الأصابع الشريفة.. طارق اللبيب

الحــلقة العشرون

ﻋﻤﻚ ﺍﻟﺤﺴﻴﺐ .. ﻗﺎﻝ ﻟﻴﻬﻮ .. ﻭﺍﻟﻠﻪ ﻃﺒﻌﺎ" ﺍﻧﺎ ﺯﻱ ﻣﺎﻭﻋﺪﻙ ﻓﻲ ﺑﺪﺍﻳﺔ ﻛﻼﻣﻲ
ﻣﺎﺑﻘﻴﻒ ﻗﺪﺍﻣﻚ .. ﻭﻳﻤﻨﻌﻚ ﺗﺘﺰﻭﺝ ﺍﻻﻧﺴﺎﻧﺔ ﺍﻟﺒﺘﺨﺘﺎﺭﻫﺎ ﺑﺲ ﺑﺲ ﻧﺘﻨﺎﻗﺶ .. ﺍﻧﺖ
ﺯﻭﻝ ﺻﺒﻲ ﻭﻣﺎﻣﺘﺰﻭﺝ ﻛﻴﻒ ﺗﺘﺰﻭﺝ ﻟﻴﻚ ﻭﺍﺣﺪﺓ ﻣﺘﺰﻭﺟﺔ ﻗﺒﻞ ﻛﺪﺍ؟ .. ﻭﻛﻤﺎﻥ
ﻋﻨﺪﻫﺎ ﺟﻨﺎﻳﻴﻦ؟ ..
ﻗﺎﻝ ﻟﻴﻬﻮ ﻭﺍﻟﻠﻪ ﺍﻧﺎ ﺍﺻﻼ ﺭﻏﺒﺘﻲ ﺍﻛﻔﻞ ﺍﻻﻳﺘﺎﻡ .. ﻭﺍﻣﻬﻢ ﻛﻤﺎﻥ ﺯﻭﻟﺔ ﺧﻠﻮﻗﺔ
ﻭﺻﺎﺩﻗﺔ .. ﻭﺻﻐﻴﺮﺓ ﻓﻲ ﺍﻟﺴﻦ .. ﻳﻌﻨﻲ ﺍﺻﻐﺮ ﻣﻦ ﺍﻟﺒﺖ ﺍﻟﻜﻨﺖ ﺩﺍﻳﺮﻫﺎ ﺍﻭﻝ ﺩﻳﻚ
.. ﺍﻻﺳﻤﻬﺎ ﻫﻨﺪ .. ﺍﻻﺑﺘﻨﻲ ﻋﺸﺎﻥ ﻣﻔﻠﺲ .. ﻣﺘﺬﻛﺮﻫﺎ؟ .. ﻗﺎﻝ ﻟﻴﻬﻮ ﺍﻳﻮﻩ ﺍﻳﻮﺓ
ﺍﻟﺴﺎﻛﻨﻴﻦ ﺣﻠﺔ ﺣﻤﺪ ..
ﻭﻓﻌﻼ ﻳﺎﺟﻤﺎﻋﻪ . ﺧﺎﻟﺪﺓ ﺍﺻﻐﺮ ﻣﻦ ﻫﻨﺪ ﺑﻲ ﺳﻨﺔ ﻭﺗﻼﺗﺔ ﺷﻬﻮﺭ .. ﻟﻜﻦ ﺍﻋﻘﻞ
ﻣﻨﻬﺎ ﺑﻲ ﻋﺸﺮﻳﻦ ﺳﻨﺔ ..
ﺍﻫﺎ ﻋﻤﻚ ﺍﻟﺤﺴﻴﺐ ﻗﺎﻝ ﻟﻴﻬﻮ ﻭﺍﻟﻠﻪ ﺍﻟﺤﻜﺎﻳﺔ ﺩﻱ .. ﻣﺸﺎﻛﻠﻬﺎ ﻛﺘﻴﺮﺓ ﻭﺍﻫﻠﻬﺎ ﺡ
ﻳﺴﺘﻐﻠﻮﻙ .. ﻭﻛﺎﻥ ﻟﻲ ﺍﻻﻳﺘﺎﻡ ﻣﻤﻜﻦ ﺗﺘﻜﻔﻞ ﺑﻴﻬﻢ .. ﺑﺲ ﻣﺎﺷﺮﻁ ﺗﻌﺮﺱ ﺍﻣﻬﻢ ..
ﻗﺎﻝ ﻟﻴﻬﻮ ﻳﺎ ﺍﺑﻮﻱ ﺍﻧﺎ ﺭﻏﺒﺘﻲ ﻓﻲ ﻛﻔﺎﻟﺔ ﺍﻻﻳﺘﺎﻡ ﻣﻦ ﻃﺮﻳﻖ .. ﻭﺭﻏﺒﺘﻲ ﻓﻲ
ﺷﺨﺼﻴﺔ ﺧﺎﻟﺪﺓ ﻣﻦ ﻃﺮﻳﻖ .. ﺍﻧﺎ ﻋﺎﻳﺰ ﺧﺎﻟﺪﺓ ﻟﻲ ﺫﺍﺗﻬﺎ ﻭﺍﻟﻠﻪ ..
ﺍﻧﺎ ﻃﻮﻝ ﻋﻤﺮﻱ ﺑﺘﻤﻨﻰ ﺍﻧﺴﺎﻧﺔ ﺯﻱ ﺧﺎﻟﺪﺓ .. ﺳﻤﺎﺣﺔ ﻭﺍﺧﻼﻕ ﻭﺍﻟﻠﻪ ﻳﺎ ﺍﺑﻮﻱ
ﻳﺎﺭﻳﺘﻚ ﻟﻮ ﺷﻔﺘﻬﺎ .. ﺍﻟﺮﺯﺍﻧﺔ ﻓﻮﻕ ﻭﺷﻴﻬﺎ ﺗﺬﻛﺮﻙ ﺍﻟﺠﻨﺔ ..
ﺑﻌﺪﻳﻦ ﻣﺎﻋﻨﺪﻫﺎ ﺍﻫﻞ ﺑﻀﺎﻳﻘﻮﻧﻲ .. ﺍﻣﻬﺎ ﻭﺍﺑﻮﻫﺎ ﻣﺘﻮﻓﻴﻴﻦ ﻭﻣﺎﻋﻨﺪﻫﺎ ﺍﻗﺎﺭﺏ ..
ﻣﺴﻜﻴﻨﺔ ﺍﻟﻠﻪ ﻭﺍﻟﺮﺳﻮﻝ .. ﻛﺎﻧﺖ ﻓﻲ ﺣﻤﻰ ﺯﻭﺟﻬﺎ .. ﻭﺯﻭﺟﻬﺎ ﺍﻟﻠﻪ ﻳﺮﺣﻤﻮ
ﺍﺗﻮﻓﻰ ..
ﺑﻌﺪﻳﻦ ﻓﻲ ﺣﺎﺟﺔ ﻣﻬﻤﺔ .. ﺍﺫﺍ ﺍﺗﺰﻭﺟﻬﺎ ﺭﺍﺟﻞ ﻏﻴﺮﻱ .. ﻣﻦ ﺣﻘﻮ ﻳﻤﻨﻌﻨﻲ ﻣﻦ
ﻛﻔﺎﻟﺔ ﺍﻻﻳﺘﺎﻡ .. ﻭﻳﺘﺒﻨﺎﻫﻢ ﻻﻧﻮ ﺯﻭﺝ ﺍﻣﻬﻢ ﻭﺭﺑﻴﺒﻬﻢ ﺑﺎﻟﺸﺮﻉ ..
ﺍﺑﻮﻫﻮ ﻗﺎﻝ ﻟﻴﻬﻮ ﻃﻴﺐ ﺷﻮﻑ ﺍﻳﺘﺎﻡ ﻏﻴﺮﻫﻢ ﺑﺲ ﺍﻻ ﺩﻳﻞ ؟؟ ..
ﻗﺎﻝ ﻟﻴﻬﻮﺍﻳﻮﺓ ﻳﺎ ﺍﺑﻮﻱ ﺑﺲ ﺍﻻﻳﺘﺎﻡ ﺩﻳﻞ ﺑﺎﻟﺬﺍﺕ .. ﺍﻧﺎ ﻣﻤﻜﻦ ﺍﺗﻨﺎﺯﻝ ﻋﻦ ﻛﻞ ﻣﺎ
ﺍﻣﻠﻚ .. ﺣﺘﻰ ﻟﻮ ﺧﻠﻴﺖ ﺍﻟﻌﺮﺱ ﻛﻠﻮ ﻛﻠﻮ .. ﺑﺲ ﻣﺎ ﻣﻤﻜﻦ ﺍﻻﻳﺘﺎﻡ ﺩﻳﻞ ﺑﺎﻟﺬﺍﺕ
ﺍﺗﺨﻼ ﻋﻨﻬﻢ ..
