الأصابع الشريفة.. طارق اللبيب

الحــلقة السادسة عشر

ﻣﺼﻄﻔﻰ ﻭﻛﺖ ﻟﻘﻰ ﺍﻟﺒﺖ ﻣﺼﺮﺓ ﻋﻠﻰ ﺍﻧﻬﺎ ﺗﺠﻲ ﺑﺎﻟﺒﺎﺏ ﺍﻟﻜﺒﻴﺮ ﻋﺸﺎﻥ
ﺍﺑﻮﻫﺎ ﺍﺑﺎ ﻳﻘﻮﻝ ﻟﻴﻬﺎ ﺍﻟﺴﺒﺐ ..
ﺍﺑﻮﻫﺎ ﺟﺎﺏ ﻟﻲ ﺧﺪﺭ ﻭﺍﺟﺐ ﺍﻟﻜﺮﻡ ﻭﺍﻟﺒﺎﺭﺩ .. ﻭﻣﺸﻰ ﻣﻨﻮ ﺗﺎﻧﻲ ﻣﺎﺟﺎ ..
ﺧﺪﺭ ﻗﺎﻡ ﺍﺗﻮﺿﺎ ﻟﺼﻼﺓ ﺍﻟﻌﺼﺮ ﻗﺒﻞ ﺍﻟﻌﺼﺮ ﺭﺑﻨﺎ ﺍﻟﻬﻤﻮ ﺻﻠﻰ ﺭﻛﻌﺘﻴﻦ ﻗﺒﻞ
ﺍﻟﻔﺮﻳﻀﺔ ﻭﻋﻤﻞ ﺩﻋﺎﺀ ﺍﻻﺳﺘﺨﺎﺭﺓ ﻭﺻﻠﻰ ﺍﻟﻌﺼﺮ ﻭﻗﺎﻡ .. ﻭﻗﺎﻝ ﻳﺎﺯﻭﻝ ﺑﻌﺪ ﺍﻧﺎ
ﺍﺳﺘﺨﺮﺕ ﺍﻟﻠﻪ ﺍﻟﺒﻘﺴﻤﻮ ﺍﻟﻠﻪ ﻛﻠﻮ ﺣﺒﺎﺑﻮ .. ﻛﺎﻥ ﻓﻴﻬﺎ ﺧﻴﺮ ﺑﺘﻢ .. ﻭﻛﺎﻥ ﻓﻴﻬﺎ ﺷﺮ
ﺍﻟﻠﻪ ﺑﺮﺍﻫﻮ ﺑﺼﺮﻓﻬﺎ ..
ﻋﻤﻚ ﻣﺼﻄﻔﻰ ﺍﺗﺎﺭﻳﻬﻮ ﻣﺸﻰ ﻗﻌﺪ ﻓﻲ ﻃﺮﻑ ﺍﻟﺸﺎﺭﻉ ﻣﻨﺘﻈﺮ ﺍﻟﺒﺖ ﺗﺠﻲ
ﺍﻭﻝ ﻣﻦ ﻧﺰﻟﺖ ﻣﻦ ﺍﻟﻤﻮﺍﺻﻼﺕ ﺍﺳﺘﻠﻤﻬﺎ ﻟﻴﻚ ﻭﻗﺎﻝ ﻟﻴﻬﺎ ﺍﻧﺎ ﺑﻘﻮﻝ ﻟﻴﻚ ﻛﻼﻡ ﻟﻲ
ﻣﺼﻠﺤﺘﻚ .. ﺗﺠﻲ ﺗﻘﻮﻱ ﺭﺍﺳﻚ .. ؟
ﺗﻌﺎﻟﻲ ﺍﻣﺸﻲ ﺑﻲ ﺟﺎﻱ .. ﻭﻣﺴﺎﻓﺔ ﺍﻟﺸﺎﺭﻉ ﻟﻠﺒﻴﺖ ﻣﺎ ﺍﻛﺘﺮ ﻣﻦ ﺩﻗﻴﻘﺘﻴﻦ
ﻗﺎﻝ ﻟﻴﻬﺎ ﺍﺳﻤﻌﻲ .. ﺟﺎﻳﻴﻚ ﻋﺮﻳﺲ ﻭﺯﻭﻝ ﺭﻫﻴﺐ .. ﻭﺍﻫﻠﻮ ﻧﺎﺱ ﺍﺻﻴﻠﻴﻦ ..
ﻭﻏﻨﻴﺎﻥ ﻭﻣﻼﻥ ﻗﺮﻭﺵ .. ﺷﻐﺎﻝ ﻣﻘﺎﻭﻝ ﺑﻤﺴﻚ ﺍﻟﺸﻐﻞ ﺑﺎﻟﻤﻠﻴﺎﺭﺕ .. ﻗﺎﻟﺖ ﻟﻴﻬﻮ
ﻃﻴﺐ ﻳﺎ ﻳﺎ ﺑﺎﺑﺎ ﻛﻴﻒ ﻳﺠﻴﻨﻲ ﺑﺪﻭﻥ ﻣﺎ ﺍﺗﻌﺮﻑ ﻋﻠﻴﻬﻮ؟ .. ﻭﺷﺎﻓﻨﻲ ﻭﻳﻦ؟ .. ﻗﺎﻝ
ﻟﻴﻬﺎ ﺍﺑﻮﻫﻮ ﺷﺎﻓﻚ .. ﻭﺍﻋﺠﺐ ﺑﻴﻚ ﻭﻛﻠﻤﻮ .. ﻗﺎﻟﺖ ﻟﻴﻬﻮ ﻃﻴﺐ ﻛﺎﻥ ﻳﻌﺮﺳﻨﻲ
ﺍﺑﻮﻫﻮ .. ﻗﺎﻝ ﻟﻴﻬﺎ ﺳﻴﺒﻲ ﺍﻻﺳﺘﻬﺒﺎﻝ .. ﻫﺴﻲ ﺍﺗﻌﺮﻓﻲ ﻋﻠﻴﻬﻮ .. ﻭﺍﻟﻠﻪ ﺍﻧﺎ
ﺑﺘﻤﻨﺎﻫﻮ ﻟﻴﻚ ..
