العسل المسموم ... طارق اللبيب

12

سبحان الله الحقد الشفتو فوق وش مودة.. كان شي مبالغ فيهو والله لمن خوفت منها .. لكن انور مع عمليتو الجبانة العملها معاي .. انا من جواي ماكنت لايمو ل.. انو هو معاهو الحق .. وحبو لي مودة .. ماكان راضي ليها الخدعة والظلم .. المطبقو فيها انا .. باختصار انا اصلا مالمتو بل اظهرت ليهو اني انا فعلا غلطان .. وندمان وكدا .. لانو بصراحة انور زول اصلي .. وانا ماعايز افقدو .. وانا في فترة وفي وضع .. محتاج فعلا زول يقيف معاي ..
اها لمن مودة زعلت وطلعت برة محل الانتظار .. انا مسكت انور قلت ليهو دقيقة ياحيوان .. عملتها ظاهرة يا غبي .. لكن انا مازعلان منك .. اسمع البيت ده راس مالي.. وحق تعب السجن .. وهو الشي الوحيد البطلعني من هنا .. عشان كدا انا ماعايز مودة تجيبو لي هنا ..
السجن كلو مباحث .. وممكن يضربو لي عثمان السر.. الضابط الفي بورسودان.. ويجي يعمل دلالة في البيت.. ويجبرني على البيع بابخس الاسعار ..تحت الضغط والتعذيب .. المهم ماعارف البحصل .. لكن انا ماعايز قصة البيت تتعرف .. لاي بشر ولاحتى ناس بيتنا .. عليك الله يا انور لو بتعزني .. قال لي جدا .. مع اني عارف اني ح اساعدك في الباطل .. لكن ده مصير اي انسان يصاحب ليهو زول طماع وجشع .. ومابخاف من ربنا .. يحصل ليهو زي البيحصل علي انا ده .. لكن يا عارف يوم الايام.. لمن ينزل عليك الانتقام الرباني.. بتذكر كلامي ده .. قلت ليهو ياخي البسويها الله مافي زول بردها .. والقسمة حبابا .. المهم انت بتساعدني ولا بتخذلني اشوف غيرك .. قال لي بساعدك .. قلت ليهو استلم الاوراق من مودة .. ودسها عندك وتعال في اي يوم ..اوريك تعمل شنو .. وياخوي مودة سعيدة وبخيتة عليك ..
انور عاين لي كدا .. وهو طالع.. وقال لي اشهد بالله انك زول حقير .. انا اتبسمت وهو فات .. المهم اظنو بعداك مشى قال لي مودة تديني الورق .. ومودة اتصلت علي.. قالت لي انت قلت لي انور يستلم الورق مني ؟..
قلت ليها ايوة يامودة اديهو ليهو .. وعليك الله يامودة ..سامحيني والله كل الحاصل ده غصبا" عني .. وانا بعمل في شنو ذاتو ماواعي لي نفسي ..
قالت لي اسامحك ؟؟ بالجد مابقدر اسامحك .. ولو ربنا ما انتقم لي فيك.. بنتقم فيك براي .. قلت ليها يابت.. استغفري الله العظيم .. وما تتابعي الشيطان .. قالت لي الشيطان انا كنت متابعاهو سنتين .. قلت ليها خلاص.. بس ادي الورق لي ..
اها يازول اتصل علي انور.. وقال لي الورق معاي.. انت عايزني اعمل فيهو شنو ؟؟
قلت ليهو انت بس اعرض البيت ده للبيع .. وشوفو بجيب كم.. وفعلا عرض البيت والبيت جاب 230 .. يعني زايد من المطلوب مني. 60 مليون .. هي مابطالة معاي .. لكن كونها تكون ثمن سجني سنتين .. والله بسيطة ..
قلت ليهو يازول بس خلي الزبون يديك عربون.. بي وصل.. وانا بحاول اطلع اتم اجراءات البيع.. وادي عمك السر قروشو .. واتخارج من السجن.. واعمل لي اي مشروع .. اتعيش منو .. كفاية بهدلة وكلام فاضي .. وفعلا" بي اختصار .. اتواصلت مع عمي السر.. انو القروش جاهزة .. واخدو لي اذن من المحكمة .. وطلعت معاي عسكري .. ظبطت ليهو امورو .. ومشيت بعت البيت وسلمت المية وسبعين للمحكمة.. وجا السر استلمها ..
