العسل المسموم ... طارق اللبيب

17

الحاصل اني انا فهمت انو الله انتقم من جماعتي.. ماعارف لكن الشلة اخدت عقاب قاسي بالحادث ده .. لكن طبعا ابراصوم مابديني فرصة افهم كدا .. طوالي نط لي قال لي هوي .. القال ليك منو.. الحادث حصل ليهم انتقام من اكل الحرام ؟ هسي يعني اي حادث يحصل والناس يموتو او يتكسروا .. معناها طوالي ديل ناس ماكلين حرام ؟؟.. انت بتفهم كيف.. طيب لو فرضنا انو ده انتقام رباني من الحرام الاكلوهو .. عثمان بلة مالو ماحصلت ليهو حاجة.. يعني هو ماكل حلال مثلا".. موش الاهبل ده قال ليك عثمان بلة ماحصل ليهو اي حاجة .. خرشة ماجاتو ..اها نفهم شنو .. خليك عندك طايوق .. الناس دي كلها ماكلة حرام وعايشة .. وفي ناس من الله خلقهم ما اكلو حرام .. برضو بموتو بي حوادث وغيرا .. ووششش فات ..
طبعا انا صراحة كلامو ده شفتو منطقي .. والخوفة الجواي من الحرام خفت كتير.. بعد ماكنت متوقع انتقام .. لكن هو بيني وبينك في انتقام اكبر من الانا فيهو ده؟ ..
ده كلو وسوسه ..
وخالد ود خالة عصمت واقف معاي .. قال لي مالك سارح في شنو؟ قلت ليهو عصمت في ياتو مستشفى؟ قال لي في المستشفى الفلاني ماشي ليهو؟؟ امشي معاك؟ .. قلت ليهو والله لازم هسي الساعة خمسة .. ارح يمكن نلقى طريقة زيارة .. قال لي ارح وركبنا مشينا المستشفى المعنية .. حصلنا الزيارة في اخر وقتها قريب المغرب .. دخلنا جوة ولقيت عصمت .. لقيتو ليك حالتو تحنن والله .. قعدت معاهو بتونس معاهو كدا .. قال لي خالد عليك الله جيب لي شنو كدا ماعارف من بره .. يعني نظام عايز يوزعه .. وبقينا الاتنين انا وهو بس في الغرفة .. قلت ليهو انت زوغت مني وين ياعصمت ؟ قال لي انت ذاتك انا تاني مالميت فيك.. من موضوع الضابط المخستك داك .. هسي الكلام ده تم ليهو اكتر من سنتين .. قلت ليهو ايوة ..
قال لي والله حصلت علينا كوارث بس خليها بالنية .. انا طبعأ اتزوجت .. ومرتي جابت ولد ميت .وماتت بعد الولادة مباشرة .. واي زول يقول لي ده الحرام.. وانا بيني وبينك ماشغال بالمواضيع دي وشغال في شغلي ... وهسي لمن حصل لي الحادث ده مافي زول بقوم لي باعمالي واضمنو غيرك انت .. والله قبيل النهار بفكر فيك .. انت هسي طوالي .. جيت شفت الصدف دي ؟
يلا ياعارف هسي في شغل كارب كربة شديدة عندك مانع ؟؟
قلت ليهو ايوة عندي مانع .. انا تاني ماعايز اخش في حاجة زي دي نهائي.. وعايز اعيش بالحلال ان شاء الله اموت بالفلس .. الله يلعن ابو القروش لو بتجي بالطريقة دي ياخ .. انا جيتك زيارة بس .. بس عشان العشرة الكانت بينا وجيت اكفر ليك ..
قال لي عليك سيب الغلس حقك ده.. الداير كفارتك منو والداير زيارة منك منو ؟ لو ماعايز تساعدني وريني عرض اكتافك .. انا طوالي قمت .. وقلت ليهو ربنا يقومك بالسلامة فتك بي عافية ..
عصمت ده نوع الناس المابتوب ومابعتبر .. انا لو مت تاني ماباكل حرام الله يمرقني من الفات ..
بس انا طالع من عصمت كدا.. حسيت بي وجع ضهر مبالغة لامن قعدت في الارض منو .. وكهربا زي الماس يضرب من ضهري لامن يصل كرعيني تحت ..
طوالي اسمع ليك الجني في اضاني قال لي.. ده غضبي منك لانك رفضت المساعدة للراجل المسكين ده . انت زول كلب ومابتستحق الرحمة .. ارجع اشتغل مع الراجل احسن ليك..
