الأصابع الشريفة.. طارق اللبيب

الحــلقة الثامنة

ربك رب الخيرخدر قطع الشارع بي سلامة .. بالرغم من انو في واحد بتاع بوكسي حك فرملة.. لامن لساتكو جابن دخان .. بي سبب الزول القاطع الشارع بدون مايعاين ده .. كورك فيهو يازول انت اعمى ولاشنو ؟؟ وطبعا" بتاع البوكسي ماعارف الحاصل عليهو .. لو عارف الحاصل كان عذرو ..
كان المفروض في شارع زي شارع واحد .. شارع قاطع نص حي سكني .. ناس العربات يمشو بهدوء شوية ..
لانك مابتعرف ظروف الناس.. ونفسياتهم وملابساتهم ومشاكلهم ..
خدر قطع .. ومشى .. ماشي لي جيهة الشرق .. لامن قرب لي شارع الردمية .. وجسمو منهار ووصدرو مسخن .. وعيونو مولعة نار .. وحاسي بي انو جاتو حمى .. فجأه قعد في نص الشارع .. الفي نص الحلة ..وخاتي يديهو في راسو .. وكل الالم الجواهو مركز في حتة واحدة ..بقول ياربي التغيير الحصل لي هندوية.. وخلاها تستسلم بي سهولة كدا شنو؟ ..
حتما" السبب ما امها .. انا متاكد السبب ما امها .. هندوية كانت مصرة علي وما كانت شايلة هم من امها .. هند شكلها قنعانة مني شديد .. ومستعجلة تقفل مني التلفون على غير العادة ..

هندوية قبل كدا قالت لي يا انت يا الموت .. ولو فرضنا . من امها معقول امها تكون وصلت الدرجة دي ؟ وليه ؟ السبب شنو؟
يعني انا فيني شنو عشان امها تنتحر عشاني انا ؟ لازم الحكاية دي وراها كلام ..
انا غايتو متأكد انو في حاجة غيرت هندوية . هندوية ما دايرة تقبل مني اي اقتراح .. هندوية شكلها قنعت مني .. ياربي تكون دي نسرين رجعت تاني تخبز وتعجن بي وراي ؟
والتفكير داير يشل راسو .. خدر بالجد كان حزين وماهاين عليهو انو يفقد البت ..
اها في سبيل ازيار كدا قريب منو مشى غسل وشيهو وكب كوز موية فوق راسو .. ورجع البيت .. الليل داك كلو مانام ولا نعس .. يتقلب في السرير زي الملدوغ ..
وقام الصباح بدري قبل الاذان قعد في نص السرير .. وخاتي يديهو في راسو .. لامن جات صلاة الصبح .. قام صلى وتاني مانام .. شال التلفون داير يضرب التلفون بتاع هندوية .. اتردد كتير .. طلع الرقم تلات مرات وقفلو راجع كلو مرة يدور يتصل عليها يغير رايو ..
مشى شال المليون ونص رجعن لي الصادق .. وقال ليهو خلاص ماعندي ليهن حوجة ..
الصادق قال ليهو ..يازول مالك في شنو؟ قال ليهو الموضوع انتهى .. البت امها رافضة .. وخليناهو الموضوع ربنا يسهل ..
ولبس وطلع مع انو الليلة ماعندو شغل .. ماعارف نفسو ماشي وين .. ولا انا عارفو ماشي وين المهم مرق ..
بهناك طبعا هندوية .. الصباح بتحضر في الكلام عشان توصل الخبر بتاع الموافقة لي امها.. ولي خالتها سمية .. وفعلا النهارية كدا وامها قاعدة براها .. قالت ليها يا امي ؟ قالت ليها نعم ياهندوية ..
قالت ليها انتي هسي شايفة معتز ده مناسب لي ؟ ..
قالت ليها عاد يابتي عندك المحن .. انتي من متين بتسأليني عن راي في البناسب ليك والمامناسب ليك؟؟ ..
دي حياتك وانتي مخيرة فيها .. وافقتي خلينا نضرب هسي لي خالتك سمية .. دايرة خدر بتاعك ده انا ماعندي مانع .. سبحان الله شوف الام .. لمن لقت البت راخية .. دايرة تعمل فيها ماهاميها الموضوع ... لكن الحقيقة اقبال دايرة معتز اكتر من بتها .. والبت فاهمة امها كويس.. وعارفاها عاملة تقيله ..
قالت ليها خلاص يا امي.. انا موافقة بي معتز.. وخدر خليتو موش دي رغبتك؟.. قالت ليها كانت رغبتي زمان .. وانتي ابيتي تسمعي كلامي.. لامن شفتي معتز .. بقت رغبتك انتي يختي.. ماتسويها فيني انا ..
هند قعدت تضحك .. وقالت ليها غايتو انتي يا امي ..