ﺑﻘﺖ ﻣﺎﺷﺔ ﻭﺗﻨﻘﻨﻖ .. ﺗﻘﻮﻝ .. ﻭﺍﻟﻠﻪ ﻏﺎﻳﺘﻮ ﻣﺒﺎﻟﻐﺎﺕ .. ﺍﻟﻮﻟﺪ ﻋﺠﺒﻚ .. ﻭﺍﻧﺎ ﻋﺠﺒﺖ
ﺍﺑﻮﻫﻮ .. ﻫﺎﻫﺎﻫﺎ ﻭﺗﻀﺤﻚ ﺑﺎﺳﻠﻮﺏ ﻓﺎﺟﺮ .. ﺍﺑﻮﻫﺎ ﺳﺎﻗﻬﺎ ﻣﻦ ﻳﺪﻫﺎ ﻭﻗﺎﻝ ﻟﻴﻬﺎ
. ﻏﻴﺮﻱ ﺷﻜﻠﻚ ﺩﻩ ﻭﺍﻟﺒﺴﻲ ﻛﻮﻳﺲ .. ﻭﺗﻌﺎﻟﻲ ﻟﻴﻨﺎ ﺑﻲ ﻏﺎﺩﻱ .. ﻗﺎﻟﺖ ﻟﻴﻬﻮ ﺍﻏﻴﺮ
ﺷﻜﻠﻲ ﻟﻴﻪ ﻳﺎ ﺑﺎﺑﺎ ؟ .. ﺍﻧﺎ ﻛﺪﺍ ﻋﺎﻳﺰﻧﻲ ﻋﺎﻳﺰﻧﻲ .. ﻣﺎﻋﺎﻳﺰﻧﻲ ﻓﻲ ﺳﺘﻴﻦ .. ﻗﺎﻝ ﻟﻴﻬﺎ
ﻗﺎﻝ ﻟﻴﻬﺎ ﺍﻟﻮﻟﺪ ﺩﻩ ﺷﻜﻠﻮ ﻣﺘﺪﻳﻦ .. ﻟﻮ ﻣﺎﺳﻤﻌﺘﻲ ﻛﻼﻣﻲ ﺑﺰﻋﻞ ﻣﻨﻚ .. ﻭﺍﻟﻠﻪ
ﺍﺳﺒﻮﻉ ﻣﺎ ﺍﺗﻜﻠﻢ ﻣﻌﺎﻙ .. ﻗﺎﻟﺖ ﻟﻴﻬﻮ ﺍﻭﻛﻲ ﺍﻭﻛﻲ .. ﻭﻻﺗﺰﻋﻞ ﻧﻔﺴﻚ ﻋﺎﻳﺰﻧﻲ
ﺍﻟﺒﺲ ﺷﻨﻮ؟ ﺧﻴﻤﺔ؟ ﻧﻘﺎﺏ ؟ ﺷﻨﻮ ﻗﻮﻝ .. ﻛﺮﻫﺘﻲ ﻓﻲ ﺍﻟﺪﻧﻴﺎ ﺍﻟﻨﻮﻋﻴﺔ
ﺍﻟﻤﺘﺸﺪﺩﻳﻦ ﺩﻳﻞ ..
ﻗﺎﻝ ﻟﻴﻬﺎ ﺑﺲ ﻏﺴﻠﻲ ﻭﺷﻚ ﺗﻤﺎﻡ .. ﻭﺍﻟﺒﺴﻲ ﺗﻮﺏ ﺍﻣﻚ .. ﻭﻟﻔﻲ ﺭﺍﺳﻚ ﻛﻮﻳﺲ
ﻭﺧﻼﺹ ..
ﺍﻟﺒﻴﺖ ﻟﻤﻦ ﻏﺴﻠﺖ ﻭﺷﻬﺎ ﺑﻘﺖ ﺍﺟﻤﻞ .. ﻭﻟﺒﺴﺖ ﺗﻮﺏ ﺍﻣﻬﺎ ﺗﻤﻼ ﺍﻟﻌﻴﻦ ﻻﻣﻦ
ﺗﻔﻀﻞ .. ﻭﺑﻘﻰ ﺷﻜﻠﻬﺎ ﺑﺖ ﻗﺒﺎﻳﻞ ﻭﻋﻮﺍﻳﻞ .. ﺑﺲ ﺟﻮﺍﻫﺎ ﺍﻧﺴﺎﻧﺔ ﻏﻴﺮ .. ﻓﻌﻼ"
ﺍﻻﺷﻜﺎﻝ ﺧﺪﺍﻋﺔ ..
ﺍﺑﻮﻫﺎ ﻣﺸﻰ ﻟﻲ ﺧﺪﺭ ﻗﺪﺍﻣﻬﺎ .. ﻭﺧﺪﺭ ﻛﺎﻥ ﺳﻠﻢ ﺍﻻﻣﻮﺭ ﻟﻠﻪ .. ﻻﻧﻪ ﻋﻼﻡ ﺍﻟﻐﻴﻮﺏ
.. ﻭﺑﻌﺪ ﺍﻟﺰﻭﻝ ﻳﺴﻠﻢ ﺍﻣﺮﻩ ﻟﻠﻪ .. ﺭﺑﻨﺎ ﺑﻜﺘﺐ ﻟﻴﻬﻮ ﺍﻟﺨﻴﺮ ﻭﻳﺼﺮﻑ ﻋﻨﻪ ﺍﻟﺸﺮ ..ﻻﻧﻮ
ﺭﺑﻨﺎ ﻋﺎﻟﻢ ﺑﻤﺴﺘﻘﺒﻞ ﺍﻟﺒﺖ .. ﻭﺣﻴﺎﺗﻮ ﻣﻌﺎﻫﺎ ﻳﻜﻮﻥ ﺷﻜﻠﻬﺎ ﻛﻴﻒ .. ﻫﻞ ﺡ ﺗﺘﻐﻴﺮ
ﺍﻟﻰ ﺍﻻﺣﺴﻦ .. ﻭﻻﺗﺴﺘﻤﺮ ﻛﺪﺍ .. ﺍﻟﻤﻬﻢ ﻳﻌﻨﻲ ..
