الحلقة 170
#بقلمLina_sabrina
بعد لخبر لي خربط قاع حساباتي ومشاعرث بقيت طول الليل فاطنة قاعدة قدام الثلفون على أمل اني نسمع خبر يطمن قلبي عليه ولو انا وهو مطلقين بصح اكيد ماش راح ننكر عشرتنا ونحجر قلبي وكل حاجة تنحط في بلاصتها ومانتمنالوش الضر وموقفي صعيب بالخصوص اني سبب فلاكسيدو ضميري من داخل يأنب فيا وليلة اليوم شهدت على وفاء مشاعري للدقيقة الأخيرة .بصح من لبكى وتعب غفيت حتا نضت بالحس قدامي فطنت لقيت روحي متغطية والنهار طلع وهوما يهزو فالفراش منين رقدو _خالدة صباح الخير نوضي عندنا خدمة كبيرة ليوم _بقاو كل واحد واش يهدر كل واحد يخمم في نهار ليوم وانا تخمامي كلو عند مجاهد _شوي وجاء عندي خالي وانا كنت قاعدة قدام التاقة _خالدة بنتي آكتيفي وشبيكي تتفرجي فالدنيا وجدي روحك على بكري _خالي منكم صح راكم توجدو للفاتحة _قرب ليا وعاقد حواجبو وقالي أنعم واش راكي تقولي علاه ليوم واش ؟_ كيفاه واش نسيت واش صرا لبارح لمجاهد راه ما بين لحياة والموت _نتي مهبولة في عقلك واش دخلك في مجاهد يعيش ولا يموت ادا نسيتي نفكرك هو رجع من الماضي تاعك طلقيك شحال من مرة جيتك انا ومرتي وجدك باه ترجعيلو ورفضتيي شحاال ؟ ياك كل يوم نعادولك في نفس السيناريو ونتي رافضة وتكريزي وفالأخير قبلتي بمحمد وليوم الفاتحة تاعكم خلاص مجاهد صفحتو أغلقيها يصرا واش يصرا فكري فالمستقبل تاعك عيب عليك تفكري في طليقك ونتي ليوم ترجعي على عصمة راجل خلاف هيا بركاي من التمهبيل والتخمام تاع المراهقين _سامحني بصح انا ماش قادرة نخمم في نهار ليوم ولا حتا نعيشو عيطلهم وقولهم يتراجعو مانيش في نهاري دير أي سبة ومبعد يرحمها ربي _اواااه نتي حابة تبهديلنا وشبيكي تشوفي فينا هنا طحانة ماش رجالة نلعبو ياو فيقي مع روحك ماش لعب الذر هنا حنا رجالة ومدينا الكلمة لرجالة مافيهاش رجعة وردي بالك تزيدي تهدري كلمة من فوق كلامي وماتخلينيش نغلط فيك وترجعي تفهمي غالط ليوم الفاتحة تاعك يصرا واش يصرا تكمل _خااالي ربي يعيشك أفهمني كيفاه نعرس وانا بهادي الحالة شوف ليا مانيش قادرة صح عيب وكلش بصح راني معاه عشرة مانقدرش نتعروس كيشغل ماكاين والو هكدا نرجع نكارة عشرة ومافي قلبي رحمة قبل لا يهدرو عليا الناس نعاتب روحي قبلهم _خااالدة سكتينا عييب _هبطو دموعي بلحظة ضعف ورجعت نحاول فيه .تعيش خالي اتفهمني اتفهم حالتي _استغفر الاه درك نشوف واش ندير __من وراها بساعة برك رجع وجهو يضحك قالي مجاهد فطن ولاباس بيه _اوووه حمدلله ياربي كيفاه حالتو _باينة يدو ورجلو مكسرين راه بلبلاطر وراسو مخيط برك قلبو ليضرو عليه دخل كوما لبارح _هو خرج وانا بقيت نحمد في ربي ونشكرو حمدلله بي سترو _ديراكت رحت لثلفون عيطت للدار لمزية يماه هزت عليا ولتم زدت تأكدت ولقيتها طمنتني ونفس كلام خالي برك مازال باه يفطن مليح ماراهش فالوعي تاعو وحالة قلبو ماش مليحة وانا نهدر معاها دخل خالي قالي كوبي نحتاجك _بقيتها على خير وكوبيت _شوفي راجل راه عايش حمدلله درك انساي عليك واش صرا وديري روحك شغل ماكان والو وروحي وجدي روحك _بصح ..._لا بصح لاوالو ماراناش نلعبو الناس مور الظهر يكونو هنا.القصة كاملة موجودة في صفحة قصص لينا صبرينة .كما كان الحال حاولت وهدرت مع جدي وبكيت وفهمتهم بصح ماحبوش يتراجعو قالو مدينا الكلمة للرجال ماهوس سبب باه نوخرو الفاتحة هكدا رايحة تخلي الناس تهدر علينا ونزيدو نتبهدلو كتر من نحت راسك _رحت للدوش بكيت على حالي كيفاه راح يطاوعني قلبي هو مريض فراش وانا نعرس ياربي كون معايا ماش حاملة روحي وانا لتم جات خالتي حورية طبطبت عليا فتحتلها _عرفتك تكوني بهادي الحالة عليها جيتك _حاولتهم بصح ماحبوش يوخروها _عيب خالدة والله ماتصلح على جال طليقك توخري الفاتحة واش يزيدو يهدرو عليك الناس شوفي هو نهار كنتي مريضة هو بكل بساطة متزوح بيك و راح خانك ودرك نتي طليقتو وتخمي فيه_ بصح القلب لحمة ماش محتمة نكون كيفو_خالدة سؤال وجاوبيني بكل صراحة نتي بعد ماسمعتي بالآكسيدو تاع مجاهد درك حابة ترجعيلو ؟_ هززت براسي لالا قتلك من قبل مجاهد غلط غلطة كبيرة موحال نغفرلو عليها مانقدرش نكون مع انسان خاني عن قصد مي حالتو ليوم مانقدرش نتخطاها وكأنو انسان غريب عليا وماكانش عشرة بيناتنا _ ماعندك ماديري ربي شاهد على نيتك انا لي عليا نقولك كملي نيتك على خيير وخليها على ربي _سبحانو __لبست وقعدت يديرولي المكياج بصح ماصلح والو بسبة دموعي ليماقدروش يحبسو ولا حتا قدرت نتحكم فيهم حالتي تشف وبكات ناس ليمعايا .تمنيت نهار ليوم تكون يما معايا تمسحلي دموعي وتواسيني وممكن كانت راح تعاوني وتوريلي طريقي .مي على كل حال قدري كان محتوم .
الحلقة 171
بقلم لينا صبرينة
جاو نساء دخلوهم للصالون ورجال بقاو فالحوش هزو الفاتحة وزغرتو ورجعت ورجعت مرت محمد شرعا وانا قلبي حاساتو مقنوط ياربي .احساسي كان دمار نفسي ليا ماش وقت هاد الأمور إطلاقا _جات ختو لكبيرة باركتلي وهيا تضحك معايا مع خالتي حورية ودخلوني للصالون كانو نساء غير شوي ولو كاين لغناء بصح واحد ماراه يشطح غير بنات خالتي دايرين حالة بشطيح وزغاريت وهادوك بقاو يشوفو معايا ويهدرو مابيناتهم وختو مرة على مرة تهدر معايا _شوي وبدات الحالة تتبدل حسيتها قراصت نورمالمو يدخل محمد يحطلي خاتم الخطبة بصح ماكانش وختو راحت عند يماها بقات تهدر معاها ووجها مايعجبش حوست على خالتي حورية مالقيتهاش وين تكون وليت قرصت مرت خالي واقفة قدامي هبطت براسها عندي _واش كاين وشبيهم وينو علاه ماجاش حطلي الخاتم وهناني _مانعرف درك نخرج نهدر مع خالك يفهمني ونجي _خرجت شويي ورجعت مع حورية قاتلي بلي محمد ماراهش داخل ورجالة تاعم راهم بعتو لنساهم باه يروحو _استغربت بصح مافهمتش حتا حورية قاتلي كيفي كييفك وجات ختو باركتلي وقاتلي مرة الجاية نخلفوهالك سامحينا _بكل بساطة راحو كامل بلا مايباركولي ولا يقربو ليا من غير عمتي برك حسيت روحي رخيسة وبلا قيمة من غير تفرقو ودخل خالي هجمت عليه نستفسر ونقول هادي هيا الفاتحة ليقتلو رواحكم عليها مالازمش تتوخر وعيب ظهر لا عريس قابلني لا مواليه حتمليني وشغل دايرين فيا مزية انا مانيش سلعة رخيسة ولا غالية بصح يعطوني قيمة نحوس على قيمة ياولوكان بضحكة ماش يديرولي هكدا حسيت روحي قدامهم صنم _ماعليش نصبرو يامات ونفهمو عليهم وشبيهك درك خالتك حورية تفهمنا _باينة لحكاية ماكان علاه تسقسو _ رحت نحيت قشي وغميت روحي الحمدلله هوما مازادوش عليا ماش من النوع لقلوبهم مريضة ويستشفاو بالعكس يوقفو معاك في أبسط حالاتك __لغدوا وانا ماسمعت حتا خبر على مجاهد وباه نروح نسقسي عليه خالي مانعني بدرس كبييير باسكو درك رجعت مرت راجل _وراء الظهر جات خالني حورية ومعاها محمد وطلب يهدر معايا انا رفضت ومبعد قاتلي راه مسكين حاشم منك وجاء يطلب السماح كون تعرفي واش صرا لبارح والله تعدريه _شوفي انا باه نقابلو بلا مانفهم اكيد نخلطها والراجل مانعرفوش مليح مالا احكي نتي _باباه لبارح نحالو الخاتم ليكام راح يحطهالك وقالو روح خدم بدراعك وجييبلها ذهب _كيفاه ينحيهالو انا مايهمنيش الخاتم فهمنيي فالتصرف هادا _الكل رافضينك وضد هاد زواج برك محمد ضاغط عليهم والخاتم صح هو شراه بصح باباه قالو راني مديون ليك بدين كبير سلكو وبعد وصل تشري فذهب _كانت باينة من تصرفاتهم لبارح بلي ماش قابلين_رحت دخلت عندو لقيتو قاعد ومشبك في يديه مع بعض كيحس بيا ناض وقف وتبسم معايا _مساء الخير خالدة لاباس عليك _حمدلله ونتا _حمدلله ومبروك علينا ربي يهنينا _آمين _وشبيه وجهك مريضة يبانو عينيك منفوخين _ايه من الحس تاع لبارح وجعني راسي _حسيتو فهم بلي راني نكدب وحتى ملامح وجهو تغيرو وراح قعد واستغفر _خالدة قعدي نهدر معاك _(قعدت وخفت يجيبلي السيرة ساعتها اكيد نتفضح قدامو )_شوفي نجيبهالك من التالي أنساي الماضي تاعك انا نعتبرو ماكانش ولو هو موجود وجامي يتمحى من داكرتك بصح راح نقنع روحي بلي نتي انسانة حابة تبداي حياة جديدة معايا بنية صافية يلزمنا انا ونتي نعيشو حاضرنا لمستقبلنا فهمتني _هززت براسي ايه _ماش حابة تسمعيني صوتك _مالقيت مانهدر برك _ماعليش عادرك مي نتمنى لي في بالي غالط انا صح وصلتلك ورجعتي مرتي مانقدرش نبعد ونسمح فيك ولو حاس بشعور غريب بصح راني نتغاضى ونخلي ليام والزمان ينسي _واش قصدك _مايهمش وماتصلحش نهدرو فيها المهم انا جييتك ليوم نطلب منك سماح على واش صرا لبارح صرا بيني وبين بابا مشكل وماقدرتش ندخل عندك بصح وعد راح نعوضك على كلشي ونعوض قيمتك ليتساهليها برك نطلب حاجة منك هيا راني هدرت مع جدك وخالك بصح حبيت نهدرهالك ليك ثاني باه نحطك فالصورة الأولى لأي قرار نمشي عليه باسكو رجعتي شريكة حياتي ومن حقك تعرفي وناخد رايك _خيير واش كاين _عرسنا راح نأجلو .العقد عادي هادا شهر في نهارو المحدد بصح العرس نوخروه لوقتاه ماش عارف ياك تصبري عليا وماعندكش اشكال _ايه عادي كما تحب _خالدة ماتقوليش كما تحب على الأقل اعطي قيمة للموضوع وحاولي تعرفي السبب_(جيت نقولو بلي راني عارفة السبب ومبعد تراجعت )_أكيد ماش لسبب واحد برك مام انا حابة شوي وقت نوجد فيه روحي _ايه يلزم توجدي روحك مليح ثاني حابة كينديك لداري تكوني متقبلة كلشي وبإرادة تامة _شفت معاه وفهمت قصدو وهو بقى ثواني على نفس النظرة شغل حاب يعرف افكاري ومشاعري في عينيا وملامح وجهي _انا نروح ونتي تهلاي في روحك وربي يلاقينا بساعة الخيير
الحلقة 172
