جال راجلك .لهاد درجة ماش دايرة ثقة فيه وفي روحك _ياربي نتي ماتفهميش انا حابة هكدا ماتسالينيش ومايهمكش في واش نفكر المهم مانحبكش تبقاي في داري و مابتبقايش معايا اصلا كيدخلتك لدار راني درت فيك مزية كبيرة ودرك خلاص وادا ماعندكش باه تركبي الكار وتروحي لدوار نمدلك دراهم وروحي _نروح وحدي هبلتي _ياك هدرتي مع بابا ليقالك عليه ديريه بعيد مني انا ماتبقايش عندي ماتسالينيش _نطقت ختو قالتي علاه تحاوزي فيها خليها وحليلها مشكلتها حرام عليك _ماجوبتهاش ونجوى قاتلي خالدة يهديك ربي انا وين نروح مانعرف حد وموحال نفواياجي لزوح اسباب الوقت ماكفيش وزيد مانعرفش وحدي حسي بيا ولو تكرهيني وكلشي بصح حاولي تتفهمي حالتي وكون تصرالي كاش حاجة ماش مليحة يبقى ضميرك مأنبك طول عمرك ماتتسرعيش _استغفر الله مالا روحي لدار محمود بقاي معاهم ونفكو المشكل تاعك المهم ماتبقايش معايا هنا _ترمي فيا للناس تاني ؟؟_درك يجي مجاهد ونوصلوك عندهم _خالدة زيدي خمي وحطي روحك في بلاصتي _مانحطش باسكو مانوصلش روحي ندير العفسة ليدرتيها باسكو تخمامك ودلالك وثقتك الزايدة في روحك وغرورك ليوصلك لهادي النقطة نتي مادرتيش حساب ليها بصح طلاقك جاك على غفلة وبدون سابق إنذار باسكو نتي حاطة روحك حاجة كبيرة زعما ديري رايك ومهما يكون مستحيل يسمحو فيك شوفي نتيجة مالا بعينك . تشفاي نهار قلتي عليا بلي راح نرجع بدار بابا مطلقة بصح القدر ليه كلام خلاف ومعكوس تباني نتي ليترجعي مطلقة للاسف الدنيا دوارة وماتدري منين تجيك الصفعة وتغفلك _تستشفاي فيا خالدة !!!_ مالا ادا مازالت عندك شوي كرامة خمي بعقلك_خليتها مع ختو ورحت للشمبرة قعدت فيها كتر من ساعة وانا نخمم فالمصيبة ليجاتني حتا سمعت لباب تفتح باين مجاهد خرجت ليه عرفني من وجهي مانيش مليحة وكاينة حاجة .
الحلقة 145
بقلم لينا صبرينة
راح نقولك حاجة ماش راح تعجب _خير وشبيك وراني نسمع فالهدرة لداخل شكون كاين هنا ؟_دخلتو للشمبرة قبل كلشي وحكيتلو كلش تاع كلش ماعجبوش الحال وتبدل وجهو وديراكت ناض راح ليها دخل كيشافتو ناضت وهو لاسلام لا كلام قالها هيا نوصلوك عند راجلك _هيا بقات رافضة بصح كيقالها يانوصلك عند راجلك ونحاول نفرزها بيناتكم بالحسنى ياتخرجي من داري وشوفي بلاصة تباتي فيها _حتا نتا كيفها ماش قابلني معاكم علاه انا جيت عند البرانية ياك عند ختي وراجلها وشبيكم مكبرين الموضوع وماحبيتوش تتخطاو الماضي وتوقفو معايا _ماحبش يجاوبها وقالنا راني لتحت نستنا فيكم_كيهبط ختو دهشت فيه وقالت عيب عليكم .لبست وهبطنا في ثلاثة ركبنا سقساها على لادراس جاوبتو و ديمارا وصلنا ختو ساع لدارهم ومبعد كملنا لدار راجلها لقيناه ماكانش ستنينا شوي حتا عيطولو وجاء هو خرج عندو ونجوى ورايا حرف مانطقتوش _شفتو يهدر معاه وطولو فالهدرة ومبعد جاو لزوج فتحلها لزهر لباب وقالها هيا هبطي .