الحلقة 105
#بقلمLina_sabrina
خرجو كلكم من الدار هيا خرجو خلوني وحدي نهدر معاها _ولدي بصح بلعقل اهدر معاها بلهداوة وماتنساش ليسمعتو على خوها ماش قليل تكون مصدومة برك ماتقساش عليها_خرجو كلهم وراح وراهم جبد المفتاح سكر الباب وجاء ليا حكمني من دراعي ودخلني للشمبرة قعدني وجاب طابوري وقعد مقابلني وحكالي كلش من البداية للنهاية بالتفصيل _خالدة انا مادخلنييش وماعلاباليش نهار ليطلقك رمضان وصرات كببيرة باه هاداك نهار حكالي رمضان وحتا محمود كان معانا هو ديجا فهم علاه دار هكدا معاك وهو ومحمود بعد صرا بيناتهم صراع كبير .وانا راكي تلومي فيا كي ماصارحتكش ماعندي علاه نصارحك يبقى خوك ودار جريمة في حق ولية ماعندي علاه نجبد عيوبو بعد هادي السنين وهو ميت خلاص سكرنا لحكاية وجميلة ماتوقعتهاش تزيد تفتح هاد الموضوع يعني حاجة فاتت ماش ضرورية تعرفيها وزيد حكاية فيها عيب تاع شرف وباه يكون في علمك باباك وزوهير يعرفو ثاني هوما سمعو كيفي كيفهم عرفو السبب ليخلاو رمضان يديير هكدا معاك بصح سكتو وسكتنا حنا تاني هوما على جال سمعة تاعهم وحنا على جال سمعتنا وعلى محمود بالخصوص فهمتي درك ماكلاه تتسرعي وتلوميني ولا تصدقي لكدوبات من انسانة تتمنالك الشر .علاه ساكتة قولي حاجة ياك مصدقتيني ؟_مايهمش بصح تعبت حابة نروح _نجهل انا ليوم وربي كبير وشبيكي علاه تروحي واش درتلك _حابة نريح راسي ونستوعب غاضتني روحي بزاف اني راني نتحاسب على أغلاط غيري ماش بستاهل نتقبل ليسمعتو على خويا ونتا تاني خبيت عليا كنت حاسبة مصارحني بكلشي بصح كل مرة تخرجلي حكاية جديدة _نورمالمو هاد الأمور مايأثروش علينا بالعكس نتمسكو ونوثقو ببعضنا امتحان ونتجازوه بصح علاه حابة تخرجي من دارك فهميني فيها _مجاهد نتا ليماراكش فاهمني قتلك حابة نروح خلاص ريحني منك شوي اصلا ماش حابة نهدر معاك ماتساالنيش خليني في حالي خليني ندير ليحاباتو ريحني _تباني نتي لوحم والصدمة تاع ليوم أثرو عليك ماعليش ليريحك دييريه راني لتحت _ناض وخرج ويماه وروفيا دخلو عندي _بنتي علاه حابة تروحيي ادا حابة مايجييك مايهدر معاك درك نقولو يروح ولا ييبقى لتحت بصح من رايي ماتخرجيش من دارك _ماش حابة نتناقش .هزيت روحي ورحت للثلفون عيطت لدار جدي باه يجي يديني قالوليلي ايه بصح بقاو مستغربين وانا ماحبيت نهدر والو _بنتي حابة ديري رايك راح تخربيها على روحك برك نسيتي كلشي دارو معاك _مانسيتش بصح حتا نتوما يلزم تتفهمو وضعي _سكتنا زمان وليت نطقت .روفيا نتي جاتك عادي على راجلك شفتك مادرتي حتا ردة فعل _شكون قال جاتني عادي بالعكس انا سمعت في نفس نهار ليسمع بيه مجاهد وزعفت وحاسبت ولومت وحتا غضبت في دارنا بصح ماسمعت حتا واحد واش صاري مانقدرش نحكيي هاد السر وهو بقى رايح جاي وفالاخير بابا غلبني قالي رجعي لدارك ومشاكلكم حلوها بيناتكم ومع الوقت نسيت المشكل حكاية ماضي ماعندي علاه نخرب داري على جالها سيرتو هو قال بلي هيا دخلت معاه بإرادتها والغلطة تاعو هو كيستر عليهم برك ونتي بركاي ماتشكي في راجلك ماعندوش ذنب _وجميلة واش مصلحتها باه تقول هكدا _مصلحتها تشوفك في هادي الحالة معاه ماتخليكمش تتهناو حطي عقلك في راسك وماتروحيش ساعتها مجاهد اكيد يخيب ظنو فيك وحنا معاه_بقيت على حالي حتا طلعت وحدة من لبنات قالولي بلي جدي راه لتحت.القصة كاملة موجودة في صفحة قصص لينا صبرينة. هبطت عندو وحب يفهم واش كاين قتلو كاين مشاكل وحابة نجي عندك _وراجلك عندو علم _ايه _سقسى خالتي قاتلو ايه علابالو ماعندنا مانديرولها هيا مصممة باه تروح عندك _ماعليش طلعي لبسي وهيا راني نستنا فيك هنا مانقدرش نطلع لفوق _طلعت لبست ولميت شوي قش وروفيا وخالتي غيير مورايا بالهدرة باه نتراجع بصح ماحبيتش ناخد رايهم وانا حالتي كانت ضعيفة نحوس على الهروب برك .