ﻗﺎﻝ ﻟﻴﻬﻮ ﻟﻴﻪ؟ ﻳﻌﻨﻲ ﺩﻳﻞ ﺑﺎﻟﺬﺍﺕ .. ﻗﺎﻝ ﻟﻴﻬﻮ ﺩﻱ ﻭﺻﻴﺔ ﻓﻲ ﺭﻗﺒﺘﻲ ﻣﻦ ﺍﻧﺴﺎﻥ
ﻏﺎﻟﻲ ﻋﻠﻲ ﺷﺪﻳﺪ .. ﻃﺒﻌﺎ ﻫﻮ ﻗﺎﺻﺪ ﺍﻟﺮﺅﻳﺎ .. ﻟﻜﻦ ﻣﺎ ﺩﺍﻳﺮ ﻳﺤﻜﻲ ﻻﺑﻮﻫﻮ ..
ﺍﺑﻮﻫﻮ ﻗﺎﻝ ﻟﻴﻬﻮ ﻣﻨﻮ ﻳﻌﻨﻲ ﺍﻟﻐﺎﻟﻲ ﻋﻠﻴﻚ ﺍﻟﻮﺻﺎﻙ ﻋﻠﻴﻬﻢ ؟؟ .. ﺍﺑﻮﻫﻢ ﻣﺜﻼ" ؟؟
ﻗﻮﻝ ﻟﻲ ﻳﺎ ﺧﺪﺭ .. ﺍﻧﺎ ﻻﺯﻡ ﺍﻓﻬﻢ .. ﻟﻮ ﺍﻧﺖ ﻋﺎﻳﺰ ﻣﻮﺍﻓﻘﺘﻲ .. ﺍﻟﻤﻬﻢ ﺑﻌﺪ ﺿﻐﻂ
ﺧﺪﺭ ﺣﻜﻰ ﺣﻘﻴﻘﺔ ﺍﻟﺮﺅﻳﺎ ﻻﺑﻮﻫﻮ .. ﻭﺍﺣﺎﻃﻮ ﺑﻲ ﻛﻞ ﺍﻟﻘﺼﺔ ﺑﻲ ﺗﻔﺎﺻﻴﻼ ..
ﺍﻟﺤﺴﻴﺐ ﺍﺳﺘﻐﻔﺮ ﻭﺍﺗﺸﻬﺪ .. ﻻ ﺍﻟﻪ ﺍﻻ ﺍﻟﻠﻪ ﻳﺎ ﺍﻟﺨﺪﺭ .. ﻃﻴﺐ ﻳﺎ ﺍﻟﺨﺪﺭ ﺍﻧﺖ ﻣﺎﻛﺎﻥ
ﺗﻜﻠﻤﻨﻲ ﺑﺎﻟﻜﻼﻡ ﺩﻩ ﻣﻦ ﺑﺪﺭﻱ .. ﻭﺍﻟﻠﻪ ﻣﺎﻛﺎﻥ ﻣﺸﻴﻨﺎ ﻟﻲ ﻧﺎﺱ ﻋﻤﻚ ﻣﺼﻄﻔﻰ ..
ﻳﻤﻄﻮﺣﻨﺎ ﻭﻳﻠﻌﺐ ﺑﻲ ﺍﻋﺼﺎﺑﻨﺎ .. ﺍﻧﺖ ﺯﻭﻝ ﻛﺘﻮﻡ ﺷﺪﻳﺪ ..
ﻗﺎﻝ ﻟﻴﻬﻮ ﻳﺎ ﺍﺑﻮﻱ ﺍﻧﺖ ﺍﺩﻳﺖ ﺍﻟﻨﺎﺱ ﻛﻠﻤﺔ .. ﻭﺍﻧﺎ ﻣﺎﻋﺎﻳﺰ ﺍﺧﺬﻟﻚ ..
ﻗﺎﻝ ﻟﻴﻬﻮ ﺍﻟﻠﻪ ﺍﻛﺒﺮ ﻳﺎ ﺍﻟﺨﺪﺭ ..ﻭﺍﻟﻠﻪ ﺍﻧﺎ ﻣﻌﺎﻙ ﺗﺐ ﻭﺍﻟﺮﻫﻴﻔﺔ ﺍﻟﺘﻨﻘﺪ ..
ﺑﺲ ﺭﺑﻚ ﻳﻬﺪﻱ ﺍﻣﻚ .. ﻭﺍﻟﻠﻪ ﺍﻣﻚ ﻣﺎﺡ ﺗﻮﺍﻓﻖ ﺑﺎﻟﻤﻮﺿﻮﻉ ﺩﻩ .. ﺍﻧﺎ ﻋﺎﺭﻓﻬﺎ ﻭﻋﺎﺭﻑ
ﺍﻓﻜﺎﺭﻫﺎ ..
ﺧﺪﺭ ﻗﺎﻝ ﻟﻴﻬﻮ ﺍﻟﺰﺍﺭﻋﻬﺎ ﺍﻟﻠﻪ ﻓﻲ ﺍﻟﺤﺠﺮ ﺑﺘﻘﻮﻡ .. ﺍﻧﺖ ﺑﺲ ﺧﻠﻴﻚ ﻣﻌﺎﻱ ﺑﺎﻟﻨﻴﺔ ..
ﻭﺍﻟﻠﻪ ﺍﻟﻤﻮﺿﻮﻉ ﺩﻩ ﻟﻮ ﺗﻢ .. ﺩﻱ ﺍﻣﻨﻴﺎﺗﻲ ﻛﻠﻬﺎ ﺍﻧﺠﻤﻌﺖ ﻓﻲ ﺣﺘﺔ ﻭﺍﺣﺪﺓ ..
ﻗﺎﻝ ﻟﻴﻬﻮ ﺍﻧﺖ ﺑﺲ ﺍﺻﺒﺮ ﺧﻠﻴﻬﺎ ﺗﻄﻠﻊ ﻣﻦ ﺍﻟﺤﺒﺲ .. ﻭﺗﺎﻧﻲ ﺍﻧﺎ ﺑﺘﻢ ﻟﻴﻚ ﺍﻟﻤﻮﺿﻮﻉ
.. ﺧﺪﺭ ﺗﻘﺮﻳﺒﺎ" ﺍﻣﻮﺭﻭ ﻣﺎﺷﺔ ﻭﺍﺿﺤﺔ ﺷﺪﻳﺪ ..
ﺑﺲ ﻓﻲ ﻣﺸﻜﻠﺔ ﻻﺯﻡ ﻧﻼﺣﻆ ﻟﻴﻬﺎ .. ﺧﺪﺭ ﻟﻐﺎﻳﺔ ﺍﻻﻥ ﻣﺎﻋﻤﻞ ﺍﻻﺳﺘﺨﺎﺭﺓ ﻓﻲ
ﺧﺎﻟﺪﺓ .. ﻃﺒﻌﺎ" ﺩﻩ ﻏﻠﻂ ﻛﺒﻴﺮ .. ﻓﻲ ﻧﺎﺱ ﺑﻤﺸﻮ ﻓﻲ ﺣﺎﺟﺔ .. ﻭﺑﻈﻨﻮ ﻣﺎﻓﻴﻬﺎ ﺍﻱ
ﺍﺣﺘﻤﺎﻝ ﺷﺮ .. ﺑﻘﻮﻣﻮ ﺑﻬﻤﻠﻮ ﺍﻻﺳﺘﺨﺎﺭﺓ .. ﻭﺑﻌﺪﻳﻦ ﻳﻘﻌﻮ ﻓﻲ ﺍﻟﻤﺼﺎﻳﺐ .. ﻳﻌﻨﻲ
ﺍﻟﻤﻔﺮﻭﺽ ﺍﻟﺰﻭﻝ ﻟﻮ ﻋﺎﻳﺰ ﻳﻘﺪﻡ ﻋﻠﻰ ﺍﻱ ﺧﻄﻮﺓ .. ﺣﺘﻰ ﻟﻮ ﺷﺎﻳﻔﻬﺎ ﻛﻠﻬﺎ ﺧﻴﺮ ..
