العسل المسموم ... طارق اللبيب

9

لو الزول بعلم الغيب كنت رجعت البيت .. لكن كلها اقدار مسطرة .. المهم انا واصلت طريقي.. ومشيت بيت مع ناس انور .. طبعا" انور لمن شافني اتفأجأ شديد .. وقال لي والله ماكنت متخيل انو الزول ده يصدق معاك .. يعني طلعك من السجن؟.. قلت ليهو والله طلع زول اصلي يا انور .. وبالعكس حقي من العملية خلاهو لي في حسابي في البنك ..
انور قال لي والله يا عارف.. انا خايف عليك .. اها الوالدة كيف والحصل شنو؟؟ حكيت ليهو .. لكن طبعا ماحكيت ليهو انو انا ناوي اواصل .. قلت ليهو انا ح اسافر.. عليك الله كلم الوالدة ماتقلق علي .. قوليها الزول ده سافر يكسب لقمة الحلال.. لو قالت ليك سافر وين؟؟ قول ليها .. ماكلمني بي مكانه ..
المهم يازول عديت ليلتي ديك مع انور .. والصباح فطرت معاهو فطور بدري.. وطلعت ..شلت دفتري .. ومشيت على البنك .. وصرفت القروش.. ومشيت لي عصمت في الدكان ..انتظرتو كالعادة .. وكنت شايل قريشاتي.. وبقلب فيهن كدا .. طبعا"اول مرة املك مبلغ زي ده .. وفرحان اني ح اخش في عملية تاني ..
والارباح تكون مضاعفة .. وضقت حلاوة القروش .. وجواي صوت الضمير ضعيف .. بقول لي (من اين لك هذا) .. اشتغلتها بي عرق جبينك؟ .. دي قروش ناس .. ده ظلم .. دي حرام ..) لكن كان صوت ضعيف.. وانا بي عنادي وقوة راسي والحقد والغضب الجواي .. مسحت ليك اي كلام زي ده من راسي .. وبقيت متحفز لي الشغلانة بي طريقة .. كاني مدفوع دفع ..
اها عصمت جاء من بعيد يتبسم .. قال لي والله ياعارف انت
زول راجل .. مافي زول بسلك بي السرعة دي .. لكن انت غلبت الوراك والقدامك .. وانت النجاح مكتوب فوق وشك .. ابشر.. يلا قوم .. عندنا شغلانة كدا تاريخية.. قول ان شاء الله ربنا يتمها .. دي بتريحك وبتريحني .. في واحد في سوبا عندو مبنى من طابقين.. لود بيري والبيت جاهز ومشطب .. مكيفاتو مركبة لو الزول داير يسكن الليلة دي يسكن وفيهو 4 دكاكين ..
والزول ده طامع في السعر شوية .. العقار مابفوت ليهو 150 مليون .. هو عايز فيهو 170 ..نحن نمشي نحاول نقنعة يدينا ليهو بي المية وستين .. بي شيك لمدة شهرين ..
قلت ليهو كيف يعني.. بيت بي طابقين بي 150 .. ياخي كتيرة..
قال لي البيت ناصية .. وفاتح في ظلطين .. تقاطع يعني اسثماري بنسبة 200 في المية .. قلتليهو .. لالا كان كدا معليش .. اها ياخوي مادام السعر ده قدر كدا .. التلاتة مليون بتاعتي دي داعيها شنو؟
قال لي نحن ح نديهو عشرين مليون كاش .. منك تلاتة ومني 17 لاني هسي ماعندي المبلغ كامل .. اها والباقي تكتبو ليهو انت شيكات.. رايك شنو؟ وتتوكل على الله وتضحي .. قلت ليهو يازول الله يجعل البركة ..
انا طبعا الدنيا كلها شايفها متغيرة.. والحتة مابتشبه زمان.. والشمس ذاتها مازي الشمش البعرفها انا .. يعني تغيير نفسياتي من جوة.. انعكس على الكون من حولي .. لاني بصراحة ماشي ارتكب جريمة.. ومـتاكد من انها حرام .. وماعندي فيها شك .. مع سبق الاصرار والترصد ..
والله انا القروش الشايلا معاي دي.. قلت نهائي ما ح اشتري منها حاجة ادخلها في بطني .. شفت التناقض ده كيف؟ الفطور .. فطرت مع انور وطلعت ..
وجماعتي ديل طبعا" (شلة عصمت الفي الدكان) كانو بتناقشو معاي.. انو الحكاية مافيها حاجة .. وسيد الحق بتنازل براهو .. لكن انا متأكد من جواي انها حرام .. ياخي الحلال بين والحرام بين .. وماداير ليهو اجتهاد كتير ..