عم السر لمن استلم قروشو .. قال لي فعلا القروش رجعت .. لكن .. انت عارفها نقصت قدر كيف؟.. اكيد ماعارفها .. انا بس شكيتك على الله .. في العملتو فيني ..
المهم ..انا ماشغال بيهو كتير .. سلمتو حقو وارتحت من القصة ... وتاني السجن ده لو بقى قبلة مابمشي عليهو .. يوم مطلعني من السجن الجماعة عملو لي احتفال وداع بالشاي والكيك ..
والله في السجن حتى العساكر والضباط صاحبوني .. ويوم الفراق ده كان يوم ماتتخيلو .. المهم مرقت .. واتنسمت عبير الحرية .. ومعاي 60 مليون .. و بقيت شايل قروشي في صديري بتاع بدلة داخلي .. طبعا .. .. ومتردد امشي اوردهن في البنك ولالا .. و وفي النهاية مشيت وردتهن في البنك .. اها طيلة الايام دي مامشيت بيتنا
ولا فكرت ارجع نهائي .. والسبب ابوي ابوي كارهني ومكرهني السودان ذاتو ..
ومرتدد كتير بين ضيقي من ابوي وبين شوقي لامي ..
ودي حالة حصلت علي بعد طلعت من السجن عندي تردد في التصرفات وارتباك في القرارات غريب .. وماسكني صداع نصفي ليهو اكتر من 8 شهور في السجن مافكاني .. المهم انا لمن طلعت من السجن .. كان عندي حاجة معينة في راسي عايز اعملا .. عايز اسافر مصر اجيب لي بضاعة .. واجي راجع ااسس لي شغل هنا بالحلال ..
لكن اول حاجة لازم اجر بيت .. اقعد فيهو الفترة دي .. واسأل من اكتر بضاعة مطلوبة في السوق عشان اجيبها من مصر .. لانو قالو التجارة من مصر دي مربحة بشكل لايتصور .. وانا للضمان كمان ممكن اتفق مع تجار عديل في الموضوع ده .. وفعلا ده كلو حصل في ظرف اسبوع بعد الطلوع من السجن .. اجرت البيت .. ومشيت صاحبت التجار .. واحدين في سوق ليبا واحدين في سوق امدرمان واحدين في سعد قشرة المهم .. عرفت انو في حاجات الزول بشيلا منها يوديها مصر وفي حاجات بتجيبها من هناك عشان المسألة تكون مربحة وذات جدوى ...
بعد التردد في انيت امشي بيتنا ولا ما امشي .. اخيرا فكرت .. قلت بم انو امي ماعارفاني طلعت من السجن .. انا اتخوفت انو تمشي السجن وماتلقاني .. ولمن يقولو ليها طلع تفكر ..اني انا طفشت تاني وتزعل.. اني ماجيتها ولا سلمت عليها وماكلمتها بالافراج .. وفي الحقيقة انا مشتاق ليها وماعايز ابوي يعرف اني جيت البيت نهائي ..وماعندي رغبة الاقيهو .. اها اعمل شنو؟
بعد تردد كتير قررت امشي البيت .. ومشيت البيت وسلمت على الوالدة وعاهدتها عهد اني تاني ما ح اعمل اي عملية تدخلني السجن وخلاص تبت الحمد لله .. وماكلمتها انو عندي قروش وكدا .. وقالت لي انتظر ابوك سلم عليهو وبشره .. قلت لالا ماح يصدقني
لازم اثبت ليهو بالفعل .. وعرفت انو امي اشترت تلفون .. واخدت الرقم منها .. وقلت ليها انا ح اكون متواصل معاك واطمنك على حالي في كل مرة ..
سبحان الله الام دي حاجة براها .. قدر ما انت تبقى كعب لايمكن امك تكرهك وتنفضك .. غايتو عشان كدا قال ثم من قال امك تلات مرات .. يعني امي اصلا ماعادتني وهي الوحيدة الحسيت انها ماجواها علي الا الخير .. شلت منها رقم التلفون وطلعت .. اها يازول طبعا" أجرت لي بيت قريب لبيتي الزمان داك في الشجرة .. وبديت اعمل في اجراءات سفر لي مصر..
وطلعت الجواز وعملت التاشيرة .. وسحبت قروش من البنك .. جزء من القروش .. يمكن نصها او اكتر شوية .. ومجهز للسفر تمام .. وح اسافر قريب ان شاء الله ..