ﻻﺯﻡ ﻳﺴﺘﺨﻴﺮ .. ﻻﻧﻮ ﺍﺣﺘﻤﺎﻝ ﻳﻜﻮﻥ ﺍﻟﺸﺮ ﻣﺨﺒﺄ ﻭﺍﻧﺖ ﻣﺎ ﺟﺎﻳﺐ ﻟﻴﻬﻮ ﺧﺒﺮ .. ﺭﺑﻤﺎ
ﻳﻄﺮﺃ ﺗﻐﻴﻴﺮ ﻓﻲ ﺍﻟﺰﻣﻦ ﻭﺷﺨﺼﻴﺎﺕ ﺍﻟﻨﺎﺱ .. ﻭﺍﻟﻤﺴﺘﻘﺒﻞ ﻻﻳﻌﻠﻤﻪ ﺍﻻ ﺍﻟﻠﻪ ..
ﻋﺸﺎﻥ ﻛﺪﺍ ﻻﺯﻡ ﺍﻟﺰﻭﻝ ﻳﺴﺘﺨﻴﺮ ﺍﻟﻠﻪ ﻓﻲ ﺍﻻﻣﻮﺭ ..
ﺍﺗﻤﻨﻰ ﺧﺪﺭ ﻳﻌﻤﻞ ﺍﺳﺘﺨﺎﺭﺓ ﻓﻲ ﺯﻭﺍﺟﻪ ﺑﻲ ﺧﺎﻟﺪﺓ .. ﻋﺸﺎﻥ ﻣﺎﻳﻘﻊ ﻓﻲ
ﺍﻟﺸﺮﻭﺭ ..
ﻋﻠﻰ ﻛﻞ ﺣﺎﻝ ﻣﺮﺕ ﺍﻻﻳﺎﻡ .. ﻭﺧﺪﺭ ﻗﻔﻞ ﺑﻴﺘﻮ ﻭﺍﻟﺒﻴﺖ ﺳﻄﻮﺡ ﻣﺎﺷﺎﺀ ﺍﻟﻠﻪ ..
ﻗﺮﻳﺐ ﻟﻲ ﻧﺎﺱ ﺍﻣﻪ .. ﺑﻴﻨﻬﻢ ﺷﺎﺭﻉ ﺑﺲ .. ﻭﺷﻐﺎﻝ ﻓﻲ ﺍﻟﻤﺸﺮﻭﻉ ﺑﺘﺎﻉ ﺍﺑﺮﺍﻫﻴﻢ
ﻋﻠﻰ ﻗﺪﻡ ﻭﺳﺎﻕ .. ﻭﺍﺻﺒﺤﺖ ﺑﻴﻨﻮ ﻭﺑﻴﻦ ﺍﺑﺮﺍﻫﻴﻢ ﻓﻲ ﻣﻮﺩﺓ ﻭﺻﺪﺍﻗﺔ ﻋﺠﻴﺒﺔ
ﻛﻞ ﻳﻮﻣﻴﻦ ﺗﻼﺗﺔ ﺧﺪﺭ ﻓﻲ ﺑﻴﺖ ﺍﺑﺮﺍﻫﻴﻢ .. ﻣﻌﺎﻫﻢ ﻋﺎﺩﻝ ﺣﺴﻴﻦ .. ﻭﻣﺮﺓ ﺗﻠﻘﺎﻫﻮ
ﻓﻲ ﺑﻴﺖ ﻧﺎﺱ ﻧﺴﺮﻳﻦ ﻣﻊ ﻋﺒﺪ ﺍﻟﻤﺠﻴﺪ .. ﺑﻘﻮ ﺍﺻﺤﺎﺏ ﺷﺪﻳﺪ .. ﻭﻋﺒﺪ ﺍﻟﻤﺠﻴﺪ
ﺍﺗﻌﺮﻑ ﻋﻠﻰ ﺍﺑﺮﺍﻫﻴﻢ ﻭﻋﺎﺩﻝ ﺣﺴﻴﻦ ..
ﻭﺧﺪﺭ ﺭﺑﻨﺎ ﺍﺑﺪﻟﻪ ﺑﻲ ﺍﺻﺪﻗﺎﺀ .. ﻣﻼﻧﻴﻦ ﻗﺮﻭﺵ ﻭﺍﺧﻼﻕ .. ‏( ﻣﺴﺘﻮﻳﺎﺕ ﻳﺎ ﺧﺪﺭﻭﻱ
ﻭﺍﻟﻠﻪ ﺍﻳﺎﻣﻚ ‏) .. ﻫﻪ
ﻃﺒﻌﺎ ﺻﺎﺣﺒﺘﻨﺎ ﺍﻟﻌﺰﻳﺰﺓ ﻭﺍﻟﺒﻄﻠﺔ ﺍﻟﻤﺨﻀﺮﻣﺔ ﻫﻨﺪﻭﻳﺔ .. ﺍﻧﻘﻄﻌﺖ ﻣﻦ ﺧﺎﻟﺪﺓ
ﺗﻤﺎﻣﺎ .. ﻭﺍﻟﺴﺒﺐ ﺍﻧﻮ ﺍﻣﻬﺎ ﻗﺎﻟﺖ ﻟﻴﻬﺎ ﺍﻟﺰﻭﻟﺔ ﺩﻱ ﺗﺒﻌﺪﻱ ﻣﻨﻬﺎ .. ﻻﻧﻬﺎ ﻟﻮ ﻭﺍﺻﻠﻨﺎ
ﻣﻌﺎﻫﺎ ﻋﻼﻗﺘﻨﺎ .. ﺑﺘﺠﻲ ﺗﻘﻌﺪ ﻣﻌﺎﻧﺎ ﺑﺎﻭﻻﺩﻫﺎ ﻓﻲ ﺍﻟﺒﻴﺖ ..
ﻭﺗﻘﻊ ﻓﻮﻗﻨﺎ ﺑﻲ ﺗﻘﻠﻴﺘﻬﺎ ..
ﻣﺸﻮ ﺑﺲ ﻋﺰﻭﻫﺎ ﺍﻻﺗﻨﻴﻦ ﻓﻲ ﺭﺍﺟﻼ .. ﻭﺗﺎﻧﻲ ﻣﺎ ﻋﺘﺒﻦ ﻋﻠﻰ ﺑﺎﺑﻬﺎ .. ﺑﺲ ﺑﻤﺮﻭﺭ
ﺍﻻﻳﺎﻡ ﺣﺴﻮ ﺍﻧﻮ ﺧﺎﻟﺪﺓ ﺍﻣﻮﺭﻫﺎ ﻣﺎﺷﺔ ﺯﻱ ﺍﻟﺴﺎﻋﺔ ﻭﻣﺎﻣﺤﺘﺎﺟﺔ ﻟﻴﻬﻢ ﺍﺻﻼ" ..
ﻫﻨﺪ ﻃﺒﻌﺎ ﻣﺴﺘﻐﺮﺑﺔ ﺷﺪﻳﺪ .. ﺍﻟﻤﺮﺍﺓ ﺩﻱ ﺑﺘﺠﻴﺐ ﺍﻟﻘﺮﻭﺵ ﻣﻦ ﻭﻳﻦ ..
ﻣﺎﻛﻠﺔ ﻭﺷﺎﺭﺑﺔ ﻭﺍﻟﻜﻬﺮﺑﺎ ﺷﻐﺎﻟﺔ ﻭﺍﻳﺠﺎﺭ ﺍﻟﺒﻴﺖ .. ﻭﻣﺸﻐﻠﺔ ﻣﻌﺎﻫﺎ ﺣﺒﺸﻴﺔ ..
ﻭﺍﻟﺤﺒﺸﻴﺔ ﻛﻞ ﻳﻮﻡ ﺗﻄﻠﻊ ﺗﺠﻴﺐ ﺍﻟﻠﺤﻤﺔ ﻭﺍﻟﺨﺪﺍﺭ ﻭﺗﺠﻴﺐ ﺍﻟﺤﺎﺟﺎﺕ ﻣﻦ ﺍﻟﺪﻛﺎﻥ ..
ﻭﻫﻨﺪ ﺑﺘﺸﻮﻓﻬﺎ ..