بقلم لينا صبرينة
راح وانا كل كلامو بقى يدور في راسي وحسيتو عن قرب فيه صعوبة في عقليتو وتفكيرو على قد ماراهو واضح على قد ماراهو غامض وفيه تخويف__فاتو يامات وانا في صراع مع تفكيري كان مازالو يامات للعقد تاعي وانا غير نخمم نطلع ونهبط يعني عندي وقت باه نقرر ادا نكمل في هاد زواج ولا نتوقف ماش على جال مجاهد باه نرجعلو ولا نسامحو ولا حاجة .برك لأنو محمد خفت منو خفت انو نعيش معاه حياة صعيبة غي كل الجوانب حابة نتفادى المشاكل ونعيش هانية يكفيني مصايب وأوجاع وفي نفس الوقت ربي يغفرلي كان تخامي في مجاهد وتأنيب الضمير ليراني حاسة بيه ونسأل في روحي واش راه يقول عليا كيسمع بلي فتحت وماعطيتوش اهمية ولا قيمة وهو رجع من الموت .كنت مشوشة مع روحي وماش متهنية وماش موضحة ليلي مع نهاري كاين ضيق في صدري وغصة في قلبي حارمتني اني نكون مرتاحة حتا لصباح سمعت بلي مجاهد بخير وراه فدار وجابوه لهنا قالو مايحملش لفواياج باه يدوه لمدينة لوخرا ليفيها دارو بعيدة _انا لتم زادني تخمام ورجعت نتخبط مع روحي كان لازم عليا نروح نهدر معاه باي طريقة كانت كيقلت لمرت خالي قريب ماخبطتني كف ودراتلي درس طويل عريض قاتلي حشمي على روحك راكي مرت راجل _حاولتها ترجيتها فهمتها باه قبلت بصح مع مخاوف من كل جيهة _خرجنا ورحنا لدارهم بقيت بعيدة ودخلت غير هيا ماطولتش وخرجت عندي لوحت بيدها باه نروح عندها كما متفاهمين قلتلها تدخل هيا ادا شافتها عافية ونقدر نشوفو بلا مايشوفني حتا واحد تعيطلي ندخل _دخلت لقيت غير يماه سلمت عليها ودموع في عينيا _هاكدا يابنتي ديري في روحك وفيه تتزوجي وتسمحي فيه _خالتي ربي يعيشك ماتزيديش عليا ليفيا يكفيني وراكي علابالك _هيا نطلعو راه في دارك لفوق وحدو _(طلعنا بصح كيقاتلي دارك تقول موس وشق قلبي شحال صعيبة كيتكون صح كانت داري ودرك رجعت لا تعني لي بصلة تحسي بلي الدنيا راهي تظلم فيك ) _فتحت لباب ودخلت هيا لولة شافتو ومبعد رجعتلي قاتلي دخلي راه فاطن بصح والله مافهمتك علاه جيتي وعلاواه _هبطت راسي ماعندي مانقولها ومرت خالي قاتلي رانا هنا ماكالاه تسكري الباب روحي وربي يغفرلك ويسترك على واش راكي ديري _دخلت للشمبرة لقيتو قاعد يتفرج فلاثيلي وكلشي فيه مجروح كيشافني تفجع حتا توجع من حركاتو الفجائية كيشافني _خالدة علاه جيتي واش جابك _حمدلله على سلامتك _قتلك علاه جيتي _جيت نهدر معاك برك _كيكونتي مرتي كنتيي تروحي ثاني عند خويا وتهدري معاه هكدا _واش راك تقول واش دخل هادي في هادي _دخلها خالدة نتي رجعتي مرت راجل واش جابك عندي _قتلك عندي موضوع نهدرو معاك _روحي روحي مابقات هدرة بيناتنا _ماعليش عندك حق بصح على جال عشرتنا انا جيتك ضميري ماسمحليش اني نرتاح _شفتو سكت وغمض عينيه لثواني وفتحهم وقالي قعدي وقولي واش عندك _رحت جيهتو لقيت كرسي قعدت كان هو فوق سرير وانا على جنبو ولاثيلي مقاابلو مرة على مرة يطلع راسو ليه _كيدرت الآكسيدو كان مقصود منك ولا من عند ربي _قبل سنين واش قتلك قتلك كون يجي يوم وتبعدي عليا نرجعك ليا بأي طريقة ياولوكان ندير آكسيدو ولا نرمي روحي من سطح ولا ند.بح روحي وانا هادا واش درت قلت خالدة مستحييل تسمح فيا وعلى جالها درك نحط حد لحياتي ونخليها على ربي والحمدلله ربي كتبلي عمر جديد واول حاجة جات في بالي قلت خالدة راهي تبكي عليا دم وحالتها حالة بصح الصدمة والخيبة والخدلان ليتلقيتها هاداك نهار ليقالولي راهي كملت وفتحت ونتا بهاديك الحالة تمنيت الموت ولا سمعت لخبر هاداك _قلبي ماطاوعنيش نديرها بصح كنت من جيهة خالي وجدي مجبورة نكمل _ خلعني كيرفع صوتو وقالي اسكتيييي هادي الكلمة ماتقوليهاش نتي واحد مايجبرك على حاجة الا ادا نتي قابلتها معاشرك سنين ونعرفك _بواش نحلفك باه تصدقني _تعطيني كنوز الدنيا مانزيد نصدق مشاعرك ليا _(هنا تخلعت في تخمامو )_ مجاهد انا ماجيتش نحيي مشاعري ليك انا كما قلت نتا رجعت مرت راجل وجيت غير باه نريح ضميري ونحمدلك على سلامتك باسكو عشرتي معاك اكيد ماش راح ننساها في ظرف قصير _عشرة عشرة مالا علاه نكرتيها ومادرتيليلها حساب _مجاهد منك صح راك تسقسي؟ ياك نتا السبة خيبت ضني فيك بطريقة باشعة ماسخايلتهاش من قبل خليتني نحقد عليك ونحس بشعور الكره غلطتك ماش كانت غلطة وغفلت عليها وماحسيتش ولا كانت عندك مبرر مقنع .هيا كانت غلطة عند قصد مع سبق وإصرار منك و كنت قانع بيها مخطط ليها كنت حاب تديرها ونتا بكل وعي هادي ليماقدرتش نشفعلك عليها وزيد من وراها شحال من ليلة بقيت فيها وحدي ونخمم ونبكي ونسقسي في روحي وفي زهري ونقول علاه زاد غلط وتزوجها علاه ماحاربش الناس والعالم على جالي وتمسك بيا ورفض يتزوجها علاه خمم في خواتاتو وليات وماخممش فيا أنا .ياك حتا أنا ولية .
الحلقة 173
بقلم لينا صبرينة
كنت نقول علاه زاد كبر غلطتو وخلاني نحس صح راك حاب تكون نجوى مرتك وعلى إسمك خليتني نخمم مع روحي بلي هيا حلم ووصلت ليها بأي طريقة كانت ونجحت الأولى تتقرب منها والثانية تكون مرتك .تمنيتك يامجاهد ترفض الزواج وتحبسو ممكن كانت حكاية خلاف صرات بيناتنا وكون عاودت تفكيري من جيهة خلاف بصح نتا واش درت مع كلشي صرا رحت تزوجتها باسكو عرفت روحك غالط مية فلمية وهادي مسؤوليتك .لوكان غلطتك كانت ماش عن قصد ولا كنت ماش فالوعي تاعك ممكن نديرلك مبررات ونعفص على قلبي ونسامح وننسى ونكملو حياتنا بصح نتا كلشي درتو كنت مقتنع بيه وراضي بيه_الشيطان غرني وقتلك من قبل ندامة هيا التالية ونزيد نقولك نجوى صح كنت متمني نوصلها بصح كيوصلتها من وراها عفتها وكل إحساسك ليقبل كنتي صحيحة فيه وانا غير مكدبك فيه بصح كنتي غالطة في حاجة انا جامي مثلت عليك بمشاعري كلشي قلتهولك ودرتو معاك كان صادق برك نجوى كنت حاب ننتقم منها بأي طريقة والغلطة كلفتني ثمن غالي _فالأخير نتا عيشني غدرة ووهم انو تحبني غير انا ومايهمكش فيها وماتعنيلكش باه فاالأخير تخوني معاها ووعودك تبقى غير كلام فارغ على لسانك _غلطتي كبيرة ومعترف بيها وماعنديش واش نزيد نبرر كتر .كون جيت نكدب كون ماتجرجرت موراك مابقيت نحاول قيك ونطلب فسماح بصح نتي ثاني دفنتي عشرتنا ونكرتي كلشي درتو معاك وين انا طايح فراش بين لحياة والموت نتي كنتي فرحانة بزواحك _لالا انا مانسيتش مواقفك معايا وعمري ماراح ننساهم . يعطيك الصحة في كلش درتو معايا جامي ننكر وقفتك ليا سترتني وحميتني تحت حناحك وسكت الناس كنت ليا سند ليا طول سنين ليفاتو وكنت نتا ملجئي الوحيد كنت راجل حنون تسمحلي دمعتي وتحن عليا .كنت معايا زوج واب واخ يعنيي كنت سند حقيقي في حياتي وماخليتنيش نحس بالنقص على قد مشاكلنا كانت بزاف وكبيرة ونبعدو على بعد على قد ماعلاقتنا تزيد تقوى وكلشي كان من وعيك ورزانتك وفي نفس الوقت حتا انا كنت معاك مرا وصونت عرضك وشرفك ووقفت معاك وساندتك في كلشي درتو وكنت متمنية نكملو مع بعض حتى نفناو _مالا علاه قدرتي تكوني مرت غيري جاوبي _حابة حياة تنسيني في همومي _كنت حاب نصدقك بصح خلاص من نهار فطنت الآكسيدو رجعت مكدب كل حاجة فيك شوفي خالدة ربي كتبلنا يفض مكتوبنا وكل واحد يشوف طريقو وهادو غير أسباب برك باه نتقبلو الواقع والمكتوب لي ربي كتبهولنا هيا درك خلاص روحي انا مانقدرش نفرض روحي عليك مادامك رفضتيني وغدرتيني مابقات حاجة بيناتنا كما انا غلطت نتي غلطتي ورجعنا متعادلين _زواجي هو على سنة الله ورسوله ليراك معتبرو خيانة وغدرة لا يقارن بخيانتك الزوحية عاود حساباتك _ايه وكون يرجع بيا زمان نعاودها باسكو قبل كلشي هيا مصلحتي ونجوى كانت حلم ووصلتها هادي هيا _وقفت ديراكت من كلامو وقتلو صراحة مانيش عارفتك راك بعقلية وتفكير جديد وصدمتي بحقيقتك المهم مجاهد كما موالف تقول نتا وراء كل ابتلاء خيرا ويمكن فراقنا ليه حكمة وخير لينا لزوج .راني رايحة و سماح بيناتنا وربي يشفيك _ايه سماح وربي يهنيك وماتعاوديش ترجعي يامدام _خرجت من عندو ودمعتي حرقتني و قلبي فيه ألف حسرة بصح خرجت رافعة راسي باسكو الحمد لله انا ربحت الوفاء والصدق مع نفسي ومعاه وكنت بنية طيبة لآخر دقيقة وضميري درك مرتاح __من رجعت لدار وانا نبكي جهدت روحي بلبكى وزعما حبيت نريح ضميري بصح قسيت على قلبي وسمعت مالا يرضيني وزيد غضبت ربي ودرت غلطة حياتي باسكو تعتبر خيانة لمحمد __نهار الجمعة رحت للمقبرة مع جدي نزورو قبر يما ومن وراها قلت نروح لقبر بناتي (هوما صح خلقو بلا نبض قلب بصح يبقاو بناتي وقطعة من روحي كبدتي)بصح كما درت مالقيتش قبرهم غبرولي وانا عارفة بلي مجاهد دفنم قدام قبر باباه ربي يرحمو يعني قبر المرحوم اصلا مالقيتوش _قالي جدي نروحو ومبعد نسقسي مجاهد ولا محمود يخبرنا _فاتو يامات وانا مع تخمامي طلعت هبطت وقررت وقلت لجدي ولخالي حابة نبطل هاد زواج _دارو فيا حالة كيفاه هادي نبطل وماراناش نلعبو واش شفتي فالراجل راه سيد رجال وماخاصو والو _ايه ماخصو والو بصح انا ماش مقتنعة بنفسي باه نعاود حياتي وراح نضلمو معايا افهموني الزواج ماش بسيف حاولت نجبر روحي بصح ماقدرتش ادا نتوما جاتكم صعيبة تقولوهالو انا نقولهالو ساهلة وهو رجولتو ماتسمحلوش يبقى مع انسانة رافضتو_بقاو يهدرو معايا ويقنعوني بصح انا رافضة لدرجة اني اتصلت بدار خالتي حورية وجوزوهالي هدرت معاها وحكيتلها وقلتلها تبعتهولي انا نصارحو وهيا انخلعت فيا وباينة مديرونجية ماقدرتش تعبر مليح بصح قاتلي محمد راه ماكانش فدوار ماش عارفين وقتاه يجي عندو يامات من راح يخدم في ريسطو فالمدينة.