قلت ليهو لو كتلتني مابرجع في كلامي .. والالم ماشي زايد وانا متغلب عليهو بالقوة ونزلت من الطابق الفيهو عصمت ونزلت مشيت الشارع.. لمن وصلت الشارع ماشايف قدامي .. لدرجة اني ندمت اني جيت لي عصمت عشان .. اقول ليهو كفارة عليك .. وانا ماشي في الشارع ومتالم الم ..والله لمن عيوني كبتن ..وبقيت ماشايف قدامي .. لكن جواي اصرار كبير.. بعد شوية قال لي .. انا ماشي عندي شغل في العريش .. لكن ماتفرح بجيك راجع سريع .. العريش دي مدينة في مصر شمال شرق سيناء ..
وفعلا فات واناحسيت بوجع الضهر فكاني .. بس والله لو كسرو انا تاني مابرجع .. كفاية ياخي كفاية ..
مشيت رجعت البيت واستغليت فرصة انو مافيش في العريش.. وصلت البيت بعد العشاء لقيت ابوي قاعد .. جيت قعدت ليهو قدامو في الارض.. وقلت ليهو ابوي انا اسف .. والله انا ماعارف نفسي مالي .. انا ماكويس انا محتاج لعلاج .. ابوي اعفى مني الله يخليك .. قال لي قوم على حيلك ياعارف .. قوم من الارض ..
قلت ليهو ابوي انا محتاج ليك .. ابوي انا تعبان .. وفجأة حسيت نفسي انا عايز ابكي وانقديت بالبكا . .. بس ابوي قام بي عطف الابوة ورفعني من الارض .. وقال لي خلاص العفو لله والرسول بطل البكاء يازول .. امي جات لقتي عيوني حمر من البكاء .. وابوي بتكلم معاي .. بقول لي .. مو عيب انو الانسان يغلط .. العيب الكعب انو الانسان يتمادى في الغلط ويكررو .. وهسي مافات شي ابعد من السكة الانت فيها دي ياعارف .. قلت ليهو والله بعدت يا ابوي .. بس انت ادعي لي محتاج لي دعواتك ..
بس بالليل جاني ليك ابراصوم .. وهايج زعلان يكورك في اضاني .. ياحيوان يامغفل .. انت مشيت اعتذرت ليهو.. الزول ده انت ماعارفو بقى يكرهك كيف ؟ وانا موش قلت ليك ما تعتذر ليهو.. قلت ليهو .. انا كنت متضايق.. انت موش عايزني انفذ ليك الكلام الانت عايزو .. متين ح تقول لي .. قال لي خلاص انا هسي ما ح انتقم منك.. بجيك يوم الاربع ياكلب .. وابقى راجل ماتنفذ الكلام البقولو ليك ..
وفات مني طوالي والغريبة ماعمل لي اي حاجة في الحكاية بتاعة اعتذاري لابوي دي.. ماعارف فهمو شنو؟ .. وقعدت يومين انا مرتاح منو راحة شديدة ..
وقروشي الفي البنك ديك مامشيت سحبت منها قرش خايف منها عديل .. بشيل مصاريفي من امي ..
اها يوم الاربعا بالمساء جاني ليك وشكلو زعلان وغاضب عضب شديد .. قال لي انا جيتك عشان تنفذ المهمة الاخيرة .. وبعد داك انا ماشي منك .. لاني زهجت منك .. ومن عباطاتك البتعمل فيها .. اسمعني كويس ..
والتنفيذ يكون بكرة طوالي .. قال لي هي خيارين بس .. الخيار الاول .. بكرة الصباح تمشي تشتري سم الفار من الصباح.. والمساء تشتري اتنين سندويتش بيرقر .. وتعمل فيهم سم الفار .. وتجي تدي واحد لابوك والتاني لامك .. عشان يكون البيت حقك ومن نصيبك .. لو عملت العملية دي انا بوعدك بي 300 مليون في اسبوع .. والبنات بنتصرف فيهم .. اها قلت شنو؟ ..
انا والله لمن سمعت الكلام ده.. حسيت بي كرعي ماتن.. وجسمي كلو انهار .. قلت ليهو قلت شنو؟؟؟ امي وابوي ؟؟ انت اكيد ماجادي ..والله مستحيل ..انااقسم بالله .. لو اموت.. مابعمل كدا ..