ﺍﻫﺎ ﻳﺎﺯﻭﻝ ﻛﻠﻬﺎ ﻋﺸــﺮﺓ ﺩﻗﺎﻳﻖ .. ﻭﺍﻟﺒﺖ ﺟﺎﺕ ﺗﻤﺸﻲ ﺯﻱ ﺍﻟﻔﺮﺳﺔ ﺍﻟﺠﺎﻣﺤﻪ ..
ﺧﺪﺭ ﺻﺮﺍﺣﺔ ﻟﻤﻦ ﺷﺎﻑ ﺍﻟﺒﺖ .. ﻣﺎﻛﺎﻥ ﻣﺘﻮﻗﻊ ﺍﻧﻬﺎ ﺗﻜﻮﻥ ﺑﺎﻟﺠﻤﺎﻝ ﺩﻩ .. ﺑﻲ
ﻗﻠﺒﻮ ﻗﺎﻝ ﻭﺍﻟﻠﻪ ﺍﺑﻮﻱ ﺍﺗﺎﺭﻳﻬﻮ ﻣﺎﻫﻴﻦ ﺁﺟﻨﺎ !!
ﺳﻠﻤﺖ ﻋﻠﻴﻬﻮ .. ﻗﺎﻝ ﻟﻴﻬﺎ ﻋﻠﻴﻜﻢ ﺍﻟﺴﻼﻡ ﻣﺮﺣﺐ .. ﻭﺍﺗﺤﺮﻛﺖ ﺟﻮﺍﻫﻮ ﻃﺒﻌﺘﻮ
ﺍﻟﺰﻣﺎﻥ ...ﺑﺘﺎﻋﺔ ﺍﻟﻜﺒﻜﺔ ﻟﻠﺒﻨﺎﺕ ﺍﻟﺴﻤﺤﺎﺕ .. ﻭﺑﻌﺪ ﻣﺎﻛﺎﻥ ﻋﺎﻣﻞ ﺗﻘﻴﻞ .. ﺑﻘﻰ
ﻳﺘﺰﺣﺰﺡ ﻭﻳﺼﻠﺢ ﻓﻲ ﻗﻌﺪﺗﻮ .. ﻭﻳﻘﻮﻝ ﺧﻼﺹ ﺍﻧﺎ ﺍﻥ ﺷﺎﺀ ﺍﻟﻠﻪ ﺡ ﺍﺑﺮ ﺍﺑﻮﻱ ﺑﺮ ﺟﺪ
.. ﻭﺡ ﺍﺳﻤﻊ ﻛﻼﻣﻮ ﻫﻪ
ﻗﻌﺪﺕ ﻓﻲ ﺍﻟﻜﺮﺳﻲ .. ﻭﻗﺎﻝ ﻟﻬﺎ ﻛﻴﻒ ﺍﻟﺤﺎﻝ ﻭﺍﻻﺣﻮﺍﻝ .. . ؟
ﻗﺎﻟﺖ ﻟﻴﻬﻮ ﻛﻮﻳﺴﺔ ..
ﻋﻤﻚ ﻣﺮﻕ ﻗﺎﻟﻴﻬﻢ ﺍﻧﺎ ﺑﺠﻴﻜﻢ ﺑﻌﺪ ﺷﻮﻳﺔ .. ‏( ﺍﻟﻜﻼﻡ ﺩﻩ ﻛﻠﻮﻗﺒﻞ ﺍﻟﻐﺪﺍ ‏)
ﻃﻮﺍﻟﻲ ﺧﺪﺭ ﺧﺸﺔ ﻓﻴﻬﺎ ﺷﻤﺎﻝ .. ﻭﺍﻟﻠﻪ ﻣﺎﺷﺎﺀ ﺍﻟﻠﻪ .. ﺍﺳﻤﻚ ﻣﻨﻮ؟
ﻗﺎﻟﺖ ﻟﻴﻬﻮ ﺍﻧﺎ ﺭﻏﺪ .. ﻭﺍﺻﻠﺖ ﺗﺘﻜﻠﻢ ﻗﺎﻟﺖ ﻟﻴﻬﻮ .. ﺳﺒﺤﺎﻥ ﺍﻟﻠﻪ ﺣﺘﻰ ﺍﺳﻤﻲ
ﻣﺎﻋﺎﺭﻓﻮ ﻭﺟﺎﻱ ﻟﺸﻨﻮ ﻃﻴﺐ؟
ﻋﺎﻳﻦ ﻟﻴﻬﺎ ﻛﺪﺍ .. ﻭﻗﺎﻝ ﻟﻴﻬﺎ ﻭﺍﻟﻠﻪ ﻃﺒﻌﺎ ﺍﻧﺎ ﺍﻱ ﻋﻠﻰ ﺣﺴﺐ ﻭﺻﻴﺔ ﺍﻟﻮﺍﻟﺪ ..
ﻭﻛﻨﺖ ﺟﺎﻱ ﺍﺭﻓﺾ ﺑﺲ .. ﻟﻜﻦ ﺑﻌﺪ ﺷﻔﺘﻚ ﻏﻴﺮﺕ ﺭﺍﻱ .. ﺍﻫﺎ ﺍﻧﺘﻲ ﺭﺍﻳﻚ ﺷﻨﻮ؟
ﻗﺎﻟﺖ ﻟﻴﻬﻮ ﺍﻧﺎ ﻣﺎﺑﺪﻱ ﺭﺍﻱ ﻣﻦ ﺍﻭﻝ ﻭﻫﻠﺔ ,, ﺑﻜﻮﻥ ﺭﺍﻱ ﺍﻧﻄﺒﺎﻋﻲ .. ﻭﺍﻧﺎ ﻣﺎﺑﺤﺐ
ﺍﻻﻧﻄﺒﺎﻋﻴﺔ ...