ﻣﺘﺤﻴﺮﻳﻦ ﻃﺒﻌﺎ .." ﺧﺎﻟﺪﺓ ﺩﻱ ﺑﺘﺠﻴﺐ ﺍﻟﻘﺮﻭﺵ ﻣﻦ ﻭﻳﻦ . ؟ ﻭﻫﻨﺪ ﻣﺎﻗﺎﺩﺭﺓ
ﺗﻤﺸﻲ ﻟﻴﻬﺎ ﻋﺸﺎﻥ ﺗﺴﺄﻟﻬﺎ ..
ﺍﻫﺎ ﻭﻛﺖ ﺍﻃﻤﺄﻧﻮ ﺍﻧﻮ ﺍﻧﻮﺧﺎﻟﺪﺓ ﻣﺎ ﻣﺤﺘﺎﺟﺔ ﻟﻴﻬﻢ .. ﻫﻨﺪ ﻗﺎﻟﺖ ﻻﻣﻬﺎ ﻳﺎ ﺍﻣﻲ ﺯﻱ
ﻣﺎ ﻣﻼﺣﻈﺔ ﺍﻧﻮ ﺧﺎﻟﺪﺓ ﺩﻱ .. ﺍﻣﻮﺭﺓ ﻣﺎﺷﺔ ﺍﺣﺴﻦ ﻣﻨﻨﺎ .. ﻟﺪﺭﺟﺔ ﺍﻧﻬﺎ ﺟﺎﻳﺒﺔ
ﺷﻐﺎﻟﺔ .. ﺧﻠﻴﻨﻲ ﺍﻣﺸﻲ ﻟﻴﻬﺎ .. ﺑﺲ ﺍﺷﻮﻑ ﺍﺧﺒﺎﺭﻫﺎ .. ﻣﺎﺗﻨﺴﻲ ﻳﺎ ﺍﻣﻲ ﺍﻟﺰﻭﻟﺔ
ﺻﺎﺣﺒﺘﻲ .. ﻗﺎﻟﺖ ﻟﻴﻬﺎ ﺻﺎﺣﺒﺘﻚ ﻓﻲ ﻋﻴﻨﻚ .. ﺍﻧﺘﻲ ﻭﺍﻟﻠﻪ ﺧﻮﺗﻚ ﺧﻮﺓ ﻳﻬﻮﺩ ﺑﺲ ..
ﺍﻣﺸﻲ ﻟﻴﻬﺎ ﺍﺻﻠﻚ ﻣﺎﻋﻨﺪﻙ ﺑﺮﻧﺎﻣﺞ .. ﻗﺎﻋﺪﺓ ﻟﻲ ﻓﻲ ﺍﻟﺒﻴﺖ ﺯﻱ ﺍﻟﻬﻢ ﻓﻲ ﺍﻟﻘﻠﺐ
..
ﺍﻫﺎ ﻳﻮﻡ ﻣﻦ ﺍﻟﺼﺒﺎﺡ ﻣﺸﺖ ﻟﻴﻬﺎ .. ﺗﺴﻠﻢ ﻋﻠﻴﻬﺎ .. ﺧﺎﻟﺪﺓ ﺣﺒﻴﺒﺘﻲ ﻛﻴﻔﻚ ؟ ﺍﻥ ﺷﺎﺀ
ﺍﻟﻠﻪ ﻛﻮﻳﺴﺔ .. ﻭﺍﻟﻠﻪ ﻣﺎﺷﺎﺀ ﺍﻟﻠﻪ ﺍﻣﻮﺭﻙ ﺑﺎﺍﺍﺍﺳﻄﺔ .. ﺭﺑﻨﺎ ﻳﺰﻳﺪﻙ ..
ﺍﻫﺎ ﻣﺎﻗﻠﺘﻲ ﻟﻲ ﺍﻟﻨﻌﻴﻢ ﺩﻩ ﻣﻦ ﻭﻳﻦ .. ؟ ﻣﺎﺷﺎﺀ ﺍﻟﻠﻪ .. ﻛﻤﺎﻥ ﺑﻲ ﺷﻐﺎﻟﺘﻚ ..
ﻗﺎﻟﺖ ﻟﻴﻬﺎ ﺭﺑﻨﺎ ﻛﺮﻳﻢ ﻋﻠﻰ ﺍﻟﻤﺴﻜﻴﻦ ﻳﺎﻫﻨﺪ .. ﺍﻧﺎ ﺭﺑﻨﺎ ﻣﺎﺑﻨﺴﺎﻧﻲ ..
ﻗﺎﻟﺖ ﻟﻴﻬﺎ ﺍﻱ ﻧﻌﻢ ﺍﻟﻠﻪ ﻛﺮﻳﻢ .. ﻭﻧﻌﻢ ﺑﺎﻟﻠﻪ .. ﻟﻜﻦ ﺍﻟﺴﻤﺎﺀ ﻻﺗﻤﻄﺮ ﺫﻫﺒﺎ" ..
ﻣﺎﻋﺎﻳﺰﺓ ﺗﻮﺭﻳﻨﻲ ﻣﻦ ﻭﻳﻦ ﺑﺘﺠﻴﺒﻲ ﺍﻟﻘﺮﻭﺵ ؟ .. ﻗﺎﻟﺖ ﻟﻴﻬﺎ ﺍﻟﺴﻤﺎﺀ ﺗﻤﻄﺮ
ﺫﻫﺒﺎ .." ﺑﺎﺫﻥ ﺍﻟﻠﻪ ﻣﺎﻓﻲ ﺷﻲ ﻋﻠﻰ ﺍﻟﻠﻪ ﺑﻌﻴﺪ ..
ﻗﺎﻟﺖ ﻟﻴﻬﺎ ﻋﻠﻴﻚ ﺍﻟﻠﻪ ﺗﺤﻜﻲ ﻟﻲ .. ﻳﺨﺴﻲ ﻋﻠﻴﻚ ﻣﻮﺵ ﺍﻧﺎ ﺻﺎﺣﺒﺘﻚ؟ ﻗﺎﻟﺖ ﻟﻴﻬﺎ
ﺩﻩ ﺳﺮ ﺑﻴﻨﻲ ﻭﺑﻴﻦ ﺍﻟﻠﻪ .. ﻣﺎﺑﻘﻮﻟﻮ ﻻﻱ ﺯﻭﻝ ..
ﻗﺎﻟﺖ ﻟﻴﻬﺎ ﺍﻧﺎ ﻋﺎﺭﻓﺔ ﺩﻩ ﺧﺪﺭ ﺣﺴﻴﺐ ﺻﺎﺡ؟ .. ﻗﺎﻟﺖ ﻟﻴﻬﺎ .. ﻻ ﺑﻘﻮﻝ ﻟﻴﻚ ﺻﺎﺡ
ﻻﺑﻘﻮﻝ ﻟﻴﻚ ﻻ .. ﺑﺲ ﻗﻠﺖ ﻟﻴﻚ ﺩﻩ ﺳﺮ ﺑﻴﻨﻲ ﻭﺑﻴﻦ ﺍﻟﻠﻪ .. ﻭﺑﻌﺪﻳﻦ ﺍﻧﺘﻲ ﺧﻤﻨﻲ
ﺍﻟﻌﺎﻳﺰﺓ ﺗﺨﻤﻨﻴﻬﻮ .. ﻗﺎﻟﺖ ﻟﻴﻬﺎ ﻭﺍﻟﻠﻪ ﻳﺎﺧﺎﻟﺪﺓ ﺍﻧﺘﻲ ﺍﺗﻐﻴﺮﺗﻲ ﻣﻨﻲ ﺷﺪﻳﺪ .
ﻭﺑﻘﻴﺘﻲ ﺗﺘﻌﺎﻣﻠﻲ ﻣﻌﺎﻱ ﻣﻌﺎﻣﻠﺔ ﺯﻱ ﺍﻟﻤﺎﺑﺘﻌﺮﻓﻴﻨﻲ .. ﻭﻣﺎﻋﺎﺭﻓﺔ ﺍﻟﺤﺎﺻﻞ
ﻋﻠﻴﻚ ﺷﻨﻮ؟ .. ﺧﺎﻟﺪﺓ ﻋﺎﻳﻨﺖ ﻟﻴﻬﺎ ﻛﺪﺍ ﻭﺍﺑﺘﺴﻤﺖ ﺍﺑﺘﺴﺎﻣﺔ ﻣﻘﻠﻮﻋﺔ ﻣﻦ ﺿﻠﻮﻉ
ﺍﻟﻮﺟﻊ .. ﻭﺑﻘﺖ ﺳﺎﻛﺘﺔ ﻣﻨﻬﺎ ﻭﻣﻬﻤﻼﻫﺎ ﺍﻫﻤﺎﻝ ﻣﻘﺼﻮﺩ ..
