Mohabbaat key naam...

terwa bab

ghar ka darwaza khol kar wo charoon andar dakhil huwey ....do kamro par mushtamil wo ghar bara nahi to itna chota bhi nahi tha ...do logon ke rehne ke liye wo bilkul theek tha ...aj umar abeera ko apna ghar dikhane laya tha ...kuch haftoon me rukhsati thi...umar chahta tha ke wo apna ghar pehle se dekh le ...un ke sath saba aur noreen bhi aey they ...jab wo charoon mukhtasar sa ghar dekh chukay to saba ne kaha

" umar bhai ..aap ka ghar bilkul perfect hai ....." umar muskuraya ...

"nahi perfect to nahi ..lekin khair koi nai ...ap ki aapi ne aa kar is ko perfect bana hi dena hai .." abeera ne koi jawab nahi dia ...umar ko laga wo kuch na kuch zarur kahe gi .....lekin us ke chup rehne par us se sawal bhi nahi kiya ....ab umar ko kia pata tha ke wo kab se us ke bazu par lage jalne ke nishan ko dekh kar pata nahi kiya kiya soch rahi thi .....

" aab chalna chahiye umar bhai .ami ko fikar ho rahi hogi ..." saba ne kaha tha .....wapas jane ke liye umar taxi le kar aya to wo teeno pechey , jabkey umar aagay betha tha ...raste me umar taxi driver se pata nahi kiya kiya bol raha tha ...abeera ki nazar ab bhi us ke hath ke nishan par tiki huwi thi ....ghar aa kar wo jan boojh kar peche peche chalti rahi taa ke saba log chalein jaein ke use umar se baat karni thi ....

" tumhare hath ko kiya huwa hai ?" saba log andar jaa chukein theein ....so us ne umar se pucha ...

" choro yar ...wese jahan tak mujhe yaad parta hai tum " aap " bolti thi mujhe ." umar ne laa parwahi se kaha ...

" meri baat ka jawab do umar .." abeera ne us ki baat ko nazar andaZ kartey huwe kaha ..

" aisey nahi bataunga abeera  ...pehle tum kaho ...aap ke hath ko kiya huwa umar ...bataein na ...to phir bataonga ..." umar ne hanstey huwe kaha ....

" kiya huwa aapke  hath ko ..??" abeera ne jese hathiyar daal diye ...

umar zor se hansa .....phir hansta chala gaya ...

"itni hansi kyun aarahi hai ..? " abeera ne kaha ...

" kuch nahi ...bas yun hi ...acha to ..tum mere hath ka puch rahi thi ...kal apne liye coffee bantey huwe jal gaya ....lekin tum to aisey puch rahi ho jese pata nahi kiya ho gaya ho ...." umar ne hanstey huwe use dekha ....

" khud coffee bananey ki kiya zarurat thi .?" abeera ne sawal dagha 

" ab meri koi dosri biwi to hai nahi jis se kaam karata phiroon ..tum ho....zara sa intezar kar lo phir tum hi se karaunga ..." 

abeera ne pehle kuch ghuse se us ko dekha ..phir kuch kahe baghair chali gai ...

"aray ...kidhar ..ruko to ...mujhe ye to bata do apne kaam karne ke liye filhal dosri biwi  rakh lun ..??"umar ne kuch tez awaz me kaha....

" batameez " abeera ne dil me kaha 

          ................................................................

 ghar mehmano se bhara huwa tha .....abeera ko lag raha tha jese us ki zindagi mukammal ho gai ho ...wo kantoon ka aik lamba safar tey karne ke baad shan se us shakhs ke pehlu me bethi thi jo us se boht mohabbat karta tha ....surkh jora pehne abeera ke chehray par noor ka saya tha ..ankhoon me iss qadar haseen khuwab utar aye they ke un ki chamak se dekhne waloon ki ankhein chundiya jatein ...wo bhi aab uth kar dostoon ke sath jaa kar beith chuka tha ...sab us ko bar bar cheer rahe they ...wo bhi khud ko sukoon ke sab se unchey darje par mehsus kar raha tha ....rukhsati ka waqt aan puhoncha tha ...wo waqt jis ke liye wo dono  dukh ka dariya par kar aye they ....abeera ab apne ghar waloon ko khuda hafiz keh rahi thi ...aj ansu bhi taskeen de rahey the ...aj ankh ke paani me koi dukh nahi mila huwa tha ...wo dheere dheere us chotey se ghar ki taraf barh rahi thi jo ke abhi kuch hi haftoon pehle us ne dekha tha .....wo shehzadi apne shehzadey ke sang us chotey se mehal me dakhil ho chuki thi .

            ....................................................

barish dheere dheere tez ho rahi thi ...badal apas me jane kiya sargoshiyan kar rahey they ...usey umar ke aaney ka shidat se intezar tha ..pata nahi wo kahan reh gaya tha ..

"mujhe use phone karna chahiye " abeera ne socha ...lekin kuch deir bad darwaze par dastak huwi ...wo jaldi se gai aur darwaza khol diya ...