ﻗﺎﻝ ﻟﻴﻬﺎ ﺍﻧﻄﺒﺎﻋﻴﺔ ﻛﻴﻒ ﻳﻌﻨﻲ؟ ﻭﺿﺤﻲ .. ﻗﺎﻟﺖ ﻟﻴﻬﻮ ﺣﺘﻲ ﺍﻻﻧﻄﺒﺎﻋﻴﺔ
ﻣﺎﺑﺘﻌﺮﻓﻬﺎ .. ﺍﺣﻤﺪﻙ ﻳﺎ ﺍﻟﻠﻪ ..
ﻗﺎﻝ ﻟﻴﻬﺎ ﺑﺮﺍﺣﺔ ﻳﺎﺑﺖ ﺍﻟﻨﺎﺱ .. ﺍﺧﺪﻧﻲ ﻋﻠﻰ ﻗﺪﺭ ﻋﻘﻠﻲ ﺣﺒﺔ ﺣﺒﺔ .. ﻭﺍﻟﻠﻪ
ﺍﻻﻧﻄﺒﺎﻋﻴﺔ ﺩﻱ ﺳﻤﻌﺖ ﺑﻴﻬﺎ .. ﻟﻜﻦ ﻣﺎﻋﺎﺭﻓﻬﺎ ﻳﻌﻨﻲ ﺷﻨﻮ ؟ ﻳﻌﻨﻲ ﺍﻻﺳﺘﻌﺠﺎﻝ
ﻓﻲ ﺍﻟﺤﻜﻢ؟ ﻭﻻ ﺷﻨﻮ . ﻛﺪﺍ ﺍﻧﺎ ﻓﺴﺮﺗﻬﺎ ﻋﻠﻰ ﺣﺴﺐ ﺍﻟﻤﻮﻗﻒ ... ﻗﺎﻟﺖ ﻟﻴﻬﻮ
ﻗﺮﻳﺐ ﻣﻦ ﻛﺪﺍ ﺑﺲ ﻣﺎﺑﺎﻟﻀﺒﻂ ..
ﺍﺳﻠﻮﺑﻬﺎ ﻓﻲ ﺍﻟﻜﻼﻡ ﻣﺎﻋﺠﺒﻮ ﻟﻜﻦ ﺍﻟﺪﻫﺸﺔ ﺑﺼﻮﺭﺗﻬﺎ .. ﻣﺎﺍﺩﺗﻮ ﻓﺮﺻﺔ ﻳﻘﻴﻢ ...
ﻗﺎﻝ ﻟﻴﻬﺎ ﻋﻠﻰ ﻛﻞ ﺍﻧﺎ ﻓﻬﻤﺖ ﻛﻼﻣﻚ ﺍﻧﻚ ﻣﺎﻋﺎﻳﺰﺓ ﺗﻘﻮﻟﻲ ﺭﺍﻳﻚ ﻓﻲ ﺍﻭﻝ ﻟﻘﺎﺅ
ﻭﻣﺤﺘﺎﺟﺔ ﻓﺮﺻﺔ ﻟﻠﺘﻔﻜﻴﺮ .. ﻗﺎﻟﺖ ﻟﻴﻬﻮ ﺑﺎﻟﻀﺒﻂ ﻛﺪﺍ ..
ﺍﻧﺎ ﻟﻮ ﻣﻮﺍﻓﻘﺔ ﻣﺎﻣﻤﻜﻦ ﺍﻗﻮﻝ ﻟﻴﻚ ﻣﻮﺍﻓﻘﺔ ﻣﻦ ﻫﺴﻲ .. ﻭﻟﻮ ﺭﺍﻓﻀﺎﻙ ﻣﺎﻣﻤﻜﻦ
ﺍﻗﻮﻝ ﻟﻴﻚ ﻫﺴﻲ ﻭﺍﻧﺖ ﺿﻴﻒ ﻻﻭﻝ ﻣﺮﺓ ﺗﺠﻴﻨﺎ ..
ﻟﻜﻦ ﺣﺘﻤﺎ ﺡ ﺗﻌﺮﻑ ﺭﺍﻱ .. ﺍﻥ ﺷﺎﺀ ﺍﻟﻠﻪ .. ﻗﺎﻝ ﻟﻴﻬﺎ ﺧﻴﺮ ﺍﻥ ﺷﺎﺀ ﺍﻟﻠﻪ .. ﻗﺎﻣﺖ
ﻃﻮﺍﻟﻲ ﻗﺎﻟﺖ ﻟﻴﻬﻮ ﻋﻦ ﺍﺫﻧﻚ ﺍﺳﺎﻋﺪ ﻣﺎﻣﺎ ﻓﻲ ﺍﻟﻐﺪﺍﺀ ..
ﻗﺎﻝ ﻟﻴﻬﺎ ﺍﺗﻔﻀﻠﻲ .. ﺧﺪﺭ ﻳﺎﺯﻭﻝ ﺑﻘﻰ ﻳﻔﺮﻙ ﻓﻲ ﻳﺪﻳﻬﻮ ﻭﻣﺒﺴﻮﻭﻭﻁ ..
ﺑﻘﻰ ﻳﻘﻮﻝ ﻭﺍﻟﻠﻪ ﻏﺎﻳﺘﻮ ﺻﺒﺮﻧﺎ ﻭﺟﺒﺮﻧﺎ .. ﺟﺎﺑﻮ ﺍﻟﻐﺪﺍ ﻭﺧﺪﺭ ﺍﺗﻐﺪﺍ ﻣﻊ ﺍﻟﺤﺎﺝ
ﻭﺑﺴﺄﻝ ﻓﻴﻬﻮ ﻣﻦ ﺍﻭﻻﺩﻭ .. ﻗﺎﻝ ﻟﻴﻬﻮ ﻭﻟﺪﻱ ﻓﻼﻥ ﻓﻲ ﺍﻣﺮﻳﻜﺎ ﻭﻓﻼﻥ ﻓﻲ
ﺍﻟﺒﺤﺮﻳﻦ .. ﻭﻓﺮﺗﻜﺎﻥ ﻣﻊ ﺍﺻﺤﺎﺑﻮ ﻣﻤﺘﺤﻨﻴﻦ ..