الحلقة 106
بقلم لينا صبرينة
كيكملت هبطت وهوما ورايا لقيت مجاهد لتحت قاعد مع جدي كيشافوني وقفو وعلجية كانت واقفة في باب الكوزينة وتهزز في راسها _قالي جدي .خالدة بنتي راجلك ماهوش حابك تروحي كيفاه درك _انا وهو هدرنا وعلابالو يلزم نروح _حنا هكداك ورمضان دخل لدار وشاف ليا وقالي طولتي ومجاهد دخل فيه طبعو من كتفو تخبط فالحيط هنا رمضان جهل وبداه بالهدرة غير ليتسمم _مجاهد هادي ليراك قاتل روحك عليها نتا كيكنت فالحبس في نص اليالي طلعت عندي لفوق لسطح وكنت غير انا وهيا وحدنا وبقات تحكي معايا وادا ماش مصدقني تقدر تسقسي وردة وبزيادة كانت كل مرة انا نتجنبها هيا تجي تقاطع طريقي وتهدر معايا هادي هيا لمرا شريفة العفيفة ليعندك وواثق فيها _هاديك دقيقة من الخلعة عينيا دارت فيهم ضبابة والوقفة ماقدرتش نشدها حتا حكمتني روفيا _واش تهدر مازلت تكدب يالكلب راح تخليني نديير فيك جريمة _قربت ليهم علجية بعدتو عليه .اسمع بعد من خوك وزيد كلامو صحيح مرتك راهي تلعب من وراك وليقالو كلو شاهدة عليه وردة انا كنت علابالي بصح كنت عارف راح تكدبني _سكتوووو خالدة ماديرهاش _دارتها مجاااهد ياخويا لعزيز مرتك دارتها وماخرجتش قد الثقة تاعك _خرجت وردة لعندنا وقالت .لالا خالدة مادارت والو كنت معاها هيا برك هدرت معاه على جال باه يهدر مع خديجة برك _ختي تكدبي في عينيك راكي شفتينا مع بعض لفوق ولا نسيتي كيهيا طبعتني من صدري وجييت طايح فالأرض بيا بالشراب وطلعت نانا وخديجة عندي هزوني من هادا زجاج والطيحة ليظرت ظهري. المهم ياسي مجاهد مرتك طلعت عندي وانا نسكر ايه مرتك كانت مع واحد سكير في نصاف ليالي ودرك شوف شكون راجل فينا انا ولا نتا ليراقد على وذنيك ومرتك تخدم من وراك _بقاو متهاجمين على بعهم ومجاهد دخل عقلو وفالأخيير علجية طلعتلو صبعها وتحلفت فيه وقاتلو كونك واعي وسقسي مرتك علاه راهي واقفة كييف الصنم هكدا _ جاء عندي وقف قدامي وهو العروق تاع راسو يبانو_نتي علاه ساكتة هدري دافعي على روحك قولي ماكانش منها نتي رحتي عندو وصارحتيني بصح ماش فليل وهو سكران وماكنتوش وحدكم ياك؟_طاحو دموعي وقتلو اسمحلي كلامو صحيح .
