الأصابع الشريفة.. طارق اللبيب

الحــلقة الخامسة

نسرين فرحانه .. شالت الرقم وركبت المواصلات..
مشت علي اهلها.. وخدر ركب اتخارج علي الحاج يوسف. اصلا ما اتاخر في الحدايق.. يعني المسافة الاخدها في الحدايق كلها ماتامه ليها اربعين دقيقه. .. خدر وصل البيت زي السااعة عشرة الا ..ولقي ناس البيت كلهم قاعدين .. يتعشو عمك حسيب الله ود حاج الضو. وامو غاليه بت موسي. واخوانو كلهم بتعشو في صينية واحدة .. قعد اتعشى معاهم .. وفوق العشاء قال لابوه.. و يا ابوي انا عايزك في كلام .. قال ليهو كويس اتعشى بعد العشا تعال لي بهناك ..
اها بعد اتعشو حسيب الله مشى غرفتو.. جات غالية ام خدر لاحقاهو قام قال ليها يا غالية ...
،، الخدر داير يتكلم معاي في موضوع.. وانا ذاتي داير اتكلم معاهو عليك الله امشي بي غادي.. و ماتجي بي جاي .. المراة قالت ليهو حكم القوي على الضعيف.. عاد نقول شنو؟ . ومشت طوالي .. وكان نفسها تعرف خدر داير يقول لابوهو شنو؟
اها الخدر وكت جا .. قال لابوهو يا ابوي والله انا داير اتزوج .. ولقيت لي بت حلال .. وماعايز افرط فيها .. بس عايزك تقنع امي تمشي معانا ،، وانا هسي عندي شغل كويس ..كلها شهر.. شهر ونص بلملم ..وان شا الله ربنا يساعدني.. واعقد ..
هو بتكلم وابوهو خاتي يدو فوق خشمو وبعاين ليه .. قال ليهو خلصت يا الخدر؟ .. قال ليهو نعم يا ابوي ..
قال ليهو انا ماعايز اقول ليك اخوك الاكبر منك .. قاعد لسع .. طبعا من حقك تتزوج في الزمن البعجبك .. انا ما ح اعترض .لكن انت عارف نحن ظروفنا زي الزفت .. وماعندنا ليك اي مساعده .. لو بتقدر تكمل موضوعك براك .. يبقى مافي مشكله..
قال ليهو انا عارف كدا كويس بس .. انا عايزكم تكونو معاي انا خايف امي ترفض.. قال ليهو امك دي خليها علي .. بس جهز امورك ..ونحن مستعدين نمشي معاك ..وبرسل لعمك حسين وعمك اسماعيل .. ولو داير خيلانك التلاته بنمشي معاك بنعزك تب .. البت من وين وجنسها شنو؟ .. قال ليهو والله سااكنين في بحري حلة حمد.. وقبيلتها دي مابتهمني.. قال ليهو كيفن يعني؟؟ انت ماك عارف نحن في اجناس معينه ما بنعررس منها؟؟..
قال ليهو ابوي انت قبل كدا قلت اي زول حر في نفسو.. في اختيار شريكة حياتو .. لابت لا ولد ما بتسيطر فيهو .. قال ليهو يازول ان شا الله تجيبها من بلجيكا.. ما تكتر كلامك .. وتقعد ترغي لي .. جاهز نحن جاهزين .. قال ليهو خلاص اتفقنا يا ابوي .. على بركة الله تصبح على خير ..
المهم يازول باختصار خدر بقى يوميا يمشي الشغل .. والشغل بتاعو اخد فيهو اسبوع عديل .. وكل الاسبوع اتصالاته مع هند متواصله.
يوم في نص الاسبوع دا.. في تلفون جا لي هند ..
الو سلام عليكم .. هند؟
قالت عليكم السلام نعم معاي منو؟..
قالت ليها معاك انا نسرين
قالت ليها والله ماعرفتك ؟
قالت ليها نعم مابتعرفيني ياهند.. لكن انا بعرفك كويس .. لاننا نحن الاتنين مخدوعين من زول واحد ..
هند قالت ليها عفوا والله مافاهمة حاجة ..
قالت ليها ياحبيبتي ده كلام سري .. لو بتوعديني يفضل سر بينا بحكي ليك بالدلايل .. ولو عايزة تقابليني بقابلك ..
قالت ليها طيب احكي ..
نسرين قالت ليها انا حبيبة خدر يا هند .. واخيرا عرفت انك انتي برضو حبيبتو .. وواعدني بخطوبة زي ما هو اعدك .. وبلاقينا الاتنين وبحبنا الاتنين ..
