الأصابع الشريفة.. طارق اللبيب

الحــلقة السابعة

قبل مانشوف اخبار هند مع صاحبتها خالدة .. خدر بي غادي الحمد لله.. خلص الشغل تمام .. ولمن عادل لقى الشغل بتاع خدر شغل متقن وباخلاص .. قرر يمسكو النقاشة برضو .. خدر في النقاشة برضو فنان فنان .. واتفق معاهو بي سعر كويس .. وعادل بالجد ماقصر مع خدر .. خدر قال ليهو والله اعمل ليك عملية في البيت ده.. اخلي الناس كلها تتفرج وتتعجب .. المهم بعد سلمو قروش البياض .. كان نصيب خدر من الحكاية دي خمسة مليون وشوية .. واتفق معاهو على انو من الاسبوع الجاي يبدا في النقاشة .. برة وجوة .. المهم يازول اول من خدر استلم القروش .. اتذكر كلام هند قالت ليهو امي.. قالت البدفعو خمسة مليون في قولة خير ديل المقطعين ..
قال انا لازم اشوف لي تمامة للقريشات ديل.. عشان هندوية ما تنذلا قدام اهلها ..
مشى .. للصادق اخوهو .. قال ليهو يا الصادق انا عندي معاك كلام سري للغاية.. بس لو بتوعدني ابوي مايعرف .. بقول ليك ..
قال ليهو احكي ياخدر .. متين انا قاعد اشيل القوالات؟ ..
قال ليهو انا طبعا ماشي اودي قولة خير لي ناس هند .. والحمد لله في الفترة الفاتت دي اشتغلت كويس.. ولسع الشغل ماشي ..
فعايز منك تسلفني مليون ونص بس.. اتمها ليهم سبعة .. عشان امها مراة طماعة .. ودايرة قروش في قولة خير ..
قال ليهو انت اهبل ؟ في قولة خير بي سبعة مليون ؟
قولة خير دي شنو ذاتها عادة سيئة .. وحتي الناس البعملوها بدفعو قيمة رمزية .. يعني ما اكتر من مليون لو بالغت .. حاجة تعبيرية كدا .. لكن الكتير ده المهر يامعلم .. انت شكلك فاهم غلط ..
قال ليهو لالا والله.. قالت دي قولة خير .. قال ليهو ده ماسمعنا بيهو ياخوي..
الناس ديل شكلهم دايرين يستغلوك .. يسفوك وعكس الهواء يفكوك ..خدر قال ليهو لالا يا الصادق.. انت معناها مابتعرف هند ..
قال اهو بنتعلم نعرف .. المهم ياخوي .. انت عايز كم؟ قال ليهو مليون ونص وتسلم ..و انابوعدك .. اول ما اخلص من شغلي بتاع الجريف .. بسلمك قروشك.. وانت عارفني ما بدين قروش .. لو ما ضمنت اني بسددها في مواعيدها .. والله الا اكون ميت ..
قال ليهو عارفك ياخوي.. ماتقعد تهضرب .. المهم يازول سلمو ليك القريشات.. تمت سبعة مليون .. وبقى قاعد فرحان .. منتظر المساء يتلقى تلفون من هندوية.. وهوماعارف هندوية شغالة في اجراءات البيع الاخيرة ..
طبعا هند مشت لي خالده ... وحكت ليها من البداية الحصل شنو .. وحكت ليها عن معتز .. وعن وسامت.. و ولبسو .. وقوامو .. وقروشو .. وبيتو .. واغترابو .. وزادت حاجات من راسها ..
خالدة قالت ليها انتي .. يا هند معتز ده عرفتيهو متين ..؟
قالت ليها لسع ماعرفتو.. اول مرة اشوفو.. قبيل النهار ..
قالت ليها .. يعني ماعارفة لو انسان صادق زي خدر.. او كذاب زي بقية الرجال .. ؟؟
قالت ليها ماعارفة والله.. لكن زول صادق زي خدر انا مالاقاني طبعا"..
قالت ليها طيب .. ياختي انت عرفتي خدر من زمن.. وعرفتي شخصيتو.. واخترتيهو لانو شخصيتو واخلاقو نادرة .. وهي البتنفع معاك؟؟
كيف تخلي الحاجة الانتي متأكدة من قيمتها .. وترميها في الشارع .. وتشيلي حاجة انتي ماعارفة عنها شي ؟؟ انتي يا هندوية عرفتي خدر .. وعرفتي اخلاقو وحبيتيهو عشان جوهرو .. وعشان صدقو وصراحتو .. تجي تغرك الاشكال والقروش ؟ انتي هسي لو اتفاجأت بانو الانسان ده عبارة عن صورة واكاذيب .. تاني بتلمي في زول زي خدر ده بالهين؟
قالت ليها لكن يا خالدة .. خدر قدامو كتير .. ولسع ماعمل حاجة .. وشغلو ذاتو ما ماشي كويس.. وح يأخرني ويديني البورة ساي .. خليني اجرب حظي .. احتمال تضبط .. والزول ده يكون كويس ..
