Tatlong araw makalipas ang eleksyon
Inaasahan ng mga mamamayan ang pagbabago
Dahil sawa na raw ang mga tao sa baluktot na sistema
Ganid na mga opisyales at kahirapang nadarama
Lagi ko na lang naririnig sa tabi-tabi
Mga reklamong nakakarindi
At pag-uwi mo sa bahay para manood ng balita
Bangayan at patayan ang lagi mong makikita
Problema sa agrikultura at edukasyon
Lalong lumalalang init ng panahon
Pera ng bayang napupunta sa kung saan
Problema sa trapikong tila wala nang hangganan
Sabihin na nating may pagkukulang ang mga mambabatas
At laging nating bukambibig na walang ngipin ang batas
Ngunit kung titingnan mo ng masinsinan
Tayo rin ay may kasalanan sa ating inang bayan
Nakalimutan natin ang pagkakaroon ng disiplina,
Ng respeto sa mga opinyon ng bawat isa,
Ng laging pagsunod sa kung ano ang tama
Nakaligtaan na natin ang salitang "pagkakaisa"
Tama na ang turuan, tama na ang sisihan
Ngayon na ang panahon para baguhin ang nakagisnan
Para sa sarili, sa pamilya, sa kapwa, at sa bayan
Sa kinabukasan ng Perlas ng Silanganan
Para sa taong iniluklok ng taong bayan
Sa'yo nakasalalay ang magandang kinabukasan
Aasa sa'yo ang mahigit isandaang milyong Pilipino
Sa malaking pagbabagong ipinangako mo
Para sa mga Pilipinong nais ng pagbabago
Kung gusto mo nga ng pagbabago, simulan mo sa sarili mo
Dahil hindi sa gobyerno magsisimula ang kinabukasan ng bayan
Ngunit sa mga nasasakupan nitong mga mamamayan
Kung gusto natin ng maayos na Pilipinas
Sa kasalukuyang kahirapan ay makaalpas
Magtulungan ang gobyerno, tao, at batas
Para maaninag ang inaasam na bukas
At bago ka man magreklamo ng kung ano-ano
Tungkol sa paligid mong napakagulo
Pwede bang pakiayos ang tricycle mo?
Nakabara sa daan, sa mga motorista'y nakakaistorbo
BINABASA MO ANG
Bigyan Mo ng Title ang Tula
AlteleMga tulang hinugot ng isang simpleng tao sa kanyang malikot na kaisipan kung saan pinagsama-sama ang tamis ng realidad, pait ng pantasya, at sampal ng kanyang mundong ginagalawan. Samahan pa ng kanyang mga kaunting karanasan, mga hugot, mga kabaliwa...