هيا هبطت وبقات تشوف ليا وهو قال لمجاهد بارك الله فيكم ومشاكلنا نفروهم وحدنا بلعقل لزوج كنا متسرعين وبربي منا وجاي مايكون غير لخير_المهم راني رجعتها ليك وان شاءالله نكون حاولت نصلح بيناتكم سوء التفاهم _ركب وديمارا سقسيتو واش مشكلتهم وكيفاه قبلها مافهمتش _نفس الهدرة ليقاتلهالك بصح كدبت في حاجة انو خرجت من الدار بلا ماتشاورو وهو شافها كيخرجت من لبلوك لحقها لقاها جات عندك يعني قالي بلي دايما تحب دير رايها وماتسمعش لكلامو وتحب تستصغرو وليوم فاض لكاس _مجاهد يبانلي ماهوش سبب مقنع باه يطلقها وهو قال كلمة بلي تأكد من شكوكو واش قصدو _مانعرف ليقالهولي قلتهولك درك مانعمروش راسنا بيها نكملو حياتنا كيف بكري كيف ليوم انا ليعليا درتو صراحة مانحبهاش تبقى معاك ولا تحاول تزيد تتقرب منك ربي يسهل عليها بعيد علينا _طول طريق وانا نخمم ونهدر مع روحي زعما مايكونش لزهر يعرف بلي نجوى بكري كانت مجاهد مصاحبتو عليها كيلقاها جات عندي ماعجبوش الحال بصح كيفاه يعرف بلي كانو مع بعض موحال هيا تخبرو مانعرف تشوشوت في أفكاري _طلعت الاولى لدار لقيت ثلفون يصوني رحت هزيت سمعت صوت بابا وليت زربت كوبيت وبقى يعاود ماحبيتش نرد ماش حابة نسمع صوتو ومازلت لحد اليوم وجهو وكلامو وقسوتو عليا ماراحتش من بالي _دخل مجاهد لدار _علاه ماهزيتيش على ثلفون راه يصوني _هز عليه نتا راه بابا هادا _تفهمني وهز عليه هدر معاه كيكوبا قالي سقسى على نجوى برك _تبسمت بإستهزاء أكيد ماعيطليش ليا باه يقسي على بنتو ماعليش ربي يسهل عليه تصرفاتو رجعت ماتهمنيش__ فليل وحنا نتعشاو صونا ثلفون راه هز لقاه بابا راه يقول عندو ساعات وهو يعيط لنجوى فالاول رد راجلها وفيساع كوبا ومبعد رجعو مايهزوش ومبعد رجعت مايحكمهمش يعني حب يقول بلي تقلق عليها ماش من عوايدها _ايه والمطلوب علاه عيطلنا _قالي روح لدارها شوفها _نجوى ونعرفها درك راهي تصالحت معاه وماعندها ماتدير ببابا كوبات ثلفون هادي هيا .هيا كيتكمل مصلحتها ترميهم_مانعرف غدوا وتبان __لغدوا هو صباح راح خدم ومع وقت لغدا جات عندي خالتي هيا تبقى معايا ليوم مجاهد يخدم فليل لغدا صباح باه يدخل لدار .بقينا مع بعض طول نهار مع الحكايات وزيد كتبتلها لاليست واش تقضي غدوا هيا تهدر وانا نكتبلها كلشي يخص جهاز بنتها ليراح تتزوج وحنا في سيرتها قاتلي بلي علجية رفضت تجي للعرس هنا _مافهمتش واش مشكلتها علاه ماتجيش _راهي تقول مانخليش داري نهار نتوما ليترجعو تجو _ربي يهديها وهاديك بلاصة يعيشو فيها كون تجي وتشوف الحالة هنا فالمدينة كيفاه مطورة نبصملك بالعشرة ماتزيد تدخل للدار تبقى تحوس برا _واش نديرولها مرا كبيرة نصايروها حتا نقنعوها _ان شاءالله __وحنا ساهرين ثلفون صونا حسبتو مجاهد لقيتو بابا ماقدرتش نكوبي وتحتمت هدرت معاه وهو هدر معايا عادي وسقسر على حوالي وقالي بلي نجوى من لبارح ماعندو خبر عليها مارحتيش سقسيتي عليها _من وقتاه انا وهيا نسقسو على بعض ماعلاباليش بيها كما جات كما راحت _بنتي منا لغدوا ادا ماردتش عليا روحي طلي عليها فدار انا راني بعيد ومرتي قريب تولد مانقدرش نخليها وحدها ماتدري تولد _مممم ان شاءالله _كوبا ورحت قعدت مع خالتي وجبنا سيرتها وقاتلي ماعليش انساي كلشي ماضي ماعندو معنى وكما قال باباك ادا ماكانش خبر روحي طلي عليها ماراكي خاسرة والو .
