قصتنا مع .. خضر الفره .. واحد من الشباب الكانو ليهم فهم في الحياة.. وعندو مبادي معينة ماشي عليها .. زول من عامة الناس متخرج من الجامعة . وكالعادة شغال اعمال حرة.. 28 سنة .. وعندو فهم في البياض والنقاشة والكهربا .. وغايتو شغال بما رزق الله .. مسمنو خضر الفرة .. لانو .. جراي جري شديد في الكورة .. عشان كدا مسمنو الفره.. والفرة دي طيرة خلويه بتشبه القطا .. سريعة في الطيران شديد..
زول كلامو كتير .. لكن طيب من جوه .. ونضيف وصادق ..
مشكلتو جنو بنات ..ومشاكلو مع البنات.. لا ليها اول ولا ليها اخر .. اصحابو في الحلة تلاتة .. ومشهور بي حاجة واحدة اصلا ما بكذب .. لو قطعت راسو .. ما ممكن يكذب ..
وعشان الصفة دي بالذات خضر استحق انو طارق اللبيب يكتب عنه رواية.. لانها صفة اصبحت نادرة في زمنا ده ..
اها هسي قايم يتوضأ داير يصلي صلاة الضهر.. وامو بتتكلم معاهو ...
انت ياخدر الليلة مالك مامشيت الشغل ..
قاليها شغل شنو ياحجة؟ انتي قايلاني انا موظف ولا رجل اعمال؟ ..
ماياهو شغل على باب الله.. يوم نلقى ويوم مانلقى .. البارح في واحد قال عندو شغل في الجريف شرق.. وقال لي بتصل عليك الصباح وانا هسي من الصباح منتظرو .. ما دق علي ..
قالت ليهو طيب التلفون ده.. الصباح ضرب كتير.. انت كنت نايم .. امكن ياهو زولك .. قال ليها لالا .. راجعت الارقام الضربت لي.. ما ياهو ..
قالت ليهو انت فاضي من النوم.. تساهر الليل كلو تظبز في التلفون..
لاقريب الصباح.. والصباح تقوم تعبان وعيونك حمر .. غايتو التلفونات دي بقت بلا ..
وكلهن بنات متمنية يوم القاك بتتكلم مع راجل ..
قال ليها ياحجة رجال الزمن ده بقو اي كلام .. مافي احن من البلي ..
قالت ليهو البلي ده شنو ياولد ؟؟
قال ليها ههه ماقلت شي يا حجه .. انتي كويسه؟؟
قالت ليهو امورك دي اصلك ما داير نخليها .. اخوك وابوك قامو من دغش الرحمن.. مشو على السوق .. انت بس اقعد ادردم لي كدي ..
عاين ليها كدا .. واخد ليهو بسمة وتلفونو ضرب ..
الو ..
دي واحدة من البلي هه ..
قالت ليهو انت وين ياخدر؟ انا منتظراك جمب الموقف .. على حسب المواعيد ..قال ليها يا الله ياهندوية ,,,
والله نسيت كلو كلو ..
البت هاجت وماجت .. قالت ليهو معقول ياخدر تنساني ..
اصلا شكلك ماعندك لي حاجة .. خلاص ياخدر انا بمشي ونتلاقى تاني ..
قال ليها لالا انتظري ياهند.. اسي انا بصل ممكن اركب امجاد عديل ..
قالت ليهو لالا مابنتظر.. معليش انا وقفت كتير.. وبعد كدا وقفتي بتكون شينة .. مع السلامة ..
قال ليهو على كل حال انا جاي متحرك ..لو لقيتك خلاص.. ولو مشيتي مامشكله ..
هو بتكلم في التلفون وامو بتعاين ليهو ..
بعد خلص المكالمة امو قالت ليهو.. ياحليلا المسكينة ليك الحق تنساها لانها واحدة من عشرين .. اريتا كان عارفاك ..