ﺧﺪﺭ ﻗﺎﻝ ﻟﻴﻬﻮ ﻭﺭﻏﺪ ﺑﺘﻘﺮﺍ ﻓﻲ ﻳﺎﺗﻮ ﺟﺎﻣﻌﺔ؟؟ .. ﻗﺎﻝ ﻟﻴﻬﻮ ﺑﺘﻘﺮﺍ ﻓﻲ ﺟﺎﻣﻌﺔ ..
‏( ......... ‏) ﺟﺎﻣﻌﺔ ﺧﺎﺻﺔ ﻛﺪﺍ .. ﺧﺪﺭ ﻧﻮﻯ ﻓﻲ ﻧﻔﺴﻮ ﺍﻧﻮ ﻳﻤﺸﻲ ﻟﻴﻬﺎ ﻓﻲ ﺍﻟﺠﺎﻣﻌﺔ
.. ﻭﻛﺎﻥ ﻧﻔﺴﻮ ﻳﺸﻴﻞ ﺭﻗﻢ ﺗﻠﻔﻮﻧﻬﺎ .. ﻟﻜﻦ ﺍﻟﺸﻐﻠﻮ ﺷﻨﻮ ﻣﺎﻣﻌﺮﻭﻑ .. ﺍﻟﻤﻬﻢ ﺑﻌﺪ
ﺍﻟﻐﺪﺍ ﻋﻤﻚ ﻣﺼﻄﻔﻰ ﺣﺲ ﺍﻧﻮ ﺧﺪﺭ ﺍﻟﺒﺖ ﻋﺠﺒﺘﻮ .. ﻗﺎﻝ ﻟﻴﻬﻮ ﺍﻫﺎ ﻋﻨﺪﻙ ﺭﺍﻱ ؟
ﻭﻻ ﻧﺪﻳﻚ ﻓﺮﺻﺔ ﺗﻔﻜﺮ ..
ﻗﺎﻝ ﻟﻴﻬﻮ ﻓﺮﺻﺔ ﻓﻲ ﺷﻨﻮ . ؟ ﺍﻧﺎ ﻣﺎﺑﻜﺴﺮ ﻛﻠﻤﺔ ﺍﺑﻮﻱ ﻭﺍﻧﺖ ﺯﻭﻝ ﻧﺴﺒﻚ ﺷﺮﻑ
.. ﻭﺍﻟﺒﺖ ﺑﺖ ﻣﺎﻓﻴﻬﺎ ﻛﻼﻡ .. ﻳﻌﻨﻲ ﻳﻜﻮﻥ ﻋﻨﺪﻱ ﺭﺍﻱ ﻛﻴﻒ ﻳﺎﻋﻢ ﻣﺼﻄﻔﻰ؟ ..
ﺑﺲ ﺑﻌﺪ ﺩﻩ ﺷﻮﻑ ﺭﺍﻱ ﺍﻟﺒﺖ .. ﻭﺍﻧﺎ ﺟﺎﻫﺰ ﺑﻌﺪ ﺍﺳﺒﻮﻋﻴﻦ ﺑﺘﺰﻭﺝ ﻛﺎﻥ ﺩﺍﻳﺮ ..
ﻋﻤﻚ ﺩﻩ ﺍﺗﻜﻴﻒ ﻛﻴﻒ ﺷﺪﻳﺪ ﻭﺧﺪﺭ ﻣﺸﻰ ﻣﺒﺴﻮﻁ ..
ﻭﻧﺤﻦ ﻧﻤﺸﻲ ﻣﻦ ﺑﻴﺖ ﻧﺎﺱ ﻋﻤﻚ ﻣﺼﻄﻔﻰ ﻭﻧﺠﻴﻬﻢ ﻣﺮﺓ ﺗﺎﻧﻴﺔ ..
ﺗﺎﻧﻲ ﻳﻮﻡ ﻣﻦ ﺍﻟﻤﻮﺿﻮﻉ ﺩﻩ ﺣﺼﻠﺖ ﺗﻄﻮﺭﺍﺕ ﺧﻄﻴﺮﺓ ﻓﻲ ﻗﻀﻴﺔ ﻫﻨﺪﻭﻳﺔ .. ﻫﻨﺪ
ﻃﺒﻌﺎ ﻣﺸﺖ ﻟﻲ ﺧﺎﻟﺪﺓ ﻓﻲ ﺍﻟﺒﻴﺖ .. ﻭﻟﻘﺖ ﺍﻭﻻﺩﻫﺎ ﺑﻴﺒﻜﻮ ﺟﻴﻌﺎﻧﻴﻦ .. ﻭﺳﺄﻟﺘﻬﺎ
ﻣﻦ ﺍﺑﻮﻫﻢ ﻭﻳﻦ ؟؟ ﻭﻗﺎﻟﺖ ﻟﻴﻬﺎ ﻭﺍﻟﻠﻪ ﻟﻴﻬﻮ ﻳﻮﻣﻴﻦ ﻣﺎﻓﻲ .. ﻗﺎﻟﺖ ﻟﻴﻬﺎ ﻟﻴﻪ ﻣﺎ
ﺍﺗﺼﻠﺘﻲ ﻋﻠﻴﻬﻮ؟؟
ﻗﺎﻟﺖ ﻟﻴﻬﺎ ﻭﺍﻟﻠﻪ ﻣﺎﻧﻌﻨﻲ ﻳﺎﻫﻨﺪ .. ﻟﻜﻦ ﻋﻠﻴﻚ ﺍﻟﻠﻪ ﺍﺗﺼﻠﻲ ﻋﻠﻴﻬﻮ ﺍﻧﺘﻲ .. ﻗﻮﻟﻲ
ﻟﻴﻬﻮ ﺍﻭﻻﺩﻙ ﺩﺍﻳﺮﻳﻦ ﻳﻤﻮﺗﻮ ﻣﻦ ﺍﻟﺠﻮﻉ ..
