Depende sa tao
Kung lalaban pa kahit sobrang sakit na
Ng mga sugat na napapala
Sa pagpilit ng nadarama
Depende sa tao
Kung magpapatuloy pa
Sa kabila ng kritisismong binabato
At sinasaksak sa likuran niya
Depende sa tao
Kung isisigaw pa
Ang mga gumugulo sa kanyang kaisipan
Sa gitna ng nakabibinging katahimikan
Depende sa tao
Kung magbibingi-bingihan pa
Sa mga masasakit na katotohanang
Isinasambulat sa kanyang harapan
Depende sa tao
Kung magpapakamartir pa
Sa kabila ng mga panlolokong
Hindi na mabilang-bilang
At sa oras na ang tao
Maumpog sa katotohanan
Magsawa sa hinagpis na dinadala
Matauhan bigla
Eto ang asahan mo
At isaksak sa kokote mo
Ang taong paulit-ulit nang naloko
Hindi na muli magpapabilog ng ulo
At kapag nangyari iyon
Hindi na siya babalik
Hindi mo na siya makikita
Hindi mo na siya mahahabol
Dahil ang tao ay may isang sakit
Ang tao, sa una lang magaling
Malalaman lamang ang halaga ng isang bagay
Kapag ito'y nawala na sa kanyang paningin
BINABASA MO ANG
Bigyan Mo ng Title ang Tula
RandomMga tulang hinugot ng isang simpleng tao sa kanyang malikot na kaisipan kung saan pinagsama-sama ang tamis ng realidad, pait ng pantasya, at sampal ng kanyang mundong ginagalawan. Samahan pa ng kanyang mga kaunting karanasan, mga hugot, mga kabaliwa...