الحلقة174
بقلم ليناصبرينة
هوما بقاو ساكتين وكل يوم يحاولو يقنعو فيا وانا ساكتة ونستنى غير وقتاه يرجع وتبعتهولي حورية وهادا ادا وصلتلو الهدرة بصح يطول ولا يقصر باين راح يجي قبل العقد ونقولهالو _كانت ليلة لخميس وجدي قالي ادا تروحي معايا للمقبرة غدوا كما كل مرة قتلو ايه نروح بصح عيط لمجاهد يقولك وين قبر باباه _درك يجي خالك ويتصل بيه _كيجا خالي عيطلو فثلفون برك وهنا شفت وجهو تبدل وعاقد حواجبو وقالو كيفاه وشبيك سقسيتك جاوبني واش هادي الهدرة _شاف مع ثلفون وقالي رخيس كوبا في وجهي _غير لخير خالي واش قالك _قالي مانعرفك شكون نتا مانعرف خالدة مانعرف بناتها _تكدب عليا ياك !!_قسما بالله يابنتي غير قال هكدا راني نحلفلك بلي هادا واش قالي ماعندي علاه نكدب _استغربت وبقيت من جيهة مصدقة ومن جيهة مكدبة بصح غدوا صباح نوضتني مرت خالي على خيبة أمل كبيييرة _نوضي ارواحي تشوفي حاجة _رحت وراها لقيت فالكوروار خالتي أم مجاهد وقدامها فاليزات وكابات منزلين لتم عرفتهم هادو تاعي _سلمت عليها وسقسيتها عليهم _مجاهد بعتلك قشك كلو ليهنا فدار و قشك لي في دار لمدينة .سامحيني بنتي هو جبرني نوصلهملك على قد ماراني حازنة عليكم على قد ماراني نلوم فيكم لزوج بصح صابرة ومؤمنة انو هادي مكاتيب ربي .حكمي عليا هادي لبرية بعتهالك _حكمتها قريتها تشوكيت من كلامو .بقات هيا تحكي وانا في عالم خلاف راحت خرجت وشفت محمود واقف مع خالي .خليت كلش ودخلت للشمبرة بكيت وحرقت روحي بدموع طول هادا العام وانا بعيدة عليه ونخمم فيه طول اليوم وهو بكل بساطة بعتلي قشي كلو وزيد أكدلي فلبرية نيتو ليقالي فيها (خالدة درك ماتساليني مانسالك بعتلك كل قشك وماخليت حتى حاجة تفكرني فيك عندي. نتي ربي يهنيك في حياتك وانا ربي يهنيني مع وحدة أخرى تستاهلني وتقيم مشاعري ليها وتبقى هادي الدنيا مكاتيب مانقدروش نتحكمو فيهم )_علاه يامجاهد زدت عميتها ودرت هادو ليجاست معايا علاااه .علاه زدت دمرتني وخربت كلشي ياربي علاه نستاهل هاد الشيى منك كيفاه طاوعك قلبك تزيد تقسى عليا واش كان راح يصرا كون صبرت حتا انا طالبت بقشي علاه تبعتهملي وخليتني نحس بقيمتي عندك ماتسواش .اااه يامجاهد شحال غلطت فيك .نتا خونتني وهكدا قلبي بكى دم وخاف عليك ونتا كيلقيتني تزوجت فالحلال حسيتها بلي غلطة مني لا تغتفر .شحال نتا قاسي يامجاهد بعد كلشي شفتو منك من حنانة _دخل خالي ولقاني في هاديك الحالة وقالي راه مايستاهلش دمعة منك راهو ممكن رايح يسبقك و يتزوج قبلك . محمود قالي رايحين يخطبولو وحدة من الفاميلة وراه قابل هادا هو ليراكي مدمرة روحك على جالو يابنتي افهمي رجال ماش كيفكيف ماتقدريش تفهمي نواياهم وتخمامهم .رجال عندهم كلشي ساهل وينساو مع الوقت _كما قال خالي عندو الحق مجاهد كمل دمرني بكل معنى الكلمة انا لي كمت نخمم نبطل زواجي باسكو ماش واجدة نبدا حياة جديدة بصح تصدمت كي لقيت الانسان ليشفى غليلو فينا كامل راح يعاود حياتو وناسي الماضي وذكرياتو وقاصد انو يزيد يجرح ويآذي __بعد الدمار الشامل ليقصفني بيه مجاهد عاودت حساباتي مليح ورتبت أفكاري وصليت واستخرت ربي باه يوجهني لطريق الصحيح وكما كان الحال نهار الإثنين جاء محمد وقال لجدي العقد غدوا ونروحو فالساعة الفلانية باه توجدو رواحكم _جاء عندي جدي وسقساني للمرة الأخيرة على قراري _قابلة جدي قابلة ومتمنية نشوف فيه كل الخير ومتيخيبش ظني _حضني جدي وفرح بيا بصح انا من داخل غايضتني عمري بزاااف ماتقدروش تتصورو الحرقة ليراني نحس بيها لداخل مي كنت انا هيا دواء نفسي .القصة كاملة موجودة في صفحة قصص لينا صبرينة_ صباح جات خالتي حوية مع راجلها ومحمد لقاتنا واجدين هزيت الصاك وخرجنا لقيتو واقف معاهم لابس كلشي جين زرق بسروال بلافاست ومن داخل تريكو بيض ونواضر فوق راسو (هاداك الوقت فاالألفين كيكان صغير يشبه للمثل الهندي تاع درك مثل فيلم عاشقي ) فيه ملامحو سمر ونيفو رقيق وعندو في رقبتو تفاحة آدم خارجة ولحيتو كحلة _لاح علينا السلام وبقى يخطف في عينيه عندي _ركبنا ورحنا وفتنا على دار مجاهد بقيت نشوف معاها حتا فتناها .هبطت راسي واستغفرت وطلبت ربي يعطيني القوة باه ننسى ونتخطى الماضي _وصلنا للمدينة هبطنا ستنينا دورنا ومحمد مرة على مرة نطلع راسي نلقياه يشوف ليا بصح كينكشفو يبدل عينيه _دخلنا وعلى بركة الله تمت الإجراءات ووقعت على زواجي معاه ورجعت مرتو شرعا وقانونا باركولنا وزغرتو _كيجينا هابطين جاء لعندي محمد وخالتي بعدت خلاتنا وحدنا واقفين بعد ماخدا الموافقة من جدي _لاباس خالدة _حمدلله ومبروك علينا _يبارك فيك وبالهنى علينا انشاءالله .خالدة راح نسقييك نتي علابالك بلي كيندخلك لداري راح تعيشي مع العايلة ؟
الحلقة 175
بقلم لينا صبرينة
صراحة ماعلاباليش بصح ماعنديش مشكل _اصبري معايا برك نكمل البنيان ونروحو لداري باسكو ماش كاملة ومطول فيها الله غالب سنين ليفاتو كنت مريض ماكنت نخدم مانجيب مصروف ولو العامين التاليين حمدلله خدمت وجمعت بصح ياربي مايكفو لجهاز والعرس _ماتكلفش روحك خاتم تكفي وتوفي _عارف بصح انا مادابيا مايخصك والو وندير الشيئ لينقدر عليك ومادابيا نخلي قيمتك عالية ونخرجك من داركم بالهمة والشان حاجة ماتخصك _مالا ربي يقدرك _آمين وحتا نتي ماتكلفيش روحك انا عندي المهم نتي معايا __بقاو عينيه يحكو وانا حشمت هبطت راسي حتا عيطولنا خرجنا عندهم وتفرقنا .كيدخلنا لدوار بقاو يكلاكسينو حتا وصلنا لدار جدي هبطنا بقاونا على خير وراحو وحنا دخلنا وسقسيت روحي زعما مجاهد هنا ؟ سمع وشاف ؟_انا هكداك ومرت خالي دخلت فهمتني بواش نخمم _قاتلي كونك مهنية ماراهش هنا علجية لبارح قاتلي راح حتا سمانة الجاية ويجي يخطب _ايه ربي يهنيه مانيش نخمم فيه _ماعليش صدقتك __بعد يامات وانا قاعدة فشمبرة لقيييت مرت خالي دخلت قاتلي جات عجوزتك قالت حابة تهدر معاك _قصدك أم محمد ؟_ ايه ارواحي نشوفو واش بغات _نضت خرجت عندها لقيتها قدام الباب فالكولوار لداخل ماحبتش تدخل . جيت نسلم عليها بعدت مني .شوفي من التالي حنا ماراناش قابلينك تكوني عروسة لولدي ولا واحد حاملك ومحمد بغاك وصح يوصلك يامات وراح يرميك ولدي ونعرفو مالا غير قوليلو يطلقك وسلكي بجلدك منو قبل لا تزيدي ترخسيي كتر _راكي قلتيها نتوما ماش قابليني باين تخرجو العيوب السبعة في محمد باه نبطل بصح انا زواجي بيه راح يكمل ماراناش نلعبو هنا _خالدة محمد ماراهش في عقلو مرات ينوض فليل يدير امور تخوف مرضو صعيب راه مرات يرجع مهبول _ماراهش مهبول هو الله عالب عليه كون جاء عايش في محيط هادي ماتشوفو منو والو بصح اي انعكاس يصرالو يكون ليه سبب _ نتي ماش معاك الهدرة مالا شوفي ماراح نجيبولك لا جهاز لا دهب عومي بحرك وهادا ادا ماجاش هادي لعشية طلقك _فتحت لباب وبدات تعيط وتصوغ وتلم فالناس وتتهم فيا بلي ضربتها وحاوزتها _اخاااه هادي خارجتها ديراكت علجية ارحم منها _درك نروح لدار وتشوفي كيفاه يجيك الرد يالهجالة ماتساوش ماكيش قد مقامنا ياليماش متربية ساقطة كيفقت بخدايمها الخامجة ياناس رجعت تهدد فيا .قالولها زوج نساء جاو عندها ونتوما هبلتو تدو هادي الفضلة الموسخة لوليدكم غيركم تفكو منها _هنا هيجت عليهم ماقدرلي حد بسيف تهدنت وجاء خوها تاع مرت خالي دخلني وفرق السوق ليبرا_ حتا لعشية جاء محمد وبقى يهدر مع جدي يحاول فيه قالو نهدر معاها زوج كلمات برك نسقسيها ومع محاولات قبل جدي نخرج عندو وسقساني واش صرا صباح حكيتلو كلش _هزز براسو وقال ماعليش وراح ومافهتش نيتو وحياتي وين رايحة بيها _هاديك ليلة بعد فليل وانا راقدة فطنت حسيت حركة فدار بصح قلت ماعليه يكون جدي ناض لتوالات مع الضلمة راه يخبط في عصاه باه يعرف طريق .انا مازلت ماغفيت وحسيت بنفس قاوي شغل واحد ينهج فالشمبرة وضوء شمعة طفالي _جدي هادا نتا علاه تمشي بلا شمعة _ماردتش عليا توسوست وخفت ومن الخلعة مالقيتش لبريكة باه نشعل .وحسيت بهاد الانسان قرب وماراهش يهدر .جيت نعيط سدلي فمي ووجهي كلو بيدو وهمسلي في وذني _ادا حابة مانديلك والو تسكتي وتعطيني أغلى حاجة عندك وهيا ذهبك _رجعت نهزز في رجليا ويدي نخبش فيه ونقاوم وهو يسكت فيا ويهدد بصح ربي حبني وكشفلي وجهو باسكو فجأة رجع ترسيتي وانا مخلية فيوزة شاعلة _تشوكيت كيلقيتو خوها تاع مرت خالي هو ماعرفش واش يدير رجع يركح فيا باه نسكت وجبد موس حطو في رقبتي وقالي سكتي خلاص ماراح ندي حتا حاجة ومانديلك والو برك سكتي ماتفضيحينيش على الاقل على جال ختي درك نروح كما دخلت _نحا يديه من عليا وانا تقعدت وبعدت منو وهو غير يقولي اسكتي ماتغلطيش مي ماقدرتش مانسكتش ولو الثمن هو حياتي ونعطيها بعيطة .رجعت نصوغ ونعيطلهم يجو وهو تفرفش وحط شال على راسو وخرج يجري من الباب وشافوه ولحقو خالي لبرا ومرتو جات عندي مخلوعة قاتلي شكون ليكان معاك واش صرا شكون هادا _خوك خوك هادا والله هو شفتو بعينيا _اخاااه اسكتي كيفاه هو خالدة وشبيكي _قتلك هو مام انا تشوكيت كان حاب يديلي الذهب بصح من وين دخل _خالدة ربي يعيشك اسكتي ماتقوليش هو ربي يخليك _وهيا تحاول فيا وتبكي دخل جدي قال واش صرا في هاد لليل منا جيت نوض بسيف _قاتلو مرت خالي مانعرف يبان سراق برك ماعرفتوش خالدة _هنا جدي من الخلعة قعد ويقول كيفاه دخل للدار وين رجعنا عايشين في ديارنا ويدخلو علينا .ومرت خالي تقولو سور من التاقة نسيتها مفتوحة.