ﻫﻨﺪ ﺳﻜﺘﺖ ﻣﺴﺎﻓﺔ .. ﻭﻗﺎﻟﺖ ﻟﻴﻬﺎ ﻟﻮ ﺍﻧﺘﻲ ﻳﺎﺧﺎﻟﺪﻩ . ﻣﺎﻋﺎﻳﺰﺍﻧﻲ ﺍﺟﻴﻚ .. ﻓﻲ ﺑﻴﺘﻚ
.. ﻗﻮﻟﻲ ﻟﻲ .. ﺍﻧﺎ ﺗﺎﻧﻲ ﻣﺎﺑﺠﻲ .. ﻗﺎﻟﺖ ﻟﻴﻬﺎ ﺍﻧﺎ ﻗﻠﺖ ﻟﻴﻚ ﻛﺪﺍ ﻳﺎ ﻫﻨﺪ؟
ﻗﺎﻟﺖ ﻟﻴﻬﺎ ﻣﺎﻗﻠﺘﻲ .. ﻟﻜﻦ ﺷﻜﻠﻚ ﻭﺗﺼﺮﻓﺎﺗﻚ ﺑﺘﻮﺣﻲ ﺑﻲ ﻛﺪﺍ .. ﻫﺴﻲ ﺑﺴﺄﻟﻚ ﻟﻮ
ﻣﺎﻋﺎﻳﺰﺍﻧﻲ ﺍﺟﻴﻚ ﻣﺎ ﺑﺠﻴﻚ ..
ﺧﺎﻟﺪﺓ ﺳﻜﺘﺖ .. ﻭﻫﻨﺪ ﻣﺼﺮﺓ ﺗﺴﻤﻊ ﺍﺟﺎﺑﺔ .. ﻻﻧﻬﺎ ﺣﺴﺖ ﺑﻴﻬﺎ ﻣﺘﻀﺎﻳﻘﺔ ﺧﺎﻟﺪﻩ
ﻣﻨﻬﺎ ﻭﺍﺿﺤﺔ ﺷﺪﻳﺪ .. ﻭﻓﻌﻼ ﺧﺎﻟﺪﺓ ﻛﺎﻧﺖ ﻣﺘﻀﺎﻳﻘﺔ .. ﻻﻧﻬﺎ ﻋﺎﺭﻓﺔ ﻫﻨﺪ ﺯﻳﺎﺭﺗﻬﺎ
ﺩﻱ .. ﻣﺎ ﻟﻠﻪ ﻭﻻ ﻣﺤﺒﺔ .. ﻭﺍﻧﻤﺎ ﺟﺎﻳﺔ ﺗﺘﺸﻤﺮ ﻣﻦ ﻣﺼﺪﺭ ﺍﻟﻘﺮﻭﺵ ﺍﻟﺒﺘﺼﺮﻓﻬﺎ
ﺧﺎﻟﺪﺓ ..
ﻗﺎﻣﺖ ﺧﺎﻟﺪﺓ ﻭﻛﺖ ﺷﺎﻓﺘﻬﺎ ﻣﺼﺮﺓ ﺗﺴﻤﻊ ﺍﻻﺟﺎﺑﻪ .. ﻗﺎﻟﺖ ﻟﻴﻬﺎ ﻛﻼﻣﻚ ﺻﺎﺡ ﻭﺍﻟﻠﻪ
ﻳﺎ ﻫﻨﺪ .. ﺍﻧﺎ ﻣﻦ ﺟﻮﺍﻱ ﻣﺎﻋﺎﻳﺰﺍﻙ ﺗﺠﻴﻨﻲ ﺗﺎﻧﻲ .. ﻭﻻ ﺍﻧﺎ ﺑﺠﻴﻚ .. ﺧﻠﻲ ﺍﻟﻮﺩ
ﻣﺤﻔﻮﻅ .. ﻭﻧﺤﻦ ﺑﻌﺎﺩ ﻣﻦ ﺑﻌﺾ ..
ﻫﻨﺪ ﺣﺴﺖ ﺑﻲ ﺧﻨﺠﺮ ﺍﺗﻐﺰﺍ ﻟﻴﻬﺎ ﻓﻲ ﻓﺸﺎﻓﻴﺸﻬﺎ ﻣﻦ ﺍﺟﺎﺑﺔ ﺧﺎﻟﺪﻩ .. ﺧﺎﻟﺪﺓ
ﻣﺎﺑﺘﻌﺮﻑ ﺗﺨﻔﻲ ﺍﻟﺤﻘﻴﻘﺔ .. ﻭﻫﻨﺪ ﺑﺘﺘﻼﻳﻖ .. ﻭﺩﻱ ﺍﻟﻨﺘﻴﺠﺔ ..
ﻫﻨﺪ ﻣﺮﻗﺖ ﻣﻦ ﺑﻴﺖ ﻧﺎﺱ ﺧﺎﻟﺪﺓ .. ﻭﺍﻟﺪﻧﻴﺎ ﻣﻀﻠﻤﺔ ﻓﻲ ﻭﺷﻬﺎ ﻭﻣﺎﻋﺎﺭﻓﺔ ﺧﺎﻟﺪﺓ
ﺩﻱ ﻣﺘﻀﺎﻳﻘﺔ ﻣﻨﻬﺎ ﻟﻴﻪ .. ﻭﺍﻟﺤﻘﺪ ﺍﻟﺠﻮﺍﻫﺎ ﺯﺍﺩ ﺍﺿﻌﺎﻑ
ﻭﺑﻘﺖ ﻣﺘﺄﻛﺪﺓ ﻣﺎﻻﻳﺪﻉ ﻣﺠﺎﻝ ﻟﻠﺸﻚ ﺍﻧﻮ ﺧﺪﺭ ﺑﺼﺮﻑ ﻋﻠﻰ ﺧﺎﻟﺪﺓ ﻭﺡ ﻳﺘﺰﻭﺟﻬﺎ ..
ﻭﻃﻮﺍﺣﻴﻦ ﺍﻟﺸﻴﻄﺎﻥ ﺑﻘﺖ ﺷﻐﺎﻟﺔ ﻓﻲ ﺭﺍﺳﻬﺎ ..
ﺧﺎﻟﺪﺓ ﻗﺎﻋﺪﺓ ﻓﻲ ﻏﺮﻓﺘﻬﺎ .. ﻭﻣﺎﺳﻜﺔ ﺳﺒﺤﺘﻬﺎ .. ﻭﻻﺑﺴﺔ ﺗﻮﺏ ﺍﺑﻴﺾ .. ﻛﺘﻘﻠﻴﺪ
ﺳﻮﺩﺍﻧﻲ ﻣﻌﺮﻭﻑ .. ﺧﺎﻟﺪ ﺍﻟﺼﻐﻴﺮ ﻳﻠﻌﺐ ﻓﺮﺣﺎﻥ .. ﻭﺍﺑﺮﺍﺭ ﻗﺎﻋﺪ ﺟﻨﺐ ﺍﻣﻬﺎ ..
ﻭﺷﺎﻳﻠﺔ ﻓﻲ ﻳﺪﻫﺎ ﻗﺮﻃﺎﺳﺔ ﺣﻼﻭﺓ ﺷﻴﻜﻮﻻﺗﺔ ﺣﺒﻮﺏ .. ﻭﻣﺒﺴﻮﻃﺔ .. ﻭﻻﻫﺴﻲ
ﻣﺎﻋﺎﺭﻓﻴﻦ ﺍﻧﻬﻢ ﺍﻳﺘﺎﻡ .. ﻭﻣﺎﺳﺄﻟﻮ ﻋﻦ ﺍﺑﻮﻫﻢ ﻧﻬﺎﺋﻲ .. ﺍﺻﻼ ﺍﺑﺮﺍﺭ ﺻﻐﻴﺮﺓ .. ﻟﻜﻦ
ﺧﺎﻟﺪ ﻭﺍﻋﻲ ﺷﻮﻳﺔ ﻭﺑﻌﺮﻑ ﻳﺘﻜﻠﻢ .. ﺍﺑﻮﻫﻢ ﺍﺳﺎﺳﺎ ﺍﻟﻠﻪ ﻳﺮﺣﻢ ﻛﺎﻥ ﺍﻻﺭﺑﻌﺔ
ﻭﻋﺸﺮﻳﻦ ﺳﺎﻋﺔ ﻣﺎﻓﻲ ..
