العسل المسموم ... طارق اللبيب

14

الحقيقة انا كنت ملاوز من حكاية الشيوخ دي وماحصل في حياتي اتجهت للاتجاه ده لكن كنت مضطر وقالو الرايحلو شي بفتح خشم البقرة .. وانتظرت يوم الاحد ده بي فرق الصبر.. وكل يوم حالتي ماشة متدهورة .. ومخاوف وضربة قلب وعدم نوم .. لكن والله كنت صابر على شي اصلك ماتتصورو .. بس الحمد لله .. المهم يوم الاحد ركبنا مشينا المعادي .. والروحاني ده كان في عمارة في الطابق الارضي .. وكت دخلنا كان في كمية من البشر.. والروحاني عندو غرفة بدخلو ليهو الناس نفر نفر ..قلت ليهو يا محمد هسي الزول ده لو طلب مننا قروش كتيرة ؟ محمد قال لي ماتشيل هم انا معاي قروش ..
انا طبعا القروش المعاي خلاص بقت على اقل ماتتصور ..
يازول نحن قاعدين منتظرين من الساعة 9 صباح.. دخلنا ليهو قريب صلاة الظهر .. لقينا ليك زول كبير .. ولابس ليهو عباية ازهرية ونظارات ولابس طرطور زي حق الكاوبوي .. وحالق دقنو وشنبو نضييف .. يشبه حسني مبارك .. وعندو صره اول من شافنا .. قال هلا هلا بالسودنيين حبايبي وابناء عمومتي.. خشي خشي ي بن النيل .. المهم قعدنا قال هااا ايه معاكو .. قلت ليهو انا يامولانا تعبان شديد .. الحاصل كيت كيت.. وحكيت ليهو الحادث والقروش الاتفقدت والهلوسة والخيالات .. الحصلت علي ..قال لي بس انت شكلك بحب الفلوش ياباشا.. ونفسك تكون سعاتي البيه .. صح؟ قلت ليهو والله دي حقيقة .. الزول ده عرف الموضوع ده من وين؟.. والله من اول دقيقة خوفني .. وجواي بقول لايعلم الغيب الا الله .. ده زول بتاع تخمينات ساي .. وبقرا الشخصيات صح .. انا صاح زول صايع.. لكن مابشك في عقيدتي .. انا قعد افكر في الكلام ده قام قال لي ياسيدي مافرقت كان قريت شخصيتك.. ولا كان كشفت الغيب .. صراحة انا قلبي داير يطير من مكانه .. الله اكبر عليك .. ده والله فعلا عندو شياطين .. قام فاجأني بي كلمة تاني . قال لي ..وبرضو ممكن يكونو روحانيين ماشرط شياطين يعني .. يعني باختصار انا بتكلم بي قلبي.. والزول ده برد على علني .. والله زعزع مبادئي وجهجه افكاري ..
قلت ليهو الله يرضى عليك يامولانا العفو منك .. وتانيا حاول عالجني .. قال لي انا ح اديك شغلانة تريحك للاخر .. انا ح احول ليك الهلوسة ديا .. لي موضوع يفيدك رايك ايه بأااا ؟؟؟
قلت ليهو والله ياريت.. قال انت دي الوقت عايز حجتين .. واحدة عايز تتخلص من الهلوسة .. 2 عايز فلوس صح؟
قلت لهو صح .. قال انت بتصلي ولا مابتصليش؟ قلت ليهو والله مرة مرة ..يعني بقطعها مامواظب عليها .. قال لي ولايهمك كدا كويس معانا يلا .. شرطي الاول والاخير.. تنفذ اللي بقولك عليهو وماتسأل ..
والله وكت قال لي كدي ذكرني عصمت .. نفس العبارة الكان بقولها لي عصمت .. قلت ليهو جدا بنفذ اي شي من دون ما اقول .. بس انا مابتضرر؟ قال لي معاذ الله.. لاسمح الله يابني ..
خش عل الاوضة اللي قدامك ديا.. وانت يا حبيبي انتظر برا .. قام محمد طلع .. وانا دخلت.. وهو دخل وراي ..على الاوضة وخت لي صحن كبير كدا.. بتاع قزاز .. قال لي بول في البتاع ده .. قلت ليهو ليه؟ ..
