كبرياء رجل وامرأة

الحلقة الرابعة والثلاثون

مكرم:انا كنت عاوز اتكلم في حاجه

ادهم:اتفضل

مكرم:انا جاي وعاوز اطلب ايد منار وعارف انك لسه في العده انا مستعد نتخطب لحد ما العده ما تخلص وبعدها نتجوز

ممدوح اتعصب وكان هيقوم بس ادهم منعه من غير ما حد ما يلاحظ

منار:مكرم اخر حاجه كنت اتوقعها انك تطلبني للجواز يا بني احنا كبرنا

مكرم:ولو اخر لحظه في عمري هبقي عاوز اتجوزك بصي الحب ملوش سن ولا الجواز المهم الشخص المناسب وانا واثق من اختياري ولحد اخر لحظه هفضل متمسك بكلامي

منار كانت لسه هترد بس الموبيل رن

منار:الوقت اخدنا احنا لازم نكون في الحفلة دلوقتي معلش يا مكرم انا مضطره امشي ورانا شغل مهم جدا

منار طلعت تجري وركبت عربيتها والباقي طلع وراها وصلو الحفله ومنار وخالد طلعو علي اوضة المراقبه والباقي كان تحت في الحفلة

منار:في راجليين عند البار وفي واحده داخلة اوضة جوا

ادهم راح ناحية الراجلين وسارة مشيت ورا البنت

خالد:في واحد داخل جوا شوفو يا ممدوح

ممدوح مشي وراه والراجل لاحظ فخرج برا في البركينج وضربه وممدوح ضربه وفضلو كدا لحد ما ممدوح وقع غرقان في دمه ومنار كانت بتدور علي ممدوح لان الاتصال اتقطع وسارة مسكت البنت وهي بتحط القنبلة وقبضة عليها وادهم مسك الراجلين من غير شوشرة والراجل اللي ضرب ممدوح هرب وبعد ما ودوهم في عربية الترحيلات

منار:انا مش لا قيه ممدوح

ادهم:كان ماشي ورا الراجل ناحية البركينج

راحو علي هناك لاقوه واقع وغرقان في دمه ادهم وخالد خدوه وطلعو علي المستشفي ووراهم سارة ومنار وصلو وخدوه في الطوارئ وبعدها بفتره الدكتور خرج

ادهم:خير يا دكتور

الدكتور:هو عنده كسر في دراعه وشوية كدمات وهو نايم دلوقتي بس فين منار

منار:نعم يا دكتور

الدكتور:هو عمال ينادي علي اسمك من فضلك خليكي جمبه

مشي الدكتور

سارة:احنا مش هنبلغ ياسمين ولا يوسف

منار:دا اكيد انا مش ناقصه تيجي وتقعد تعيط

خالد:طب هنعمل ايه دلوقتي

منار:ادهم يخش يقعد معاه وياخد باله منه مش صحبك

ادهم:وانا مالي هو بيهلفط باسمي ولا اسمك

منار:اديك قولت بيهلفط فخش انت خد بالك منه

سارة:منار انتي مش عاوزة تقعدي معاه ليه

منار:باختصار كدا حتي لو مبقاش يهمني وعاملته كزميل عادي ممكن يترجمها غلط فانا مش هخش ولو علي جثتي