الحلقة 176
بقلم لينا صبرينة
هيا تهدر معاه وفي نفس الوقت تحاول فيا بملامح وجها باه نسكت ومانفضحوش _كيرجع خالي قال مالحقتوش الكلب ورجع يسقسي فيا كيفاه داير وواش دار بصح غاضتني مرتو سكت على جالها وغدوا من داك قاتلي سور دخل من الدار باسكو حوست على مفاتح تاعها تاع دار مالقاتهمش سور هو داهم وعلابلو بلي عندي دهب وعندي الخلعة جاء طمع يخوفني ويديهم بسهولة واستغل التريسيتي ماكانش _هيا من كترة مالامت روحها هزت ولادها وراحت لدارهم غير باه تتلاقى بخوها وتحاسبو على غلطتو لكبيرة باسكو خالي كون يسمع بهادي لحكاية يطلقها بدون تردد _بصح للأسف خوها زاد الطين بلة وخرجو هدرة بلي لقاو راجل معايا فدار وخرجو سيناريو طوييل عريض و قوات الهدرة عليا وهنا قلت خلاص محمد باين راح يطلقني بصح تفاجأت كيجا عند جدي وخالي وقالهم هدرو معاها تحدد نهار ليساعدها هادا الشهر للعرس وماش سامع بواش يهدرو الناس نصدق نتوما واش تقولو __عجبني تصرفو انو وقف معايا وحتى سمع الناس بنهار العرس وحتى وقف ليهم بالمرصاد وبقى يتحلف في اي واحد يزيد يهدر على شرفي ويقذف فيه ومرت خالي طلبت سماح مني الف وقالت بلي هدرت معاه وقالها غلطة الشيطان ماش راح تتعاود __فاتو ليام وللأسف لخبر صحيح ومجاهد خطب وحدة فاميلتو وكيقالولي اسمها عرفتها كانت بزاف متمنياتو ونظراتها كاشفينها بصح ماكنتش مريضة بيها باسكو عاقلة مي فالاخير ظهر من نصيبها ربي يهنيهم _نكذب عليكم كون نقولكم خبر خطبتو مأثرتش فيا بالعكس كل مرة مجاهد يحطم مشاعري كل مرة يخلي حبي ليه يتدفن بصح مع روحي قلت خلي هكدا خير ياك انا موحال نسامحو ولا نقدر نرجع معاه مالا خلي عذابو ليا يكون لمصلحتي ومع الوقت حبي ليه يتمحى ومايبقاش ليه وجود وبعيدا على مجاهد وحياتو انا راني نبني في حياة جديدة لنفسي وجهزت روحي بالشيى لينقدر عليه غير امور قليلة برك ماقدرتش نكثر وقشي لقديم كلو صدقتو انا تاني ماخليت والو يفكرني بمجاهد _وصل نهار الخطبة ويحنولي فيها و في نفس الوقت كانت يماه رافضة زواج وماش راضية عليه __لبست وماكييت وكوافيت شعري كما كل لعرايس كيكملت وخرجوني عندهم قعدت فالصالون والكل يشوف فيا كاين ليفرحان راه زاهي ويشطح وكاين ليمشنف. شوي ودخل محمد لابس سروال كحل وقمجة بيضة تبسم معايا وسقسى على حوالي _خالدة مايهمكش في هادو الوجوه المتشائمة ليهمك هو وجهي برك _تبسمت معاه وقتلو عندك حق المفيد هو نتا قدامي _عينيه كانو يبرقو بريق مع لونهم المارو لمتناسق مع بشرتو _قدمت ختو مدتلو الخاتم وحكم يدي ولبسلي الخاتم في صبعي وهو يدو يرجف ووجهو غامرتو الفرحة _خويا حكم يدها نصوروكم _حسيتو حاب يحكم يدي بصح حاشم ولا خايف من ردة فعلي .ولات ختو هاجيرة قدمت وحطت يدو على يدي ودرنا فوطوات وبقى حاكم يدي ومتمسك بيها مليح وكيكملنا قالي اتهلاي في روحك ونتلاقو غدوا _ان شاءالله _خرج ومن وراها حناولي وحطولي جهازي كانت غير سنسلة طوييلة وفلايك هو شراهم والباقي قاتلي هاجيرة راهم تاعي خويا مالحقش يكمل جهازك حطيتهملك قدام الناس ماتفهميش النية غالطة تعيشي _في قلبي الجاست ليدارو هو الصح هو كان حاب يوخر العرس باه مايخصني والو بصح كيخرجو فيا الهدرة زرب باه يسكتهم ويستر عليا __ليلة هاديك حسيتها طويلة مانكدبش عليكم بقيت نخمم خفت يصرالي سيناريو معاكس يخرب كلشي انا درك خلاص قانعة اني نبدا حياة جديدة مع محمد على أمل انو السعادة تدخل حياتي معاه ونتهنى من موضوع الثار والإنتقام والفضايح يكفيني مصايب بصح في داخلي خوف من كل الجوانب اني راح نكون مع إنسان جديد وبعقلية جديدة__نضت صباح وجدت روحي كما أي عروسة محمد قالي تلبسي لاغوب بلونش وهو يدير عرس كما أي واحد بيانسور هادا عرسو الأول ومن حقو يفرح ويعيش نهارو .لبست هاديك لاغوب وانا حاشمة من روحي بصح لبنات نساوني في افكاري السلبية _وصل الكورتاج ودخل عندي محمد بالكوستيم نوار مع هو طويل وكتافو عراض حسيتو شخصية الله يبارك خرج عليه _تبارك الرحمن فلي خلقك ياخالدة ربي يبعد عليك العين يارب وتكمل فرحتنا ويهنينا _لبسلي البرنوس وحكم يدي وخرجنا على زغاريت وجدي يوصي فيه عليا _ركبني فالطونوبيل ملور وهو معايا وخوه يسوق وطول طريق راسي فالأرض وهو مرة على مرة يطل عليا ويسقسي فيا وشبيكي كاش مابيك كاش ماخصك وانا نقولو والو من غير تعب برك _حتا الحشمة بيك شوفي خدودك كيفاه حومر __وصلنا لدار استقبلوني وفرحتلي بزاااف عمتي ربي يحفظها ويماه ماقربتش لينا وشابحة في وجها ماش راضية وهو كون صاب ماخرجش من معانا وهو حاكم يدي شغل خايف وانا حقيقة مشاعري داخليا مختلطة ماقدرتش نوصفها نخلوها على ربي وخلاص.
الحلقة 177
بقلم اينا صبرينة
بعد ماعشاو الناس بداو يتفرقو وكل واحد واش يهدر عليا سيرتو يماه بقات تعاير وتعاود بصح خالتي لكبيرة ماخلاتلهاش قدام الناس _دخلوني للشمبرة تاعي شفت معاها باينة عليها جديدة ودعت خالتي وبناتها ومرت خالي هوما راحو وانا قعدت نستنى على أعصابي شغل اول مرة نتزوج بصح طول وانا من تعب والارهاق لي فيا حطيت راسي على لمخدة غفات بيا عيني ديراكت _مافطنت غير كيحسيت بيدو على يدي نضت مخلوعة _بسم الله عليك سامحيني خلعتك و طولت عليك _سماح ماعليش كيفاه تفرقو الناس كامل _ايه بسيف ياك نتي لاباس _ايه حمدلله تعب برك _ماعليش ليل طوييل وريحي هيا درك نصليو متوضية ؟ _باينة لالا _ماعليش درك نبعتلك حورية تعاونك _جات حورية عاونتني فلاغوب ورجعت توضيت وستنيتو جاء صلينا مع بعض وطلبت ربي يهنيني ويفتحلي بيبان الخير في زواجي كما فتحنا ليلتنا بالصلاة وبذكر الله _قعدني قدامو فالسرير وقالي خالدة من ليلة ليوم انساي بلي كنتي متزوجة من قبل أنساي واش صرالك اوك انا عارف كلشي ومتيقن ومتأكد بلي الخطوة ليدرتها معاه صادقة فيها وماهيش نزوة وتعدي انا حبي ليك حب نقي وعفيف ومتمني عشرتنا تدوم حتا لآخر نفس لينا ولو حياتنا درك راح تلقاي فيها صعوبة بصح اتحملي على جالي حتى يفرج ربي _ان شاءالله كونك مهني معاك مرا فحلة وراح تخلي راسك ديما مرفوع مي حبيت نعترفلك بغلطة درتها وانا على عصمتك _ادا غلطة وراح تجيبلنا مشاكل نفضل ماتقوليهاش ماش حاب نسمعها ولا نعرفها انا نبدا نحاسبك من نهار ليوم والباقي عارف بلي كنتي في صراع مع نفسك ومع غيرك ماش قليل ليفتي عليه عليها مانيش راح نلومك بصح منا وروح عرفي تتصرفي اوك متفاهمين _ايه بربي ومادابيا تبقى بيناتنا دايما الصراحة _بيانسور هيا الأهم باه نتفاداو المشاكل يلزم نكونو صريحين ونتمنى منك تعيشي حياتك مع حاضرك الحالي ونساي كل الماضي ماتجبديهش نهائيا _هززت براسي وحط يدو على يدي شفت معاهم وقتلو وشبيهم يديك علاه مجروحين _من الخدمة برك _علاه واش كنت تخدم ياك قالولي فالريسطو _ايه بصح الفترة الأخيرة كنت صباح فالريسطو ومع لعشية نجي للفلاحة عليها _هادا كامل باه تزرب فالعرس وتسترني _خالدة انا ماش داير فيك مزية انا حابك تكوني معايا ليوم قبل غدوا عليها زربت هادا ماكان وزيد باه نصارحك بابا ماحبش يعاوني ودرت كلشي وحدي تحتمت خدمت فالفلاحة بصح فالأخير كيقتلو ماش عارض الناس لقيتو وحدو راح قضى وعرض يعني انا كنت راح ندير عرس قد روحي _سامحني مالا على تعبك _ماتخميش انا نسيت كلش ونتي معايا درك .علابالك ربي مافيه غير لخير صبرت ونلتك شكون يصدق _بدا يتقرب مني بشوي وخلاني نحس صح بلي انا انسانة جديدة مع انسان متفهم و حنين وخايف على مشاعري وعلى احاسيسي مركز في كل حرف وكلمة يقولها وفي كل لمسة منو _خالدة اول مرة نقولهالك بصريح العبارة وفلحلال يااااو نحبك وحاب نسمع العالم كامل ونقول نحب خااالدة نحبك ونبقى نحبك ............._كيكمل باسني على راسني وغطاني _شفت معاه لقيت دموع في عينيه _وشبيك _دور ليا وتكى على دراعو وتبسم معايا حتا بانو ضروسو في وسط عينيه مغرغرين بدموع _مايروحش بالك لبعيد هادو دموع فرحة برك حمدلله ربي كتبك ليا وراكي معايا ماتقدريش تعرفي احساسي درك شغل طفل صغير وعطاولو لعبة عندو شحال وهو يحلم بيها يملكها هكدا نتي حمدلله الانسانة ليحلمت تكون شريكة حياتي راهي بين يديا ونوعدك نخليك عصفورة بين يديا نحميك حتى من نسمة الهواء _ربي يخليك ليا ان شاءالله برك اصبر عليا واعطني وقت كافي باه نوالفك _مانيش مزروب وراح يجي يوم وتوالفيني وترجعي تتفاعلي معايا _حط راسو فالمخدة تاعي ويدو عليا تمشي _خالدة غمضي عينيك ورقدي وخلني نسهر وانا نتمتع بملامحك البريئة والصغيرة __كما قال غمضت عينيا وخليتو يتأمل في كل تفصيل فيا وفي نفس الوقت حسيت بطمئنينة معاه وتمنيت كون محمد دخل حياتي قبل سنين قبل مايبدا الثأر ومشاكلو .هيا صح مكتوب بصح حتى بابا عندو يد فالموضوع كون قبل بيه هاداك العام كون حالتي ماش هكدا __فاتو يامات عرسي وانا في راحة تامة خالتي قايمة بيا على لخر ومحمد مانهدرش عليه كل ساعة يلزم يتفقدني بوجهو البشوش وضحكتو المتفائلة ..مي يماه تقلقت مني وقاتلي ماتبقايش راقدة وتاكلي نوضي تخدمي _كانو فالدار سلايف عمتي بزاف وولادهم وعرايسهم يعني كما قالت خالتي حورية جيش كبير وكاين لي بديارهم وحدهم بصح يجو بزاف وكاين لمتزوجين وكاين العزاب __رجعت صباح نوض نخدم شغلي والقايلة نريح ولعشية نعونهم فلعشاء وكل واحد كيفاه يتصرف معايا كاين ليعادي وكاين لي ضايقتلو مني ويماه مانهدرش عليها كون تصيب شمبرة ماندخلهاش بصح هيا نسات بلي انا يسموني خالدة ماش هيا لنسمحلها تفرض رايها عليا .