قال ليها انا قصدي شريف ياحجة .. قالت ليهو .. اناقصدي شريف انا قصدي شريف .. قديتنا بيها قد الكلمة دي .. انت هسي جاهز ليك لي عرس بتلقط في بنوت الناس شرق وغرب ..
مدام ماعندك ليهن مستقبل المفروض ماتسوي اي علاقة مع بت
وتقعد تمني فيها بالاماني الفارغة .. خلي البنات يشوفن حياتن ومستقبلن ..
قال ليها انا هسي بربط الحبل .. وبعدين الامور ربنا بدبرها ..
امكن القى واحدة اهلها محنفلين ومنغنغين.. تصلح لي اموري .. ويضحك ..
قالت ليهو ياهو ده الشين المابشبه الرجال ..
يعني بعدين الناس يقولو خدر ود حسيب عرسوهو ؟؟ وتبقى انت
العرسوك بترضى؟
قال ليها طيب اسوي شنو ؟ قالت ليهو اصبر .. تدبر امور اخوك الكبير بعدين انت الله كريم ..
قال ليها الصادق اخوي ماشغال بي عرس .. ولاقاعد يجيب سيرتو.. وانا ما بتقيد بيهو تاني.. انا والله داير اعرس ياجماعة ..
يعني انا يا امي والله عمري مافكرت في حرام.. ولا افكر انا داير اعرس بالحلال ياجماعة ..
يعني اسوي شنو ..؟؟
قالت ليهو ياولد سيب الجراسة والكلام الفاضي .. شوف ليك شغل ثابت .. قال ليها مافي ماااااااااااااااافي .. فتشت لامن كرعي ديل وجعوني .. احسن اقعد عاطل ولا اكابس اطلع مصاريفي؟؟ .. قالت ليهو كعب العطل ياولدي .. والشغل مافيهو عيب ..
قام مشى صلى وولبس طلع ..
في الشارع بتكلم براهو زي الزول المركب ليهو سماعة بلوتوث ..
والله الناس ديل ما جايبين لي خبر ساي .. سبحان الله الرسول صلى الله عليه وسلم قال .. من لم يستطع فعليه بالصوم ..
يعني عشان انا معاهد نفسي من الحرام .. عشان كدي بهضرب بالعرس .. لكن شباب الزمن ده مابفكرو في العرس لانو اساسا مسألة العرس بقت معجزة من الله .. او ربنا يديك ليلة القدر ..
عشان كدا الشباب بقو مدفوعين دفع للحرام .. طبعا" ماممكن الواحد يصوم عمرو كلو .. مع مكابسة الشغل دي ..
يعني سبحان الله .. ارتفاع تكاليف الزواج سبب في الفساد الاخلاقي الحاصل في وسط الشباب .. ودي معادلة وااااضحة ..
غايتو انا ان شاء الله ربنا يسترني لامن الم في حلالي .. انا داير احلف لي مرتي واقول ليها والله انا مامسيت قبلك .. وافتخر لي اولادي اني ماعملت حرام في حياتي .. والاقي ربنا وصحيفتي نضيفة من الحاجات دي .. .
الزول ده ماشي وبتكلم بيديهووعيونو .. لغاية ماركب المواصلات في شارع واحد الحاج يوسف . وماشي بحري جوة . منها يلاقي هند . الواقفة منتظراهو من الساعة 12 ونص .. ولو مالقاها ينتظر تلفون زول الشغل ويرجع ليهو تاني .. المهم
مشى نزل في الموقف .. ومشى طوالي على طلمبه اسمها البحار الدافية . المفروض هندوية تكون قريب منها هناك.. على حسب الموعد المضروب ..
هندوية من بنات بحري.. بت من نور.. تشبه الفرح المشرشر .. تشبه الضحكة البريه من وجه الطفل .. في يومو غيومو ملبده .. هندويه اكتر من كدا ..