ﻫﻨﺪ ﺷﺎﻟﺖ ﺍﻟﺮﻗﻢ ﻭﺍﺗﺼﻠﺖ ﻓﻲ ﺍﻟﺘﻠﻔﻮﻥ ﺑﻲ ﺍﻟﺴﻤﺎﻋﻪ ﺍﻟﺨﺎﺭﺟﻴﺔ .. ﺭﺩ ﻋﻠﻴﻬﺎ
ﺯﻭﻝ ﻗﺎﻝ ﻟﻴﻬﺎ ..
ﻧﺤﻦ ﻧﺎﺱ ﺍﻟﺸﺮﻃﺔ ﺍﻟﺰﻭﻝ ﺻﺎﺣﺐ ﺍﻟﺘﻠﻔﻮﻥ .. ﺩﻩ ﻟﻘﻴﻨﺎﻫﻮ ﻣﻀﺮﻭﺏ ﻭﻫﺴﻲ
ﺭﺍﻗﺪ ﻓﻲ ﺍﻟﻤﺴﺸﺘﻔﻰ .. ﻭﻣﺎﻓﻲ ﺯﻭﻝ ﺍﺗﺼﻞ ﻋﻠﻴﻬﻮ ﻫﻨﺎ ﻧﻬﺎﺋﻲ .. ﺍﻧﺘﻲ ﻣﻨﻮ ؟ ..
ﻗﺎﻟﺖ ﻟﻴﻬﻮ ﺳﺠﻤﻲ ﻣﺎﻟﻮ ؟ ﺍﻧﺎ ﺻﺤﺒﺔ ﺯﻭﺟﺘﻮ .. ﻗﺎﻝ ﻟﻴﻬﺎ ﻭﻳﻨﻬﺎ ﺯﻭﺟﺘﻮ؟؟ ﺧﻠﻴﻬﺎ
ﺗﺠﻴﻨﺎ ﻓﻲ ﺍﻟﻤﺴﺘﺸﻔﻰ ﺍﻟﻔﻼﻧﻲ ..
ﺧﺎﻟﺪﺓ ﺗﺴﻤﻊ ﻓﻲ ﺍﻟﻤﻜﺎﻟﻤﺔ ﺟﺎﻫﺎ ﺍﻧﻬﻴﺎﺭ ﻟﻤﻦ ﻭﻗﻌﺖ .. ﻫﻨﺪ ﺭﻓﻌﺘﻬﺎ ﻭ ﻗﺎﻟﺖ ﻟﻴﻬﺎ
ﺍﻣﺸﻲ ﻟﻴﻬﻮ ﻳﺎﺧﺎﻟﺪﺓ .. ﺷﻮﻓﻲ ﺍﻟﺤﺎﺻﻞ ﻋﻠﻴﻬﻮ ﺍﻧﺎ ﻣﺎﺑﻘﺪﺭ ﺍﻣﺸﻲ ﻣﻌﺎﻙ .. ﺑﺲ
ﺧﻠﻴﻚ ﻣﺘﻮﺍﺻﻠﺔ ﻣﻌﺎﻱ ..
ﺧﺎﻟﺪﺓ ﻗﺎﻟﺖ ﻟﻴﻬﺎ ﻋﻠﻴﻚ ﺍﻟﻠﻪ ﻳﺎﻫﻨﺪ ﺩﻳﻨﻴﻨﻲ ﺍﻥ ﺷﺎﺀ ﺍﻟﻠﻪ ﻋﺸﺮﻳﻦ ﻟﻤﻦ ﺍﺭﺟﻊ ..
ﺍﺩﺗﻬﺎ ﺍﻟﻌﺸﺮﻳﻦ .. ﻗﺎﻟﺖ ﻟﻴﻬﺎ ﻣﻌﻠﻴﺶ ﺣﺒﻴﺒﺘﻲ ﻣﻤﻜﻦ ﺍﻃﻠﺐ ﻣﻨﻚ ﻃﻠﺐ ﺗﺎﻧﻲ ..
ﺳﻮﻗﻲ ﻣﻌﺎﻙ ﺧﻠﻮﺩﻱ . ﺍﻧﺎ ﺑﺸﻴﻞ ﺍﺑﺮﺍﺭ .. ﺧﺎﻟﺪ ﻭﻟﺪ ﺧﺎﻟﺪﺓ .. ﻃﻴﻮﺑﻲ ﻭﺑﺴﻤﻊ
ﺍﻟﻜﻼﻡ ﻃﻮﺍﻟﻲ ﻣﺸﻰ ﻣﻊ ﻫﻨﺪ .. ﻭﺳﺎﻗﺘﻮ ﻣﺮﻗﺖ ﻣﻨﻬﺎ ﻣﺸﺖ ﻋﻠﻰ ﺍﻫﻠﻬﺎ ..
ﺧﺎﻟﺪﺓ ﻃﻠﻌﺖ ﻏﺸﺖ ﺍﻭﻝ ﺩﻛﺎﻥ ﺍﺷﺘﺮﺕ ﻟﻲ ﺑﺘﻬﺎ ﻛﻴﻜﺔ ﺍﻟﺼﻐﻴﺮﺓ ﺍﻟﺒﻴﺎﻛﻠﻮﻫﺎ ﻣﻊ
ﺍﻟﺸﺎﻱ ﺩﻳﻚ .. ﻭﺭﻛﺒﺖ ﻣﺸﺖ ﺍﻟﻤﺴﺘﺸﻔﻰ .. ﻭﻫﻲ ﻣﻦ ﺍﻟﺒﺎﺭﺡ ﻣﺎ ﺍﻛﻠﺖ .. ﻭﺻﻠﺖ
ﺍﻟﻤﺸﺘﺸﻔﻰ ﻭﺍﺗﺼﻠﺖ ﺗﺎﻧﻲ .. ﺭﺩ ﻋﻠﻴﻬﺎ ﺍﻟﻌﺴﻜﺮﻱ ﻭﻭﺻﻒ ﻟﻴﻬﺎ .. ﺟﺎﺕ ﻟﻘﺖ
ﺍﻟﺰﻭﻝ ﻓﻲ ﻏﻴﺒﻮﺑﺔ .. ﻭﻣﺎﻋﺮﻓﺖ ﺗﻌﻤﻞ ﺷﻨﻮ .. ﻭﺍﺩﻭﻫﺎ ﺍﻟﻔﻮﺍﺗﻴﺮ ﺑﺘﺎﻋﺔ ﺍﻻﺩﻭﻳﺔ
ﻭﺍﻻﺳﻌﺎﻓﺎﺕ .. ﻃﻮﺍﻟﻲ ﺍﺗﺼﻠﺖ ﻋﻠﻲ ﻧﺴﺮﻳﻦ ﻭﻗﺎﻟﺖ ﻟﻴﻬﺎ ﺗﺠﻴﻨﻲ ﻭﺩﺍﻳﺮﺓ ﺗﺘﺼﻞ
ﻋﻠﻰ ﺧﻀﺮ .. ﺍﺗﺮﺩﺩﺕ ﺍﺗﺬﻛﺮﺕ ﺍﻧﻮ ﻗﺎﻝ ﻟﻴﻬﺎ ﻧﺤﻦ ﺍﻫﻠﻚ .. ﻃﻮﺍﻟﻲ ﺍﺗﺼﻠﺖ ﻋﻠﻴﻮ ..