ﻭﻣﺮﺕ ﺍﻻﻳﺎﻡ .. ﻭﺧﺪﺭ ﺍﺣﻮﺍﻟﻮ ﻣﺎﺷﺔ ﻓﻲ ﺯﻳﺎﺩﺓ ﺳﺮﻳﻌﺔ .. ﻭ ﺍﺷﺘﺮﻯ ﺍﻟﻌﻔﺶ ﺣﻖ
ﺍﻟﺒﻴﺖ ﻟﻐﺎﻳﺔ ﺍﻟﻤﻼﻋﻖ ﺣﻘﺎﺕ ﺍﻻﻛﻞ .. ﺍﻱ ﺣﺎﺟﺔ ﻳﺸﺘﺮﻳﻬﺎ ﻳﺘﺨﻴﻞ ﺍﻧﻬﺎ ﺣﻘﺔ ﺧﺎﻟﺪﺓ
.. ﻋﺸﺎﻥ ﻛﺪﺍ ﺍﺧﺘﺎﺭ ﻋﻔﺶ ﺍﻟﺒﻴﺖ ﺑﻲ ﻋﻨﺎﻳﺔ .. ﺑﻌﺪ ﺩﺍﻙ ﺍﺷﺘﺮﻯ ﻋﺮﺑﻴﺔ .. ﺗﻘﺮﻳﺒﺎ
ﻋﺮﺑﻴﺔ ﺍﺳﻤﻬﺎ ﺳﺒﻮﺭﻃﺎﺝ .. ﻭﻻ ﺍﺳﻢ ﻗﺮﻳﺐ ﻟﻲ ﺩﻩ .. ﺍﻧﺎ ﺍﻟﻌﺮﺑﺎﺕ ﺍﻟﻜﻮﺭﻳﺔ ﺩﻩ
ﻣﺎﺑﻌﺮﻓﻬﺎ ﻛﻮﻳﺲ ..
ﻭﻛﻞ ﻳﻮﻡ ﺧﺪﺭ ﺑﺴﺄﻝ ﻓﻲ ﺭﺑﻨﺎ .. ﺍﻧﻮ ﻳﻘﺴﻢ ﻟﻴﻬﻮ ﺧﺎﻟﺪﺓ .. ﻭﻳﺘﺨﻴﻞ ﻓﻲ ﺗﻘﺎﺳﻴﻢ
ﻭﺟﻬﻬﺎ ﻭﺟﻤﺎﻟﻮ .. ﻭﺍﺑﺘﺴﺎﻣﺘﻬﺎ ﺍﻟﻌﻤﺮﻭ ﻣﺎ ﻧﻈﺮ ﻟﻴﻬﺎ ﺑﻤﻔﻬﻮﻡ ﺍﻟﻌﺸﻖ .. ﻭﻧﻔﺴﻮ
ﻳﺸﻮﻓﻬﺎ ﻟﻤﺮﺓ ﻭﺍﺣﺪﺓ ﺑﺲ .. ﺗﻠﻮﻥ ﻟﻴﻬﻮ ﻋﻨﺪﻭ ﻣﺴﺎﺣﺎﺕ ﺍﻟﺮﻭﺡ .. ﻭﺗﺨﻠﻂ ﻟﻮﻥ
ﺍﻻﺣﺘﺮﺍﻡ ﻭﺍﻟﺘﻘﺪﻳﺮ ﺑﻠﻮﻥ ﺍﻟﻌﺸﻖ ﻭﺍﻟﺤﺐ ..
ﻟﻜﻦ ﻃﺒﻌﺎ" ﻣﺤﺎﻝ ﻳﺸﻮﻓﻬﺎ ﻓﻲ ﺍﻟﻔﺘﺮﺓ ﺩﻱ ..
ﻳﻮﻡ ﻗﺎﻋﺪ ﻓﻲ ﺑﻴﺖ ﻧﺎﺱ ﻧﺴﺮﻳﻦ ﻣﻊ ﻋﺒﺪ ﺍﻟﻤﺠﻴﺪ .. ﻗﺎﻝ ﻟﻴﻬﺎ ﻳﺎ ﻧﺴﺮﻳﻦ
ﺍﻧﺎ ﻋﺎﻳﺰ ﺍﺩﻳﻚ ﻛﻼﻡ ﺳﺮﻱ ﻟﻠﻐﺎﻳﺔ .. ﺑﺲ ﻣﺎﻓﻲ ﺯﻭﻝ ﻋﺎﺭﻓﻮ ﻏﻴﺮﻱ .. ﺍﻧﺎ ﻭﺍﺑﻮﻱ
ﻭﻫﺴﻲ ﺍﻧﺘﻲ ﻭﻋﺒﺪ ﺍﻟﻤﺠﻴﺪ .. ﻻﻧﻮ ﻣﻮﺍﻋﻴﺪﻭ ﻟﺴﻪ ﻣﺎﺟﺎﺕ ..
ﻗﺎﻟﺖ ﻟﻴﻬﻮ ﺍﻧﺖ ﻋﺎﻳﺰ ﺗﻘﻮﻟﻲ ﺩﺍﻳﺮ ﺧﻠﻮﺩﺓ ﺻﺢ؟ ..
ﻗﺎﻝ ﻟﻴﻬﺎ ﻭﺍﻟﻠﻪ ﺍﻧﺘﻲ ﻳﺎ ﺍﻟﻤﺴﻠﻄﺔ .. ﻋﺮﻓﺘﻲ ﻛﻴﻒ؟ .. ﻗﺎﻟﺖ ﻟﻴﻬﻮ ﺍﻧﺎ ﻧﻨﻮ ﺍﻧﺖ
ﻧﺴﻴﺖ ﻭﻻ ﺷﻨﻮ؟ .. ﻗﺎﻝ ﻟﻴﻬﺎ ﺑﺲ ﻋﻠﻴﻚ ﺍﻟﻠﻪ ﻣﺎﺗﺤﻜﻲ ﻟﻴﻬﺎ .. ﻻﻧﻬﺎ ﻟﺴﻊ ﻣﺎ
ﺧﻠﺼﺖ ﺍﻟﺤﺒﺲ ﻭﻛﺪﺍ ﻗﺎﻟﻮ ﺣﺮﺍﻡ .. ﻗﺎﻟﺖ ﻟﻴﻬﻮ ﻳﺎﺧﻮﻱ ﻋﺎﺭﻓﺔ ﺍﻟﺨﻄﻮﺑﺔ ﻓﻲ
ﺍﻟﻮﻗﺖ ﺩﻩ ﻣﺎﺻﺢ ..
ﻟﻜﻦ ﻣﻤﻜﻦ ﺍﻟﺰﻭﻝ ﻳﻮﺻﻞ ﻟﻴﻬﺎ ﺍﻟﻤﻌﻠﻮﻣﺔ ﺑﺎﻟﻠﻔﺔ .. ﻟﻜﻦ ﻓﻲ ﻣﺸﻜﻠﺔ ﻳﺎﺧﺪﺭ ..
ﻃﺒﻌﺎ" ﺧﺎﻟﺪﺓ ﺩﺍﻳﻤﺎ" ﺑﺘﻘﻮﻝ ﺍﻧﺎ ﻣﺴﺘﺤﻴﻞ ﺍﺗﺰﻭﺝ ﺗﺎﻧﻲ .. ﺍﻧﺎ ﻋﺎﻳﺰﺓ ﺍﺭﺑﻲ ﺍﻭﻻﺩﻱ
ﻭﺑﺲ .. ﻣﺎﻋﺎﻳﺰﺓ ﺍﻱ ﺷﻲ ﻏﻴﺮ ﻛﺪﺍ ..
ﺧﺪﺭ ﻟﻤﻦ ﺳﻤﻊ ﺍﻟﻜﻼﻡ ﺩﻩ ﺍﺗﻐﻤﻪ ﻏﻢ ﺷﺪﻳﺪ .. ﻗﺎﻝ ﻟﻴﻬﺎ ﻋﻠﻴﻚ ﺍﻟﻠﻪ ﻳﺎﻧﺴﺮﻳﻦ ؟ ..