قالت ليها يعني شختك بختك .. بطيخة مقفولة .. ياهندوية؟؟؟
هند قالت ليها بالضبط كدا؟.. قالت ليها على كيفك يا هند.. لكن والله لو انا عندي خدر.. ماببيعو بي قروش الدنيا ..
هند صرت وشها.. وقالت ليها يهوداك خدر .. امشي عليهو .. انتي من زمان كان تقولي خاته عينك عليهو.. كنت بخليهو ليك ..
قالت ليها اسمعي هنا يا الغبيانة .. انا زول كان بحب صحبتي .. مستحيل افكر فيهو ..لكن انا بضرب ليك مثل ..
خالدة سكتت مسافة.. وقالت بينها وبين نفسها.. ياجماعة هند دي مادام جاية تشاورني.. ودايراني اديها الكلام الصاح .. ليه ماعايزة تقبل كلامي .. معناها هي اصلا قنعت من خدر.. ودايرة زول يدعمها عشان ماتحس بالذنب بعدين ..
كويس انا بديها كلامي الاخير ..
قالت ليها ياهند .. ممكن تسمعيني ؟ انتي موش جيتي تشاوريني في الموضوع ده .. ولا جيتي تديني خبر..
قالت ليها جيت اشاورك والله ..
قالت ليها ماتتخلي عن خدر .. مهما كانت الظروف والاسباب .. وبعدين قولي خالدة ضرتني ..
قالت ليها طيب يا خالدة .. لو كانت امي مارضيانة بي خدر.. وعايزة معتز .. موش انا المفروض اعمل الخطوة البترضي امي علي ؟
قالت ليها انتي ياهند بتغشي في منو ؟ بتغشي فيني انا .. ولا بتغشي في روحك .. انا عارفاك وعارفة عنك اي حاجة .. امك من زمان ماعايزة خدر.. بس انتي مصره عليهو .. وقاعدة تقنعي في امك ..
وهسي امك وعدتك.. قالت ليك لو قلتي ماعايزة معتز.. انا بقبل بي خدر . قالت ليها ماياهو ده ياخالدة الشي المحيرني .. والله انا خايفة افوت معتز .. وبعدين اندم مع خدر والبهدلة .. والله ماعارفة اعمل شنو؟
قالت ليها انتي هسي عندك رغبة في خدر اكتر؟.. ولا في معتز.. ؟ بغض النظر عن الوضع المادي؟ ..
قالت ليها الصراحة سوا سوا ..
قالت ليها والله طلعتي زولة حقيرة .. وماعندك عشرة بي تعريفة .. ياخي حرام عليك.. البشوفك زمان تتكلمي عن خدر.. يقول لو جاك السلطان سليمان ما ح تقبلي بيهو ..
قالت ليها والله يا خالدة .. انتي حبيبتي .. مابكذب عليك .. انا من ما شفت معتز .. حساباتي اتلخبطت ..
قالت ليها خلاص.. يبقى مافي داعي تعلقي خدر.. اكتر من اللازم امشي انهي معاهو الموضوع.. خليهو يشوف حياتو .
قالت ليها ايوة اصلي ناوية على كدا ..
اها ياجماعة هسي مرت تلات ايام.. وما اتصلت على خدر .. وخدر متعود انو مايتصل عليها.. الا هي تديهو خبر بظروفها في البيت كيف .. يعني ما بتصل عليها هو .. متفقين على كدا ..
المهم ياسيدي .. خدر مجهز السبعة مليون.. ومنتظر البت تتصل عليهو .. عشان يديها البشارة .. ومستغرب البت دي طولت كدا ليه؟
وهي طبعا" اتصالاتها كلها مع خالتها سمية ..
وسميه شغالة فيها غسيل في الدماغ .. لغاية ما البت استوت علي نار هاديه .. وبقت يومها كلو تتخيل في معتز.. وقعدتو وطريقة كلامو .. وتتبسم براها .. اول مايمر عليها خيال خدر.. تشيل نفسها وتختو ..