طيب بالنسبة لانور .. عايش قصة حب.. اغرب من الخيال من مودة .. ومودة طبعا واقفت ليهو على الارتباط .. في الاول كانت موافقة مكاواة وانتقام .. علي انا ..
لكن تاني حبتو بالجد .. وبقت متمسكة بيهو .. وانا قاعد الاقيهو بس ماكتير .. وبقيت مابحكي ليهو حاجاتي الخاصة .. من يوم الخوازيق العملها لي معاها في السجن ديك ..
الزول الانا مسافر معاهو مصر اسمو منتصر .. كان زمان صاحبنا انا وانور .. لكن حصل بينو وبين انور سوء تفاهم .. واتقاطعو سنين ..
المهم يازول سحبت قروشي من البنك وحولتها دولار ..وقطعت التذكرة وسافرت القاهرة بالطائرة .. وامي وابوي والدنيا كلها ماعارفة انا وين ..
لمن وصلت مصر .. لقيت نفسي انا في دنيا تانية خالص.. ماليها اي علاقة بالواقع الانا عايشو في السودان .. الدنيا دي زحمة والناس دي يحوصو زي النمل ولغاية الساعة 4 صباحا تلقى السوق ده منور.. والدكاكين فاتحة .. والزحمة بتاعة الناس .. الناس ديل مابنومو كلو كلو ولاشنو؟..
منتصر مفتكر انو انا مفلس .. وعايز يتخارج مني باي طريقة .. قال لي انا عندي ناس اختي هنا.. ماشي ليهم.. كنت بسوقك معاي لكن بيتهم ضيق .. احسن حاجة نشوف شقة رخيصة نأجرها وتقعد فيها انت .. وانا بمشي وبجيك .. طبعا هناك الشقق المفروشة باليوم .. مشينا عين شمس واجرنا شقة .. كانت في الطابق التاني .. وانا قعدت في الشقة دي بس اليوم الاول الجيت من السفر .. من تاني يوم الصباح .. طلعت على البلد وبقيت بتحاوم وكلما القى لي سوداني امشي عليهو اسلم عليهو واتعرف بيهو ... وفي واحدين بلقاهم يشبهو السودانيين لكن هم مصريين .. المهم حاولت اصاحب لي كم نفر كدا عشان يعرفوني بالبلد .. بس للاسف اي سوداني لقيتو هناك حاول يزوغ مني .. وطبعا منتصر تاني ماجاني نهائي وانا من الاول حسيت انو زايغ مني .. المهم يازول اتعرفت بي واحد اسمو محمد عصام من اولاد بري الدرايسة .. وده الزول الوحيد اللقيتو اصلي وود حلال ولو ماهو انا كنت احتمال اجي راجع ..
يوم اتصلت علي امي .. وريتها انا في مصر .. وطمنتها ,,قامت حكت لي كلام اغرب من الخيال ..عن مودة ..مودة بالرغم من انها لقت الزول البحبها ويبادلها الحب ..
بس كانت حاقدة على .. ونفسها تنتقم مني باي طريقة ..
مشت لامي في البيت ..وقالت ليها انا صديقة امنية التهامي ..وعايزة اتصل عليها ..وماعارفة ليها رقم ..وامنية كلمتني قالت لي أسالي عمتي ..
امي قالت ليها .. دقيقة اجيب ليك التلفون تطلعي رقمها .. انا التلفونات دي مابعرفها والتلفون مشترياهو قريب ..
مودة شالت الرقم من امي .. اها يازول انا لمن امي كلمتني بالكلام ده .. قلت ليها لو امنية اتصلت عليك وسألتك مني اديها رقمي ده عشان اشوفها اتصلت عليها لشنو؟ ..
وفعلا امي ادت امنية رقمي الفي مصر .. وامنية اتصلت علي انا في مصر .. وكلمتني .. قالت لي .. اتصلت علي واحدة اسمها مودة .. وقالت لي..
انا اسمي مودة .. وكان عندي علاقة غرامية مع عارف .. وعرفت انو بلعب علينا .. نحن الاتنين.. انا وانتي يا امنية .. بس انا كشفتو .. ولقيتو زول حرامي وكذاب .. وانا ممكن اثبت ليك .. الزول اكل ليهو قروش من زول تاجر كبير اسمو السر .. واشتري بيها بيت .. ودخل السجن .. وبعد اسعار البيوت ارتفعت .. طلع باع البيت .. ودفع للزول قروشو .. وبقى يتاجر بي باقي القروش الحرام .. ..الكلام صحي ياعارف؟ ..
الى اللقاء ..