الحلقة 178
بقلم لينا صبرينة
فاتو شهرين على زواجي وحب محمد ليا باين من عينيه والحمدلله كلشي مليح وعلى خير ولو لقيت نفس سيناريو تاع علجية في يماه بصح ماهمنيش وباباه الحق حاطني فوق راسو ومايخليهمش يركبو عليا يقولهم راهي عروسة نورمالمو ماتمس والو تجيبولها لحجرها بصح كما شفت عجوزتي متحكمة فيه شوي _ محمد عقليتو عن قرب هايلة هو عفوي وضحوكي وصريح بصح زوج حوايج مقلقيني فيه اول حاجة كون يصرا نقاش بينو وبين واحد من مواليه ينوض حرب كبيرة مايتحكمش في اعصابو وساع يماه تنوص تعاير فيه وتقولو مهبول يلزم سبيطار يلمك علينا هنا محمد نشوف الشر يخرج من عينيه ويبدا يكسر ويعيط حتا من انا نخافو مانقربلوش موحال من الاول كنت عارفة بلي عندو ردة فعل هجومية وماش بساهل تسيطر عليه .حتا لآخر مرة صرات معاه تكوراجيت ودخلت عندو كان فالشمبرة قاعد على حافة سرير وجسمو كلو يرجف من الغش _قدمت ليه قعدت .لوقتاه تبقى دير هكدا وتهاجم علاه ماتناقشش خير _مواليا مايصلحش معاهم النقاش يلزم هكدا باه يسكتو _مي هادي الطريقة تخليهم يقولو عليك كلام ماش مليح ادا يماك مارحمتكش من كلامها كيفاه لوخرين _خليهم يهدرو المهم انا عارف روحي صحيح وفي عقلي مانيش مهبول .انا صح عيشت فترة في هبال بصح حمدلله ربي رجعلي عقلي _بقى يحكيلي بواش جوز طول سنين ليفاتو وحسيت بغصة في قلبو غايضتو روحو ويخبي في عينيه عليا صراحة شقلي قلبي ظروفو صعيبة ونفسيتو مهلوكة يعني هادو والديه ومواليه وماسلكش منهم كيفاه الناس _قربت ليه كتر ودخلت يدي عندو حطيتها في ظهرو وحضنتو وحطيت راسي على صدرو _محمد راني معاك فيق مع روحك نتا يلزم تنفض الغبار على روحك وتبدا حياة خاصة بيك تخلي الماضي وراك وتعيش لمستقبلك ماتخليش الناس تأثر عليك هوما هادرين وماش ساكتين يلزم نتا تبني روحك من جديد كما نتا حابني نعيش حاضري معاك حتا نتا عيش حاضرك معايا وخلينا نكونو شركاء في كلش باه نتخطاو كل الحواجز _حط يدو عليا وحضني بالقوة _واش يلزم نديرو _طلعت راسي ليه وقتلو نبعدو على الدوار _مانقدروش نروحو لمدينة يلزم دراهم بزاف وانا ماعنديش _نبيعو الذهب ونحاولو نستقرو بعيد وربي يعوضنا _لا غير هادي ماتصراش وماتعاوديهاش _بعدت عليه ووقفت .مالا سامحني نتا ليحاب تبقى داخل هادي الدوامة وتحت رحمتهم_ارجعي كما كنتي _أنعم _قتلك ترجعي كما كنتي قبيل حضنيني وحطي راسك على صدري باسكو صح حسيت بالحنانة تاعك عليا وسافرت بعيد بتخمام _تبسمت ورجعت كما كنت وبقينا نهدرو فالموضوع بصح بلا نتيجة كيكونو دراهم ناقصين ماتقدريش تخططي لحياة جديدة باسكو محمد هو راجل ماخصو والو برك يحتاج دعم باه يرجع مكانتو وشهامتو مع مواليه والناس باسكو هوما يشوفوه صح مهبول وتافه وهاد الشيى يرجع على نفسيتو بالتهلكة بصح انا هادو الشهرين شفتو بلي بعقلو ومابيه والو برك زهرو معوج كلما يقول لقيت خدمة مليحة ترجع تفسدلو وكل مرة بسبب __بعد يامات رجع نفس سينارويو وتقلق بصح هدن روحو وخرج هنا الكل تفاجأ كيفاه ماهاجمش ويماه شافت ليا .اسمعي كاش مادرتيلو _واش نديرلو في رايك والو وليدك برك فاق بلي نتوما يلزمكم يتصرف معاكم بلا مبالاة باه يريح راسو من صداع الفارغ _ماعجبهاش كلامي وعلقت عليه بالغش وانا على قد ماعشت معاهم لمرار على قد ماكانت عندي قيمة في هادي الدار من جيهة باباه ليدارهالي عكس عمومو وولادهم واحد ماحاملني حتا وصلت انو يتهموني بالسريقة وضربوني وحقروني لوكان ماش باباه وعمتي وخالتي كون هرسوني بالضرب لمزية باباه كان حاضر و هو ليوقف معايا قبل لا يجي محمد وحتا انا رجعتهالهم أضعاف خليتهم يرجعو يديرولي حساب في كلش _في ليلة وانا قاعدة شفت مع ساعة قلت هادا علاه طول وين راهو _لبست وخرجت للكولوار وشفت مع الدوش راه شاعل الضوء قربت وطبطبت _محمد نتا ليراك هنا ؟_ ايه درك نجي روحي برك _سكت ورجعت للشمبرة نفس السيناريو كل مرة وهادي هيا الحاجة الثانية ليمقلقة منها كل مرة يدخل لدوش يطول فيه مافهمتش واش راه يدير وكينسقسيه يقولي نعرق ندخل نغسل طرفي برك ومرات يخرج لبرا ويطول ونفس الشيى يقولي تضيق روحي نخرج لهواء طبيعي_وانا الحجج هادو ماصدقتهمش وحسيتو مخبي حاجة عليا وماش حابني نعرفها بصح ماعليش مع ليام تبان واش مخبي _لغدوا لقيت نصيرة جات عند يماها وانا جاتني الفرصة نسقسيها تهادرنا فالموضوع وطلبت مني السماح وكلش وانا حاسبتها ولولمتها على كلشي دارتو وفالاخير سقسيتها علاه قلتي لمجاهد وليا بلي ليبعتلي لبراوات راه فالحبس _ماحبيتش نقولو الصح باه مايحوسش على محمد مديتلو اسم واحد خلاف عارفتو هاداك الانسان فالحبس ونتي ثاني كدبت عليك باسكو كنتي مزوجة ماش بضرورة نقولك شكون هو .
الحلقة 179
بقلم لينا صبرينة
بعد كلامي معاها فهمت وهيا ماطولتش وراحت مايحبوهاش تجي نهائيا وخلات عمتي وراها تتحسر وتتحرق _وانا قاعدة نشرب فلحليب لعشية دخلت يماه وتشوف معايا ماعجبتهاش _مازال محمد ماعطاكش طريحة _انا مانوصلش روحي لطرايح كونك مهنية _شكون قالك توصلي محمد بلا ماتفيقي بيه حتا تلقايه عطاك دبزة ولا كف للوجه الله غالب عليه مسكين مريض مايفيقش لروحو حتا يضرب بلا عقل_نتي يماه ولا عدوتو يالطيف منك ومن أمومتك وعقليتك __بعد يامات رجعو تهموني بسرقة كبيرة اني سرقت سنسلة ولقاوها في شمببرتي ولحقو ليهم حابين يشكو بيا للأمن بصح جاء محمد ووقفهم عن حدهم وصرات كبيرة بيناتهم ولمينا قشنا وخرجنا من الدار ولو باباه حاولو باه مانروحوش بصح محمد مصمم مايزيد يبقى دقيقة فدار _خرجنا والجيران يشوفو لينا وكل واحد واش يهدر علينا .ركبنا فطونوبيل وديمارا _محمد وين نروحو قريب يأذن المغرب _نديك لدار جدك ابقاي لتم هادو ليام ومعبد يرحمها ربي نشوف واش ندير _ونتا ؟_ كيلعادة نروح للفيرمة تاعنا _تتمسخر كيفاه تريسكي بروحك لتم _راني موالفة ماتخميش اصلا قبل العرس تحاوزت من الدار وكنت نبات فيها _منك بصح ؟؟_ايه انا الطحان ليزدت رجعت ليهم _اول مرة نسمعها .محمد علاه صدقتني بلي خاطيني _باسكو الشيطان تربى على يديهم نعرف نيتهم حابين بأي طريقة نطلقك باه نبقى تحت يديهم .شوفي خالدة من التالي يما رباتنا وتحبنا دايما نمشو على حساب واش تحب هيا ونهار فاقت بلي بغيتك وناويك ماعجبتيهاش كان مادابيها وحدة عاقلة وتحشم باه تقدرلها ونتي عارفاتك قادرة على شقاك _خافت مني ؟؟_ايه زيد كلشي صرا فالفترة الاخيرة زادت حقدت عليك وعمرتهم كامل عليك _ربي بهديهم لمزية باباك وخالتي وعمتي معزين فيا فدار صينو كون طرطقت _خلينا منهم وهيا دخلي لدار _نروح معاك ولا تجي معايا لدار جدي _خااالدة صايي قتلك تبقاي في دار جدك _ماش نازلة ونتا كما تحب _واش تحوسي نديك للفيرما وكون يزدمو علينا هادوك ونتي معايا وشبيكي خمي بعقلك _ بعد مناقشات غلبتو ورحت معاه لدار تاع الفيرمة والليل كان ديجا طاح _غلق البيبان مليح وسد التاقة تاع البيت بلوحة كبيرة وشعل شموع وقعدنا فتحنا ليكاسكروط ليجبناهم معانا تعشينا بصح صوات الحيوانات هنا بزاف قاوي _محمد حنا رانا وحدنا _ لالا معانا الجنون _بسم الله الرحمن الرحيم علاه جيينا هنا _رجع يضحك عليا وقالي شوفي شواربك بياضو من الخلعة _ياودي هادا سؤال تسقسي فيه رانا فالفيرماا يعني بلاصة تاع فلاحة باين كاين ديور قدامنا بصح ماش كما لتحت فالدشرة لتحت _مانعرف خفت نتا ماخفتش ؟_ صح عندي لاكريز بصح ماش في هادو المواقف عادي موالف كيتضيق بيا الحالة لتحت فالدشرة كنت نهرب لهنا في وسط الريسك تاع هادوك سنين ليفاتو تاع الا.ر.ه.اب وهكداك وكنت نجي هنا نبقى فظلام وحدي غير باه نهرب من الواقع والبشر _في بلاصتك كون مت بالخلعة _جاك جاك موراك خالدة اهربي _رجعت نعيط ونصوغ ونتخبط مع روحي وهو شبع عليا ضحك حتا رجعت نبكي قرب حضني ويمسح في شعري ويطلب فسماح _والله نضحك برك ياعمري نتي هههه فراشتي تخلعت قلبك قريب خرج من بلاصتو بصح كيفاه تبقاي هكدا تتخلعي حتا من خيالك لمزية ماعندناش نفس لاكريز صينو مانلقاوش شكو ليبينا _حرام عليك والله ماش خدمة هادي _جبد روحو مني وحكم وجهي بيديه لزوج _خالدة شوفي غير انا ونتي وحدنا مع ضوء الشموع شكون لي كيفنا جوء رومنسي بإمتياز خليني نسيك في هادي الخلعة ونسافر بيك لبلاصة تطيرك من الواقع_محمد علاه تحب تهرب من الواقع شحال من مرة تعاودهالي _ باسكو الواقع بزاف ضرني ودرك كيرجعت معاك مازلت ماش مصدق كنت نشوفك برا وعيني تزيغ عليك وخفت نتعلق بيك وصرا ليكنت خايفو وتعلقت بيك من بعيد .كيتزوجتي قلت ماعليش ماهيش من مكتوبي راح تبقى خالدة في قلبي لنهار نموت و راح تبقاي ليا حلم وماش واقع وحتاوبقيت نغير عليك ونحبك بصمت ونتي مع غيري .صراحة بقيتي غصة تعبت روحي وواقعي _بصح انا درك راني معاك حاول تعيش ......_فاتت ليلة كما قال على ضوء الشموع ونسمات الطبيعة وأصوات خلق الله ومع حكايات جمعتنا ومنو فهمت بلي هو عندو كريز فجائية مرات تجي وحدها ولا تجي من الغش او التوتر وانا عندي كريز من خلعة او الخوف __لغدوا جبرني وداني لدار جدي قالي ريسك فالفيرمة مانقدرش نخليك لتم ابقاي في دار جدك حتا يفرج ربي ممكن نبيع طونبيل ونشوف دار نكريها ونستقرو وحدنا _وكما كان لحال بقيت لتم وهو رايح جاي .حتا لوحد نهار خرجت من مرت خالي كيكنا راجعين تلاقينا بعلجية في طريقنا شافتني جات عندي سمعتني وسخ وذنيا كما العادة _راكي كبيرة ماش حابة نطيحلك برك صينو كون وريتلك درك خرجت من دارك مابقاتلي صلة بيناتكم نهدر واش نحب ونقول لينحب واحد مايسالي ياشيبة النار .
الحلقة 180
بقلم لينا صبرينة
ايه قولي فرغي قلبك برك وانا ساعتها نديها سخونة لراجلك نقولو نتا مفتح عليها وهيا دخلت لداري وطلعت عند طليقها ساعة وهيا تحكي معاه ااااه قولي نكدب فيها حسباتلكم ماشفتكمش _هنا خربطلتي قاع حساباتي وخفت لا توصلو الهدرة وليت رجعت نكدب فيها وخليناها في نص الطريق ورحت ومرت خالي لحقتني لقاتني قاعدة ونهزز في رجليا وخايفة _شفتي ياخالدة درك كون يسمع محمد وخالك والله ماتفوت علينا على خير _نتي ماعندو ماعندك علاه تخافي برك وصلتيني بمحاولة مني المشكل فيا وفي محمد كون يعرف ولو ماحبش يسمع مني وقالي مايهمنييش بصح خفت من ردة فعلو كون يسمع وتغيضو _نقولك ياولوكان يسمع محمد مانضنش يصدقها هو يماه وكدبها وينك ياعلجية _نخاف من روحي نفضح روحي مانعرفضش نكدب وكون نكدب نحس بعداب يتبعني _فات عليك ماكتر وسلكتي منهم عرفي برك كيفاه تسيري امورك وخلاص __فاتو ياامات وانا صح خايفة كاش مانهدر محمد دار فيا ثقة وزيد وصاني هاداك الوقت وانا كسرت كلامو ورحت عندو عارفة روحي غالطة بصح هاداك الوقت كنت حمارة مادرتش حساب للدرك كنت معولة نبطل ومانكملش في هاد الزواج .اوووف كون خليتني يامحمد نحكيلك كون راني تهنيت .خليتها على ربي ودعيت ربي يسترني وخلاص _وانا نتغدى دخل خالي وقالنا بلي أب محمد توفى _صدمة كبيرة ماكان مريض ولا حتى حاجة بيه قالو ناض صباح قالهم تعبان راح رقد مازادش ناض مسكين ربي يرحمو _محمد ماسمعش كان فلمدينة ومن تم يروح للفلاحة ستيناه فالفيرمة ليخدم فيها حتى جاء استغرب كيشافنا انا وخالي نستناو فيه وقال واش كاين _خليتها على خالي هو خبرو وكما توقعت لخبر جاه صدمة عليه ماتوقعهاش _رحنا للجنازة وكل ناس تبكي عليه ولادو بناتو خاوتو خواتاتو كل الناس حازنة عليه فاتت جنازة كبيرة حتى ليل خلاص لقيت يماه هاجت عليا وتحاوز فيا وتعيط وتقوولو عليا سراقة وخرجوها عليا مانحتاجهاش في داري _كيسمع محمد وقف في وجها سمعها زوج كلمات قاسيين وحكم يدي وخرجنا داني لدار جدي بلا هدرة وراح مسكين كلشي فيه ويماه مارحمتوش _فاتو يومين من وراها خممت مع روحي وقلت نروح نهدر معاها بلعقلية ممكن تتفهمني يعني نبقى انا سبب فالمشاكل ماش حابة محمد يبقى براسو وحدو ماش حاباتو يقطع صلة الرحم سيرتو مع يماه .نجرب نحكي معاها بهداوة ولحنانة ورزانة ممكن تسمعلي _هدرت مع جدي وافقني الراي وداني لدارهم طبطبت فتحولي لباب دخلت وجدي قالي ساعة ونرجعلك _سقسيت هاجيرة وينهي يماها قاتلي فشمبرة _رحت عندها كانت وحدها دخلت عندها وهدرت معاها وكما كنت ناوية بكل هدوء بصح هيا سمعت كل كلامي من الاول حتا للأخير ومبعد حكمت يدي وخرجتني لبرا قاتلي ادا حابة تبقى صلة الرحم بينا وبين محمد طلبي منو الطلاق ونتي ماعندك حتا رجعة لهادي الدار مستحيل تزيدي تدخليها ياولوكان نشوفو يموت بالشر مانخليهش يدخل وهو معاك ياطماعة ستنيتي حتا باباه مات وجاية تهدري هكدا تطمعي كاش مانمدولكم روحي الله لا يشوفك في نهار مليح _غلقت عليا الباب وبزاف شوكاتني في قساوتها يعني وليدها الصغير ومارحمتوش كارثة وخلاص _بقيت لتم واقفة ماقدرتش نتحرك حتا يرجع جدي بصح من غير دقيقة ولقيتها فتحت الباب وبدات ترمي عليا في قشي وتعاير وعمتي وخالتي نسمع فيهم من داخل يتخاصمو معاهم والدار قايمة قاعدة بصواتهم بقاو يرمولي قشي وكملو بالفاليزة .وكلت ربي فيهم عيطت وهدرت وانا حايرة فالمعاملة تاعهم فيا وكفاه تصرفو معايا كنت معززة مكرمة من قبل فدار بصح بعد موت باباه تبدلو الأمور وحتا أسلوبهم تبدل على قبل و لقيت روحي صح فالشارع ليمايرحمش وقشي مرمي فالأرض ومفرق والناس لي رايحة والجاية تشوف فيا وتهدر عليا .كل مرة يخلوهم يتأكدو بلي انا هيا العاطلة وليمانسواش .بعد عياطي وهيجاني نضت نلم فالقش هادي للمرة الثانية يصرالي نفس الموقف المرة الاولى تاع مجاهد بعتلي كل قشي بصح هادي المرة الثانية كانت قاسية ومبهدلة .بقيت نلم ونبكي حتا لمحتو جاي لعندي _خالدة واش جابك لهنا خبروني جيت نجري _فهمتو نيتي لقيت وجهو تقلب ولم معايا القش حتا جاء جدي حاير واش صاير.وحنا واقفين والناس تتفرج جاء بابا عندي شحااال ماشفتو حتا للعرس وماجاش . حاب يفهم واش كاين ومحمد ماعطاهش وجه وقالي ركبي نروحو .ركبنا وصلنا للدار هو جدي هبط دخل وانا حكمني وناض يعيط في وجهي_واش دخلك فيا كيفاه تروحي عندهم وتطلبي منهم هاد الشيئ علاه تشوفي فيا صغير مهبول نسيتي واش دارو فيك آخر مرة ياك زعما نتي كرامتك فوق كلشي علاه مالا تنازلتي وشبيكي واش صاير لعقلك نسيتي بلي نتي ليدفعتيني للتغيير ونويتي نبني حياة جديدة مالا واش في عقلك .هكدا يخمو بلي طامع فالورث تاع بابا زدتي عقدتي الأمور واصتصغرتيني قدامهم .