ﻗﺎﻟﺖ ﻟﻴﻬﻮ ﻭﺍﻟﻠﻪ ﻛﻢ ﻣﺮﺓ ﻗﺎﻟﺖ ﻟﻲ ﻛﺪﺍ .. ﻟﻜﻦ ﺍﻧﺎ ﻣﻤﻜﻦ ﺍﺣﺎﻭﻝ ﻣﻌﺎﻫﺎ .. ﻣﺮﺓ
ﻭﻣﺮﺗﻴﻦ ﻭﺗﻼﺗﺔ .. ﻭﺍﻥ ﺷﺎﺀ ﺍﻟﻠﻪ ﺗﻘﺘﻨﻊ .. ﺑﺲ ﺍﻧﺎ ﻛﺎﻥ ﻧﺠﺤﺖ ﺍﻧﺖ ﺗﺤﻀﺮ ﻟﻲ
ﺍﻟﻬﺪﻳﺔ .. ﻗﺎﻝ ﻟﻴﻬﺎ ﻭﺍﻟﻠﻪ ﻟﻴﻚ ﻣﻮﻳﺔ ﻋﻴﻮﻧﻲ ﻭﺩﻣﻲ .. ﻭﺍﻟﻠﻪ ﻳﺎﻧﺴﺮﻳﻦ ﻣﺎﻓﻲ ﻓﺮﻕ
ﺑﻴﻨﻚ ﻭﺑﻴﻦ ﻟﺒﻨﻰ ﺍﺧﺘﻲ .. ﺑﺲ ﺍﻧﺘﻲ ﺍﻗﺮﺏ ﻟﻲ ﻣﻨﻬﺎ .. ﻭﺍﺳﺮﺍﺭﻱ ﺍﻟﺒﺪﻳﻚ ﻟﻴﻬﺎ
ﺍﻧﺘﻲ ﻟﺒﻨﻰ ﻣﺎﺑﺪﻳﻬﺎ ﻟﻴﻬﺎ ..
ﻗﺎﻟﺖ ﻟﻴﻬﻮ ﻟﺒﻨﻰ ﺳﻜﻮﺗﺔ ﻭﻏﺘﻴﺘﺔ .. ﻟﻜﻦ ﺫﻛﻴﺔ ﻭﻣﻔﺘﺤﻪ .. ﻃﺒﻌﺎ ﺑﺘﻌﺮﻓﻬﺎ ﺷﺪﻳﺪ ..
ﻻﻧﻬﺎ ﺑﺘﺠﻲ ﺑﻴﺖ ﻧﺎﺱ ﺧﺪﺭ ﻣﻊ ﺭﺍﺟﻼ ﻛﻢ ﻣﺮﺓ .. ﻻﻧﻮ ﻋﺒﺪﺍﻟﻤﺠﻴﺪ ﺻﺪﻳﻖ ﻣﻘﺮﺏ
ﻟﻲ ﺧﺪﺭ ..
ﻗﺎﻟﺖ ﻟﻴﻬﻮ ﻃﻴﺐ ﻛﺪﻱ ﺍﻭﻝ ﺍﻧﺎ ﺑﺴﺄﻟﻬﺎ .. ﻭﺍﺷﻮﻑ ﻣﻮﻳﺘﻬﺎ .. ﺍﻗﻮﻝ ﻟﻴﻬﺎ ﻟﻮ ﺧﺪﺭ
ﺟﺎﻙ ﺑﺘﻘﺒﻠﻲ ﺑﻴﻬﻮ ؟؟
ﺧﺪﺭ ﻗﺎﻝ ﻟﻴﻬﺎ ﻻﻻ ﺍﺻﺒﺮﻱ .. ﻣﺎﺗﻔﺘﺤﻲ ﻣﻌﺎﻫﺎ ﺍﻟﺴﻴﺮﺓ ﺩﻱ .. ﺍﻻ ﺍﻧﺎ ﺍﺧﺪ
ﺍﻟﻤﻮﺍﻓﻘﺔ ﻣﻦ ﺍﻣﻲ .. ﺍﺑﻮﻱ ﺍﻟﺤﻤﺪ ﻟﻠﻪ ﻭﺍﻗﻒ ﻣﻌﺎﻱ ﺷﺪﻳﺪ ..
ﻗﺎﻟﺖ ﻟﻴﻬﻮ ﻃﻴﺐ ﺍﺳﺮﻉ .. ﺍﻟﺰﻭﻟﺔ ﺩﻱ ﺑﺎﻗﻲ ﻟﻴﻬﺎ ﺗﻼﺕ ﺍﺳﺎﺑﻴﻊ .. ﻭﺗﻄﻠﻊ ﻣﻦ
ﺍﻟﺤﺒﺲ .. ﻗﺎﻟﻴﻬﺎ ﻛﻮﻳﺲ ﻳﺎﻧﺴﺮﻳﻦ ﺍﻟﺨﻄﺔ ﻛﺎﻻﺗﻲ .. ﺍﻧﺎ ﺡ ﺍﻓﺘﺢ ﺍﻟﻤﻮﺿﻮﻉ ﻻﻣﻲ
ﻓﻲ ﺍﻟﻴﻮﻣﻴﻦ ﺩﻳﻞ .. ﺍﻭﻝ ﻣﺎ ﺗﺪﻳﻨﻲ ﺍﻟﻤﻮﺍﻓﻘﺔ ﺍﻧﺘﻲ ﺗﻤﺸﻲ ﺗﺘﻜﻠﻤﻲ ﻣﻌﺎﻫﺎ ..
ﻋﺒﺪ ﺍﻟﻤﺠﻴﺪ ﻗﺎﻝ ﻟﻴﻬﻢ ﻳﺎﺟﻤﺎﻋﺔ ﺍﺩﻭﻧﻲ ﻣﻌﺎﻛﻢ ﺭﺍﻱ .. ﻟﻮ ﺍﻧﺖ ﻣﺸﻴﺖ ﺷﺎﻭﺭﺕ
ﺍﻣﻚ ﻫﺴﻲ ﺑﺎﻟﺘﺎﻛﻴﺪ ﺡ ﺗﺮﻓﺾ .. ﻻﻧﻬﺎ ﻣﺎﺑﺘﻌﺮﻑ ﺧﺎﻟﺪﺓ ﺯﻱ ﻣﻌﺮﻓﺘﻨﺎ ﻧﺤﻦ ﻟﻴﻬﺎ ..
ﺑﺲ ﺑﺘﻌﺮﻑ ﺍﻧﻬﺎ ﻣﺮﺍﺓ ﺭﺍﺟﻼ ﻣﻴﺖ ﻭﻋﻨﺪﻫﺎ ﻃﻔﻠﻴﻦ ﻭﻳﺘﺨﻴﻞ ﻟﻲ ﺍﻱ ﺍﻡ ﻣﻤﻜﻦ
ﺗﺮﻓﺾ ﻻﻋﺘﺒﺎﺭﺍﺕ ﺍﻟﻤﺠﺘﻤﻊ ﺍﻟﻐﺮﻳﺒﺔ ..
ﺧﺪﺭ ﻗﺎﻝ ﻟﻴﻬﻮ ﻃﻴﺐ ﺍﻧﺖ ﻓﻜﺮﺗﻚ ﺷﻨﻮ؟ ﻗﺎﻝ ﻟﻴﻬﻮ ﻧﺼﺒﺮ ﻟﻐﺎﻳﺔ ﻣﺎ ﺧﺎﻟﺪﺓ ﺗﺨﻠﺺ
.. ﻭﻧﺴﺮﻳﻦ ﺗﺠﻲ ﺗﺤﻨﺲ ﺍﻣﻚ ﻭﻟﺒﻨﻰ ﻳﻤﺸﻮ ﺯﻳﺎﺭﺓ ﻟﻲ ﺧﺎﻟﺪﺓ ﻓﻲ ﺍﻟﺒﻴﺖ ..
ﻭﻳﺘﻌﺮﻓﻮ ﻋﻠﻴﻬﺎ .. ﺍﻧﺎ ﻣﺘﺄﻛﺪ ﺍﻧﻮ ﺍﻣﻚ ﺡ ﺗﻌﺠﺐ ﺑﻲ ﺧﺎﻟﺪﺓ .. ﻻﻧﻮ ﺧﺎﻟﺪﺓ ﺍﻱ ﺯﻭﻝ
ﻳﺸﻮﻓﻬﺎ ﺑﺮﻳﺪﺍ ﻛﺪﺍ ﻟﻠﻪ ﻓﻲ ﺍﻟﻠﻪ ..