ركبنا مشينا بيت ناس عصمت اول .. قال لي عندنا (عدة شغل) عايزين نشيلا من هنا ..لاحظ (عدة شغل).. اها دخلني جوة .. وطلع لي بدلة سوداء .. وجزمة سوداء.. والله تقول حقات وزير .. وقال لي خش استحمى والبس ديل .. والله انا لمن استحميت ولبست البدلة والجزمة وربط لي الكرفتة .. قلت انا وزير الخارجية .. واداني شنطة سمسنايت .. قال لي خت القريشات ديل جوة هنا .. وشيل الشنطة دي معاك ..
اها يازول ركبنا مشينا سوبا غرب .. شفنا البيت .. ومشينا ودخلنا فيهو غرفة غرفة .. بعداك طلعنا مشينا للراجل سيد البيت في سوق السلمة .. عندو مغالق هناك..
المهم .. قعدنا معاهو ..وقال انا البيت دي عايز ابيعو صح ..بس لو ماجاب السعر الانا طالبو فيهو ما ببيعو ..170 ولاتنقص تعريفة .. والراجل بتكلم ويعاين لي من فوق لي تحت .. وعرف انو انا شخصية ماساهلة ..
عصمت قال ليهو .. والله يا حاج السر انا لمن جيتك .. عارفك زول خير ومابتستحق الا الخير .. انا بعرفك شديد.. انت ماحصل ظلمت انسان ..عشان كدا ربنا بحبك ..وجاب الخير لغاية عندك .. الله يحفظك ياعمي السر ..ويحفظ ليك اولادك ..
اها ياعمي الزول المعاي ده.. زول صاحبي شديد .. وانت عارفني ما بصاحب لي زول الا يكون قمة في الشهامة الرجولة .. ومابجيب ليك زول يخذلني معاك ..
.. الزول ده يا عم السر اسمو عارف محمد الحسن .. يتخيلي كدا الاسم عرفتو .. صاح؟
الود ده مع انو صغير لكن طبعا تاجر كبير ..اها هسي مسافر الصين يجيب بضاعة ويجي .. وهو ما محتاج للبيت ..محتاج للكاش .. بقوم يشتري منك البيت بالسعر الانت عايزو.. ويبيعو في الايام الجاية دي .. او يرهنو للبنك .. ويمشي يجيب بضاعتو ويجي .. يديك حقك ..احتمال قبل المواعيد .. انت طبعا بتعرف ناس العبد بتاعين الملابس الجاهزة الفي السوق العربي ؟؟ ..قال ليهو ايوة ايوة بعرفهم معروفين ديل .. صاح انا من قبيل اقول الاسم ده سامعو وين ..؟ ..
قال ليهو بس ده ولدهم ذاتو.. والماسك الشغل كلو .. ومشكلتو انو خلص ليهو باخرة بتاعة صاحبو والكاش العندو خلص .. ديل ناس ملوك ومعرفتهم ساي مكسب ياحاج ..
الراجل يازول لمن سمع كلام عصمت لمن حيلو مات .. خلي عمك السر انا براي قربت اصدق كلام عصمت شدو مازول مجيد في الكذب والتمثيل .. اها عمك السر قبل علي انا وقال لي .. مافي مشكلة انتو ناس موثوق فيكم .. وانا عصمت ده بعرفو .. كان خاطب بت اخوي.. لكن اظنها قالتو ماعايزاك يابكرش .ههه ..
وقعدو يضحكو .. وجابو لينا الشاي .. والراجل المسكين صدق الخدعة.. واعتبر انو انا تاجر كبير .. وعصمت بتكلم بي كل جدية .. والله اصلو ماتقول بكضب .. المهم يازول من محلنا داك ومشينا على المحامي .. ووثقنا البيت بي شهادة بحثو .. وعقد البيع .. والوضع تمام مية في المية ..
قام عصمت قال ليهو ياحاج.. لو انت محتاج لي قروش.. نديك العشرين الفوق دي هسي .. ونكتب ليك ال150 ..
قال ليهو لالا مافي داعي المدة ماكبيرة .. عصمت قال ليهو والله ان شاء الله يسدد ليك قبل المواعيد
لانو بعد يجي من الصين بعد عشرة يوم .. تاني ماعندو مشكلة ..