" kahan reh gae they haan ..fikar ho rahi thi mujhe .." umar ke salam ka jawab dene ke foran bad us ne ghuse se kaha ....umar andar aatey huwe muskuraya...abeera ne darawaza band kar dia .

"teen saal ho gae shadi ko abeera lekin majal hai jo tum zara bhi badli ho .. tum aj bhi .wesi ki wesi ho ..." umar ne jutay utartey huwe kaha ...abeera kar us ke barabar me beth gai ..

" acha kaisi hun mein aur kiya nahi badla ..?" abeera jese ab fursat se puch rahi thi ....wo iss waqt kaley frock mein malboos thi ...us ke reshmi baaal khule huwe they  aur bara sa dupatta senay par achi tarha phela rakha tha ...

" tum wesi hi ho ...masum si ..mera khayal rakhne wali ...baat baat pe ghusa honey wali..." umar ne muskuarate huwe us ka hath apne hath me liya ...us ke hath pe mehendi itni khoobsurat lagti thi ke koi had nahi ....abeera kuch bhi nahi boli bas umar ki tarha khud bhi apne mehendi lage hath ko dekhti rahi ke umar phir se goya huwa.

"tumhare hathon par mehendi achi lagti hai boht ...." abeera hansi...

" aap baat ko ghuma rahey he umar sahab ...mein to aap se puch rahi thi ke aap eid ki raat itni deir se kyun aey hein ...?" abeera ne muskurahat dabate huwe pucha ...wo use zara sa cherna chahti thi ...

" yar ab tumhe kiya batao ...esha parhne ke bad aik dost mil gaya masjid mein usi ke ghar pe tha .." umar ab relax ho kar betha chuka tha ....

" aur apni bichari ..masum si biwi ka khyal nahi aya aap ko ..ke wo ghar akeli bethi eid ki raat bhi bore ho rahi hogi ...?" abeera ne baqaida narazi ke tor par apne hath umar ke  hath se alag kiya ..

"aray ..ab itni bhi deir nahi huwi ..sirf 11 hi to bajh rahey hein ...tum haroon ko lo aur chalo ...mein tumhe bazar ke jata hun...kuch zarurat ki cheezain bhi le lena aur khaana bhi bahir hi kha lengay ..." umar ne apne bete ka naam letey huwe kaha ....

" nahi aap thakey huwe hein ...chorein jane dein ...ab haroon ko bhi uthaongi to neendh kharab hogi us ki ..." abeera ne muskurate huwe bare aram se mana kar diya.

shadi ke baad umar ne boht mehnat se apni parhai mukammal ki thi ..isi liye use boht achi job mil gai ...lekin wo ab bhi abeera ke sath usi chotey se ghar me rehta tha...kyun ke us ghar se un ki boht yadein jurein thein ...boht sath dia tha is ghar ne un ka ....haan albatta pesey ajane ke baad us ne ghar ko nae sere se sahi karwaya tha ...yun ke ab naya naya dekhia dene lagta ......bahir barish ka zoor barh chuka tha ..abeera aur umar coffee ka cup hath me liye aaj kai saal bad guzri zindagi ko soch rahe the....Allah imtehan me dale to mayus nahi hona chahiye ....wo to chahta hai ke hum sabar wale ban jaein tab hi humein zara si takleef de kar azmata hai aur agar hum sabar kar lein to wo humein sabirein me shamil farma deta hai aur quran me wazeh tor par saberen ko khushkhabri sunai gai hai ....jannat ki khushkhabri aur duniya me sukoon ki khushkhabri .....umar aab tak abeera ke mehendi lage hathoon ko dekh raha tha ...wo is baat se be khabar barastey motiyon ko apne ghar par barstey huwe dekh rahi thi ...wo khush thi ...boht khush ....

"abeera tumhara hath waqai me pyara lag raha hai yar ..."  umar ne abeera ka hath aik bar phir thaam liya  tha ...

"umar ap bhi na ...acha rukein ..mein aik minute me ai .." abeera ne us se apna hath churate huwe kaha ..jab wo wapas ai to us ke hath me chorian thi ..kaanch ki rang barangi choriyan ....

umar us ko aik aik kar ke choriyan pehenta dekhta raha ...un ki khanak raat ke iss peher bari khobsurat mehsoos hoti thi ....umar aik bar phir us ka hath thamm chuka tha ...moti abhi tak us ke ghar par baras rahey the......coffee ke cups khali ho chukay thay ...lekin un dono ki beshumar batein khatam hone ka naam hi nahi leti thein ....yahan tak ke subha ka noor har su pheel gaya .....

      THe End...

from ur writer : mein boht ziyada khush hun ke mein apni story complete kar pai ...plx apne comments se mujhe bataein ke aap ko ye akhri chapter kaisa laga....? aur jazak Allah un logo ko jo meri story par hamesha apne piyare comments karte rahe .......dedicated to all those people who supported my story ....jazakAllahu khairan kaseera ...:):):)