الأصابع الشريفة.. طارق اللبيب

الحــلقة الثانية

خدر قال ليها والله ياهند المجازفة دي ماحبابا .. لازم خطواتنا تكون محسوبة .. كدي انتي اسمعي كلامي .. وامشي البيت.. اسألي الوالدة .. عن تصوراتها للوضع بتاع جيتنا ده .. بكون كيف والخسارات .. انتي قايلة نجي في البيت دي هينة كدي؟ ..
انا والله من جوه قلبي دايرك.. ومشتاق لمتين يلمنا بيتنا بالحلال.. لكن برضو ما داير استعجل واخسرك .. هسي العين بصيرة واليد قصيرة ..
قالت ليهو طيب موش ده طلبك.. انا بعمل القلت عليهو .. وانا متاكده امي ماعندها مانع من اي شي ..
سكت مسافة وطلع تلفونو.. بقى يعاين للارقام .. وبتكلم براهو ..بقول هسي الزول ده ابا يتصل مالو يارب؟ .. مخليني منتظر من الصباح ..
قالت ليهو منو الزول يا خدر.. قال ليها زول عندو شغل في الجريف ..
قالت ليهو طيب ياخي اتصل عليهو انت ..
قال ليها ناس الشغل انتي ماعارفاهم.. الواحد لو اتصلت عليهو يقول مفلس .. ويقوم يعصرني في السعر .. البلد دي فيها قوانين عجيبة خلاص .. التاجر يبتسم معاك تقول داير يغشني .. الزول يتعامل معاك كويس .. تقول بكسرلي في تلج داير ياكل راسي .. تتصل على زول يقول داير مني حاجة .. يعني البلد بقت فيها قوانين فرضوها الناس ضد الذوق والادب.. ونحن مجبورين نمشي بيها ..
لكن اقول ليك .. خليهو يقول العايز يقولو.. والله كان اتصل عليهو واشوفو ليه ما يتصل علي ..
ضرب ليهو داك فتح الخط .. الو سلام عليكم ..
معاك خضر بتاع البياض .. انت ياخي مديني مواعيد الليلة الصباح وانا قاعد متكسر في البيت راجيك ..
قال ليهو والله ياخدر انا ضربت ليك كتير وبجيني زول في تلفونك بقول لي النمرة غلط ياهو نفس الرقم الاديتني ليهو ..
خدر قال ليهو مستحيل تلفوني ده قاعد معاي.. ما شالو اي زول كدي مليني الرقم المعاك .. ملاهو الرقم لقى في غلط في الرقم ..
قال ليهو لالا ياخ .. الرقم القبل الاخير ده تلاتة ماستة .. خلاص يازول مافرقت اجيك متين؟ .. قال ليهو بكرة ان شاء الله .. المهم يازول اصلا ماقعدو كتير .. لانو هند اصلا اتاخرت ..
المهم بكرة اتصل على العمال الاتنين.. المفروض يشتغلو معاهو .. ومشى وصل للزول هناك في الجريف.. ولقو الراجل قاعد براهو.. خاتي ليهو كرسي قدام البيت .. وقاعد لابس جلابية نضيفة ومكوية وطاقية .. ومولع سجارتو.. ومركب السماعة بتاعة التلفون.. وبتكلم ..
والبيت كبير ماشاء الله .. والاتفاقية على الشغل كانت بحساب.. الامتار
حسب الامتار بتاعة البيت كلو وراهو الحساب ..
البيت سطوح ..فيهو قسمين قسم رجالي وقسم نسائي .. والظاهر القروش كويسه مع خدريعني ..
بعد شوية جات بت.. خدر قايلها دي المهندسة .. بقت تتكلم مع عادل سيد البيت .. سلمت .. وقالت ليهو لو سمحت ياعادل ..ممكن اتكلم معاك ؟
قال ليها جدا ..
قال لناس خدر خشو ابدو في الاوضة دي .. دخلو على الاوضة وبدو يعجنو في الاسمني والرملة ..
اتخيل الاوضة شباكا فاتح في الشارع .. وخدر سامع كلام البت مع عادل سيد البيت ..
قالت ليهو انت شكلك بتغش على .. وبتكذب كذب بدون هواده .. وماصادق معاي نهائي .. قال ليها انا بعد قبضت الرسايل في تلفونك.. تاني لو بقيتي قبلة مابصلي عليك .. انتي انسانة ماعندي ذرة وفاء .. وبدو يتناقشو منفعلين.. والصوت عالي والعمال جوة يسمعو .. خدر مدا راسو بالشباك.. وقال ليهو يا استاذ عادل اتكلمو براحة .. خفضو صوتكم.. الجيران سامعين كلامكم ده ..