الحلقة 181
بقلم لينا صبرينة
سمحلي انا كانت نيتي حاجة خلاف _خبط الفولو وبد يستغفر لقيت جدي خرج عندو حلفلو يدخل يتغدى _ هبطنا من غير دخلنا شوي والباب طبطب راحو فتحو سمعت صوت علجية خرجت عندها قلتلها واش تحوسي نتي _وينو راجلك عارفة راه هنا عليها جيت عيطيلو خليني نسمعو باه يربيك نتي مارباك لا باباك لا مجاهد خليه يربيك هو _احترمي روحك وطيري من قدامي _حنا هكدا وهوما جاو كامل يستفسرو واش كاين _هنا قالتلهم كلشي ومحمد بقى يشوف ليا بنظرة واعرة وتقتل وجدي وخالي مكدبينها وهيا زادت جبدت مرت خالي وحكاتلهم بالتفصيل واش شافت (تخلعت فيها كيفاه شافتنا مع انو كنا حريصين) جيت ننكر سمعت صوت مجاهد برا يعيط عليها يقولها واش دخلك واش وصيتك _ديراكت محمد طبعني للحيط تخبطت فيه وخرج عندو رحت طليت عليهم من تاقة لقيتهم حاكمين بعض وقالو علاه راك تدور على مرتي واش مازلاك عندها _بعدني ماعندو مادخلني في مرتك ماجات ماشفتها قبل لا تحكم تأكد قبل _شفت محمد بعد منو وقالو كييفاه ناناك تكدب _ايه فاهمة غالط هيا جات لدار قبل لا تفتح عليها نتا باه تدي قش برك وأصلا كون عيني فيها مانخاليهالكش _احترم روحك ولا ماتشوفش حاجة تعجب نتا اصلا نتا دارك ماش هنا علاه راك تجي _بقاو هاداك هدرة وهو هدرة وفي نقاش حاد ومجاهد كلامو مستفز حسيتو يغطي عليا وفي نفس الوقت راه يوصلو في ميساج انو محمد خدا الفضلة تاعو ليهو رجع مايحتاجهاش .وهادا ليمخلي محمد هايج وعلجية بيناتهم تأكدلهم في كلامها وشفت محمد ماهوش في حالة مليحة ولمرا كببيرة قادر مايدير ويباصي رحت هدرت مع جدي يدخلوه بصح ماسمعلهمش حاط راسو مع راس مجاهد وليت حطيت عليا خمار وخرجت عندو حكمت يدو .محمد تعيش ادخل ماناقصناش مشاكل كتر يعيشك _ديراكت شفت مجاهد هز روحو وراح وخلى موراه علجية عارفة يكون ماعجبوش الحال وممكن تأثر بصح هادا هو الحاضر هادا هو المكتوب كل واحد يشوف ويعيش لنصيبو __من دخلنا وهو يهدر معايا على الموضوع ويلوم ويحاسب فيا _خالدة ردي بالك تكدبي عارف بلي كلامها صحيح عليها كنتي ناوية تبطلي عليا راهم وصلولي الهدرة هاداك الوقت ودرت روحي ماسمعتهاش _ايه صحيح ماش راح نكدب بصح حبيت نهدر معاه برك لآخر مرة ونتسامحو وخلاص باسكو الآكسيدو بسبابي _راكي عارفة واش درتي هادي راهي خيانة _والله من غير هدرة برك تصافينا هادا ماكان ومرت خالي ويماه كانو معايا _ميهمنيش فيهم هوما قوليلي برك كيفاه درتي حاجة كما هادي كنت دايرك انسانة واعية وتفرقي بين الحلال والحرام علاه غلطتي هادي الغلطة_سامحني عارفة روحي غالطة مليون فالمية بصح كان لازم عليا نهدر باه يرتاح ضميري وزيد انا موالفة نحب نحكيلك ونتا قلتي مايهمنيش _حكيتلو لحكاية كامل كيفاه صرات وهو سمع كلشي وخبط الكانابي برحلو وعيط في وجهي وخرج وحسيت روحي وصلت لطريق مقطوع معاه __يامات ماجاء ماحوس عليا ماتفقدني لا والو وجدي وخالي تاني زعفو مني ويهدرو معايا غير المحتم ومرت خالي على جالي صرفقها خالي بكف ورخسها ونايفها وهيا من كبيرة في عقلها ماجات حطت عليا اللوم لا والو ولو انا السبة بصح قاتلي المهم نتي مابقاتلكش حسرة وغصة في قلبك وزيد منها فهمتي بزاف امور منو كنتي غافلة عليهم ودرك ماتخميش كلشي يفوت وليشوفو ربي منا وروح قولي حمدلله .وكما كان الحال كان عندها الحق وانا بعد تفكير قلت لخالي مع لعشية يديني وين يخدم يلزم انا ثاني ندير خطوة للقدام ونعطيه قيمة في حياتي ماش نستنى منو هو يتقدم في حاجة كما هادي _وصلني كيشافني استغرب وجاء عندي _شكون جابك _خالي جابني حابة نهدر معاك _مانيش في حالة باه نهدر عندي خدمة روحي ومبعد يرحمها ربي _مانيش متحركة حتا تسمعني _خير قولي واش عندك _انا راني غالطة ومستعرفة وطالبة سماح منك _سماح مايكفيش خالدة مايكفينش اني نسمحلك على غلطة كما هادي وسوستيني فيك ماخليتي فيا والو _عندك حق وواجدة ندير البوسيبل باه تسامحني انا كون ماجيتش مقتنعة مانتزوجك مانصايرك مانتحمل واش عشت في داركم من إهانة مانجيك درك ونطلب سماح مادابيا تنحي الوسواس ليفي راسك وتعطيني فرصة نثبث روحي بلي صادقة في نوايا تاعي _خالدة روحي قتلك غلطتك كبيرة وماش بساهل بكلمة حلوة تنسيني فهمتي _يعني نتا ماش حاب تتفهمني وحابني نذل روحي ليك ونبقى نحاول فيك هكدا حاب باه تسامحني .مالا انا نقولك انا ماش الإنسانة لينبقى نتبع في راجل رافضني ويخليني نحس روحي وحدة داير فيها مزية برك وحياتي كما تحب تسيرها نتا _هادا واش خرج منك درك _ايه هادي هيا أنا ماكالاه تستغل الفرصة وتهيني _خليتو ورحت ركبت مع خالي _واش ماتفاهمتوش _ايه حسباتلو نبقى نحاول ونجري وراه حتا يسامحني شرحت واعتدرت واش نزيد كتر _كون انا في بلاصتو نعطيك طريحة ومانزيدش نشوف ليك رايح نسبك درك .
الحلقة 182
بقلم لينا صبرينة
يابنتي راكي غالطة من ساسك لراسك وزيد هو شافها خيانة منك والحياة الزوجية فيها تنازلات نهدر معاك شغل ماعندكش تجربة وشبيكي _(في قلبي بكري مجاهد كان كيصرا مشكل بيناتنا يواجه ويهرب ومبعد يرجع كأنو ماصرا والو )_ والحل خالي _نديك للفيرمة تاعهم ونبقاو لتم نستناوه كيجي هبطي لعندو وزيدي هدري معاه على الأقل بينيلو بلي ماكيش حابة تسمحي فيه ديري جاست على جالو وهو كلشي سمعو عليك وسمعو من يماه وصدقك نتي وكلشي مصايب جازو عليه على جالك وبقى متمسك بيك حتى نتي برهني بلي حابة علاقتكم تستمر _خممت في كلامو لقيتو عندو حق رحنا للفيرمة تاعهم وبقينا نستناو فيه حتى شفت طونوبيل تاعو من بعيد جاية تقعدت مليح وعدلت روحي وخماري وخالي يتبسم من تحت لتحت عليا _هبطت حسباتلي درك يهبط معايا لقيتو قالي كما وصيتك هيا بسلامة _وين رايح ماردش عليا وراح ومحمد نزل من طونوبيل تاعو ويشوف ليا ويهزز براسو _نتي مارحتيش ؟ _(خالي حطني تحت الأمر الواقع واكيد مانقدرش نقولو هو ليقترح عليا نجي باسكو هكدا يرجع يبان خالي شغل رماني عليه وماش قابلني) قتلو ايه مارحتش على جالك مستنية فيك نهدر معاك كيشفتك جيت قلت لخالي يروح باسكو حابة نبقى راسي لراسك_قبيل كنتي تقولي انا وانا واش تبدل درك _ كلام فارغ نورمالمو بين زوج متزوجين ماكانش هادا التخمام يلزم نكونو واعيين ومانخربوش علاقتنا على جال كرامة وانانية يلزم نفهمك وتفهمني _طلعلي حواجبو وبقى يتأمل فيا لثواني وراح يفتح الباب ومانعرف واش راه يتمتم بين شواربو _راح تخليني هنا محمد ؟_في رايك نتي جاية عندي وحاطتني تحت الامر الوقع باينة ماخليكش برا للذيابة _تبسمت ودخلت قبلو وبقيت وراه نفهم فيه ونشرحلو في اسبابي ونسي حتا لقيتو دور ليا وحبسني _وشبيك كرهت من كلامي؟ _خالدة راني داخل لثوالات _ ممم روح نستنى فيك بصح ماطولش كما موالف_عارف ليوم نطراش من صوتك و كلامك المتكرر __كما كان الحال بقيت موراه حتا سامحني وقالي كون درتيها وحنا متزوجين كون ساعتها ماتفراش معاك على خير ولو راني لحد الآن ماش راضي على عملتك بصح حسيت انو كلمة خاينة كبيرة عليها وشفعتلك لأنو كنتي صادقة معايا ومانويتيش تكدبي ولا تنكري وحاولتي من قبل تحكيلي وانا ليماكنتش حاب واصلا كنت شاك وموسوس بلي كنتي مازال عقلك بعيد عليا عليها انا ليلة عرسنا قتلك نبدا نحاسبك من ليلة هاديك وقبل نديير روحي اطرش وأعمى وبعد زواجنا شفت فيك الصدق ونيتك الطيبة معايا كون جيتي مازلتي عايشة مع ماضيك كنت ساعتها راح نكشفك باسكو هادو التفاضيل نتدقق فيهم ونعرف خباياهم _سامحني والله كنت هاداك الوقت مشوشة بزاف عارفة روحي غالطة _سماح انساي بصح خودي حدرك منا وروح راني شفعتلك برك لاسباب ليقلتهملك وزيد طريقتك باه ترضيني ماكيش قليلة فيها ينخاف منك _نسحرك بلا ماتفيق _من عندك قابل حتى تحبسيني في قلبك وعقلك طول عمري _بستو بوسة طوييلة وحضنتو ومن هادي النقطة والمشكل ليصرا بيناتنا كانت هيا البداية لعلاقتنا والنهاية لماضي مؤلم عشناه كل واحد وحدو و درك انا بديت حياة جديدة مع محمد وكلي ثقة من روحي وهو نفس الشيى فاق مع روحو وتعب مع نفسيتو باه يخرج من القوقعة ليكان غارق فيها وعرفت بلي كيكانت تجيه لاكريز فجائية يروح لدوش ولا يخرج المهم يحب يبعد مني ومانشوفوش بهاديك الحالة.