اقبال قالت ليها هسي انتي خدر اتكلمتي معاهو؟ .. ولا دايرة تخليهم الاتنين في الخط .. يقبض البقبض والبفك يفك؟؟
قالت ليها لالا.. انا من امبارح كلمت خدر.. وخلاص انتهينا من الحكاية دي ..
قالت ليها خدر ياهندوية لو زولا" فيهو فايدة.. كنت بقول ليك خليهو في الرف.. لكن ده الرف ذاتو كتير عليهو.. احسن شي اتخلتي منو ..
خلاص بس اديني فرصة.. اخلص من الفي يدي .. ونجي نضرب لي خالتك سمية ..
فعلا ضربن لي سمية.. واتكلمت معاها اقبال .. قالت ليها ياسمية هندوية دي خلاص اقتنعت بعد تعب والله ..
سميه قالت ليها انتي متاكدة يا اقبال ؟ قالت ليها تمام التاكد .. عايزة تتكلمي معاها؟؟ تتاكدي بي نفسك ؟؟ .. هاك ليها .. هاك يا هندوية خالتك سمية ..
هندوية شالت التلفون وقالت ليها .. اهلين ياخالتي سميه كيفك؟
سمية قالت ليها خلاص ياهندوية ..؟؟ اخدتي راحتك في التفكير؟ قالت ليها ايوة خلاص.. ربنا يسوي الفيها خير ..
قالت ليها خلاص.. انا بديهو تلفونك ينسق معاك .. وتتفقو علي كل شي .. على كل حال.. الان هندوية امورة مشت زي الباسطه ..
خدر النهار كلو طاش بي بحري .. واصلو بس مخو كلو كلو ماوقف من التفكير .. بس اخر حاجة رسى تفكيرو في نسرين .. وخاتي انها هي السبب في الموضوع ده .. تكون خلقت فتنة تاني ..
يعني حكاية انو الرفض من الام القصة دي ماركبت ليهو في راسو ..
قام اتصل على نسرين ..
قال ليها انتي وين؟؟ قالت ليهو انا في ام درمان عند ناس خالتي.. في ابروف .. قال ليها انا عايز الاقيك هسي ممكن؟؟..
قالت ليهو في شنو ياخدر؟؟ صوتك ماطبيعي .. انت وين؟ انا بجيك هسي .. قال ليها انا في بحري .. قالت ليهو مسافة السكة ..
وصف ليها هو وين.. بعد نص ساعة كانت معاهو ... اول من جات شافتو .. قالت ليهو انت ياخدر مالك ؟ مالو شكلك كدا؟ انت عيان؟ قال ليها خليني انا مالي .. ماعندك شغلة معاي المشكلة انتي .. انتي يا نسرين زمنك كلو .. عايشة معانا بالطيبة وصفاء النية .. دي شنو الحركات البديتي تعملي فيها دي ؟.. قالت ليهو حركات شنوياخدر قول بسم الله ؟
طوالي اتذكرت الكلام القالتو لي هندوية ..
قال ليها موش انت هدفك الاساسي انو هنوية تتخلا عني؟؟ اهو خلاص البينا انتهي .. ياريت تكوني ارتحتي .. مشيتي فتنتي بيني وبينها عشان تخليني ليك .. خلاص يانسرين هدفك تم .. قالت ليهو بس متين الكلام ده طول والله .. وانتو بعدو كنتو عاديين انا متابعة ..
قال ليها انتي اصلا ما وقفت خساستك.. وقوالتك .. بس نفسي اعرف انك قلتي ليها شنو ..
قالت ليهو والله ماح اكذب عليك .. وده كلو عشان انا عايزاك.. ماعندي هدف تاني ..
قال ليها انتي عارفة اني بحب هندوية .. وعايز اتزوجها .. وانتي ماعندي رغبة في زواج منك..
يعني ح تعملي شنو غير الحسادة .. يعني ماعملتي حاجة .. هندوية خلتني .. وانتي لو بقيتي اخر واحدة في الدنيا .. انا ماعايزك .. بس انا مابسيبك ..خليك عارفة انا ح انتقم فيك .. انتي عارفة انا مابسيبك تنفدي بي عملتك دي ..
قالت ليهو طيب انا بحكي ليك .. انا بس قلت ليها يوم الحدايق انت كنت معاي .. قال ليها لالا بعد الحكاية ديك .. لانو ديك لاقتني وانا وريتها الحقيقة .. وهي اقتنعت وكنا عاديين صاح .
قالت ليهو والله يا خدر بس ياها ديك .. لكن تاني ما اتصلت عليها.. اقسم بالله تاني ما اتصلت عليها .. لن شالله ربنا يشل امي وابوي .. طبعا" هو عارف لمن نسرين تقول ان شاء الله ربنا يشل امي وابوي مابتكذب ..
قالت ليهو الا يكون عندكم مشكلة براكم ..