المهم البت زعلت ونفضت يديها كدا.. وفاتت .. وعادل ولاهماهو .. يصلح في سمعاتو .. ولا عاين ليها .. وهي شكلها زعلانة زعل غريب ..
المهم خدر باشر الشغل عادي ..
بعد سبع دقايق من البت دي فاتت .. جات ركشة.. نزلت منها مراة .. في عمر التلاتين تقريبا.. وانسانة جميلة وانيقة.. لابسة توب ومتحننة .. ماشة زي الضابط في مراسم السلام الجمهوري ..
جات وقفت قدام عادل .. وقالت ليهو خليك يوم واحد صادق معاي .. الكان معاك هنا منو؟ وكانت بتعمل في شنو؟
وشنو يعني يعني بت تجيك في بيت فاضي ؟ اتكلم ياعادل ...
عادل ده خاف خوف.. لامن بقى يبلع في ريقو .. قال ليها يامراة .. انتي الليلة ماطبيعية ولاشنو؟ بت شنو؟ مافي بت جات هنا نهائي..
اهو ديل العمال اسأليهم .. قالت ليهو ياعادل البت دي انا بعرفها.. ومتابعاها لي زمن .. اوعك تكذب علي .. انا خلاص الليلة اخر لي يوم معاك .. بس تنتهي من الشغل وتوديني بيتنا .. يجي ابوي يتفاهم معاك ..
قال ليها قلت ليك مافي بت جات هنا .. وكورك لي خدر ..تعال ياخدر,,
خدر جا طالع .. المراة قالت لي خدر.. ..
اسمع يا انت .. مع اني عارفة انك ماحتقول الحقيقة .. شوفت البت الكانت هنا دي ؟؟
عادل قال ليهو .. عليك الله يا خدر .. في بت جات هنا؟ المراة دي بتهلوس شكلها؟؟
خدر قال ليها والله الحقيقة يابت العم ...الزول ده كذب عليك .. والمفروض يقول الحقيقة .. واليحصل يحصل ..
اي صح جات بت هنا .. ووقفت هنا برة ..ونحن كنا شغالين جوة .. في الاوضة دي .. وقالت ليهو انت شكلك بتغش على وبتكذب وماصادق معاي معاي نهائي .. قال ليها انا بعد قبضت الرسايل في تلفونك .. تاني لو بقيتي قبلة مابصلي عليك .. انتي انسانة ماعندي ذرة وفاء .. وبدو يتناقشو منفعلين والصوت كان عالي.. ونحن جوة نسمع .. حتي انا مديت راسي بالشباك .. وقلت ليهو يا استاذ عادل اتكلمو براحة .. المهم البت فاتت زعلانة .. وشكلها البيناتهم خربت ..
ده الحصل بالتفصيل ..
المراة خلت راجلها.. وبقت تعاين لي خدر مستغربة .. وقالت ليهو .. انت ليه كشفت لي الموضوع ده يعني؟؟ .. سبحان الله !!انت ماخايف انو الراجل الظالم ده يطردك من الشغل ؟؟
خدر قال ليها يطردني يطردني ..مابكضب والارزاق بيد الله .. مابكضب لو كتلني .. خلي يطردني ..
المراة قبلت على راجلها.. قالت ليهو .. يعني فيها شنو لو بقيت شجاع وقلت لي الحقيقة .. زي العامل ده ..
على الاقل كان انا طلعت الشك الفي قلبي ..وانا كنت احترمتك .. انا هسي كنت مفكرة انك عملت اكبر من كدا .. وكدا اطمأنيت وعرفت الحقيقة .. لكن نكرانك وكذبك .. كان حيخلي الشك في قلبي ليل ونهار ..
اتعلم مرة في حياتك تكون صادق وشجاع.. وفاتت طوالي .. اخدت ليها خطوات وجاتو راجعة .. قالت ليهو الزول ده لو طردتو من الشغل بتكون غلطت معاي انا ..
خدر طبعا" خلاص استعد لي انو ينهي الشغل.. لانو ضمان ضمان ينطرد الليلة .. لانو خلا الراجل قدام مرتو اقل من سمسمة ..
لكن حصل العكس.. عادل جاهو جوة قال ليهو .. والله ياخدر مع انك زول مابتحسب للعواقب .. لكن مرقتني من ورطة ..