وحاسه بالهم.. وماعارفة الهم ده مصدره شنو؟
طبعا" دي ردة فعل طبيعية .. الاحساس بالتخلص من انسان مخلص .. والاصرار على ظلمه .. والتفكير في طريقة للتخلص منه بغير جرح ولاحرج ..
وهمها كلو .. تتصل عليه كيف؟؟ وتقول ليهو شنو؟؟
المهم يوم بالمساء ..قوت قلبها .. وادتو جرس واحد .. خدر لمن شاف رقمها في الشاشة . الدنيا كلها نورت في وشو.. وحسه بي هوا بارد دخل في انفاسه .. وابتسم ابتسامة لذيذه خلاص ..
طوالي رجع ليها .. اول مافتحت الخط ..
قال ليها شرفتي ونورتي ..
يشهد الله اشتقت ليك شوق .. لدرجة حاسي اني زي العيان .. ومافي لي دواء غير صوتك .. البت دي قلبها عمل فرا . وجاتها وجعة وغمه في قلبها .. لانها عارفة خدر صادق في اي كلمة تطلع منو ..
بقت تتكلم معاهو وبالا بره ..
كيفك ياخدر .. ان شاء الله كويس .. انا اسفة في اليومين الفاتن ديل ما اتصلت عليك .. والله نفسياتي في الواطة ..
قال ليها مالك؟ ان شاء الله خير .. انا طبعا" عندي ليك مفاجأة ح تروح منك كل النفسيات والمعاناة ..
قالت ليهو شنو المفاجأة؟ .. قل لي ان شاء الله تفرج علي شوية ..
قال ليها انا احتمال اجيكم في اليومين الجايات ديل .. قالت ليهو يهدي المشكلة ياخدر .. ياخي انا نفسياتي في الارض.. بي سبب امي .. امي ياخدر .. بقت ضاغطاني ضغط عجيب .. عشان اسيبك ..
حتي بقت لابتاكل ولابتشرب .. لامن بقت عيانة .. بي سبب اصراري عليك .. امي ياخدر ماعايزاك كلو كلو .. انا اعمل شنو ياخدر؟ ..
قال ليها .. انا لكن يا هند جهزت قولة خير.. سبعة مليون والله .. والله الشغل ماشي كويس .. قالت ليهو والله امي الشايفاها دي.. لو دفعت ليها مليار ماعايزاك ..
انا اعمل شنو ؟ والله تعبت معاها .. قال ليها طيب خليني اقعد معاها
انا بتكلم معاها .. بحاول بقنعها والله .
قالت ليهو ماعايزة تشوفك.. انااقترحت ليها .. قلت ليها بخلي خدر يقعد معاك .. وتسمعي من خشمو .. رفضت وقالت لي لو جبتي لي خدر ده في البيت.. انا بشرب صبغة واموت واريحك مني ..
قال ليها طيب نصبر شوية امكن تقتنع ياهند ..والله انا بصبر وعندي ظن في ربنا يفتحها علي .. والله الشغل ماشي معاي كويس ..
قالت ليهو مافي طريقة.. والله ياخدر هسي امي كلمت ابوي.. وقالت ليهو اقرب زول يجي يتقدم ليها .. نحن بنديهو .. وابوي ذاتو بقى واقف معاها.. وانا ماعارفة اعمل شنو.. ؟ وقعدت تبكي بقى مصطنع ومفتعل.. انا مضطرة ياخدر .. ان شاء الله ربنا يقسم اخير مني .. وانا لي الله .. وان شاء الله ربنا يصبرني .. وطوالي قالت ليهو مع السلامة ياخدر .. عشان امشي اكلم امي.. اقول ليها انا خليت خدر .. عشان تاكل ليها لقمة.. امي بقت عيانة ياخدر ..
قال ليها خلاص امشي كلميها.. عشان تاكل .. لكن ماتقنعي انتي .. ماتستلمي.. حاولي رضيها باي طريقة .. قالت ليهو حاولت كتير حاولت .. غلبني غلبني غلبني .. قال ليها يعني خلاص كدا ياهند؟
قالت ليهو ايوه خلاص ياخدر .. مع السلامة ياخدر .. خدر ماقدر يرد عليها .. بقى ساكت متبكم بس .. وقفلت منو التلفون .. خدر طبعا مصدوم صدمة ..المكالمة خلصت ولسع خاتي التلفون في اضانو .. ومبهوت .. زي الزول المات جناهو قدام عينو.. وطلع من البيت.. الكلام ده بالمساء .. طلع مشى بالشارع.. وهو ماعارف ماشي وين.. وطلع لغاية ما وصل الزلط .. وقطع الزلط بدون مايعاين للعربات المارة ..
الى اللقاء ..