ﻧﺴﺮﻳﻦ ﻋﺎﻳﻨﺖ ﻟﻴﻬﻮ ﻛﺪﺍ ﻭﻗﺎﻟﺖ ﻟﻴﻬﻮ ﻫﻮﻱ ﻳﺎﺭﺍﺟﻞ !!!
ﻗﻌﺪﻭ ﻳﻀﺤﻜﻮ ﻗﺎﻝ ﻟﻴﻬﺎ ﻗﻠﻨﺎ ﻟﻠﻪ ﻓﻲ ﺍﻟﻠﻪ .. ﺧﺪﺭ ﻗﺎﻝ ﻟﻴﻬﺎ ﻋﻠﻴﻚ ﺍﻟﻠﻪ ﻳﺎﻧﺴﺮﻳﻦ
ﺳﻴﺒﻲ ﺍﻟﻠﻴﺎﻗﺔ ﺧﻠﻮﻧﺎ ﻓﻲ ﺍﻟﻤﻬﻢ .. ﺍﻧﺘﻲ ﺭﺍﻳﻚ ﺷﻨﻮ ﻓﻲ ﻓﻜﺮﺓ ﻋﺒﺪﺍﻟﻤﺠﻴﺪ
ﺩﻱ؟ .. ﻗﺎﻟﺖ ﻟﻴﻬﻮ ﻭﺍﻟﻠﻪ ﻓﻜﺮﺓ ﻇﺎﺑﻄﺔ ﻟﻮ ﺍﺗﻨﻔﺬﺕ .. ﻟﻜﻦ ﻫﻞ ﺍﻣﻚ ﺑﺘﻤﺸﻲ ﻟﻲ
ﺧﺎﻟﺪﺓ؟ ﻭﺍﻟﻤﻨﺎﺳﺒﺔ ﺷﻨﻮ؟
ﻗﺎﻝ ﻟﻴﻬﺎ ﺍﻧﺎ ﺑﻘﻮﻝ ﻟﻴﻬﻢ ﺍﻣﺸﻮ ﻟﻴﻬﺎ ﺯﻭﻟﺔ ﺑﻌﺮﻓﻬﺎ ﻭﺑﻌـــــﺮﻑ ﺯﻭﺟﻬﺎ
ﺍﻟﻤﺮﺣﻮﻡ .. ﻭﻳﺸﻮﻓﻮﻫﺎ ﻟﻮ ﻣﺤﺘﺎﺟﺔ ﻟﻲ ﺣﺎﺟﺔ .. ﻭﻣﺮﺓ ﻭﺍﺣﺪﺓ ﻳﺪﻋﻮﻫﺎ ﻟﻲ ﺯﻭﺍﺝ
ﻟﺒﻨﻰ ﺍﺻﻼ .. ﺑﺎﻗﻲ ﻟﻴﻬﻮ ﺷﻬﺮ ..
ﺧﻼﺹ ﻳﺎﺟﻤﺎﻋﺔ ﺍﺗﻔﻘﻨﺎ ؟ ﺍﺗﻔﻘﻨﺎ .. ﻭﻻﺣﻆ ﺍﻧﻮ ﺧﺪﺭ ﻟﺴﻊ ﻣﺎﻋﻤﻞ ﺍﻻﺳﺘﺨﺎﺭﺓ ..
ﻭﻣﺮﺕ ﺍﻻﻳﺎﻡ ﻭﺍﻻﻣﻮﺭ ﻛﺎﻧﺖ ﻣﺎﺷﺔ ﺗﻤﺎﻡ ﺑﺲ ﻳﻮﻡ ﺗﻘﺮﻳﺒﺎ ﻗﺒﻞ ﻣﺎﺗﻄﻠﻊ
ﺧﺎﻟﺪﺓ ﻣﻦ ﺍﻟﺤﺒﺲ ﺑﻲ ﺗﻼﺗﺔ ﻳﻮﻡ ﺗﻘﺮﻳﺒﺎ .. ﻧﺴﺮﻳﻦ ﻣﺸﺖ ﻟﻴﻬﺎ ﻓﻲ ﺍﻟﺒﻴﺖ
ﻭﻃﺒﻌﺎ ﻟﻘﺘﻬﺎ ﻟﻴﻚ ﺑﻘﺖ ﺍﻧﺴﺎﻧﺔ ﺟﺪﻳﺪﺓ .. ﻇﻬﺮﺕ ﻋﻠﻴﻬﺎ ﺍﺛﺎﺭ ﺍﻟﻨﻌﻤﺔ ﻭﺍﻟﺮﺍﺣﺔ
ﻭﺍﺯﺩﺍﺕ ﺟﻤﺎﻝ .. ﻭﺑﻘﺖ ﻧﺎﺭﻣﻨﻘﺪ ﺑﺲ .. ﻭﻧﺴﺮﻳﻦ ﺑﻘﺖ ﺗﻌﺎﻳﻦ ﻟﻴﻬﺎ ﻭﺗﺘﻌﺠﺐ ..
ﻭﻏﻠﺒﻬﺎ ﺗﺴﻜﺖ .. ﻗﺎﻟﺖ ﻟﻴﻬﺎ ﻳﺎ ﺧﺎﻟﺪﺓ ﻭﺍﻟﻠﻪ ﺍﻧﺎ ﺑﺘﻤﻨﺎﻙ ﻟﻲ ﺧﺪﺭ ﺍﺧﻮﻱ ..
ﺧﺎﻟﺪﺓ ﺩﻱ ﺍﻧﻌﺮﻃﺖ ﻭﻧﻔﻀﺖ ﻳﺪﻫﺎ ﺑﻲ ﻏﻀﺐ ﺷﺪﻳﺪ .. ﻭﻗﺎﻟﺖ ﻟﻴﻬﺎ ﺍﺳﻤﻌﻲ
ﻳﺎﻧﺴﺮﻳﻦ ..ﻟﻮ ﻋﺎﻳﺰﺓ ﺧﻮﺗﻚ ﻣﻌﺎﻙ ﺗﺴﺘﻤﺮ .. ﺗﺎﻧﻲ ﻣﺎﺗﺠﻴﺒﻲ ﻟﻲ ﺳﻴﺮﺓ ﻓﻲ
ﻣﻮﺍﺿﻴﻊ ﺯﻱ ﺩﻱ .. ﺍﻧﺎ ﻗﻠﺖ ﻟﻴﻚ ﻣﺴﺘﺤﻴﻞ ﺍﻓﻜﺮ ﻓﻲ ﺯﻭﺍﺝ .. ﺍﻧﺎ ﺣﺎﻟﻔﺔ ﻟﻮ ﺍﻟﺪﻧﻴﺎ
ﺩﻱ ﺿﺎﻗﺖ ﺑﻲ ﺯﻱ ﺧﺮﻡ ﺍﻻﺑﺮﺓ .. ﻣﺎ ﺑﻌﺮﺱ .. ﻭﻟﻮ ﺧﺪﺭ ﺍﺗﻜﻔﻞ ﺑﻲ ﺍﻭﻻﺩﻱ ﻟﻲ
ﻫﺪﻑ ﺯﻱ ﺩﻩ .. ﻣﻦ ﻫﺴﻲ ﺧﻠﻲ ﻳﺘﺨﻼ ﻋﻨﻬﻢ .. ﺍﻧﺎ ﺭﺑﻨﺎ ﻛﻔﻴﻞ ﺑﻲ ﻭﻗﺎﺩﺭ ﻋﻠﻲ ..
ﻭﺩﻩ ﺍﻟﻤﻦ ﺯﻣﺎﻥ ﺍﻧﺎ ﻛﻨﺖ ﻣﺘﻮﻗﻌﺎﻫﻮ ﻭﺧﺎﻳﻔﺔ ﻣﻨﻮ؟؟ .. ﻭﻋﺎﻣﻠﺔ ﻟﻴﻬﻮ ﺍﻟﻒ
ﺣﺴﺎﺏ .. ﺍﻧﻮ ﺧﺪﺭ ﻓﻲ ﺍﻟﻨﻬﺎﻳﺔ ﻳﺠﻲ ﻳﻄﻠﺒﻨﻲ ﻟﺰﻭﺍﺝ .. ﺍﻫﻮﻥ ﻟﻲ ﺍﻟﻤﻮﺕ ..
ﺍﻟﻰ اللقاء