'Wag mo akong sanayin
Sa laging pagtawag mo
Dahil ayaw kong hanap-hanapin
'Yang malokong boses mo
'Wag mo akong linlangin
Gamit ang mga salita mo
"I love you" na binubulalas mo
Baka maloko ako
Isip ko'y 'wag paglaruan
Ng mga makukulit mong banat,
Ng pagkanta mong lihis sa nota,
At ng pagtugtog mo ng gitara
'Wag mo akong kunsintihin
Sa talento mo sa musika
Pati mga kuwento mong likha
Araw-araw inaalala
'Wag mo akong lokohin
Ng iyong ngiting makulit
Dahil pati ang iyong mukha
Sa diwa'y hindi maalis-alis
'Wag mo akong sanayin
Dahil ayaw kong umasang
Balang araw, ang makakapiling ay ikaw
At ang pag-ibig ko'y iyong matatanaw
Dahil alam ko ang katotohanan
Ang puso mo'y iba ang laman
Ayaw ko lang sa bandang huli
Maiwan akong nasasaktan
"Sa panaginip na lang pala kita maisasayaw"
Sambit ni Ely Buendia
Hirit naman ni Chito Miranda,
"Tanggap ko, oh aking sinta, pangarap lang kita"
Mukhang pinapatamaan ako
Ng mga kantang naririnig ko
Dahil sinasabi nila ang totoo
Sa kung ano'ng laman nitong puso ko
Alam kong kaibigan mo lang ako
At sa panaginip lang ang salitang "tayo"
Kaya ang damdamin ko'y pilit itatago
Sa isang palayaw kong ibinigay mo
BINABASA MO ANG
Bigyan Mo ng Title ang Tula
RandomMga tulang hinugot ng isang simpleng tao sa kanyang malikot na kaisipan kung saan pinagsama-sama ang tamis ng realidad, pait ng pantasya, at sampal ng kanyang mundong ginagalawan. Samahan pa ng kanyang mga kaunting karanasan, mga hugot, mga kabaliwa...