__بعد عام من هاداك نهار ليوم رانا في ولاية بعيدة بزاف من دوارنا جينا ليها بطلب من صاحبو كيلقالو خدمة مليحة في ريسطورو ومع شهرية تكفينا وتوفينا بصح تحتمت باع طونوبيل تاعو ولو قديمة بصح جابتتلو سومة مليحة شرا بيهم قاراج وكراه ومنو ثاني نسترزقو وهادي الخطوة ساعدتنا باه نهزو رواحنا فالأاول سوفرينا ماعندنا والو لمزية كيجينا.صاحبو لقالنا هادي الدار وقالنا قعدو فيها قد ماتحبو ومبعد نتفاهمو فالكراء وكما كان لحال كيوجد شوي دراهم مدهملو وعايشين في رحمة ربي محمد انسان خلاني نحب لحياة رغم صعوبتها وظروفها علاقتنا مرات فيها مشاكل بصح هو يواجهم بكل عقلانية يحب يحط النقاط على الحروف ونتفااهمو عليهم ودايما يقولي الغلطة يلزم نستفادو منها وناقشوها باه مانزيدوش نوقعو فيها _الحقيقة عندنا عام ونص برك زواج وهكدا ووالفتو معايا هو جاني في وقت صعيب نفسيتي كانت فيه تعبانة بصح كيعاشرتو رتاحت بلا مانفيق وانا معاه صدري يتشرح ماكانش خلافات كبيرة وهموم حياتي معاه جددتها بعيد الظروف القاسية ليقبل بعيد على الثار والانتقام والخوف والتوتر .
الحلقة 183
بقلم لينا صبرينة
اول مرة نحس روحي مرتاحة ومتحررة بزيادة من أي مخاوف وعرقلات وبالمقابل كاين بزااف امور تغيرت في حياة الناس لي نعرفهم ومحمد مع كل معاناتو ليجوزها وهو يحكي ويبكي من وراها بعد ربي سبحانو بحنانتي ووقفتي معاه خلاتو يتبدل ويرجع محمد راجل ليعندو شخصية وكاريزما وقف على روحو وتعب ونال شخصية مايهزها جبل __قاعدة ونتفرج فلاثيلي ومتأثرة لقيتو قرصني من خدي وقعد جنبي _خالدة علاه راكي تخمي بزاف قتلك يرحمها ربي _بصح والو حتا أمل ماكاين عندنا بزاف من تزوجنا وماهزيتش الحمل حابة نفرح ونفرحك _كيسهل ربي نفرحو ماتبقايش كل ماتشوفي لقطة تاع ولاد تبداي تبكي وتتحسري_ماعليش رانا صابرين __لغدوا سمعنا خبر موت جدي ليتلقيتو كيف الجمرة على قلبي .رحنا للدوار وحضرنا جنازتو صراحة موتو دمرني حرقلي قلبي هو كان بالنسبة ليا أب ثاني ليا محبتو وحنانتو ليا كببيرة وبلا ماننسى مواقفو معايا آخر السنين هادو ليمالقيتهاش في بابا _بعد مابقينا يامات لتم تحتمت نرجعو غدوا لداري بصح حبيت نروح للمقبرة نزور قبر يما _داني محمد زرناه قرينا الفاتحة على قبر يما وباباه ومبعد قتلو نزرو قبر بناتي _شاف معايا ومالقى مايهدر ولو ريحتهم درك ماكانش بصح لقبورة يبقاو تاعهم محفورين على جالهم _رحت لبلاصة تاعهم لقيت فيها قبر كبير واسم مانعرفوش هنا مخي تقلب رجعت نمشي كيف المهبولة ونحوس وهو مورايا وهو غير يتبع فيا ونبكي ونعيط نقولو وينهم وين لقبر تاع بناتي كييفاه ضاعو مني والله متأكدة هادا قبر باباه وقدامو تاع بناتي كيفاه درك ماكانش _هيا نخرجو وغدوا نفهمو وتبان بركاي راكي هلكتي روحك_حسبي الله ونعم الوكيل لينحالي قبر بناتي ياك شافي العام ليفات آخر مرة جيت معاك وكانو هنا _ايه صح بصح خلي نروحو ومبعد نفهمو _مانيش متحركة حتا نعرف وينهم ادا حاب يمسح الماضي بناتي في واه جاوه _هو راه هنا راني شفتو لبارح ووعد مني راح نسقسيه _كيوعدني خرجت وبعد ساعة كيعرف بلاصتهم جاء رجعني باسكو غدوا نروحو بكري _كيدخلت للمقبرة ومشينا شوي لمحتو واقف عرفتو من لبعيد ولو بظهرو قدرت نعرفو _محمد كان حاكم يدي حتا وصلنا عندو ودور لينا _البركة في راسك ربي يصبرك_قلبي كان يرجف رديتلو وانا ثاني عزيتو في ناناه ياربي شهر من توفات حتا هيا _قالي هادو هوما قبر لبنات مابدلتهمش برك لقبورا تحركو من بلاصتهم كيصراو الفيضانات عليها لبلايص رجعو مخلطين وراني وصيت باه يكتبولي اسم فيهم باه يرجعو يبانو _ايه خير وخير _قالو محمد يعطيك الصحة بالاك عطلتك كنت رايح _عادي لمزية لحقت بيا المهم انا نروح ونتوما اتهلاو في بعضكم ورد بالك تغدرها انا ماقدرش نكون قد كلامي وقد الثقة ونتا كونك راجل حافظ على الأمانة ليعندك باسكو صعيبة باه تلقى كيفها أتهلى فيها والسلام عليكم _راح ومحمد وجهو حمار والنار شعلت فيه برك احترم لبلاصة ليراهو فيها وانا قعدت نبكي على كلامو وفي نفس الوقت نبكي على جال لبنات نهدر ونقول ربي يلاقيني بيكم فالجنة ربي ماكتبلناش تعيشو معايا فالحياة بربي فالجنة نلاقيكم _خرجنا من تم وهو غير يمشي وساكت ومرة على مرة يشوف ليا خزرة تقتل ويقولي كون ماجيناش داخل المقبرة قسما بالله مانفوتهالو على خير وآخر مرة منك نزيد نشوفك هدرتي معاه ولا مع اي راجل ساع ند.بح.ك واحد مايسمع بيك _قلت مع روحي انا درك واش ندير هو نادم عليا وماقدرش يبني حياة جديدة ليه باسكو بعد ماخطب بطل بعد شهور من خطبتو فسخ كلشي والسبب مانعرفوش وانا بنيت وأسست حياة ليا بعيد _محمد روح عند يماه زارها _رحت عندها نفس الهدرة _ربي يهديها مازالت يماه لحد اليوم ماتهدرش معاه والكل متغشش منو من غير خوه لكبير راجل خالتي حورية وعمتي يهدرو معاه والباقي مافهتش علاه عاداوه مرات نلوم روحي انا السبب ومرات نقول المشكل فيهم وزيد يتحلفو فيه يقولو مانمدولك حتا حاجة من الورث مادامك متزوح بخالدة .نهار تطلقها نعطوك حقك __رجعنا للولاية تاعنا ورجعنا لحياتنا بعيد على كل لافامي بالنسبة لرمضان وكيلو ربي من راح مازاد رجع ونجوى تزوجت راجل هو صح كبير شوي بصح قالولي المهم لقات واحد يسترها ومجاهد كما قلتلكم فسخ خطبتو وجامي حاول يوصلني ولا حاجة خلاف بالعكس كل واحد شاف طريقو ليتناسبو بصح الدنيا مرات تغدر وتفاجئك بالنصيب المنتظر ولو بعد سنين .
الحلقة 184
بقلم لينا صبرينة
بعد سنة 2015
فاتو كل هادي السنين وانا عايشة بعيد على الدوار وبعيد على الناس لافامي بيناتنا غير اتصالات ولا حاجة جديدة تدكر من غير بابا توفى وقبل لا يموت كما اي أب طلب سماح وكانت اول مرة نشوف مرتو ووليدو الله يبارك خويا صغير بصح مرتو حرمتو منا باسكو بعد موت بابا هزتو وراحت لمدينة منين مواليها باسكو زوهير كان ديجا كمل حكوميتو وخرج من الحبس حتا هو تزوج وأسس عايلة وعمتي صغييرة بقات معاه وعندي تواصل معاه بصح سطحيا ونجوى جابت من غير طفلة وقالو نحاولها الرحم وفاقت براجلها متزوج غيرها باه تجيبلو لولاد بصح محتمة تبقى معاه ماعندها وين تروح ورمضان راه يجي للبلاد بصح مازدتش تصادفت معاه ورجع عندو ولاد مع مرتو وراه مهني بصح كاين ربي هو يجيبلي حقي منو ولو بعد حين .ومجاهد ماخطب ماتزوج ويماه مرات كينروح لدار خالي نتواصل معاها نسقسي على حوالها بيها بررفيا يبقى خييرهم فوق راسي ماننساهش وخواتاتو كل وحدة بدارها _وبالنسبة لمحمد ياريت وألف ياريت كون عرفتو من زمان كون جيت عارفة ربي راح يعوضني براجل كما محمد كون ماطيحت دمعة من عيني من قبل كلشي ربي إبتلاني بيه كان ليه حكمة محمد معاه خلاني نحب لحياة رغم صعوبتها وظروفها وماضيها ليبقى ملاحقني طول هادي سنين ودرك رانا حمدلله كاريين دار وتحتها قاراج فاتح فيه ريسطورو صغييرة يخدم فيها وكيجوه لعراس يروح يطيب وفي وقت فراغو يهز طونوبيل تاعو ويخدم طاكسيور بعد ماتحتمت زاد باع القاراج هاداك .المهم هو انسان الله يبارك ناشط بزاف يحب يخدم وانا تعلمت لخياطة ورجعت نخيط فدار ونضيع بيها وقتي ورجعت نتعامل مع الناس ونلهي روحي خرجت من ربع حيوط والإكتئاب ولخياطة بزاااف عاونتني وحتى نساتني في وجيعتي تاع لولاد باسكو مازال ربي ماكتبليش نجيب لولاد صابرين وخلاص ومرضنا لزوج ماأثرش علينا وفي علاقتنا كيبعدنا من الضغوطات ريحنا شوي وموالين محمد حاقدين عليه وعليا ولو يماه قبل لا تموت رضات عليه بصح هوما ماحبوش يمدولو حقو لانو كلش بإسم خوهم لكبير هو ليرفض يمدلو.حتا من راجل خالتي وماقدرلهمش وكون صابو راه طللقني سيرتو كيماجبتش لولاد والمشكل مني انا ومافهمتش علاه يكرهوني وانا مادرتلهم والو من غير حكمو عليا من دعايات الناس وهاداك الهم وزيد باه يرفع قضية باه يدي حقو تكلف بزاف دراهم ووقت عليها ماقدرتش وبالنسبة لولاد وهو الحق كان صابر معايا وماش مقلق وقابل بواش عاطينا ربي .حتا وصل النهار المشؤوم وين بقيت نعيطلو ونعاود والو مايهزش عليا فالاول يصوني ومعبد رجع طافي وهو راح يوصل عايلة لولاية خلاف . بديت نخاف ودرت الف سيناريو في راسي وكل ساعة نهبط للريسطو عند الخدامة زوح نسقسيهم يقولو والو ماكانش خبر .وصل الليل وماكانش خبر عليه حتا طبطبو فالباب رحت قلت شكون لقيتو الخدام ليخدم فالريسطو _واش كاين محمد مازال باه ييجي _صايي عيطلي وقالي وصل دراهم تاع الريسطو لمرتي_فرحت ورحت لبست عليا الخمار فتحتلو حط يدو فالجيب جبد دراهم .مديت يدي نحكمو عليه لقيتو حكم يدي _واش ديير نحي يدك هبلت _محمد ماعيط لا والو بصح علابالك والله تعجبيني نموت على نساء ليقد عمرك وماجابوش ولاد نحسهم بومبة بين عينيا ياك حتا نتو ...._اسكت واحشم على روحك ونحي يدك والله نلم عليك الناس _نحيت يدي بالقوة وجييت نغلق الباب لقيتو حكمها بيدو ويهدر ويدير في حركات جريئة وتعيف سور كاش ماراهو شارب ماراهش طبيعي لتم بديت نعيط في وجهو ونهدد و هو حسباتلو نخاف ونستسلم ونسكتلو بصح ماهوش يعرف بلي راه مع انسانة تعرضت لجميع انواع الشبهات ورجعت مانخافش ونواجه.وهو كيلقاني نعيط هكدا هز روحو وراح الكلب الرخيس اصبر برك عليا _بقيت على أعصابي نستنا في اي خبر عليه بصح والو .عيطت مرت صاحبو قلتها تخبر راجلها كوبات واتصلت بيه حكاتلو وقالها درك نحاول نعرف شكون هادي العايلة ليداهم ونشوفو __طلع النهار في وجهي وانا نبكي ونستنا عيشت ليلة رعب من خوفي عليه وزيد مع أوهامي كيبقيت وحدي .شويي والباب طبطبو قلت شكون لقيتهم صاحب محمد ومرتو فتحتلهم قالي ماتخافيش راه بخير برك صرا معاه آكيسيدو قريساوه فالطريق وراه فسبيطار_ هنا موت وحييت ورجعت نسقسي فيه ونعاود ادا راه عايش وهو يقولي عايش برك مضرور درت اتصالااتي ولقيتو هيا ندوك _رحت لبست و رحت معاهم فطونبيل وانا طول طريق نبكي و نقول بلي خلاص قادرة نلقاه ميت ولا كاش مابيه باين صرا كاش حاجة فيك كون راه بخيير كون عيطلي مايخلينيش متحيرة ياربي نكون غالطة ونلقاه بخيير _بسيف وصلنا باسكو ماش نفس ولايتنا .