قال لي بول وبس.. من دون كلام .. وطلع.. انا بولت في الصحن .. وبقيت قاعد بعاين لي بولي زي الاهبل .. دخل علي قال لي اتوضأ بالبول ده زي وضوء الصلاة بالضبط .. قلت ليهو قلت شنو؟ كدا حرام .. قال لي انت عاوز الشيطان يفرط روحك ولا ايه؟
اعمل البقولك عليه .. قلت ليهو مابقدر بقرف .. قال لي ..هو بولك ياعم .. يلا يلا خلصنا يابيه ..
انا طبعا متضايق ومضطر اعمل اي حاجة .. اتوكلتا على الله واتوضيت بي البول تصدق.. والله انا لمن خجلان من نفسي .. بس الكارثة ماهنا .. الكارثة قال لي.. يلا بعد كدا أوم صلي ركعتين حلوين كدا .. وسمعني الصلاة على النبي .. اعوذ بالله .. كيف يعني يامولانا اصلي بوضو نجس ؟؟..
قال لي موش حرام .. انت بس اعملا على مسؤليتي .. وبعدين حتشكرني .. وطلع خلاني في الاوضة .. وبرضو عملت كدا للاسف .. ووقفن على القبلة اول ماكبرت وبديت اقرا .. ظهر ت الخيالات في الغرفة الفيها الضوء الخافت دي..
والخيالات جابت اصوات المرة ..
اصوات غابة وخرير موية واصوات قمري وصوت قطر وحاجات كدا ما اقدر اوصفها ليك .والله رعب غريب .. انا ماقدرت اتم الصلاة من الخوف .. فجأة كدا الصور كلها اختفت وظهر لي زول في الحيطة اسود وشكله غريب ومخيف ..قاعد في كرسي ورابط راسو بي قطعة حمراء وقال لي .. مافيش تاني خيالات انا بس .. غسل وشك بالمية واطلع خلاص انتهينا .. وتاني معاك انا وبس .. قلت ليهو انت منو ؟قال لي انا بكلمك فيما بعد .. فجأة اتلاشى والحيطة بقت فاضية ولاول مرة اعاين في الحيطة ما القى فيها شي نهائي ..
والخوف من جواي راح تماما .. وحسيت انو انا طبيعي مية في المية .. لكن جواي في احساس بتاع حزن غريب .. ماعرفت مصدره ..
حزن بي طريقة غريبة اقرب ابكي .. وحسيت انو انا عمري قرب وخلاص اجلي جاء .. بس السبب بتاع الاحساس ده شنو؟؟ انا ماعارفو..
المهم طلعت وقلت لي للروحاني .. اها ياشيخنا المطلوب مني شنو؟
قال لي ايه يعني فلوس؟ قلت ليهو ايوة ..
ضحك.. وقال لي انت لو عاوز انا بديك .. انا موش محتاج فلوس .. انا عندي في الشارع ده 4 بنايات طوابق .. امشي امشي يابني الله يسهل عليك .. انا طبعا ماصدقت ..
وطلعت سقت محمد واتخارجنا .. وماحكيت شي من العملتو والشفتو جوة الغرفة لي محمد عصام .. لانو اي زول احكي ليهو ح يقول لي ده كفر .. وانا بيني وبين نفسي عارف نفسي كفرت.. ياخي اصلي بي وضوء بتاع نجاسة في شر اكتر من كده؟ .. لكن ماكنت عارف النتيجة بتاعة فعلتي دي في الوكت داك ..
اها يازول مشيت البيت .. وانا طبيعي جدا جدا ونشيط.. وماعندي اي مشكلة .. والعندي كلها راحت .. بس المالي راسي الزول الظهر لي في الحيطة ومشى تاني ماظهر لي الا يوم الاربعاء ..
يعني من الاحد .. الاتنين والتلاتا مافي اي شي .. يوم الاربعاء زي الساعة 11 وانا قاعد في الشقة براي .. محمد كان في الشغل .. ومهند برضو مشى الشغل .. والاولاد الاتنين التانين في الجامعات انا راقد في السرير .. فجأة ظهر نفس الشخصية بي نفس الهيئة في الحيطة .. وقال لي الليلة اليوم الاول في الشغل يا معلم انت جاهز ؟ قلت ليهو جاهز لشنو؟ .. قال لي انت موش عاوز فلوس ولا ايه؟؟ .. قلت ليهو ايوة عاوز .. بس انت اسمك مين؟ .. قال لي انا اسمي (ابراصوم) من الجن .. مايهمك كتير .. بس انت بعدين بعد المغرب تمشي النادي الفلاني .. اوعك تتأخر.. لانك لو اتاخرت انا بنتقم من ابوك فاهم؟ .. قلت ليهو جدا مابتاخر بجي .. قال لي نتلاقى هناك انا وانت .. لمن جا محمد سألتو قلت ليهو يامحمد في نادي اسمو كيت كيت .. وين مكانه بالضبط ؟ .. قال لي ده نادي بتاع قمار.. عايز بيهو شنو؟ قلت ليهو انا لازم امشي ليهو .. قال لي بس انا مابمشي معاك ..