طبعا" صدقها طوالي وزعلو منها كلو راح في لحظة .. وقال ليها والله مافي اي مشكلة يانسرين .. طيب لو ما انتي عملتيها ..معناها مالا ياربي؟؟ .. وحكى ليها الحصل .. نسؤين ماعرفت تشمت ولا تتاثر لي حالة خدر ..
قالت ليهو المهم انت صدقتني؟.. قال ليها صدقتك ..المؤمن صديق .. انت وكت تكذبي كذبك ظاهر لانك هبلة .. ومابتتمني الشلل لامك وابوك ..
قالت ليهو كويس بس انت اديني فرصة.. وانا والله بعرف ليك هي مالا .. ولو في اي بصيص امل برجعها ليك اقسم بالله .. بس وصف لي بيتهم .. وخلي تلفونك فاتح ..
قال ليها لالا .. ابدا .. انتي ماتدخلي في الموضوع ده.. انتي لو عايزة تخدميني .. هند عندها جارتها.. وصاحبتها شديد.. اسمها خالدة بعرفها وبتعرفني .. بس تلفونها مامعاي .. عايزك تجيبي لي تلفوونها .. وبس .. لو قدرتي تكوني ماقصرتي معاي ..
قالت ليهو جدا بس اجيبو كيف؟ واعرفها كيف؟ .. قام خدر وصف ليها بقالة قريبة من بيت ناس هنوية .. قال ليها امشي لي سيد البقالة .. اساليهو من بيت بت اسمها خالدة يوسف .. ولمن تصليها قولي ليها خدر خطيب هندوية داير رقمك وبس ..
قالت ليهو جدا ده موضوع اسهل من ما تتصور .. اخدمك بعيوني ياخدر ..
وفعلا نسرين ركبت ركشة من بحري.. ومشت حلة حمد.. وصلت البقالة ..على حسب الوصف .. وسألت من خالده يوسف.. وبتاع البقالة قال ليها والله بيت ناس يوسف يهداك.. الفاتح في وشك ده .. لكن لو عندو بت اسمها خالدة ولالا ماعارف ..
مشت طوالي دقت الباب .. جات فتحت ليها الباب مراة كبيرة.. نسرين قالت ليها .. السلام عليكم ياخالة .. قالت ليها عليكم السلام ..
نسرين قالت ليها دا بيت ناس خالدة؟ قالت ليها نعم.. حبابك اتفضلي .. طوالي نسرين بقت خاشة .. ودخلت لقت ليك خالدة .. رحبت بيها ..
قالت ليها ياخالدة انا عايزة الزيارة دي تكون سرية وكدا .. انا نسرين بت خالة خدر .. خدر خطيب هندوية ..قالت ليها ايوة بعرفو تماما .. قالت ليها الحقيقة ياخالدة .. في مشكلة حاصلة بين خدر وهندوية .. وخدر مالاقي يتواصل معاها .. عشان يعرف منها السبب .. وطلب مني رقمك مخصوص .. عشان تكوني واسطة خير .والله ..
قالت ليها جدا .. اديهو ليهو.. خدر بعرفو شديد.. امكن لاقيتو مرتين مع هندويه .. وهو والله محل ثقة ..
بس المشكلة شنو؟.. قالت ليها والله طبعا هندوية قطعت علاقتها مع خدر.. وخدر ماقادر يتحمل القصة دي .. وعايز يعرف السبب ..
لانها قالت ليهو بس امي رافضة .. ومابيه الاكل والشراب .. وهو شكلو ما مقتنع بالحتة دي .. وعايز يشوف معاك لو في امل في العلاقة دي ترجع ولالا ..
قالت ليها والله للاسف يانسرين .. هندوية كذابة .. وماصدقت مع الولد .. هندوية خلت خدر بمحض ارادتها.. ولا امها ولاشي .. اسأليني انا من الموضوع .. هندوية جاها عريس ..
اخو راجل خالتها .. ومغترب ووضعو كويس .. وهندوية فكرت بي مستقبلها .. وما ختت اعتبار لي خدر .. لانو صراحة خدر قدامو زمن.. عشان يكون نفسه.. وانتي عارفة البت الزمن مافي صالحها ..
غايتو ده رايها .. وانا شخصيا" اقتنعت بيهو ..
قالت ليها كلامك صح .. بس انا عايزاك تقولي الكلام ده لي خدر.. لانو شكله لسع منتظرها .. طبعا" نسرين عايزة الكلام يصل لي خدر من زول غيرها هي .. لانها عارفاهو مابثق فيها .. وح يقول عايزه تطفشني منها .. عشان كدا قالت لي خالدة قولي ليهو الكلام ده انتي ..
خالدة قالت ليها اديني رقمو اتصل عليهو هسي .. واوضح ليهو الكلام الماعارفو .. واحكي ليهو الحقيقة .. لانو انسان صادق ويستحق يعرف الحقيقة وتتكلم براها زعلانة .. وشايلة التلفون تنقل في الرقم .. واتصلت علي خدر ..
الى اللقاء ..