الحلقة 146
بقلم لينا صبرينة
لغدوا صباح راقدة حسيت بيد تحطت على كرشي ومعاها روحي طلعت نضت مخلوعة موت خلعة حتى نفسي ضياق عليا لقيتو مجاهد بقى يسمي بسم الله _خالدة ماقصدتش نخوفك من غير حطيت يدي برك باه نفطنك بلعقل _حتا تهدنت وهدرت معاه بلي حتى انا ماعرفتش علاه تخلعت حسيت شغل يد كبيرة تحطت على يدي وفكرة في راسي انو راح يدوه عليا _واش يدولك _وليدي _بعيد الشر من غير أوهام برك _تعبت والله عييت من الأوهام والوسواس ليراكبني _تفرج حبيبي بإذن الله اصبري وشوفي كيفاه ربي يشفيك _آمين _حضني وانا بقيت مستحلية قربو ليا حتا سمعت خالتي تعيطلي باه استوعبت روحي _مجاهد جيت بكري _هههه لالا نتي ليرقدتي بزاف قريب يأذن الظهر _ياااه عليا باينة من سهرة تاع لبارح انا ويماك اصبر نخرج عندها عيب عليا وزيد نتا معايا لاصق ومخليها _ياك مع حلالي وينو العيب فالنص _تبسمت وخرجت عندها لقيتها لابسة حجابها قاتلي درك تجي بنتها مع روفيا ومحمود يروحو يقضو وليت رحت عند مجاهد حاولتو يخليني نخرج معاهم ولا يخرج معانا هو ثاني فاالأول ماقبلش وبطريقتي خليتو يقبل وهو ماحبش يخرج قالي تعبان بزاف نرقد شوي مابيد ترجعي .خبرت خالتي فرحت ورحت كليت ليكتب ربي وكيجاء محمود لبست وكنا راح نهبطو بقى يسمعني في شرطو باه نخرج قالي مانفارقش يد يماه دقيقة نبقى معاها برك وين تروح معاها وكيشغل انا طفلة صغيرة وراح نتودر ولا يخطفوني__رحت معاهم قضينا ونحينا على خاطرنا بتحواس مع محمود عندو طولة البال خدينا راحتنا تقلشنا عليه حتى مور العصر باه قالنا يكفي ليوم. وصلوني لدار من غير هبطت من طونوبيل لمحت لزهر هبط من طونوبيل تاعو وشافني قدم ليا .ومحمود هبط لعندو ماعرفوش قالو خير خويا وين بيها _ماتخافش هادا لزهر راجل نجوى _ااا سامحني خويا ماعرفتكش _تعارفو على بعض وقالي بلي نجوى خرجت من الدار وماش عارفها وين راحت قلت ممكن جات عندك _صباح ماكاش بصح انا مع ظهر خرجت من دار _مازادش هدر وطلع لدار ديراكت وحنا لحقناه _لقينا مجاهد غير كما فتح الباب ولزهر زدم ديراكت ضربو من كتفو وبدا يسب فيه وسمعت كيقال ولاد لحرام .كملنا دخلنا ومجاهد جن جنونو عليه عياطو واصل لسماء دورت راسي لقيت نجوى فالدخلة تاع الصالون قاعدة فالارض ومتكية فالباب وحالتها تخوف وجها مضروب زرق وحمر فمها يسيل منو الدم بزااف _هنا تخلعت واش جابها بهادي الحالة _خليتهم لزوج ورايا يتقاتلو ومحمود بيناتهم ورحت عندها _وشبيكي علاه دارلك هكدا _شافت معايا وعينيها كلها دموع وتشهق _ نتي سبابي رجعتيني ليه لزهر عدبني زرقلي لحمي ومجاهد كمل عليا _كيفاه كمل عليك واش تهدري واش دخل مجاهد ياك نتي ليجيتي برجلك _ايه انا ليجيت بصح هو لقاها فرصة من كل جيهة وخلف ثارو وكمل هو ضربني وانا لا حول ولا قوة ماغضتوش غرام والدم لي عليا يبرهن كلامي ياريت وصلتو قبل وشفتو واش دارلي وبالاك كون ماجيتوش درك راه ....
هيا تحكي وانا ماش مصدقة بلي الشخص ليراهي تهدر عليه هو مجاهد يعني ممكن يقدر هو يدير هكدا على جال باه يشفي غليلو ......