لكن اقول ليك حاجة.. بمشي بشتري السم وبشربو براي وانتحر وارتاح .. قال لي
احسن حاجة.. لانو البعملو فيك انا .. افضل منه انك تنتحر ..
قلت ليهو طيب ياابراصوم .. الخيار التاني شنو؟ قال لي في قرية اسمها كيت كيت .. شرق بحري .. وصفها لي وصف دقيق .. قالي تشيل رطل بتاع سم الفار وتمشي .. تلقى الصهريج بتاع الحلة واضح في طرف الحلة ... تمشي بالليل بعد الساعة واحدة وتطلع فيهو بالسلم .. وبتلقاهو فاتح من فوق ..كب السم فيهو .. وانزل بس ده الخيار التاني ..
تختار واحد في الاتنين ديل .. الخيار التالت تنتحر .. يا اما انا بعذبك عذاب السنين والله انت قايلا ملعبة .. تناديني وتستخدمني بالنجاسة وانا اخدمك وبعدين تعصى ؟؟ يلا قرر سريع ..
قلت ليهو والله ولا واحدة مابعملا .. قال لي جدا .. وسكت مني وبدا جسمي يسخن .. زي الزول العندو حمى .. والسخانة ماشة زايدة ..
والله زي الزول الرامينو في النار.. وقمت كبيت موية فوق جسمي .. والله الموية بتنزل من جسمي زي موية الشاي من السخانة مافاضل الا اكورك .. بس صابر .. عشان امي وابوي مايشعرو بالحاصل .. وبقيت امرق وادخل زي المجنون.. لغاية الصباح .. عيني ماغمضت ولا ارتحت ولاقعدت اظني طلعت الشارع وجيت خمسين مرة .. الصباح النار خفت من جسمي .. وسمعتو قال لي عندك فرصة تنفذ واحدة من الخيارين .. من هسي لغاية المساء .. وانا طبعا مستحيل اقتل امي وابوي .. ومستحيل اقتل لي حلة كاملة بالسم .. بس المساء ولعت النار في جسمي مرة تانية .. والمرة دي اشد من حقة امس .. والليل كلو انا لاهديت ولارقدت.. وقدرت اقعد .. والله حاجة اصلا لايمكن تتصورها او تتخيلا ..
واكتر شي النار بتولع في بطني .. وضهري ..فوق من صدري لغاية الصرة لغاية ما جسمي اتسلخ زي الزول الكابين فوقو موية سخنة لدرجة بقيت الفنيلة تألمني .. ومن الصباح الحاجة تخف .. وبالليل تستمر تاني .. وكل يوم بقول لي تنفذ المهمو ولا انا ح استمر معاك في العذاب ده سنين .. لابزهج ولا بمل ولا بحن عليك ..
غايتو بالنهار مرات بلقا لي ربع ساعة اغمض عيوني.. ويجيني ليك بالهلاويس واقوم مصدع صداع غريب .. والصداع بجيني بس بالنهار لو حاولت انوم .. ايام وليالي انا ماضقت النوم بعيوني .. الحمد لله .. فكرت امشي لاهل الله الصالحين .. امكن يفكوني من الحكاية دي .. مشيت لي كم زول.. وكان ابراصوم بتسهتر بيهم وبضحك عليهم .. وبقول لي عليك الله ماتضيع وقتك من الجهلة ديل .. وفعلا كل العلاجات والبخرات والمحايات ما فادت معاي شي.. ولا ودت ولاجابت..
اها في واحد صاحبي من جيرانا ..ابوهو عيان من زمان.. من نحن اطفال ..قالو عندو زي سحر كدا.. عملوهو ليهو في البلد ..عشان مشى يطالب بي حقو في الاراضي .. وسنين ما اتعالج ..
هسي قبل ايام لقيتو كويس.. وبتونس مع الناس طبيعي.. سألت الناس ..قلت ليهم .الزول ده العالجه منو؟ وصفوك انت لي ..
فانا جيتك وقررت احكي ليك الحكاية دي من اولها لي اخرها .. وهسي انا تعبان جدا .. ماتتخيل الحاصل علي .. انت شايفني طبيعي كدا .. لكن انا الحاصل علي يعلم بيهو رب العالمين
واكتر من مرة فكرت انو اشرب صبغة .. واموت ولا اقطع شراييني .. عشان ارتاح من العذاب الانا فيهو .. ودي كل قصتي وانا جاي وكلي امل اني القى الحل عندك .. اذا بتقدر تخلصني من الشيطان ده باذن الله ..
الى اللقاء ..