اديك الدليل ؟
قالت ليها احكي .. قالت ليها تتذكري يوم الاربعا.. اللهو اول امس بالليل .. انتي اتصلتي على خدر .. وقال ليك انا في الحدايق مع اصحابي ؟ بتصل عليك بعد عشرة دقايق؟
متذكرة ياهند؟
قالت ليها ايوة حصل ..
قالت ليها ما كان مع اصحابو ولاشي.. كان معاي انا .. وكنا في جو كلو رومانسية .. بس لمن انتي اتكلمتي معاهو.. غلط وفتح السماعة الخارجية.. وانا سمعت صوتك .. وانفصمت فيهو وهجت فيهو.. وقعدت ابكي .. بطول حسي .. قام حكى لي علاقتو بيك ..
وقال لي انا ماعندي ليها حاجة.. بجرجر فيها ساي.. لغاية ماتطلع من حياتي ..
هند قالت ليها والله حقيقة يا نسرين.. كلامك صح.. ده حصل فعلا قال لي مع اصحابي.. وقال لي بتصل عليك بعد عشرة دقايق ..
لكن انتي جبتي رقمي من وين ؟
نسرين قالت ليها جبتو منو هو ..
هو اصلا مابكسر لي كلام .. قلت ليهو اديني رقم البت دي .. الاقيها واشوفا .. قال لي بديك ليهو لكن عليك الله ماتحكي ليها..
قالت ليها خلاص يا نسرين شكرا" ليك .. انتي اديتيني حقيقة انا كنت غافلة منها .. بالجد ماعارفة اشكرك كيف ..
الحقيقة ياجماعة نسرين لعبت اللعبة صح .. واستدلت على الاكاذيب بالحقايق زي مابقولو .. ورتها حاجات حاصلة فعلا .. عشان تصدق الكضبه.. ودي اخبث طريقة من طرق الكذب والاففتراء.. نٍسأل الله السلامة ..
المهم هند عاشت ساعات عصيبة.. من الانهيار العصبي والدخول في عالم شبيه بالجنون من الغضب والاحباط ..
بس بالليل اتصلت على خدر.. وخدر حسه انها صوتها متغير .. واصلو ابا يسألها عن شي ..
قالت ليهو ياخدر انا لازم بكرة الاقيك .. قال ليها معليش انا بكرة شغال بدري .. قالت ليهو بتقدر تجيني بالمساء في الزوادة؟
قال ليها يا هند في شنو الضروري شديد كدا؟؟
قالت ليهو في كلام عايزة اقولو ليك .. وماينفع اقولو في التلفون .
لازم الاقيك وجها لوجه .. لانو كلام مصيري وبتعلق بي حياتنا ومستقبلنا .. قال ليها طيب ما نحن يوميا بنتكلم عن حياتنا ومستقبلنا بالتلفون.. الجد شنو .. على انك لازم تلاقيني .. ؟؟
قالت ليهو لانو الكلام ده حساس.. ويمكن يكون اخر كلام يحصل بينا .. وعليهو انا بحدد استمر معاك ولالا .. انت ح تلاقيني ولا يفتح الله .. ؟؟
قال ليها جدا بكرة الساعة كم ؟ قالت ليهو اي وقت لاني بجيب معاي اخوي الاصغر مني.. طوالي حتي لو بعد 9 مساء ماعندي مشكلة ..
قال ليها لالا.. انا بطلع من هناك بدري.. وبلاقيك قريب المغرب .. انت بعد المغرب مباشرة تلاقوني في الزوادة ..
خدر عرف انو نسرين اتصلت على هند.. وصاطت ليها راسها .. وعايز يعرف ردة فعل هند.. مع قوالات الناس والفتن.. بتتصرف كيف ؟
لكن برضو عامل فيها رايح .. وعامل فيها مافاهم اي حاجة ..
وهي بقت ماعارفة الحقيقة وين .. وكانت مفتكرة انو خدر اصدق زول على وحه الارض .. وهسي بي كلام نسرين عرفت انها مخدوعة في خدر.. الكانت مفتكراهو ملاك .. وطلع زول اي كلام ..
المهم بقت طول اليوم تفكر في الكلام البتقولو ليهو .. عشان تقدر تثبت ..
هل الزول ده حيستمر يكذب عليها؟؟ ولا ح يعترف بالحقايق القالتها نسرين ..؟؟
وفعلا نسجت فكرة كويسة.. بتوضح ليها الامور شديد ..
باكر المساء جابت اخوها اسمو عبدالهادي اصغر منها .. قالت ليهو عايزاك تمشي معاي لموضوع يكون سري بيني وبينك ..
عبد الهادي قال ليها شنو.. ؟؟
قالتليهو ماشة اقابل خطيبي .. وعايزة اقطع علاقتي معاهو ..