المهم انا كتبت ليهو شيك كامل بي 170 مليون .. والله اول مرة تجيني خوفة من الكتابة .. وطلعنا وشلت التلاتة مليون بتاعتي واوراق البيت .. بس المرة دي ما بفارق عصمت .. ببراهو في ضنبو.. بس يمشي يمين معاهو يمشي شمال معاهو ..
عشان ذاتو اشوفو بتصرف كيف .. وبعدين اكون فاهم الشغلانة اكتر منو هو ذاته .. واعمل ليك عمايل في البلد دي .. تحير الشيطان ذاتو ..
معليش والله .. انا بحكي في الكلام ده هسي.. ومستحي من نفسي .. لكن ده الحصل .. بس لازم احيطك بي كل التفاصيل ..
المهم انا بقيت مع عصمت الليل والنهار .. غايتو الزول ده انا من الله خلقني ماشفت زول بي اجرامو وذكاهو .. والخطط البعملها .. والله انا بندهش منها .. سبحان الله .. بس تقول عندو شيطان بمليهو الحاجات دي .. لا بغلط ولابتعتع ولا بتلفت .. والله مستعد يقنع الجان بالكلام العايز يقولو ..
ولسانو حلو ينقط عسل بس .. وممكن ياكل راسك بي تلاتة كلمات بس ..
ركز معاي كويس في الوقت ده .. ناس امي وخالي . كانو بفتشو لي وماعارفين انا وين .. حتى ابوي قسمت فيهو مكنة انو انا برئ ومظلوم .. وطلعت من السجن براءة المكنة الفكتها امي .. وابوي قرر انو يلاقيني ويصافيني .. لكن مالاقيني .. ومشو لي انور في البيت .. وانور قال ليهم الزول ده سافر .. وماعارفو سافر وين .. لكن سبحان الله اصلا ما جاني منهم تلفون .. مع انو انا ضربت تلفون لابوي قبل كدا .. المفروض رقمي يكون معاهو .. ولا اتصلو على عصمت نهائيا .. او احتمال يكونوا اتصلو عليهو وقال ليهم ماعارف مكانه ..
وانا بي هنا ماجايب خبر للحاصل بي وراي في الوقت ده طبعا" الكلام ده كلو عرفتو في ما بعد وندمت حيث لاينفع الندم ..
المهم انا كنت فرحان فرح عجيب بالبيعة النجحت.. وبالعقار البساوي ميات الملايين وبقى ملكي ..
على كل حال وباختصار شديد .. بعنا العقار لي واحد من بحري شمبات وبالكاش .. بعناهو بي 160 .. يعني ماخسران معانا الا العشرة الفوق دي .. وبقينا شغالين بالقروش.. مافي داعي افصل ليك اشترينا شنو .. شي اسمنتي وشي سكر وشي بهائم وشراء وبيع سريع .. وبارباح مجزية .. وكلو بي تدبير عصمت الشيطان ..وسافرنا بورسودان 20 يوم واشترينا حاوية بتاعة ادوات بناء من بورسودان سيدا مقبوض في شيك وجبناها الخرطوم وووو
المهم القروش بقت كمية انت ماتتخيلا ..
وانا بقيت بتكلم بالملايين .. وفجأة كدا بدون اي مقدمات ..
مواعيد الشيك البي 170 مليون حلت .. والله تقول الشهرين ديل بقن اسبوعين من شدة ماجات سريع .. وحاج السر داك الفي السلمة مشى البنك .. ولقى حسابي فيهو 2 مليون .. والجن ركب راسو .. وبقى كايس لي وكايس لي عصمت .. وعصمت اتخلص من تلفونو .. وغاب من الساحة .. وانا اساسا ماكنت هامي بالموضوع.. لاني ضامن السجن .. ومستعد ليهو واشتقت لي ناس عبدالحميد وجماعتو .. وكنت حايم عادي بالسوق ماخايف ..
المشكلة انو عمك السر سيد العقار.. ولدو ضابط كبير في المباحث المركزية .. وجند ليهو تيم كامل .. عشان يقبضو علي .. وبالمعلومات عرفو بيتنا في الديوم .. والعساكر جو البيت .. وسألو مني وابوي كان بستفسر .. قال ليهم مالو عارف؟ ايوة ده ولدي .. قالو ليهو الزول ده مطلوب 170 مليون .. ومعانا امر قبض من المحكمة بي اسمو .. واليوم داك كان خالي التهامي واولادو في البيت لانهم كانو مسافرين تاني يوم .. وجو يودعوا ناس البيت .. وخالي سمع الكلام وامنية سمعت .. وكلهم شافو العساكر وقرو امر المحكمة القبض ..
الى اللقاء ..