لحلقة 185
بقلم لينا صبرينة
وراولنا شمبرتو وطلعنا عندو حمدلله لقيتو عايش بصح كلش فيه مكسر دقدقوه بالضرب ومغمض في عينيه بسيف يفتحهم حزنت عليه وعلى حالتو وهو حاكم يدي ويقولي بصوت مبحوح ماتبكيش المهم عايش وراني قدامك ماتزيدش عليا قعدي برك قدامي وكلشي يهون _قعدت وعرفت بلي حتا كواغطو داوهملو مع ثيليفون كلش عندو داوه وكيلقاوه لابوليس ماعرفوش هويتو وهو غايب على الوعي ___بعد يامات رتاح وديناه لدار مي حالتو نفسية تأزمت ورجع يخمم بزاف باسكو كانت طونوبيل شوي ساترتنا من المصاريف تاع لكراء _من تم بديت نتوسوس وحدي وقلت سور راح يسمح فيا ويتخلى عليا ويروح يسترجع رزقو زدت توسوست كتر سيرتو كيرجع يعيط بزاف لخاوتو ويدابز معاهم رجع ماش حامل روحو وحتا كينهدر يديير روحو ماسمعش ويطنش ونهار حكيتلو على هاداك الخدام دار فيا حالة كيفاه سكت وراح ليه مانعرف واش دارلو بصح ماحكيتلوش بلي تحرش بيا قتلو برك كلامو مايعحبش وجريئ وقلل من الاحترام ومن وراها قال خلاص حاوزتو _فاتو يامات وزدت صبرت عليه حتا برا مليح ورجع صحتو وقلت هادي ليلة نجبدلو الموضوع ادا رجعت علة عليه مانقدرش نفرض روحي معاه وزيد من حقو يرجع أب _دخل لدار وعيطلي _خرجت عندو كان واقف فلكوروار و لابس سروال بيض و قمجة مارو ومحفف جديد _خير وين رايح بهادي الحطة _عجبتك _جاوبتو بايه وهبطو دموعي _قرب ليا وحكم وجهي باسني _وشبيها فراشتي تبكي واش كاين _رايح تخطب ياك كرهت من الانتظار ؟_نتي مهبولة كيفاه نسمح فيك ونروح نخطب _مالا علاه لابس هكدا _قش برك جديد قستو لتحت فريسطو وطلعت نوريلك تشوفي برك بربي رايح نلبسو في عرس صاحبي وشبيكي علاه تخمي بالسلبي_باسكو راك رجعت والو ماعندك عليها جاوني افكار انو تطلقني وتدي حقك وتتزوج _نسمح في روحي وفالدنيا وفي كلش غير فيك موحال .ياخالدة افهمي صح لحقت ليك موحال نتخلى عليك يصرا واش يصرا ياو لوكان يخيروني على كنوز الدنيا ماش راح يكونو كما نتي باسكو نتي كنز ربي هداك ليا كنز غالي وحقيقي ودايم وردي بالك نزيد نشوف النظرة في عينيك تاع عدم الثقة كما تاع قبيل ساعتها مانتفاهموش انا ولو يصراو مشاكل واختلافات وعراقيل غير نتي ليتبقاي رقم واحد في حياتي ومادام كل مرة نسلك من الموت ونرجعلك ونكون معاك فهاد يعني انو حنا من نصيب بعضنا والقدر راح يبقى جامعنا لآخر نفس في حياتنا .خالدة يا من سكنتي القلب في صمت طويل حتى في البعد كنتِي نبض حنين ومرت الأيام وجرح القلب دام لكن حبي لكي لم يزل بقى ثابثا في يقين _قالهالي وجبدني ليه باسني وحضنتو واختفت الأوهام والوساس من راسي باسكو كلامو دايما يكون فيه طاقة ايجابية وفيه تفائل ومع الوقت صح برهنلي كلامو صحيح رجع من الصفر يخدم ويتعب وليدارو فيه هاديك الحالة للاسف مالقاوهمش بصح الحمدلله المهم هو رجع ليا بخير وعلى خير_بعدها بشهور وين قلت خلاص وفقدت الأمل أني نكون أم ونسمع كلمة ماما ربي فرحني وفرجها عليا بالحمل وانا في عمر الأربعين سنة .ربي مافيه غير لخير وربي هداني طفل كيف لقمر نورلنا حياتنا ربي يحفظهولنا _دخل محمد عندي وانا نرضع في وليدنا بقى يتفرج فينا وهو واقف عند الباب والمنشفة فوق كتفو _كملتي شهرين نفاس ونتي مازلتي نافسة هادا وليدنا حاساتو خطفك مني _واش تحوس محمد انطق باين عندك كلام ماتحشمش هيا قول _ ههه يقولو الراجل يكبر ويجياح هكدا انا ليوم مالا ليلة ليلتنا وكل عام هو عامنا ومن حقي نعبر على حبي وعشقي ليك ونكون بطل في كل عام نكبر فيه باسكو تستاهلي نفرشلك الدنيا حرير مالا ليلة نمسح وحشي فيك ياأجمل إمرة عرفها الكون _لاحلي بوسة فااهواء وراح يدوش وخلى قلبي فيه فرحة كبيرة قولو على رواحكم بلي قلبي رمانة بصح حتا محمد حبيتو عشقتو والله عشقتو ياناس _رمضان صح حبيتو وكان اول حب دخل لقلبي بصح كيشوه شرفي خلاص كرهتو في دقيقتو الله لا تربحو ومجاهد صح حبيتو حب بريئ وصادق وكبييير بصح خيانتو ليا بهاديك الطريقة خلا قلبي ينفر منو ودرك عندي غير محمد حبي ليه صادق ومجنون وحبنا لبعض جامي نقص ودرك دخلنا في عام 2025 وين كتبت قصتي ومشاعري ليكم. ووليدنا في عمرو 9 سنين عمرنا حياتنا كثر وكثر وربي فرجها علينا بدار وتهنينا والمرض تاعنا لزوج عمرو ماكان عقبة في حياتنا بالعكس كنا واقفين على بعضنا وداوينا وربي يشفينا وحسبي الله ونعم الوكيل فاللي ضرونا والمرض النفسي والجسدي عمرو لا يكون عيب .
الحلقة 186
بقلم لينا صبرينة
انا اختياري لمحمد ماغلطتش فيه وعرفت بلي الحياة الزوجية ماتبناتش على المظاهر لانو هادوك مع الوقت يتلاشاو بالعكس تتبنى بالإحترام والمودة والرحمة والوفاء والصدق والحب العفيف الطاهر وهادا واش لقيت في محمد بالتحديد الصدق والوفاء هوما ليفازو وانا بزواجي من محمد هاداك الوقت ماش باه نعاقب مجاهد ولا نخلفلو ثارو لالا انا برك كنت حابة نبعد من حياة الثأر والإنتقام حابة نبعد من الغل والحقد ومجاهد الله غالب عليا ماقدرتش ننسى واش دار ونسامح غلطتو هاديك مستحيل نقدر نتأقلم ونكمل معاها حياتي_ انا بعد طلاقي من مجاهد عشت شهور كبيرة وماقدرتش نتخطى الغدرة تاعو لهادا ولو كنت كملت معاه حياتي ماكنتش راح نهنى معاه لانو ثقتي فيه تهدمت وممكن كنت راح نبقى نجرحو ونفكرو فيها والثقة تكون منعدمة يعني ماكانش استقرار ممكن هو يجي يوم ويكره مني ومن وسواسي ويرجع يعاود نفس الغلطة ويجيب عليا مرا .مالا من الأحسن بعدت عليهم ومن هاديك الحياة ليماكانتش فيها الراحة والحب وحدو عمرو مابنى دار بصح في حياتي ماش راح ننسى ولا ننكر مواقفو معايا هو صح حارب على جالي ودار كلش افعال واقوال بصح كلشي تبخر وبقى غير كلام فارغ عليها اغنية ماجدة الرومي تاع يسمعني حين يراقصني تفكرني فيه تفكرني في كلامو وحبو ليا بصح مادام كافأني بالخيانة والغدرة هاديك خلاص بقاو غير اقوال وافعال بلا فايدة وهو ربي يهنيه في حياتو ولو لحد الآن مازال وحداني عايش وحدو عزابي في ولاية خلاف ومانعرف عليه غير لقليل لينعرفو انو بعيد على اهلو وكل واحد تفرق ويماه ربي يرحمها ويجعلها من اهل الجنة وفالاخير باه قدرت نكتب قصتي ونحكي مشاعري كانت صعيبة وفي نفس الوقت خرجت كلشي في قلبي وحسيت براحة باسكو نفسيتي دايما تحتاج نخرج واش في قلبي نحس براحة وماش عيب اني نحكي مواقف مجاهد وواش عشت معاه انا حكيت حياتي وواش من أحداث جازو عليا ومادام هو كان في حياتي أكيد ندكرو بالخير ولا بالشر واصلا من عندي ومن قلبي سماح بيناتنا ومحمد قد قد مانحكي عليه مامخلصش راجل بأتم معنة الكلمة ولو مرات يطونا خلافات بصح نحلوهم بأي شكل من الأشكال وقصتي حكات على كل واحد شفى غليل ثارو في خوه وانا وحدة منهم ماننكرش بصح ثاري كان بمكتوب ربي هو وجهني للطريق الصحيح لي تعافيت فيه بصح الثأر هادا دمر بزاف مشاعر لأنو كل حقد يروي حكاية ألم .والثأر ماكان إلا نار شعلت في قلوبهم وما بقى منها غير الرماد الخاوي وفي الختام نقولكم نادرا ماتكون النهايات سعيدة مع طرف آخر انا نهاية قصتي مع بطلي الحقيقي محمد ونهاية جميلة ربي عوضني بسيد الرجال وقدرنا رمانا لبعض باه نتلاقاو ونتقاسمو أوجاعنا ونتشاركو حياتنا مع بعض والعبرة ليس في البداية العبرة في شكون يبقى متمسك بيدك للنهاية ويكون صادق رغم كل الظروف والانعكاسات ولا تغركم العشرة ليتدوم سنين وسنين ممكن موقف بسيط يهدم يلزم اليقظة قبل لا تتفر فيكم وكلشي ويبقى من مكاتيب ربي والحمدلله على النصيب والقدر المكتوب وماصعبت إلا فرجت وماتعسرت الا تيسرت وما أغلق باب الا و فتح الف باب بإذن الله .ولأن السعادة في يد الله فخالدة دائما بخير بإذن الله تعالى .
الـــــــنــــــهـــــــايــــــــــــــة ❤
وبقلمي انا لينا صبرينة
وفي الأخير شكرا للعقول الراقية ليبقات متبعتني وداعميني الف شكر ليكم حبيباتي .
المهم كما قريتو وبعد سنين طويلة من الصبر والمشاكل، خالدة عاشات في دوامة من الألم والخيبة. تظلمت، تخانت، وتعذبت بزاف الحياة مرمدتها ذاقت الألم بجميع أنواعو ، من خيانة الناس ليها وخاصة خيانة مجاهد ومن فقدان الغاليين. فقدت بناتها، وفقدت أمها، وكأن الدنيا كلها كانت ضدها. كانت دايما تتمنى لو الزمن يقدر يخفف عليها، بصح الجروح ما كانتش تروح، والآمال تروح قدام عينيها. جربت الدنيا بكل قساوتها، والطلاق مرتين زاد من وجع قلبها، وحسّت بالظلم. لكن في لحظة من اليأس، ربي كان أقرب ليها، وجابلها محمد. محمد ما كانش زوج فقط، كان السند والبلسم لروحها. ما كانش يطلب منها شيء، كان يداوي جروحها بحب وحنان من بعد كل هاد العذاب، خالدة فهمت أن الصبر يفتح أبواب الفرج، وبلي بعد الظلام يجي النور، وأنو ربي ما ينساش عبادو أبداً، الصبر هو مفتاح الفرج، مهما كانت الحياة صعيبة ومرّة. بالصبر، تتعلم الروح كيفاه تتحمل وتقف قدام كل صعوبة، حتى لو كانت الحياة قاسية. صحيح أن الألم يجرح القلب، بصح مع الوقت، يبدأ الفرج يبان قدامنا. ربي يختابرنا، ومن بعد ما تحس روحك وصلت للآخر، يفاجئك الفرج من بعيد. الصبر هو اللي يقوّينا، ويخلينا نأمنو أنو بعد العسر، يجي اليسر جامي تفقدو الأمل من ربي سبحانو وهذي هي نهاية قصتنا المؤثرة #غليل_الثأر وانا عن قصد فااسرد كنت نختصر حياتها وعلاقتها ااشخصية مع مجاهد ودكرت غيير الامور المهمة ودرك ان شاءلله تكونو استفادتو منها وديتو منها عبر ودروس ومايكونش تعبي راح هكذاك دمتم في رعاية الله وحفظه نلتقي مرة اخرى في قصة اخرى وعبر اخرى .