ﻗﺎﻟﺖ ﻟﻴﻬﻮ ﺣﺎﺻﻞ ﺣﺎﺻﻞ .. ﺧﺪﺭ ﻧﻔﺾ ﻳﺪﻭ .. ﻭﺭﻛﺐ ﻃﻮﺍﻟﻲ ﺟﺎﻫﺎ .. ﻭﻗﺎﻡ
ﺑﺎﻟﻮﺍﺟﺐ ﻭﺯﻳﺎﺩﺓ .. ﻭﺩﻓﻊ ﻛﻞ ﺍﻟﻔﻮﺍﺗﻴﺮ .. ﻭﻧﺴﺮﻳﻦ ﻭﺻﻠﺖ .. ﻭﻣﻌﺎﻫﺎ ﺯﻭﺟﻬﺎ
ﺍﻟﺮﺍﺟﻞ ﺍﻟﻄﻴﺒﺎﻥ ﺩﺍﻙ ﺍﻟﻼﻗﻴﻨﺎﻫﻮ ﻓﻲ ﺍﻟﺤﻔﻠﺔ .. ﻭﺣﻤﺎﺩﺓ ﺍﻟﺼﻌﻨﻮﻥ ﺷﺎﻳﻼﻫﻮ ..
ﻭﺑﻘﻮ ﻛﻠﻬﻢ ﻭﺍﻗﻔﻴﻦ ﻣﻌﺎﻫﺎ ﻭﻗﻔﺖ ﺧﻮﺓ ﺟﺪ ﺟﺪ ﻭﺍﻟﻠﻪ ..
ﺍﻇﻦ ﺗﻼﺗﺔ ﺍﻳﺎﻡ ﻣﺮﺍﺑﻄﻴﻦ ﻓﻲ ﺍﻟﻤﺴﺘﺸﻔﻰ .. ﺧﺪﺭ ﻳﻄﻠﻊ ﻳﺨﻠﻬﻢ ﻣﻌﺎﻫﺎ ..
ﻋﺒﺪﺍﻟﻤﺠﻴﺪ ﻳﻄﻠﻊ ﻳﺨﻠﻲ ﺧﺪﺭ ﻭﻧﺴﺮﻳﻦ ﻣﻌﻬﺎ .. ﺑﻌﺪ ﺗﻼﺗﺔ ﻳﻮﻡ ﺟﺎﺕ ﻫﻨﺪ ﻭﺍﻣﻬﺎ
ﻭﺟﺎﺑﻮ ﻣﻌﺎﻫﻢ ﺧﻠﻮﺩﻱ ﺍﻟﺼﻐﻴﺮ .. ﻭﻟﻘﻮ ﺧﺪﺭ ﻭﻧﺴـــﺮﻳﻦ ﻓﻲ ﺍﻟﻤﺴﺘﺸﻔﻰ ..
ﻭﺍﻗﻔﻴﻦ ﻣﻊ ﺧﺎﻟﺪﺓ .. ﻭﺧﺪﺭ ﺩﻩ ﻟﻤﻦ ﻭﺷﻮ ﺷﺎﺣﺐ ﻣﻦ ﺍﻟﺘﻌﺐ ﻭﺍﻻﺭﻫﺎﻕ ..
ﻫﻨﺪ ﻟﻤﻦ ﺷﺎﻓﺖ ﺧﺪﺭ ﻟﻤﻦ ﺩﺍﻳﺮﺓ ﺗﺠﻴﻬﺎ ﻏﻴﺒﻮﺑﺔ .. ﻭﺑﻘﺖ ﺗﺮﺟﻒ ﺯﻱ ﺍﻟﻘﺼﺒﺔ
ﻻﺣﻆ .. ﺗﻼﺗﺔ ﺳﻨﺔ ﻣﺎ ﺍﺗﻼﻗﻮ .. ﻭﺧﺪﺭ ﻋﺎﻳﻦ ﻟﻴﻬﺎ ﻛﺪﺍ ﺑﻲ ﻃﺮﻑ ﻋﻴﻨﻮ ﻟﻘﺎﻫﺎ ﻟﻴﻚ
ﺍﺗﺒﺸﺘﻨﺖ ﻭﺑﻘﺖ ﺯﻱ ﺷﻴﻄﺎﻥ ﺍﻟﺠﺒﺎﻝ .. ﻭﺷﻬﺎ ﻣﺎﺑﺘﻘﺎﺑﻞ .. ﺑﻘﻰ ﻳﻘﻮﻝ .. ﻭﺍﻟﻠﻪ ﺍﻧﺎ
ﻛﻨﺖ ﺡ ﺍﺩﻗﺲ ﺩﻗﺴﻪ ﻣﺒﺎﻟﻎ ﻓﻴﻬﺎ .. ﺍﻟﺤﻤﺪ ﻟﻠﻪ ﺍﻟﺮﺑﻨﺎ ﺻﺮﻓﻚ ﻣﻨﻲ ﻳﺎ ﻣﺴﻴﻠﻤﺔ
ﺍﻟﻜﺬﺍﺏ ..