اصلا امي داقة فيهو جرس وهو ظروفو مامساعداهو .. واخيرا طلعت لي كلامات .. بتمشي معاي ؟؟.. قال ليها يلا.. والله مايمشي معاك الا انا ..
وركبو رقشة ومشو انتظروهو من قبل المغرب في الزوادة ..
الزوادة دي حديقة في بحري .. قريبة من كوبري الحديد ..
وانتظرو شوية.. لغاية بعد المغرب .. خدر طبعا من الشغل غشا بيتهم في الحاج يوسف شارع واحد .. وغير ولبس سريع ركب جاها ..
اول ماشافتو جاي داخل الزوادة .. قالت لي اخوها عبد الهادي .. اول ما تسلم عليهو.. استاذن وامشي اقعد في الكرسي داك .. عشان ماتسمع الكلام .. قال ليها شكلك الليلة عايزة .. تعصريهو وتمصريهو ..
قالت ليهو اصبر ..
اول ماجا خدر وسلم .. وعبد الهادي قال عن اذنكم ياجماعة.. عندي اتصال ..
اول ماقعدت وسألته من اخبارو واخبار الشغل .. قالت ليهو ياخدر.. طبعا" انت عارف امي ماعايزاك كلو كلو .. واناماعايزة ادخل في موضوع فيهو غضب امي.. وهسي مرشحين لي واحد مغترب .. وامي عايزاهو شديد .. وانا شكلي عايزة ارضخ للموضوع ده ..
قال ليها حرام عليك يا هند .. نحن متفقين .. وانا باني عليك كل امالي ..
ليه عايزة تبيعني بالسهولة دي ..
قالت ليهو لانك ...............ولا خليك .. مافي داعي اتكلم ..
قال ليها اتكلمي مافي مشكلة ..
قالت ليهو ممكن اسألك سؤال ؟ انت يوم انا اتصلت عليك.. وانت قلت لي انا في الحدايق .. قلت لي معاي منو ؟؟
قال ليها قلت ليك معاي اصحابي .. وفعلا كان معاي اصحابي انا مابكذب عليك قالت ليهو اصحابك منو؟
قال ليها علاء وعمار ونسرين ووو المهم عداهم كلهم ..
وقال ليها في اللحظة الانتي اتصلتي علي بالذات.. كانت نسرين ماشة تجيب رصيد .. وانا مشيت معاها .. واحكي ليك بالتفصيل كمان ..
نسرين قالت لي انا بالنسبة ليك شنو؟.. قلت ليها صديقة واخت..
قالت لي مافي صداقة بين البت والولد .. وقالت لي يا اما تجي بيتنا تطلبني.. يا اما تاني مابتشوف وشي .. وانا تفاجأت من كلامها ..
وقلت ليها انا مرتبط بواحدة وما بقدر ارتبط بيك .. وقعدت تبكي
ووووو المهم حكا ليها الحقيقة بالتفصيل الممل ..
لغاية ماقال ليها وطلبت مني رقمك عشان تتعرف عليك .. لكن انا عرفت هدفها .. واديتها رقمك .. وعايز اشوفك بتواجهي النوعية دي كيف .. ويا للاسف مع اول امتحان انهرتي ياهند ..
هند قعدت تبكي.. وغلبها تمسك نفسها من البكا.. لغاية ما اخوها لاحظ ليها .. وجا قال ليها مالك ياهند؟؟
الزول ده قال ليك شنو؟ قالت ليهو ارجع مكانك يا هادي.. لو سمحت ..
وقبلت على خدر قالت ليهو انا اسفة ياخدر سامحني .. سامحني اني شكيت فيك لي لحظة .. حرام عليها البت دي .. عيشتني في غم انا قربت اجن ..
قال ليها ولايهمك.. بس المفروض ماتصدقي كل مايقال.. حتى لو حكو ليك الحقيقة مخلوطة بالكذب اتأكدي اول ..
ياهند عمرو الكذب واللف والدوران .. بعقد المشاكل اكتر .. والحقيقة مهما كانت هي البتخلي الامور زي فلق الصباح الباهي ..
انا ياهند بعشق اتني في الدنيا .. واحدة هند .. والتانية الحقيقة ..
اها اخبار المغترب شنو؟؟ وقعد يضحك .. بقت تضحك ودموعها في عيونها .. والامور اتضحت بسبب الصدق .. والشفافية ..
ولو خدر كذب ولف ودور.. كان ضيع اي شي في لحظة .. المهم القعدة اتحولت لي ونسة حلوة .. وكلام جميل .. ووعدها انو في اخر الاسبوع ح يستلم قروش واحتمال كبير يجيهم في البيت قريب
وفرحت جدا" .. وودعتو ومشت فرحانة دايرة تطير .
فهل تدوم هذه الفرحة..
الى اللقاء ان شاء الله