انا بشكرك من جوة قلبي والله .. طبعا المراة دي مراتي وبت عمي وعمي الرباني. وخيري كلو من يدو .. وبخاف من زعلها جدا جدا .. ولو عمي سمع بحاجة زي دي بغطس حجري ..
خدر قال ليهو ياعادل .. والله مرتك دي مراة ظاهر عليها بت رجال .. ياخي ماتخونها ولاتكذب عليها .. قال ليهو خلاص اشتغل اشتغل.. والله انا حيلي كلو ميت من الخوفة ..
خدر قال ليهو اسمع يا مدير .. الصح كان مامرقك الكضب مابمرقك ..
ارح ارح ياجماعة الشغل .. واستمر في شغلو .. وماحصل ليهو اي شي .. وحس انو سعيد من جوة.. واتكيف من روحو.. وازدات ثقتو في نفسو .. وبقى يتبسم براهو ويقول.. اكضب ؟؟ والله ما اكضب.. انا خايف من شنو عشان اكضب .. الاقدار بيد الله .. والارزاق بيد الله .. انا كان كضبت اول حاجة بحتقر نفسي .. وبشوف نفسي انا الجبان .. وانا الضعيف .. (لله درك ايها الخضر) .!!
طبعا هندوية مشت للبيت .. وهناك وزارة الداخليه ليها السطوة والجبروت .. قالت لي امها يا امي انا بعدين عايزه اتكلم معاك ..
قالت ليها كلام شنو.. انا عارفة كلامك المكحلة مايملاها.. سمح
.. المهم بعد المغرب كدي .. نادت امها في الاوضة براها .. عشان تقدر تقنعها بالزول البتحبو ..
قالت ليها يا امي والله خدر ده اكتر زول جادي .. وماعندو مانع يجينا في لحظة .. بس الظروف واقفة قدامو .. امها قالت ليها الكلام ده كل مرة بتقوليهو ويطلع زي رفاقتو .. انتي اي زول يتقدم ليك يطير .. تاني مايجي راجع .. شكلك عندك عارض الا نشوف ليك شيخ ..
قالت ليها يا امي والله انا عارضي معروف .. عاداتكم وتقاليدكم والمباهاه والمبالغة .. ياخوانا العرس ده موش عقد وكرامة وخلاص؟؟
.. يعني في داعي الناس تصرف في الزواج ميتين وتلتمية مليون ..
هسي فدوى بت خالتي دي .. عليك الله عرسها ده بكونو خسرو فيهو كم ؟
قالت ليها مالو يا يمه ..صلاة النبي ..عرس الهنا والمنى .. اريتو يايمة حال بنياتي ..
قالت ليها المهم يا امي.. انا ماعايزة شيلة .. انا ماعايزة صالة .. انا ماعايزة اي بزخ ومبالغات.. انا عايزة عقد وكرامة وبس .. حتى لو في شي على حسب قدرة الزول.. مافي داعي نحن نمحق البركه .. انا ماعايزاك تقيفي لي في الموضوع ده .. دي حياتي .. وانا عايزة كدا..
قالت ليها يابت اللهيه التلوي خشمك .. دايرة تسويني ضحكة قدام الحريم .. هسي وريني منو هي البت في الزمن ده البترضى بي كلامك ده .. انتي خدر البتقوليهو ده.. موش قلتي لي شغال مقاول ؟؟ صاح ولا انا غلطانه ؟
قالت ليها ايوة مقاول وشغلو بالملايين .. بس اليومين ديل شغل مافي .. وظروفو صعبة.. لكن ان شاء الله بعد نعرس .. كل الامور تمشي تمام ..
قالت ليها اسمعي ياعديمة الفهم .. العرس ده ياهو البوري الناس حياتك ومستقبلك .. ان بقى عرس مجيه .. معناها انتي بتتمتعي وتترتعي .. وان بقى عرسا" مبشتن ومخوزق الناس كلهم بعرفووك انك خلاص بتعيشي عطشانة وجيعانة ومقطعة .
قولي لي زولك ده.. اجهز تب وتعال لينا .. قالت ليها .. طيب يا امي سؤال .. انتي قولة خير دي بدفعو فيها كم ؟ قالت ليها كان عشرة كان عشرين على حسب الوضع؟
في ناس بدفعو عشرين .. والمقطعين بدفعو خمسة بس ..
البت بي قلبها قال وححح وقالت في سرها ..اووووب علي انا من الملايين دي.. من هسي بدت؟؟ .. خدر يجيبها ليهم من وين المسكين .. ؟؟
الى اللقاء