زولة ممتازة جدا .. ومرة سترة .. والله ماعندها اي قصد في ملعبة.. يعني باختصار دايرة عرس.. وبراكم بتشوفو كلامها.. لمن خدر يصل ..
اها في العربية كان بتواصل معاها ولمن وصل قال ليها انا وصلت ..
وهي طبعا كانت زعلانة .. ودايرة تمشي بس عرفت انو لو مشت ح تخسر الجولة .. فكرت بمنطق الذكاء.. وقالت ليهو بنتظرك ..
وانتظرته في الناحية الشرقية لموقف حافلات الحاج يوسف ..
المهم قعدت معاهو وبدت تتكلم ..
قالت ليهو والله ياخدر صراحة.. انا تعبت من كلام الناس.. واسئلة امي واخواتي .. ومرات السؤال تلقاهو مطروح فوق العيون لكن مابقولوهو .. انا من كلمتهم قلت ليهم خدر ح يجينا في البيت .. الليلة ليها شهرين وانت كل يوم تقول لي اصبري لي ..
قال ليها ياهندة انتي براك المستعجلة .. ومشيتي كلمتي امك بي علاقتنا .. وقلت ليها قريب بجينا في البيت .. وختيتيني امام الامر الواقع .. انا قلت ليك ماجاهز والله ..
قالت ليهو تجهز لي شنو؟ يعني كونك تجيب اهلك وتجو تطلبو رسمي دي دايره ليها جهوزيه؟
قال ليها والله ياهند انا ماعايز ادخلك في حتة ضيقة .. واعمل خطوبة بعدين اهلك يقعدو ينقنقو معاك في التاخير .. والله احسن ليك تصبري .. قالت ليهو انت مالك بس؟؟ على الاقل نقد عين الشيطان.. هسي نحن بنتلاقى .. لينا تلات شهور واهلي عارفينك ومتوقعين في اي لحظة تصلهم ..
قال ليها والله حتى وصولي ليكم محتاج لي مصاريف ماهينة .. انتي معاي ؟ يعني الناس مابقبلو اجيكم يدي فاضيه.. زي مابقولو يد ورا يد قدام .. وانا والله هسي في يدي مافي الا مية وخمسين جنيه ..
قالت ليهو اقول ليك حاجة .. انت حاول تمهن خمسمية وانا بدبر ليك خمسمية .. ونتشايل الاتنين يا خدر .. الحياة تعاون ..
قال ليها افو انا اخوك أسعاد ؟
على اليمين قرش ما اشيلو منك؟
يعني اشيل منك قروش واجيبا راجعة عشان ادفعا ليكم .. قولة خير ؟
لالا دي انا مابسويها.. بس انتي هسي امشي شوفي لي مصاريف ..
الموضوع ده كم؟ .. يعني لازم ادفع قروش للموضوع ده صاح؟
قالت ليهو ايوة لازم .. لازم انت تشد لي وشي قدام ناس بيتنا .. وصاحباتي مايقولو من اول يوم بشتنه .. وناس امي ذاتهم مايقولو لي انتي صمتي السنين وفطرتي على بصلة ..
قال ليها اهو ده الكلام الانا خايف منو ..
والله انا خايف استسلم للضغط بتاعك ده .. وامشي معاك .. وبعداك اتخوزق انا وتتخوزقي انتي ..
قالت ليهو يازول نجازف موش الحياة مجازفة ..
الى اللقاء ..
أنت تقرأ
الأصابع الشريفة.. طارق اللبيب
Poetryكل ما يمر الأيام .. و السنين تتوالى .. بتدي الانسان دروس و عبر في الحياة كل قصة تحصل قدام عينيك .. بتعلمك قوانين في الحياة ... كل شيء في الدنيا كأنه بتكلم ... البحر و النجوم و الرمال و الجبال و الشوارع و الحيطان و كل شي .. كانه يقول .. بالله الب...