قلت ليهو ماتمشي .. بمشي براي بس وصلي وتعال .. قال لي واضح بوصف ليك .. المهم وصف لي وانا المغرب طلعت مشيت على النادي .. ولقيت الناس دي شغالة قمار .. بي طرق مختلفة .. ناس بالليدو .. وناس بالضمنا وناس بالبكرة .. وناس بالكوشتينة .. بس طق ظهر لي (ابراصوم) في الحيطة بتاعة النادي . قال لي سامعني ياعارف؟.. قلت ليهو سامعك .. قال لي انا حأغيب واتكلم معاك في اضانك .. قلت ليهو جدا مافي مشكلة .. وسبحان الله انا اصلا ماخوفت منو الشي ده .. تاني بقيت اسمع ليك صوتو قريب لي اضاني ..بتكلم معاي كلام واضح ومسموع .. قال لي امشي للطاولة نمرة 3 فيها اللعبة الانت بتعرف ليها .. واللعبة كانت كوشتينة .. وانا بعرفها فعلا" .. قال لي احجز قيمك .. وحجزت .. ولمن نزلت في اللعبة .. كان في واحد خرت الناس ديل جت ولمه قروش بي الهبل ..
ابراصوم في اضاني قال لي العب معا العلق ده .. انا نزلت العب .. والوسوسة في اضاني يتكلم معاي .. ارمي الكرت الفلاني .. ماترمي ده ارمي ده .. وانا طبعا بنفذ .. واي كرت ارميهو يكسب .. هو طبعا" كاشف ورق الناس كلها ..
ولميت القروش من الزول كلها .. واي زول ينزل يلعب معاي بخرتو بالطريقة دي .. والناس البلعبو معاي كلهم ارتبكو .. وبقو يلعبو غلط.. ويخسرو وانا شغال بكسب .. والله اليوم داك لميت قروش اصلا ماتتيخيلا قدر كيف ..وكنت مستعد اواصل.. لكن الوقت اتاخر.. وكل الناس المعاي قروشهم خلصت ..
قام وسوس لي قال لي امشي جيب عسكريين من برة ..يوصلوك البيت ..وقول ليهم بدفع ليكم .. وفعلا لميت قروشي في اكياس .. مشيت جبت لي عساكر اتنين لقيتهم قاعدين قدام باب النادي ..
وناس النادي ديل كلهم بعاينو لي بي اندهاش غريب .. سقت معاي العساكر .. واديتهم ليك قروش قدر مرتباتهم شهرين .. وصلوني الشقة.. انا شايل قروش كمية اول مرة اشوفها .. تقول لي قروش عمك السر ؟؟ والله محمد عصام ده لمن اتخلع .. تلات اكياس كبار مليانة قروش بس.. والله زي مابحكي ليك ..
المهم يازول بالليل محمد عصام بقى يتكلم معاي قال لي ياعارف انت لعبت قمار؟ قلت ليهو ايوة .. قال لي كيف كسبت وقدرت تخرت المصريين ديل بالطريقة دي ؟؟ ياخي المصريين ديل شياطين في القمار ده .. قلت ليهو اهو الحصل .. قال ياعارف والله انا بس مابقدر اتعايش معاك.. وانت معاك القروش الحرام دي .. فيا اما تشوف ليك شقة تاني غيري .. يا اما انا بسيب ليك الشقة وامشي انا واخواني نأجر شقة تانية ..
قلت ليهو الصباح بقوم اشوف لي شقة بس استحملني الليلة .. انا والله بالخلعة بالقروش دي ابيع ليك ابوي ذاتو .. خلي محمد عصام ..
باكر من الصباح طلعت اشتريت شنطة كبيرة.. وختيت فيها قروشي
وطلعت مشيت اجرت شقة في اقل من نص ساعة ..
طوالي ابراصوم .. داك قال لي امشي افتح حساب في البنك.. ومشيت فتحت حساب باسمي عديل في البنك .. قال لي مافي حاجة اسمها مسافر السودان.. انت حتكون رجل اعمال في البلد دي .. والله انا ماعارف انا بحلم ولاحقيقة ..
الى اللقاء