ﺍﻡ ﻫﻨﺪ ﺑﻌﺪ ﺷﺎﻓﺖ ﺧﺪﺭ .. ﺷﻜﺖ .. ﻳﺎﺭﺑﻲ ﺩﻩ ﺍﻟﺰﻭﻝ ﺍﻟﺰﻣﺎﻥ ﻛﺎﻥ ﺩﺍﻳﺮ ﻫﻨﺪ؟ ﻭﻻ
ﻣﺎﻳﺎﻫﻮ؟ .. ﺑﻌﺪ ﺷﻮﻳﺔ ﻧﺎﺩﺕ ﻫﻨﺪ ﺑﺮﺍﻫﺎ .. ﻗﺎﻟﺖ ﻟﻴﻬﺎ .. ﺍﺳﻤﻌﻲ ﻳﺎﻫﻨﺪﻭﻳﺔ ﺗﻌﺎﻟﻲ
ﺍﻗﻮﻝ ﻟﻴﻚ .. ﺍﻧﺘﻲ ﺩﻩ ﻣﻮﺵ ﺧﺪﺭ ﺍﻟﻜﺎﻥ ﺩﺍﻳﺮﻙ ﺯﻣﺎﻥ؟
ﻗﺎﻟﺖ ﻟﻬﺎ ﺍﻳﻮﺓ ﻳﺎﻫﻮ .. ﻗﺎﻟﺖ ﻟﻴﻬﺎ ﻣﺎﺷﺎﺀ ﺍﻟﻠﻪ ﻳﺎﻳﻤﺔ ﺻﻐﻴﺮ ﻭﺟﺎﻫﻞ ﻭﺍﻟﻠﻪ .. ﺍﺭﻳﺘﻨﺎ
ﻛﺎﻥ ﻗﺒﻠﻨﺎ ﺑﻴﻬﻮ .. ﺍﺧﻴﺮ ﻣﻦ ﺍﻟﺮﺍﺟﻞ ﺍﻟﺤﺮﺍﻣﻲ ﺍﻟﻄﺮﻃﻮﺭ ﺩﺍﻙ ..
ﻗﺎﻟﺖ ﻟﻴﻬﺎ ﺷﻨﻮ ﻳﺎ ﺍﻣﻲ ﻳﻌﻨﻲ ﻋﺎﻳﺰﺓ ﺗﺤﺴﺴﻴﻨﻲ ﺑﺎﻟﻨﺪﺍﻣﺔ ؟؟ﻣﺎﻗﻠﻨﺎ ﻛﻠﻬﺎ ﻗﺴﻢ
.. ﻭﻣﺎﻋﺎﻳﺰﺓ ﺍﻗﻮﻝ ﻣﻨﻮ ﺍﻟﻜﺎﻥ ﺍﻟﺴﺒﺐ . ﺧﻠﻴﺘﻬﺎ ﻟﻲ ﺍﻟﻠﻪ ﺳﻤﻴﺔ ﺑﺎﻟﺴﻢ ﺍﻟﻴﻘﺘﻠﻬﺎ ..
ﻗﺎﻟﺖ ﻟﻴﻬﺎ ﻋﻠﻴﻚ ﺍﻟﻠﻪ ﻳﺎﻫﻨﺪﻭﻳﺔ ﻻﻫﺴﻲ ﻣﺎ ﻋﺮﺱ ؟ ﻗﺎﻝ ﻟﻴﻬﺎ ﺗﺼﺪﻗﻲ ﻟﺴﻊ ؟؟
ﻗﺎﻟﺖ ﺍﻫﺎ ﻣﺎﻋﺎﺭﻑ ﺍﻧﻚ ﺍﺗﻄﻠﻘﺘﻲ ؟ ﻗﺎﻟﺖ ﻟﻴﻬﺎ ﻻﺯﻡ ﻳﻜﻮﻥ ﻋﺎﺭﻑ .. ﺧﺎﻟﺪﺓ ﺑﺘﻜﻮﻥ
ﺣﻜﺖ ﻟﻴﻬﻮ .. ﻗﺎﻟﺖ ﻟﻴﻬﺎ ﻣﻌﻨﺎﻫﺎ ﻗﺮﻳﺐ ﺑﺠﻲ ﻳﻤﺪ ﻳﺪﻭ .. ﻭﻳﻘﻮﻝ ﺩﺍﻳﺮ ﻙ ﺍﺻﺒﺮﻱ ..
ﻗﺎﻟﺖ ﻳﺎﺭﻳﺖ ﻳﺎ ﺍﻣﻲ ﻳﺎﺭﻳﺖ .. ﺍﻟﻤﻬﻢ ﺑﻌﺪ ﺷﻮﻳﺔ ﻃﻠﻌﻦ ﻫﻲ ﻭﺍﻣﻬﺎ ﻭﺧﻠﻦ ﺍﻟﻮﻟﺪ
ﻣﻊ ﺍﻣﻮ ﻓﻲ ﺍﻟﻤﺴﺘﺸﻔﻰ .. ﺑﻌﺪ ﻃﻠﻌﻦ ﺑﻲ ﻋﺸﺮﺓ ﺩﻗﺎﻳﻖ ﺍﻟﺪﻛﺘﻮﺭ ﺟﺎ ﻗﺎﻝ
ﺍﻟﺰﻭﻝ ﺩﻩ ﺍﻓﺎﻕ ﻣﻦ ﺍﻟﻐﻴﺒﻮﺑﺔ ..
ﻟﻜﻦ ﺍﻭﻝ ﺷﻲ ﻋﺎﻳﺰ ﻳﺘﻜﻠﻢ ﻣﻌﺎﻫﻮ ﺍﻟﻌﺴﻜﺮﻱ ﻋﺸﺎﻥ ﻧﺸﻮﻑ ﺍﻟﻀﺮﺑﻮ ﻣﻨﻮ؟
ﺍﻟﻲ ﺍﻟﻠﻘﺎﺀ