Araw ng Paggawa
Ng mga manggagawa
Kumakayod hanggang magdamagan
Walang tulugan kung kinakailangan
Umagang naging gabi, gabing naging umaga
Ugaling ating nakikita sa kanila tuwina
Mga bisig at binting pinatatag ng panahon
Para sa kinabukasan, sa kahirapan ay makabangon
Ngunit minsan nakakalungkot isipin
At kadalasa'y nakakainis na rin
Sa kabila ng pagod, pagbayad ng buwis,
Pag-alay ng serbisyo, perwisyo ang kapalit?
Uuwi rito sa Perlas ng Silanganan
Galing sa ibang bansa, trabaho'y sandaling nilisan
Makakapiling na ang pamilya, isasalubong sa kanya
Malaking abala, bagahe niya pala'y tinamnan ng bala
Dati naman, habang nagpapakapagod
Pinupuno ang kahon ng mga pasalubong
Laman ay sakripisyo at pagmamahal
Pagdating dito, 'di kaano-ano ang nagkalkal
Dito rin sa bansa, may mga bayani
Kapayapaan at proteksyon, pinapanatili
Kaya nga lang, mayroong problema
Mga gamit nila, luma't minsa'y may diperensya
Mayroon din tayong mga matatalinong tagapagturo
Tagalinang ng kaisipan, tagabuo ng pagkatao
Nakakabilib ang kanilang diskarte sa pagtuturo
Ang mga klase nila minsan, nasa ilalim ng puno
Nagtuturo pa rin kahit kulang ang mga libro
Ang kanilang mga mag-aaral, sa sahig nakaupo
Naging faculty pa ang kanilang banyo
Pero tuloy pa rin ang kanilang serbisyo
Ilan lang yan sa mga katotohanan
Ang ating bansa, kaliwa't kanan ang kulang
Sa kabila nito, tungkulin nila'y ginagampanan
Para sa pamilya, sa bansa, at sa kinabukasan
Ngunit sana 'wag nating abusuhin
Ang kanilang paglilingkod para sa atin
Respeto at karapatan, 'wag ipagkait
Simple lang naman 'yan, ibigay na nating kapalit
Ang araw na ito, ibigay na natin sa kanila
Makapagpahinga kahit pansamantala
Ang mga magulang mo, samahan mo muna
Ilibre mo sila kahit fishball lang sa plaza
BINABASA MO ANG
Bigyan Mo ng Title ang Tula
RandomMga tulang hinugot ng isang simpleng tao sa kanyang malikot na kaisipan kung saan pinagsama-sama ang tamis ng realidad, pait ng pantasya, at sampal ng kanyang mundong ginagalawan. Samahan pa ng kanyang mga kaunting karanasan, mga hugot, mga kabaliwa...